Momvhura 2012 vasimaguli kwa gwene yintau yosipako serova sonomvhura 3 000. Awo kwa tetukire unene. Morwasinke? Morwa nonkango edi va tjenge posipako oso.

Apa vasimaguli va tulire kumwe yintau yaso, awo va vhulire kuresa nonkango edi va tjenge Vakanani posipako oso. Ado kwa tente asi: “Esibali Ben [munwa] Beda.” Esi yiso sikando sokuhova vasimaguli va gwana edina eli posipako sanare.

Muntu gumwe gedina Esibali kwa mu tumbura moBibeli. Age kwa kere gumwe govana vahompa Sauru. (1 Hist. 8:33; 9:39) Munekuto Josef Garfinke gumwe govasimaguli ava va gwene sipako oso kwa tente asi: “Ayo kutetukisa pokudiva edina Esibali asi kwa moneka moBibeli ntani posipako sanare, nayinye kwa horokere posiruwo sepangero lyaNdafita.” Esi kuna kara sihonena sina kulikida omu yitundwamo yovasimaguli ayi kwatesa ko Bibeli.

MoBibeli munwaSauru Esibali kumutumbura asi Isiboseti. (2 Sam. 2:8-10) Morwasinke? Vasimaguli kwa faturura asi ogu ga tjenge buke zaSamwere gwauvali kapi ga here kuruganesa Esibali morwa kwa diworokesere Vaisraeli kuhamena Bara, karunga gomvhura ogu nga va karere Vakanani. Nye mobuke zomovaHistoli wokuhova kwa tumbura mo edina Esibali.