1. Morwasinke muntu ava mu pere mfumwa ntani epuro musinke natu ka zogera?

KUPA muntu mfumwa kutanta asi kumufumadeka. Ose kupa muntu mfumwa morwa yininke eyi ga rugana ndi situmbukira esi ga kara naso. Kuvhura tu lipure asi: Wolye twa hepa kupa mfumwa ntani morwasinke va fira kugwana mfumwa ozo?

2, 3. (a) Morwasinke Jehova ga fira nawa-nawa kumupa mfumwa? (Tara efano.) (b) Yilye Nzwigona va tumbura mEhororo 5:13, ntani morwasinke ga fira kumupa mfumwa?

² Ehororo 5:13 kwa uyunga asi: “Ogu ana hingire kosipundi souhompa noNzwigona,” va fira kuvapa mfumwa. Megaununo 4 mobuke zoozo kwa gava mo konda zimwe eyi Jehova ga fira kumupa mfumwa. Yisitwa yemeguru kwa zigilire va hamberere Jehova “ogu ga kara nomwenyo narunye nanarunye.” Awo kwa tente asi: “Ove Hompa Karunga gwetu, uyerere nefumano nononkondo yoge, yeeyi nyove wa sita nayinye, ano mpango zoge yizo za pakesa po nayinye, yi pwe kusita.”—Ehor. 4:9-11.

 ³ Nzwigona kuna kara Jesus Kristusa “Nzwigona zaKarunga ezi azi gusa po nonzo douzuni.” (Joh. 1:29) Bibeli kututantera asi age ga pitakana vagara navenye ava va kere vahompa ndi ava vana kara ngesi vahompa ndi vapangeli. Azo kwa faturura asi: “Age mupangeli govapangeli, age hena Hompa gohompa,” ntani “nomfa kutupu hena nonkondo dokumupangera.” (Ehor. 17:14; Rom. 6:9) Kweli ko hompa gumwe ogu ga ligava mwene atu zowore kononzo ndi? Ove nampo kuvhura o kwatese ko nonkango edi ya uyungire yisitwa yemeguru asi: “Nzwigona ezi va dipaga za fira kugwana epangero nougawo nounongo nononkondo nefumano nouyerere nehamberero!”—Ehor. 5:12.

4. Morwasinke ya karera hepero zonene kupa mfumwa Jehova naJesus?

⁴ Ayo hepero unene kupa mfumwa Jehova naJesus. Mokukagwana mwenyo gwanarunye twa hepa kuyirugana oyo. Nonkango edi ga uyungire Jesus da kara mwaJohanesa 5:22, 23 kulikida hepero zeyi natu va pera mfumwa. Age kwa tente asi: “Mwene ko Tate nagumwe si a pangura, nye mpanguro nazinye kwa zi gava koMuna, asi va fumadekere po Muna navenye, moomu ava fumadeke Guhwe. Ogu a dili kufumadeka Muna, naGuhwe si ogu ga mu tuma kapi a mu fumadeke.”—Resa Episarome 2:11, 12.

5. Morwasinke twa hepera kulikida mfumwa nefumadeko kovantu?

⁵ Vantu kwa va ungire va “fane Karunga.” (Gen. 1:27) Yiyo nye vantu wovanzi ava likidire yikara yimwe yaKarunga. Pasihonena, vantu kulikida eharo nonkenda kovakwawo. Awo kwa va unga nezwi lyokomutjima eli ali va rondora asi eyi yiwa ndi yidona. (Rom. 2:14, 15) Vantu wovanzi kwa hara yininke yoyiwa ntani youkuhuki. Ntani awo kwa hara kuparuka novakwawo mombili. Yi kare asi va yi dimburura ndi hawe, awo kuhetekera ko kulikida yikara yaJehova, ano morwa oyo awo va fira kuvalikida mfumwa nefumadeko.—Epis. 8:5.

6, 7. Kombinga zokugava mfumwa, ngapi Nombangi daJehova da lisiga novantu wovanzi?

⁶ Twa hepa kudiva kuhamena mfumwa ezi natu gava kovantu ntani zokuhura kupi. Vantu wovanzi kwa va pukisa mpepo zouzuni waSatana. Oyo yiyo nye vantu va harera kukarera vagara ndi vakadi vamwe mevango lyokuvapa tupu efumadeko lyokuwapera. Awo kutara vampitisili womaukarelikarunga novanapolitika novadani womaudano nava ava dana monomuvi ndi ava ava dimbi asi awo mulyo unene. Vadinkantu novakondi kwa hara kuhonena vantu owo monkedi omu ava uyunga ndi omu ava dwara ndi monkareso zawo.

⁷ Vakriste wousili kunyonkera po kupa mfumwa vantu monkedi zangoso. Kristusa yige ga tulire po sihonena sokusikilira mo esi twa hepa kuhonena. (1 Pet. 2:21) Karunga kapi nga yi mu hafesa nsene tu gava mfumwa zokupitakanena kovantu. Twa hepa kudiworoka asi: “Navenye kwa zona, makura uyerere waKarunga yiyo va u pira.” (Rom. 3:23) Yosili, kwato muntu ogu ga fira mfumwa zokupitakanena.

8, 9. (a) Ngapi omu Nombangi daJehova adi tara ava ava rugana mepangero? (b) Mfumwa zokuhura kupi natu gava kwava ava rugana mepangero?

⁸ Mouzuni ou, mwa kara vantu ava va fira efumadeko morwa situmbukira esi va kara naso. Pasihonena, ava ava rugana  mepangero kwa kara nositumbukira sokupopera vantu nokupakera mbili yihepwa yawo. Ayo kuretera navenye mauwa. Mupositoli Paurusa yiyo nye ga tumangedere Vakriste va limburukwe “kepangero” Age kwa va tanterere asi: “Omu va pe navenye eyi ya va hamena: mutero kwava womutero, omu fumadeke ava lya hamena efumano.”—Rom. 13:1, 7.

⁹ Yipo nye ngoNombangi daJehova kufumadeka ava ava rugana mepangero kuliza nompo zomosirongo setu. Ose kuruganena kumwe nawo ngomu ava sikisa mo yitumbukira yawo. Nye kapi tatu va kwatesa ko nsene tava tu pura tu rugane eyi ayi lilimbi noveta zaJehova. Momaukaro gangoso ose kulimburukwa nokupa mfumwa Jehova kupitakana vantu.—Resa 1 Peturusa 2:13-17.

10. Ngapi vakareli vaJehova vanare va tulire po sihonena sosiwa monkedi omu ngava tara vemepangero?

¹⁰ Vakareli vaJehova vanare kwa tulire po sihonena sosiwa monkedi omu ngava tekura vemepangero. Josefa naMariya va zire apa mupangeli goVaroma ga geve mpangera asi vantu navenye va ka litjangese mutero. Awo kwa zire koBeterehema nampili ngomu Mariya ga kere pepi nokuhampuruka mbeli zendi. (Ruk. 2:1-5) Apa Paurusa va mu rundilire, age kwa ka uyungire nefumadeko kwahompa Herodesa Agilipa naFestusa mupangeli goVaroma ogu nga pangere moJudeya.—Yirug. 25:1-12; 26:1-3.

11, 12. (a) Morwasinke pwa karera malisigo monkedi omu atu tara ava ava rugana mepangero ntani novampitisili womaukarelikarunga? (b) Yitundwamo musinke yoyiwa ya kere apa munazinyetu gomoAustria ga likidire efumadeko komunapolitika?

¹¹ Nampili ngoso, Nombangi daJehova kunyoka kupa mfumwa zokupitakanena vampitisili womaukarelikarunga, nampili ngomu vampitisili owo va hara kuvapa mfumwa zokulikarera. Maukarelikarunga goyimpempa kuswaura Karunga nokuronga marongo gepuko. Yipo nye, ose kutara vampitisili owo ngwendi moomu atu tara vantu navenye nye kapi atu va pe mfumwa zokupitakanena. Apa ga kere pevhu, Jesus nga tumbura vantu vangoso asi vayilipaki ndi vapukisi. (Mat. 23:23, 24) Nye apa atu likida efumadeko kwava ava rugana mepangero poyiruwo yimwe kureta yitundwamo yoyiwa.

¹² Leopold Engleitner kwa kere muzuvhisi gomupampi gomoAustria ogu lya kwete epangero lyoVandovesi nokumutuma nehina lyorutenda kokamba zononkwate. Munekuto gedina Heinrich Gleissner nage kwa mu kwete. Age kwa kere munapolitika gomoAustria. Nampili ngoso, kapi lya mu here epangero lyoVandovesi. Morugendo rwawo rokuza kokamba zononkwate, munazinyetu Engleitner kwa fatwilire nefumadeko epuliro lyendi kwaGleissner, ogu ga purakenene nawa. Apa ya pwire yita yauvali youzuni, Gleissner kwa ya twikilire kuvatera Nombangi daJehova moAustria. Nampo wa diva yitundwamo yoyiwa eyi ya horoka morwa Nombangi daJehova kwa pa mfumwa zokuwapera ezi va tambura moBibeli kwava ava rugana mepangero.

13. Unene po wolye twa hepa kufumadeka nokupa mfumwa, ntani morwasinke?

¹³ Vapuli vakwetu twa hepa kuvapa mfumwa nokuvafumadeka. Unene po vakuronambunga ava ava tu pitisire. (Resa 1 Timoteusa 5:17.) Ose kufumadeka vanavazinyetu  owo yi kare asi rudi rwawo musinke ndi oku va tunda ndi eyi ava rugana. Bibeli kuvatumbura asi “mauhwi,” ntani Karunga kuvaruganesa va pakere mbili vantu vendi. (Efe. 4:8) Gazadara ko tupu eyi ava rugana vakuronambunga novatareli wonombunga nava womoKomitiye zoBeteli ntani womoMbungagendesi. Vanavazinyetu mosiruwo sovapositoli kwa fumadekere unene owo ngava va pitisire, nose twa hepa kuvafumadeka. Apa atu kara novagara owo kapisi tu va tare ngwendi vaengeli tuna kara nawo. Nye tu va fumadeke nokuvapa mfumwa morwa yirugana yawo yoyinene nonkareso zawo zokulinunupika.—Resa 2 Vakolinte 1:24; Ehororo 19:10.

14, 15. Malisigo musinke ga kara po pokatji kovakuronambunga ntani novampitisili womaukarelikarunga?

¹⁴ Vakuronambunga awo vasita wokulinunupika. Ano oyo yiyo ayi va ninkisa va nyoke kuvatekura ngwendi vantu wokufumana unene. Awo kwa lisiga novampitisili womaukarelikarunga vanaina nava womosiruwo sovapositoli ava ga uyungire Jesus asi: “Awo kwa hara mavega gomawa po poyipito noyipundi yovanamakuto monosinagoge nomalikunda-kundo gopomarandero.”—Mat. 23:6, 7.

¹⁵ Vakuronambunga awo kutambura nelinunupiko nonkango daJesus asi: ‘One walye omu va tarerere, va mu tumbure asi ‘Varongi,’ yeeyi murongi gweni gumwe tupu, one hena namuvenye vezimo limwe tupu. Nye one hena nagumwe si ngomu tumbura apa pevhu asi ‘Guhyeni,’ yeeyi Guhyeni gumwe tupu, nye age meguru ga kara. One walye hena ava mu tumbura asi ‘Vapitisili,’ yeeyi mupitisili gweni gumwe tupu, Kristusa. Nye gomunene po pokatji keni a kare mukareli gweni. Ogu a linenepeke, ngava mu nunupika, ano ogu a linunupike, ngava mu nenepeka.’ (Mat. 23:8-12) Vakuronambunga kwa linunupika, yiyo nye vapuli vakwawo uzuni mudima ava va fumadekere nokuvalikida eharo.

16. Morwasinke no litura mo unene mokukwata egano nokutura pasirugana eyi azi tanta Bibeli kuhamena kulikida mfumwa?

¹⁶ Ayo kuvhura yi guse siruwo mokudiva ava natu vhura kupa mfumwa nomu natu zi va pa. Oyo yiyo ya horokerere Vakriste mosiruwo sovapositoli. (Yirug. 10:22-26; 3 Joh. 9, 10) Nye twa hepa kulitura mo  unene tu likide mfumwa kuliza nomu za tanta Bibeli. Nsene tu yi rugana, ngatu gwanena mo mauwa gomanzi.

17. Mauwa musinke aga tundu mo mokulikida mfumwa ava ava rugana mepangero?

¹⁷ Nsene tu fumadeka ava ava rugana mepangero, kuvhura nampo ngava tu popere tu zuvhise mbudi zongwa pwa hana madonganeso. Awo kuvhura ngava hafere sirugana setu sokuzuvhisa. Eyi yiyo ya horokerere muzuvhisi gokukarera gomoNdovesiranda gedina Birgit ogu ga zire kosure oku nga dimbire munwendi a ka kare posilika sokugavera nonzapo. Vamitili kwa tanterere Birgit asi ayo ya va hafesere kukara novanona woNombangi posure zawo. Awo kwa uyungire asi vanona woNombangi kwa ninkisire ukaro woposure u wape. Birgit tava fatwilire asi: “Vana vetu kwa va ronga va likide nkareso zongwa kuliza nonompango daKarunga, kukwatera mo kulikida efumadeko kovamitili.” Mitili gumwe kwa tente asi: “Ngano vanona navenye kwa kara ngwendi veni, sirugana soumitili ngano kuturerupira.” Konyima zoyivike yongandi gumwe govamitili kwa ka kere posigongi somazuva gatatu mositata saLeipzig.

18, 19. Morwasinke ya karera mulyo kugava mfumwa zokuwapera kovakuronambunga?

¹⁸ Nompango domoNonkango daKarunga kuvhura kutuvatera tu kwate egano omu natu fumadeka vakuronambunga. (Resa Vahebeli 13:7, 17.) Twa hepa kuvapandadeka koyirugana yawo nokukwama mavyukiso aga ava tu pe. Nsene tu yi rugana awo ngava vhura kusikisa mo yirugana yawo noruhafo. Nye kapi yina kutanta asi twa hepa kutemwinina mukuronambunga gokudivikwa monkedi omu a dwara nomu a gava yiuyungwa yendi ndi omu a uyunga. Nsene tu yi rugana oyo, kapi ngayi moneka nawa kovantu. Twa ha divareni asi mukuronambunga nage kapi ga sikilira mo. Sihonena esi twa hepa kukwama kuna kara saKristusa.

¹⁹ Ose ngatu vatera vakuronambunga pokuvapa mfumwa zokuwapera, mevango lyokuvafumadeka kupitakanena. Mokurugana ngoso, ayo ngayi va vatera va dire kulinenepeka ndi va lizuvhe asi awo nkenye apa kurugana youhunga.

20. Ngapi kugava mfumwa kovakwetu ayi tu vatere?

²⁰ Pokupa mfumwa ava za fira ayo kutuvatera tu nyokere po kuliharera uwa wanyamwetu. Ayo kutuvatera hena tu dire kulinenepeka nsene nose vana tu pe mfumwa. Kutuvatera hena tu ruganene kumwe nombunga zaJehova ezi azi dili kupa vantu mfumwa zokupitakanena va kare asi vapuli ndi kapisi vapuli. Ntani ayo kutuvatera tu dire kupunduka nsene ogu twa fumadeka a rugana epuko.

21. Uwa musinke wounene ou natu gwana pokugava mfumwa?

²¹ Uwa wounene ou natu gwana pokugava mfumwa kwava za fira kuna kara asi ayo kuhafesa Karunga. Ose kurugana eyi ga hara nokumulimburukwa. Makura age nga vhura kulimburura nkenye ogu ana hara kumupa usima. (Yis. 27:11) Mouzuni, vantu kwa kara nomagano gepuko kuhamena kugava mfumwa. Nye ose tuna hafa asi tuna diva kugava mfumwa moomu ga yi harera Jehova.