EZUVA limwe kongurangura momukunda gwaBrookings moAmerika kwa kere mufu sili. Ame kwa kere kumwe novakwetu monzugo zoyimuna oku tatu kankama komufu. Ose kwa sikeme pepi netemba lyokunwina yimuna eli lya zulire mema gomatenda. Tanko ni mu simwitire ko eparu lyange yipo mu dive eyi twa sikamenene monzugo ozo.

Ame kwa hampurukire nge momazuva 7 Nsinano 1936. Mezimo lyetu ose kwa tu reta tuvane, nyame nsiraura. Ose kwa tungire pofarama moDakota. Kulima kwa kere nomulyo kwetu, nye koyili yimwe ya kere nomulyo unene. Vakurona vange kwa gwene ekuho mo-1934 ngoNombangi daJehova. Kurugana mpango zaKarunga kwa kere sininke somulyo po kwawo, morwa awo va ligeve kwendi. Otate Clarence kwa kere muwapaiki gombunga zovakuronambunga ano konyima mukurwawo Alfred yige ga ya kweme ko.

Epata lyetu kwa here unene kuza komapongo nokuza tunda embo zende embo tu tantere ko vantu kuhamena meho zongwa va tumbura moBibeli. Sihonena sovakurona vange ntani nedeuro eli twa gwene kwawo ya tu vaterere tu hare Jehova. Name namukurwange Dorothy kwa kere vazuvhisi apa nkenye gumwe ga kere nonomvhura ntazimwe. Mo-1943 yipo na tamekere kugava yiuyunga moSikora zoUkareli.

Yigongi kwa kere nomulyo kwetu. Tani diworoka sosigongi esi sa karerere modoropa Sioux Falls momvhura 1949. Munazinyetu Grant Suiter kwa geve siuyungwa sosiparatjangwa asi: “Uhura pepi una kara!” Mosiuyungwa oso age kwa korangedere vazuvhisi navenye ava va gwana ekuho va  ruganese eparu lyawo mokuzuvhisa mbudi zongwa zoUhompa. Konyima zosigongi oso yipo na ligeve kwaJehova. Ano posigongi esi sa kweme ko momukunda gwaBrookings, yipo na ya gwene ekuho monzugo zina nina tumbura ketamekero. Metemba lyoyimuna yimo va tu kuhwire kumwe novakwetu vatatu momazuva 12 Mangundu 1949.

Kutunda opo yipo na tokwere kurugana uzuvhisi wokukarerera. Mezuva 1 Murongagona 1952 yipo na tamekere ame nomvhura dange 15. Bibeli kuuyunga asi: “Kara ukwawo novanongo ngo kare munongo” ano mepata lyetu mwa kere vantu wovanongo ava va kwatesere ko etokoro lyange. (Yis 13:20) Mukurwa gotate Julius ogu ga kere nonomvhura 60 yige muzuvhisi gokukarerera ogu ngani pwaga nage. Nampili ngomu twa li sigire monomvhura, ose ngatu hafere sirugana sokuzuvhisa. Na lirongerere ko yoyinzi koudivi wendi. Konyima mukurwange Dorothy nage ta ya tameke nouzuvhisi wokukarerera.

Apa na kere mudinkantu vakurona vange ngava zigida vatareli wonombunga va ya rare membo lyetu. Mutareli gumwe ogu ga vaterere nge unene kuna kara Jesse Cantwell namukadendi Lynn. Ekorangedo lyawo yilyo lya tumangedere nge ni tameke uzuvhisi wokukarerera. Evatero lyawo lya ninkisire nge ni li tulire po hena yitambo yimwe yopampepo. Apa ngava dingura nombungakriste dopopepi, poyiruwo yimwe ngava zigida nge tu ze nawo mokuzuvhisa. Oyo kwa korangedere nge unene.

Mutareli ogu ga ya kweme ko kuna kara Bud Miller namukadendi Joan. Posiruwo oso ame nomvhura dange 18 ntani na hepere kukamoneka komberewa ezi ngazi tokora ogu na za koukwayita. Ano mberewa ozo momukunda gwetu kwa tjenge edina lyange ni lihameke mosirugana esi sa li limbire nompangera ezi ga geve Jesus kovasikuli vendi mokudira kulihameka moupolitika. Nye ame kwa here kuzuvhisa mbudi zongwa zoUhompa. (Joh. 15:19) Yipo na tjangerere mberewa ozo va tjangese nge asi ame muzuvhisi.

Ayo kwa korangedere nge apa munazinyetu Miller ga zire a ka ndindire nge ko komberewa ozo. Age kwa kere mugara gouradi. Ayo kwa pere nge uradi pokukara kumwe nendi apa va puragerere nge. Ngoyitundwamo, momvhura 1954 mberewa  zina yipo za tjangesere nge asi ame muzuvhisi. Oyo kwa pere nge mpito ni sikise mo sitambo simwe sopampepo.

Momvhura zoozo yipo va tambwire nge ni ka rugane koBeteli, ezi za kere pofarama posirudi Staten Island, moAmerika. Ame kwa ka rugene ko nomvhura ntatu. Ame kwa ka lirongerere ko yoyinzi morwa na ka rugene kumwe novanavazinyetu wounongo.

Pofarama ozo kwa kere po sitasi soradio WBBR. Nombangi daJehova yido ngadi gendesa sitasi oso kutundilira momvhura 1924 dogoro 1957. Vantu wokusika po-15 ndi 20 yiwo ngava rugana pofarama ozo. Sinzi setu kwa kere vadinkantu ntani kapi twa kere noudivi. Nye ngatu rugana namunazinyetu gomukondi Eldon Woodworth ogu ga kere mugwavekwa. Age kwa kere nounongo wounzi. Ntani age kwa kere ngwendi guhyetu pokuturonga yoyinzi. Poyiruwo yimwe apa ngatu dili kulizuvha novakwetu, age nga tu tantere asi: “Ayo kututekukisa kweyi ga tu horowora hompa a tu ruganese nampili ngomu twa dira kusikilira.”

Ose ngatu rugana hena namunazinyetu Frederick W. Franz. Age kwa kere munongo ntani ga divire nawa Matjangwa, age hena kwa here kutuvatera. Ogu nga tu terekere nondya kwa kere Papargyropoulos, edina olyo kwa kere udigu yiyo ngatu mu zigidisa kedina lyendi limwe Harry Peterson. Nage kwa kere mugwavekwa ntani kwa kere noupampi wokuzuvhisa. Munazinyetu Peterson nga sikisa mo nawa sirugana sendi koBeteli nye kapi nga ncenuna yirugana yokuzuvhisa. Nkenye kwedi nga gavere yimbapiratjangwa yoyinzi. Nage ga divire nawa Matjangwa ntani nga limburura mapuro getu.

Pofarama ose ngatu wapaike enyango noyikwahidi yipo tu yi ture moyindoronhwa. Ose ngatu rongere yindoronhwa oyo yokusika konyara nolita 42 000 yipo va ka lye navenye vemepata lyaBeteli. Ame ngani rugana rugana namunazinyetukadi Etta Huth ogu ga kere nounongo. Yige nga tjanga elikwamo lyoyininke eyi twa hepere kutura moyindoronhwa. Vanavazinyetukadi womukunda  nawo ngava wiza va ya tu vatere, ano Etta yige nga pe eyi nava vhura kurugana. Nampili ngomu Etta nga kere nediwo lyokurongera enyango noyikwahidi moyindoronhwa, nye simpe ga fumadeke vanavazinyetugara ava ngava pitisire pofarama. Age tulire po sihonena sosiwa sokufumadeka upangeli.

Angela Romano nage kwa kere gumwe govanavazinyetukadi gomudinkantu ogu nga wiza a ya vatere pofarama. Etta yige ga mu vaterere apa ga tambwire usili. Angela nage kwa kere gumwe govantu wovanongo na ya divire apa ngani rugana koBeteli. MwaKudumogona 1958 yipo twa likwere naAngela Romano ano ose kwa hafera kuruganena kumwe Jehova nomvhura 58. Monomvhura nadinye, ulimburukwi waAngela kwaJehova kwa nkondopeka nonkwara detu. Ame kwa huguvara mukadange mwankenye udigu.

Apa sitasi soradio WBBR va si randesere mo-1957, yipo na ka rugene koBeteli moBrooklyn karuwogona. Apa twa likwere naAngela, yipo na hagekere kurugana koBeteli, makura tatu ka rugana uzuvhisi wokukarerera ure wonomvhura ntatu posirudi Staten Island. Posiruwo oso ngani rugana hena kowo va rende sitasi setu esi va rukire asi WPOW.

Name naAngie kwa tokomenene kurerupika eparu lyetu yipo tu vhure kukazuvhisira nkenye oku kuna hepa evatero. Momvhura 1961 yipo va tu tumine tu ka kare vazuvhisi wosiruwo nasinye mositata Falls City, Nebraska. Karuwogona tupu apa twa ka sikire, tava tu zigida koSouth Lansing, moNew York, tu ka kare koSikora zoYirugana yoUhompa ure wokwedi. Twa ka haferere edeuro eli twa ka gwene ntani kwa ndindilire nononkondo tu ka li ruganese moNebraska. Nye twa hana kuyindindira ose kwa tu tumine koCambodia ngovatumwa. Mosirongo oso ose twa ka mwene nokukazuvha nokukalya yininke eyi twa dilire kudiva rumwe. Ose kwa here kutantera ko vantu vamo mbudi zongwa.

Nye ukaro wopapolitika mosirongo oso kwa rundurukire makura twa hepere kuza koVietnam. Nye ehudi konyima zonomvhura mbali yipo wa kwete nge uvera, makura tatu tengura koAmerika. Apa na verukire, yipo twa twikilire nosirugana sosiruwo nasinye.

MwaNsinano 1965 yipo va tulire nge ni kare mutareli gonombunga. Name naAngie kwa haferere sirugana sokutarera nombungakriste nokuvatera kuwapaika yigongi ure wonomvhura 33. Yigongi kwa kara yilika eyi ani hafere unene, yipo nye na haferere sirugana sokuwapaika yigongi. Apa ngatu dingura nombungakriste moNew York, yigongi ngatu yi ruganene mosira saYankee.

Mwaza nomvhura name naAngela kwa gwene yitumbukira yokulisiga-siga ntani youdigu. Pasihonena, momvhura 1995 yipo va pulire nge ni ka ronge koSure zEdeuro lyoVakwafimbunga. Konyima zonomvhura ntatu tava tu zigida koBeteli. Ame kwa hefe kukarugana hena koBeteli oku na tamekerere sirugana sange sosiruwo nasinye. Ame  ngani rugana moDepartemende zoyirugana yokuzuvhisa ntani ngani rongo konosikora doUhompa. Momvhura 2007, Mbungagendesi yipo za tulisire po Departemende zoNosikora doUhompa, ano ame kwa tulire nge ni kare mutareli gwado.

Nosikora doUhompa kwa di rundurura mwaza nomvhura. Sikora zovakuronambunga kwa zi tulisire po momvhura 2008. Monomvhura mbali da kweme ko sikora ozo kwa dewire vakuronambunga wokupitakana po-12 000 koPatterson ntani koBeteli moBrooklyn. Sikora ozo ozo kuna kuzirugana komavango gapeke vanavazinyetugara ava va deura. Momvhura 2010, Sure zEdeuro lyoVakwafimbunga kwa zi rukire asi Sikora zoBibeli zoVagara woVadike ntani kwa tulisire po sikora zimwe va rukire asi Sikora zoBibeli zovalikwali.

Momvhura 2015 mwaSitarara, nosikora odo mbali kwa tulire kumwe makura tazi kara Sikora zovazuvhisi woUhompa. Kosikora ozo kuvhura kuza ko valikwali ndi vadike wovagara ndi wovakadi. Vanavazinyetu wovanzi mouzuni mudima kwa hefe apa zuvhisire asi sikora ozo ngava zi ronga koNobeteli dokulisiga-siga moyirongo yawo. Ayo kuhafesa pokumona asi wovanzi ngava gwana mpito mokukaza konosikora doUhompa ntani nina hafa pokuyalidiva novanavazinyetu ava va tura marunduruko meparu lyawo yipo va ya gwane edeukoro konosikora.

Pokugazadara ko keparu lyange komeho ni ya gwane ekuho dogoro ngesi, ame kuna kupandura Jehova kovantu wovanongo ava va vatera nge Kutundilira apa na kere muzuvhisi gokudira kugwana ekuho dogoro apa na ya gwene ekuho, tani pandura Jehova kweyi ga vatera nge ni mu dive nokumukarera. Vamwe kwa kere vanona ndi vakondi kwange ntani wokonontundiliro dokulisiga-siga. Nye nkareso noyirugana yawo kwa likidire asi awo kwa hara unene Jehova. Mombunga zaJehova, mwa kara vantu wovanongo ava natu vhura kulikwatakana nawo. Ame yiyo na rugana ntani na gwanena mo uwa.