Ove wa fumadeka unene Nonkango daJehova ndi?
“Apa twa mu reterere nonkango daKarunga, . . . tomu di tambura, kapisi panonkango-nkango tupu, nye ado nonkango daKarunga.” —1 TES. 2:13.
MARUSUMO: 114, 113
1-3. Madiro kulizuvha musinke nampo ga kere pokatji kaEwodiya naSintike, ntani ngapi natu vhura kunyokera po maudigu gangoso? (Tara efano.)
VAKARELI vaJehova kwa fumadeka unene Bibeli. Morwa kudira kusikilira mo, natuvenye kugwana mavyukiso goPatjangwa. Ngapi omu atu ga tara? Tu tareni sihonena soVakriste vanare Ewodiya naSintike. Pwa kere madiro kulizuvha pokatji kovakadi ava wovagwavekwa. Maudigu musinke? Bibeli kapi za ga tumbura. Nye tu fanekeseni eyi nampo ya horokere.
2 Tu ninke asi Ewodiya kwa zigidire vamwe womombungakriste kembo lyendi va ka lye nokukahafera kumwe. Sintike kapi va mu zigidire ko, nye ga yi zuvhire asi vakwawo va ka haferere epongasano olyo. Sintike nampo ga uyungire asi: ‘Kapi nina kuyipura asi Ewodiya kapi ka zigidire nge ko. Ame kugazara asi ose vakaume wovanene.’ Sintike ta yi mu guvisa, ta tameke kugazarera Ewodiya momudona. Makura Sintike ta tura po epongasano nokuzigida woovena ga zidire Ewodiya nye age kapi ga mu zigidire ko. Madiro kulizuvha aga ga kere pokatji kaEwodiya naSintike ngano ga donganesere po mbili zomombungakriste. Bibeli kapi za Fil. 4:2, 3.
tumbura yitundwamo, nye vanavazinyetukadi owo nampo va tambwire mavyukiso gaPaurusa.—3 Naina, maukaro gokulifana pamwe kureta maudigu monombungakriste dovantu vaJehova. Nye, maudigu gangoso kuvhura kugakohonona po ndi kuganyokera po nsene tu tura pasirugana mavyukiso atu gwana moBibeli. Ntani nsene twa fumadeka unene Bibeli, ose ngatu tura pasirugana mavyukiso gamo.—Epis. 27:11.
BIBELI KUTURONGA TU PANGERE MALIZUVHO GETU
4, 5. Mavyukiso musinke za gava Bibeli kuhamena kupangera malizuvho getu?
4 Udigu kupangera malizuvho getu apa atu lizuvhu asi vana tu tekura momudona. Ayo kukora komutjima nsene vana tu tekura momudona morwa rudi rwetu ndi omu twa fana. Ayo kukora unene nsene ogu ana tu zonene mupuli mukwetu. Bibeli za kara nomavyukiso aga naga tu vatera nsene vana tu handukisa ndi?
5 Jehova ga diva eyi ayi vhuru kuhoroka apa vantu ava dili kupangera malizuvho gawo. Nsene tuna handuka kuvhura tu uyunge nokurugana yininke eyi natu vhura kukalivera konyima. Ayo ya wapa kutambura mavyukiso gomoBibeli kuhamena kupangera malizuvho getu nokudira kuhanduka usimbu. (Resa Yisewe 16:32; Muudisi 7:9.) Natuvenye twa hepa kulironga kudira kuhanduka usimbu ntani twa hepa kudongwenena po vakwetu. Morwa ayo mulyo unene kwaJehova naJesus. (Mat. 6:14, 15) Ove wa kara noudigu wokudongwenena po vakweni ndi wokuhanduka usimbu ndi?
6. Morwasinke natu dilira kukara nonyengo?
6 Vantu ava ava dili kupangera malizuvho gawo kuhanduka usimbu nokukara nonyengo. Nkareso ozo kutjilisa wopeke. Muntu ga kara nonyengo kuvhura a ninkise womombungakriste va kwame nkareso zendi. Age kuvhura a hare kuhoreka ehandu ndi nyengo zendi, nye ‘nkenye ogu nga mona’ magazaro gomadona aga ga kara nago komutjima. (Yis. 26:24-26) Vakuronambunga kuvhura va vatere muntu ogo a dimburure asi ehandu nonyengo nonkoko kuna kara yikara va dira kupulisira mombunga zaKarunga. Bibeli za vyukilira kuyitumbura. (Lev. 19:17, 18; Rom. 3:11-18) Nove kuzikwatesa ko ndi?
JEHOVA KUNA KUTUPITISIRA
7, 8. (a) Ngapi omu Jehova a pitisire ruha rwepevhu rombunga zendi? (b) Mavyukiso musinke azi gava Bibeli ntani morwasinke natu ga limburukwira?
7 Jehova kupitisira nokuronga ruha rwepevhu rombunga zendi kupitira ‘momukareli gokulimburukwa gonondunge’ megendeso lyaKristusa ‘mutwe gombungakriste.’ (Mat. 24:45-47; Efe. 5:23) Ngwendi mbungagendesi zomosiruwo sovapositoli, mukareli ogo nage kwa fumadeka Bibeli unene. (Resa 1 Vatesaronika 2:13.) Mavyukiso ndi nompangera musinke domoBibeli edi adi tu vatere?
8 Bibeli kwa gava mpangera asi a tu kare momapongo nkenye apa. (Heb. 10:24, 25) Azo kutukorangeda hena tu lize merongo limwe. (1 Kol. 1:10) Nonkango daKarunga kututantera tu ture muhowo yirugana yoUhompa meparu lyetu. (Mat. 6:33) Matjangwa kwa nkondopeka hena situmbukira setu sokuzuvhisira momambo nomoyitaura nankenye oku. (Mat. 28:19, 20; Yirug. 5:42; 17:17; 20:20) Bibeli kwa gava mpangera kovakuronambunga mokukuhura mbunga zaKarunga. (1 Kol. 5:1-5, 13; 1 Tim. 5:19-21) Ntani Jehova kwa gava mpangera asi navenye womombunga zendi va hepa kukuhuka panyama nopampepo.—2 Kol. 7:1.
9. Yilye Jesus ga tura po a tu vatere tu kwate egano Bibeli?
9 Vamwe kulizuvha asi kuvhura va kwate egano Bibeli pwavene. Nye Jesus kwa tura po “mukareli gokulimburukwa” yipo a fatwilire vantu marongo gomoBibeli. Kutundilira momvhura 1919, Jesus Kristusa yipo ga tamekere kuruganesa mukareli ogo mokuvatera vasikuli vendi va kwate egano Bibeli nokulimburukwa mapukururo gazo. Pokulimburukwa mavyukiso gomoBibeli, ose kuvatera mbungakriste zi kare zina kuhuka, mombili nomouumwe. Nkenye ogu a lipure asi: ‘Ame kukwatesa ko mukareli ogu ana kuruganesa Jesus ndi?’
ETEMBA LYAJEHOVA KUNA KUGENDERERA
10. Ngapi omu ruha rwemeguru rombunga zaJehova va ru singonona mobuke zaHesekiyeli?
10 Bibeli kwa tu vatera tu dive ruha rwemeguru rombunga zaJehova. Pasihonena, muporofete Hesekiyeli kwa mwene emoneko lyetemba eli lya fanekesa ruha rwemeguru rombunga zaKarunga. (Hes. 1:4-28) Jehova yige a gendesa etemba olyo ntani alyo kuvyuka nkenye oku ana liharere. Eyi aru rugana ruha rwemeguru kukundama ruha rwepevhu rombunga zaKarunga. Etemba nare lya gusa kugenda. Gazadara ko marunduruko aga za tura po mbunga zaKarunga nomvhura da ka pita ntani diworoka asi Jehova yige ga retesa po marunduruko ogo. Kristusa novaengeli wovalimburukwi ntaantani ngava ya zonagure po ou uzuni woudona, ano etemba lyaJehova kuna kugenderera kuwiza mokuyafumadeka upangeli wendi nokuyapongora edina lyendi.
Ayo kutuhafesa pokuzuvha vanavazinyetu owo ava lizambere moyirugana yokutunga! (Tara paragarafu 11)
11, 12. Yininke musinke zina kusikisa mo mbunga zaJehova?
11 Gazadara ko eyi rwa sikisa mo ruha rwepevhu rombunga zaJehova momazuva gopouhura. Kutunga. Mafere govanavazinyetu kwa litulire mo mokutunga mberewa zetu zonene moAmerika. Megendeso lyoDepartemende zokutunga, mayovi govanavazinyetu kwa lizambera mokutunga Yinyanga yoUhompa ntani nokunenepeka Nobeteli. Ayo kutuhafesa pokuzuvha vanavazinyetu owo va lizambera moyirugana oyo. Tu diworokeni asi Jehova kuna kutungika vazuvhisi woUhompa uzuni mudima owo ava gava ko yimaliwa mokukwatesa ko matungo ogo.—Ruk. 21:1-4.
12 Erongo. Koneka nosikora edi adi gava erongo lyokutunda kwaKarunga. (Jes. 2:2, 3) Ose kwa kara noSikora zovazuvhisi wokukarerera, Sikora zovazuvhisi woUhompa, Sikora zaGiliyata, Sikora zoVabeteli wovape, Sikora zovatareli wombunga novakadi vawo, Sikora zovakuronambunga, Sikora zoukareli ntani Sikora zovakomitiye woBeteli novakadi vawo. Yosili Jehova kwa hara kuronga vantu vendi. Age kuturonga hena kupitira kointaneta zetu jw.org, oku atu gwana yimbapiratjangwa yoBibeli momaraka mafere. Kointaneta zetu kugwana ko ruha rovanona, romapata ntani ruha royininke yoyipe. Ove kuruganesa jw.org mokuzuvhisa ntani moukareli wepata ndi?
LIMBURUKWA KWAJEHOVA NOKUKWATESA KO MBUNGA ZENDI
13. Situmbukira musinke twa kara naso ngovakareli vaJehova?
13 Azo nfumwa mokuhama kombunga zaJehova. Morwa twa diva noveta daKarunga nonompango dendi, twa kara nositumbukira sokurugana yoyiwa nokukwatesa ko upangeli wendi. Ngomu uzuni una kudonapa, ose twa hepa ‘kunyenga udona,’ moomu ga u nyenga Jehova. (Epis. 97:10) Ose kapi atu kwatesa ko vadinikarunga pokuuyunga asi: “Udona asi uwa nouwa asi udona.” (Jes. 5:20) Ntani ose kukondja tu kare tuna kuhuka panyama nopamukaro nopampepo morwa tuna hara kuhafesa Karunga. (1 Kol. 6:9-11) Ose twa hara Jehova nokumuhuguvara ntani ose kumulimburukwa pokuparuka kuliza nonompango dendi domoBibeli. Ntani ose kuhetekera ko kutura pasirugana nompango odo yi kare asi kembo, mombungakriste, koyirugana, kosure ndi nkenye oku. (Yis. 15:3) Tu tarurureni nonkedi dimwe omu natu vhura kulimburukwa kwaKarunga.
14. Ngapi vareti woVakriste nava limburukwa kwaKarunga?
14 Kurera vanona. Vareti woVakriste kulimburukwa Jehova pokuronga vana vawo kuliza noNonkango dendi. Vareti ava va tjira Karunga kapi a kwama nompo dovantu omu ava rere vana vawo. Mukriste nokukwama si mpepo zouzuni. (Efe. 2:2) Guhya goMukriste kapi ta uyunga asi: ‘Mompo zetu vakadi yiwo wokuronga vanona.’ Bibeli za vyukilira kuuyunga asi: ‘Anone oguhya ko, omu tekure vana veni oku tomu va pukurura kuliza neyi ga hara Karunga.’ (Efe. 6:4) Vareti ava va tjira Karunga kuna hara vana vawo va kare ngwendi Samwere, morwa Jehova kwa kere pwendi apa ga kulire.—1 Sam. 3:19.
15. Ngapi natu limburukwa kwaJehova nsene tatu tura po matokoro gomanene?
15 Kutura po matokoro. Apa atu tura po matokoro gomanene, nkedi zimwe natu limburukwa kwaKarunga, pokupapara mavyukiso gomoNonkango dendi ntani kombunga zendi. Mokulikida mulyo gokuyirugana oyo, tu tarurureni ukaro ou au kundama vareti wovanzi. Vareti wovanzi kwa hara kutuma vana vawo va ka va rere vanekoro ano awo vene va twikire kurugana va gwane yimaliwa. Alyo kuna kara etokoro lyankenye muntu, nye twa hepa kudiworoka asi Karunga nga ka tu pangura komatokoro aga atu tura po. (Resa Varoma 14:12.) Ayo ya wapa kutura po matokoro gomulyo kuhamena mapata getu neparu lyetu twa hana mavyukiso gomoBibeli ndi? Hawe. Ose twa hepa evatero lyaGuhyetu gemeguru morwa ose kapi tatu vhuru kulipangera nyamwetu.—Jer. 10:23.
16. Etokoro musinke ga hepere kutura po mukadi gumwe apa ga hampurukire, ntani yisinke ya mu vaterere a ture po etokoro lyewa?
Epis. 127:3; Yis. 22:6) Mukadi ogu kwa kandererere kwaJehova ngamoomu aga tu korangeda Matjangwa tu yi rugane. (Epis. 62:7, 8) Ntani ga tanterere murongi gwendi navamwe womombungakriste udigu wendi. Nampili ngomu va mu kondjesere vanekoro novakaume a tume munwendi, age kapi ga kwatesere ko egano olyo. Mugara gwendi ya mu tetukisire omu womombungakriste va vaterere mukadendi namunwendi makura ta yi mu tumangeda a lironge Bibeli nokuza komapongo kumwe nepata lyendi. Yosili, mukadi ogu ga lizuvhire asi Jehova ga limbwilire ekanderero lyendi.
16 Mukadi gumwe ogu ga hampurukire munona gomumati mosirongo sapeke kwa here kutuma munwendi kosirongo sawo yipo omama vendi va ka mu rere. Posiruwo oso ga hampurukire, ta tameke kulironga Bibeli kumwe noNombangi daJehova. Ta tura po ezokomeho ntani ga lirongere asi Karunga kwa mu pa situmbukira sokurera munwendi nage a karere Jehova. (17. Mavyukiso musinke twa gwana kuhamena varongwa vetu woBibeli?
17 Kukwama mavyukiso. Nkedi zimwe zomulyo omu natu limburukwa kwaKarunga kuna kara kukwama mavyukiso aga aga tundu kombunga zendi. Pasihonena, tu tareni magano aga va geve kuhamena varongwa vetu woBibeli. Ose kwa tu pa mavyukiso asi nsene tuna tameke kulironga nomuntu mobuke Yisinke azi rongo Bibeli?, konyima zankenye elirongo twa hepa kumutantera ko kuhamena mbunga zaJehova. Kuvhura tu yi rugane oyo pokuruganesa vidiyo Yisinke atu rugana ko koSinyanga soUhompa? ntani sifo Wolye vana kurugana mpango zaJehova? Ntani kwa tu pa mavyukiso asi nsene tuna mana buke Marongo goBibeli nomurongwa ogu ga tura po ezokomeho, twa hepa kutwikira kulironga nendi mobuke “Omu kare meharo lyaKarunga” nampili ga gwana ekuho. Mbunga zaJehova kwa gava mavyukiso aga yipo varongwa wovape va kare vana ‘nkondopara mepuro.’ (Koros. 2:7) Ove kuna kukwama mavyukiso ogo ndi?
18, 19. Nokonda musinke dimwe deyi natu likidira rupandu kwaJehova?
18 Pwa kara nokonda dononzi deyi natu likidira rupandu kwaJehova. Eparu kwendi lya tunda, pwa hana age kapi tatu ligumagura. (Yirug. 17:27, 28) Age kwa tu pa uhwi wouwa, Bibeli. Ose twa zi tambura asi Nonkango daKarunga ngwendi moomu Vakriste womoTesaronika va tambwire nonkango daKarunga.—1 Tes. 2:13.
19 Bibeli za tu vatera tu hedere pepi naJehova ntani nage ga tu hedera pepi. (Jak. 4:8) Guhyetu gemeguru ga tu pa mpito mokuhama kombunga zendi. Ayo kutuhafesa sili. Mutjangi gumwe gepisarome kwa dimbire asi: “Pandureni HOMPA, yeeyi age muwa, ano [eharo ndi] nkenda zendi zanarunye.” (Epis. 136:1) Ntanto “[eharo ndi] nkenda zendi zanarunye” kwa moneka mo yikando 26 mEpisarome egaununo 136. Pokulimburukwa kwaJehova nombunga zendi, ngatu ka limonena usili wononkango odo morwa ngatu ka paruka narunye.