“AME kwa gwene ekuho apa na kere nonomvhura 15, ano konyima zomakwedi ntazimwe tani rugana uzuvhisi wokuvatera. Konyima zomvhura, yipo na tulire mo ehundiro lyokurugana uzuvhisi wokukarerera. Apa na mene sure, ame kwa here kuza oku va hepere vazuvhisi. Ame kwa here kuza kodoropa zapeke ni likare ure nomama wovakadi ava va dilire kukara gumwe goNombangi daJehova. Ayo ya guvisire nge apa Mutareli gonombunga ga tanterere nge asi na hepa kuzuvhisira moomo modoropa zetu. Kapi na mu tanterere omu na lizuvhire. Ame kwa guvire, tani zi ni ka gazadare ko eyi ga uyungire. Tani tantere ko ogu ngani zuvhisa nendi asi: ‘Ame kuna kulizuvha ngwendi Jona. Nye konyima Jona ga ya zire koNinivhe. Name na hepa kuzuvhisira oku vana tantere nge.’”

“Ame ngesi kuna kara muzuvhisi gokukarerera nomvhura ne momukunda gwetu. Ntani ame kuna kumona mo yitundwamo yoyiwa morwa na tambwire mapukururo va pere nge. Udigu wange kwa kere nkareso zange kovantu. Ngesi ame na gwana ruhafo. Mokwedi kumwe, ame kwa rugene malirongo goBibeli 24. Tani pandura Jehova, morwa na tamekere kulironga nomama wovakadi ava ngava rwanesa epuliro lyange.”

Murongwa gumwe goBibeli gomoFiji ga hepere kutokora pokatji kokuza kosigongi ndi a ze namugara gwendi kosipito sehampuruko. Mugara gwendi ta mu pulisire a ze kosigongi. Ta tantere mugara gwendi asi na ka mu gwana konyima zosigongi. Nampili ngoso, apa ga ka tengwire kosigongi, ta lizuvhu asi ga hepa kunyokera po ukaro ou nau vhura kutura elikwatakano lyendi naJehova mosiponga. Makura kapi ga zire kosipito sina.

Apa mugara gwendi ga tanterere vanekoro asi mukadendi na wiza tupu morwa ka mu pulisilire a ze “kepongo lyoNombangi,” nye awo tava mu limburura asi: “Kapi na wiza ko, Nombangi daJehova kapi adi dana yipito yehampuruko!” *

Ngoyitundwamo, mugara gwendi ya mu hafesere asi mukadendi ga kwatererere kepuliro lyendi ntani nekezwi lyendi lyokomutjima. Nkareso zendi zoulimburukwi za mu pere mpito zokuzuvhisira mugara gwendi ntani navamwe. Yitundwamo musinke ya kere? Mugara gwendi ga tamekere kulironga Bibeli nokuza kumwe nendi komapongo.