‘AGE siruganeso sange na horowora, a divise edina lyange kovapagani nokovahompa.’ (Yirug. 9:15) Hompa Jesus kwa uyungire kuhamena mugara goMujuda ogu ga ya kere Mukriste nokuyadivikwa konyima asi mupostoli Paurusa.

Gumwe ‘govahompa’ owo kwa kere Nero mupangeli goVaroma. Ngapi no lizuvha nsene va kutwara komupangeli gwangoso o ka popere epuro lyoge? NgoVakriste ose ku tu korangeda tu honene Paurusa. (1 Kol. 11:1) Nkedi zimwe natu vhura kuyirugana kuna kara pokuhonena omu Paurusa ga ruganene kumwe nonoveta doposiruwo sawo.

Veta zaMosesa yizo ngava kwama mosirongo saIsraeli ntani yizo veta ngava kwama Vajuda navenye nkenye oku va tungire. Konyima zoPentekoste momvhura 33, vakareli wousili kapi va hepere hena kukwama Veta zaMosesa. (Yirug. 15:28, 29; Gar. 4:9-11) Nye Paurusa noVakriste vakwawo kapi ngava swaura Veta ozo, awo ngava zuvhisire koVajuda navenye pwa hana yilimbikiso. (1 Kol. 9:20) Yikando yoyinzi Paurusa nga zi monosinagoge a ka zuvhisire vantu ava va divire Karunga gwaAbirahamu ntani age hena nga ruganesa Matjangwa goRuhebeli mokuvafatwilira.—Yirug. 9:19, 20; 13:5, 14-16; 14:1; 17:1, 2.

Jerusarema yilyo evango va horowere vapostoli mokugendesa yirugana yokuzuvhisa. Awo ngava rongo montembeli nkenye ezuva. (Yirug. 1:4; 2:46; 5:20) Sikando simwe Paurusa kwa zire koJerusarema ano konyima tava ka mu kwata. Yipo za tamekere mpanguro zendi ezi za ka mu twaredesere koRoma.

Ngapi omu vapangeli woVaroma va tere epuliro eli nga zuvhisa Paurusa? Mokugwana elimbururo, twa hepa kudiva omu Varoma ngava tara maukarelikarunga. Awo kapi ngava sininike vantu vemepangero lyawo va sige maukarelikarunga gawo, ntudi nsene ukareli owo kuna kurwanesa epangero ndi kuna kuronga vantu nkareso zondona.

 Epangero lyoVaroma kwa pere Vajuda umanguruki. Buke zimwe kwa tanta asi: “Vajuda kwa gwene umanguruki mepangero lyoVaroma. . . . Awo ngava rugana ukareli wawo ntani kapi va va sininikire va karere yikarunga yoVaroma. Awo ngava kwama noveta davene monomukunda edi va tungire.” Ntani kapi va hepere kulihameka moyirugana youkwayita. * Apa Paurusa ga poperere epuliro lyendi kovapangeli woVaroma age kwa ruganesere umanguruki ou lya geve epangero lyoVaroma koVajuda.—Backgrounds of Early Christianity

Ava va nyengere Paurusa kwa zedagwire vantu novagendesi wositata va di mu vyuke. (Yirug. 13:50; 14:2, 19; 18:12, 13) Pasihonena, vakuronambunga womoJerusarema kwa zuvhire mauyungo moVajuda asi Paurusa kuna kuronga vantu “va zumbe yaMosesa.” Mauyungo ogo ngano ga ninkisire Vakriste wovape va gazara asi Paurusa kapi ga fumadekere nompango daKarunga. Ntani masimbi goVajuda ngano ga tere Vakriste asi kuna kurwanesa ukareli woVajuda. Ngano yimo ya kere ngoso, Vajuda ava va kere Vakriste ngano va va tengekere. Ntani ngano va va nyokere monkarapamwe nokuvasilika kuzuvhisira montembeli ndi monosinagoge. Nye vakuronambunga vena kwa tanterere Paurusa a ze kontembeli a ka likuhure pampo yipo a likide asi mauyungo gena kapisi usili.—Yirug. 21:18-27.

Paurusa ga yi rugene ano ya mu pere mpito ‘zokugava undipo nokukoreka mbudi zongwa.’ (Fil. 1:7) Nye pontembeli Vajuda tava piyaganeke vantu nokuhara kudigapa Paurusa. Makura mupitisili govakwayita goVaroma ta mu gusa po. Apa Paurusa va here kumutwara va ka mu sopore ta uyunga asi age ngomvharwera zaRoma. Makura tava mu twara koKasereya omu ngava ruganene nompanguro domoJudeya. Oko ga ka gwene mpito zokukagavera undipo kovapangeli. Ntani vantu vamo va gwene mpito va dive ko yoyinzi kuhamena epuliro lyoVakriste.

Yirugana egaununo 24, kwa faturura kuhamena omu Paurusa ga mu pangwire Felikisi, nguuru goMuroma moJudeya ogu ga divire ko nare kuhamena epuliro lyoVakriste. Vajuda kwa pere Paurusa usima asi ga tezere po veta zoVaroma mononkedi ntatu. Awo kwa tente asi Paurusa kwa retere ndjorongani moVajuda navenye ntani asi age kwa tulisire po kambunga kendi koukareli nokunyateka ntembeli ezi za kere mepopero lyoVaroma. (Yirug. 24:5, 6) Mausima ogo ngano ga mu twaredesere va ka mu dipage.

Ayo ya kara nomulyo koVakriste naina va dive eyi ga rugene Paurusa apa va mu pere mausima. Age kwa litulire ntani ga likidire efumadeko. Paurusa kwa tumbwire Veta novaporofete ntani ga uyungire asi nga karere ‘Karunga gozinyakurwendi.’ Ou yiwo umanguruki va gwene Vajuda mepangero lyoVaroma. (Yirug. 24:14) Konyima Paurusa ga ka poperere nokukagavera undipo kepuliro lyendi kwanguuru Porokiusi Fesitusa, ntani kwahompa Herodesa Agilipa.

Mokuninka asi va ka mu pangure pauhunga, Paurusa yipo ga tokwere asi: “Ame kwahompa gwaRoma nina tara.” Age kwa kere mupangeli gomunene posiruwo sina.—Yirug. 25:11.

Muengeli kwa tanterere Paurusa asi: “Kosipara sahompa gwaRoma yiko tupu ngo ka sikama.” (Yirug. 27:24) Apa Nero ga tamekere kupangera age kwa uyungire asi kapi nga gendesa nompanguro nadinye pwagelike. Ure wonomvhura ntantatu age kwa pere vapeke va mu pangwire po. Buke zimwe kwa uyunga asi apa Nero nga pangura age nga yi ruganene mombara zendi nevatero lyovagavindunge ava va kere noudivi.—Buke The Life and Epistles of Saint Paul

 Bibeli kapi za tumbura asi Nero yige ga pangwire Paurusa ndi age kwa pere gwapeke a mu pangwire po nokuyamutantera yitundwamo. Nye mompanguro ozo, Paurusa kwa fatwilire asi age nga karere Karunga goVajuda ntani nga korangeda vantu navenye va fumadeke epangero. (Rom. 13:1-7; Tit. 3:1, 2) Kuna kumoneka asi Paurusa ya mu tompokere kupopera mbudi zongwa mompanguro morwa va mu mangwilire.—Fil. 2:24; Fir. 22.

Jesus kwa tanterere varongwa vendi asi: “Ngava mu twara komeho zovapangeli nohompa mwarwange.” (Mat. 10:18) Azo mfumwa mokukarera po Jesus monkedi ozo. Apa atu litura mo mokupopera mbudi zongwa monompaguro, ose pamwe kugwana efundo. Nye matokoro aga ava tura po monompanguro vantu wokudira kusikilira mo kapi aga ‘koreke’ nawa-nawa umanguruki wokuzuvhisa mbudi zongwa. Uhompa waKarunga yiwo welike ngau ya gusa po mahepeko nomaudona nagenye.—Muud. 8:9; Jer. 10:23.

Naina, apa Vakriste ava popere epuliro lyawo, awo kuyererepeka edina lyaJehova. Ngwendi Paurusa, nose twa hepa kukara tuna litura nokuuyunga usili ntani nokufaturura nawa. Jesus kwa tanterere vasikuli vendi asi: “Kapisi omu hove kugazara eyi nomu ka lipoperesa. Yeeyi ame ngani mu pa nonkango nounongo, asi nonkore deni ngadi ka yi vhure kumulimburura ndi kumupatanesa.”—Ruk. 21:14, 15; 2 Tim. 3:12; 1 Pet. 3:15.

Apa Vakriste ava popere epuliro lyawo komeho zovahompa novanguuru ndi vapangeli, awo kuvhura kugava umbangi kovantu ava va dira kuzuvha rumwe mbudi zongwa. Matokoro gamwe va tulisa po monompanguro kwa retesa po marunduruko monoveta, edi da tupa emanguruko lyokuzuvhisa ntani tu twikire kurugana ukareli wetu. Yi kare asi yitundwamo musinke yomonompanguro odo, uradi ou ava likida vakareli vaKarunga kumuhafesa.