1, 2. Morwasinke Nombangi daJehova adi dwarere nawa? (Tara efano pepenuno 17.)

SAINTUNGA zomoHoranda kwa divisire kuhamena epongo lyovampitisili womaukarelikarunga asi: “Nsene upyu una kara ko awo kudwara yikoverero yokudira kuwapera.” Nye azo kwa divisire hena asi: “Nombangi daJehova kwa lisiga. . . . Koyigongi yawo vamati novagara kudwara nondjakete nonotaye ano vakadona novakadi kudwara nondoroko dokuwapera . . . donongwa.” Nombangi daJehova kugwana epandadeko morwa ‘yidwara yawo yoyiwa yokuliza nonkareso zongwa eyi ayi gava undipo asi awo kwa tjira Karunga.’ (1 Tim. 2:9, 10) Nampili ngomu metjangwa eli mupositoli Paurusa kwa uyungire kuhamena vakadi, simpe kutamba hena nokovagara woVakriste.

² Ndwareso zongwa mulyo kwetu ose vakareli vaJehova ntani mulyo kwaKarunga ogu atu karere. (Gen. 3:21) Eyi azi uyunga Bibeli kuhamena ndwareso nomaliwapaiko kulikida nawa-nawa omu Karunga ga harera vakareli vendi wousili va dware. Yipo nye, kapisi tu dware ndi tu liwapaike kuliza neyi ayi tu hafesa. Nye twa hepa kugazadara ko eyi ayi hafesa Jehova, ogu ga sita nayinye.

3. Yisinke natu lirongera ko koVeta ezi ga geve Karunga koVaisraeli kuhamena ndwareso?

 ³ Pasihonena, Karunga kwa geve Veta koVaisraeli ezi za va poperere komparukiso zokunyata zonomuhoko dapeke. Veta kwa likidire asi Jehova kwa silikire vakadi mokudwara yidwara yovagara ndi vagara yovakadi. (Resa Deuteronomium 22:5.) Kuliza nompangera ozo, kulikida nawa-nawa asi Karunga kapi ga hara ndwareso ezi nazi ninkisa vagara va moneke ngwendi vakadi ndi vakadi va moneke ngwendi vagara ndi ndwareso zokudira kuvhura kudimburura asi ogu ana yi dwara mugara ndi mukadi.

4. Yisinke nayi vatera Vakriste va ture po matokoro gomawa kuhamena eyi nava dwara?

⁴ MoBibeli kwa kara mo nompango edi adi vatere Vakriste va ture po matokoro gomawa kuhamena omu nava dwara, yi kare asi kupi oku va tunga ndi mpo zawo musinke ndi mukarompepo ogu guna kara ko. Ose kapi twa hepa va tu pe elikwamo lyeyi natu dwara ndi eyi natu dira kudwara. Nye, ose kukwama nompango domoBibeli edi adi tu vatera tu tokore eyi natu dwara. Tu konakoneni nompango dimwe domoBibeli edi nadi tu vatera tu koneke ‘mpango zaKarunga neyi yoyiwa ya tu wapera ayo ya sikilira mo’ nsene tatu horowora eyi natu dwara.—Rom. 12:1, 2.

5, 6. Ngapi omu ndwareso zetu nazi kundama wopeke?

⁵ Mupositoli Paurusa kwa nkondopekere mulyo gompango atu gwana 2 Vakolinte 6:4. (Resa.) Emoneko lyetu kulikida asi ose vantu musinke. Sinzi sovantu kugazarera muntu kuliza neyi ava ‘mono nomeho gawo.’ (1 Sam. 16:7) Yipo nye, ngovakareli vaKarunga twa hepa kudiva asi kapisi tu dware tupu eyi twa hara nye twa hepa kugazadara ko omu nayi kundama wopeke. Nompango edi atu gwana moBibeli da hepa kutuvatera tu nyokere po kudwara yokukwata korutu ndi yokumonekesa ndi yokupindura malizuvho gomuntu. Eyi kwa kwatera mo kunyokera po kudwara yidwara eyi ayi monekesa maruha gonomuga. Kapi tuna hara kuninkisa vantu va li fe nomuga ndi va tare kwapeke morwa monkedi omu tuna dwara.

⁶ Nsene tu dwara yidwara yokuzera yoyiwa yokuzira mo, vantu ngava tu fumadeka ngovakareli vaJehova Musiti gwanayinye. Ntani kuvhura nga yi va kokere koukareli wousili. Ntani hena dwareso zetu zongwa ngazi fumadekesa ko mbunga zaJehova. Ngoyitundwamo, vamwe kuvhura ngava purakene kombudi zetu.

7, 8. Poyiruwo musinke twa hepa kudwara nawa?

⁷ Eyi atu dwara kukundama Karunga gwetu gokupongoka novapuli vakwetetu novantu womomukunda. Tuna hepa kudwara monkedi zokufumadeka Jehova nombudi ezi atu zuvhisa. (Rom. 13:8-10) Unene po twa hepa kudwara nawa apa atu zi komapongo nomokuzuvhisa. Twa hepa kudwara ‘yoyiwa eyi ya wapera ava va tjira Karunga.’ (1 Tim. 2:10) Monomukunda dimwe yidwara yimwe kapi ya fira kuyidwara. Yiyo nye Nombangi daJehova uzuni mudima kufumadeka nompo domonomukunda yipo va dire kupundukisa wopeke.

 ⁸ Resa 1 Vakolinte 10:31. Apa atu zi koyigongi, ndwareso zetu za hepa kukara zongwa zokuwapera kapisi zi fane ngwendi zovanauzuni. Nampili komeho ndi konyima zosigongi nsene kuna kukagendagura po nokukalihafesa twa ha dwara monkedi zokudira kuwapera ndi zokulindjambaika. Nsene tu dwara nawa, kapi ngatu li fa nomuga kulitumbura asi ose Nombangi daJehova. Ntani ngayi tu pa emanguruko lyokugava umbangi nsene mpito zina moneka.

9, 10. Ngapi etjangwa lyoVafilipi 2:4 nali kundama ndwareso zetu?

⁹ Resa Vafilipi 2:4. Morwasinke Vakriste va hepera kugazadara ko omu ndwareso zawo azi kundama vapuli vakwawo? Konda zimwe kuna kara asi vantu vaKarunga kukondja kusikisa mo mpango ezi asi: “Ano omu dipage madowo aga aga rugana mweni, ngwendi gaga: ruhonda, nonyata noruho nomadowo gomadona.” (Koros. 3:2, 5) Kapi tuna hara vapuli vakwetetu yi va digopere kusikisa mo epukururo olyo. Vanavazinyetu ava va siga nkareso zoruhonda awo simpe kukondja kurwanesa po madowo gomadona. (1 Kol. 6:9, 10) Yipo nye kapi tuna hara yi va karere udigu kukondja morwa ndwareso zetu.

¹⁰ Apa atu kara kumwe novanavazinyetu, ndwareso zetu kapisi zi va pundukise. Yi kare asi komapongo ndi nkenye oku. Ose twa kara nemamguruko lyokuhorora eyi natu dwara. Nye nampili ngoso, natuvenye twa kara  nositumbukira sokudwara monkedi ezi nazi vatera wopeke va kare vana kuhuka ntani va sikise mo nompango daKarunga dokupongoka pamagazaro nomononkango nomonkareso. (1 Pet. 1:15, 16) Eharo lyosili “kapi ali reta yoyidona, kapi ali papara yeeyi lya hara lyene.”—1 Kol. 13:4, 5.

11, 12. Yisinke twa hepa kudiworoka nsene tatu tokoro eyi natu dwara?

¹¹ Apa vakareli vaKarunga ava tokora eyi nava dwara, awo kudiworoka asi ‘nkenye eyi kuhoroka posiruwo esi va paka po.’ (Muud. 3:1, 17) Yimo, kuyikwata egano asi mukarompepo ntani nomaukaro gamwe kukundama eyi natu dwara. Nampili ngoso, nompango daJehova kapi adi runduruka kuliza nomukarompepo.—Mara. 3:6.

¹² Pokwenye, udigu unene kudwara yidwara yokuwapera yokuzira mo. Nye nampili ngoso, vanavazinyetu kuyihafera nsene tu dira kudwara yokukwata korutu ndi yokumonekesa. (Joba 31:1) Ntani nsene tatu zi komukuro ndi kondama tu ka zogane yidwara eyi tuna ka zoganesa nayo ya hepa kukara yokuwapera. (Yis. 11:2, 20) Nampili ngomu vantu wovanzi mouzuni ava dwara yidwara yokuzoganesa yokumonekesa rutu, ose ngovakareli vaJehova kwa kara nosinka sokufumadekesa Karunga gokupongoka ogu twa hara.

13. Morwasinke mpango zomo-1 Vakolinte 10:32, 33 nazi kundamena ndwareso zetu?

¹³ Pwa kara hena mpango zimwe zomulyo ezi azi tu vatere tu horowore yidwara yokuwapera. Ose kugazadara ko ezwi lyokomutjima lyavawopeke. (Resa 1 Vakolinte 10:32, 33.) Twa hepa kutakamesa asi ndwareso zetu kapisi zi pundukise wopeke. Paurusa kwa tente asi: “Nkenye ogu a pakere mbili mukwawo mokumuruganena uwa asi a kure mepuro.” Age kwa tente hena asi: “Yeeyi naKristusa si kapi ga lipakerere mwene mbili.” (Rom. 15:2, 3) Jesus nga pakere mbili yihepwa yovakwawo morwa age kwa here kusikisa mo mpango zaKarunga. Yipo nye, nose twa hepa kunyokera po ndwareso ndi yidwara eyi twa hara nye ayo kuvhura yi pundukise ava tuna hara kuzuvhisira.

14. Ngapi vareti nava ronga vana vawo va fumadeke Karunga monkedi ezi ava dwara?

¹⁴ Vareti woVakriste va kara nositumbukira sokuronga mapata gawo omu nava tura pasirugana nompango domoBibeli. Ayo kwa kwatera mo asi vareti vene novana vawo va dware nokuliwapaika monkedi ezi azi hafesa Karunga. (Yis. 22:6; 27:11) Vareti kuvhura va ronge vana vawo va fumadeke Karunga gokupongoka ogu ava karere pokutura po sihonena sosiwa nokuvapa mavyukiso nomapukururo gomawa monkedi zeharo. Ayo mulyo unene kovareti mokuronga vana vawo oku nava vhura kuranda yidwara yokuwapera. Ntani kapisi va rande tupu yidwara eyi va hara nye eyi ngayi va pulisira mokusikisa mo situmbukira sawo sokukarera po Jehova Karunga.

15. Yisinke nayi vhura kutuvatera tu tokore eyi natu dwara?

¹⁵ Bibeli kugava mapukururo gomawa kwetu aga naga tu vatera tu ture po matokoro gomawa aga naga vhura kufumadekesa ko Karunga. Eyi atu dwara kulikida yidwara eyi twa hara. Ntani ose kuranda yidwara kuliza noyimaliwa eyi atu gwana. Nye nampili ngoso,  yidwara yetu nkenye apa ya hepa kukara yina zere, yokuwapera ndi yokuliza noukaro ntani neyi va pulisira oku twa tunga.

16. Morwasinke ya karera mulyo kupapara yidwara yokuwapera?

¹⁶ Kapi ya kara ureru kugwana yidwara yokuwapera ndi neyi yokuzira mo. Yitora yoyinzi kurandesa yidwara eyi yina kara momode. Yipo nye kuvhura yi guse siruwo nelituromo lyetu mokupapara nondoroko nonohema nonoranga nonosuta dokudira kupata unene. Nye vapuli vakwetetu ngava tu pandadeka kelituromo lyetu lyokupapara yidwara yokuwapera. Nampili yi tu guse siruwo mokupapara yidwara yokuwapera, ose ngatu gwana ruhafo rorunene pokufumadekesa Guhyetu gemeguru.

17. Maukaro musinke naga ninkisa munazinyetugara a tokore nsene asi kuvhura a kare nononzwedu?

¹⁷ Ngapi kuhamena vanavazinyetugara ava ava sigilire nonzwedu dawo? Veta zaMosesa kwa pulisilire vagara va sigilire nononzwedu dawo. Nye ngesi Vakriste kapi vana kukwama hena Veta ozo. (Lev. 19:27; 21:5; Gar. 3:24, 25) Monompo dimwe, vagara va va pulisira kukara nononzwedu edi vana kurura nawa ntani kapi ayi kondere vantu va dire kupurakena mbudi zoUhompa. Vakuronambunga novakwafimbunga vamwe kwa kara nononzwedu. Nye nampili ngoso, vanavazinyetugara vamwe kudikurura ko. (1 Kol. 8:9, 13; 10:32) Monompo ndi komavango gamwe vagara kapi ava kara nononzwedu ntani vagara woVakriste kapi va va pulisira kukara nononzwedu. Yipo nye nsene munazinyetugara a kara nononzwedu kuvhura yi mu ninkise a dire kufumadekesa Karunga mondwareso nomomaliwapaiko gendi ntani age ta tura epuko.—Rom. 15:1-3; 1 Tim. 3:2, 7.

18, 19. Ngapi etjangwa lyaMika 6:8 ali tu vatere kombinga zondwareso zetu?

¹⁸ Ayo kutuhafesa pokudiva asi Jehova kapi a tu pe noveta dononzi kuhamena ndwareso nomu natu liwapaika. Nye age kutupulisira tu ruganese umanguruki wetu yipo tu ture po matokoro gomawa kuliza nomapukururo gomoBibeli. Yipo nye, nampili mondwareso nomomaliwapaiko getu kuvhura tu likide asi ose twa ‘linunupika melikwatakano lyetu naKarunga.’—Mika 6:8.

¹⁹ Kulinunupika kwa kwatera mo kulikonakona nyamwetu kuliza noupongoki waJehova, morwa ose kwa korera mwendi tu gwane mavyukiso gomawa. Kulinunupika kwetu kwa kwatera mo hena kufumadeka malizuvho nomagano govakwetu. Yipo nye tuna hara kukara ‘nelinunupiko melikwatakano naKarunga’ pokuparuka kuliza nonompango dendi ntani pokufumadeka malizuvho govakwetu.

20. Ngapi omu ndwareso zetu nazi kundama wopeke?

²⁰ Monkedi omu atu dwara ya hepa kulikida asi ose Nombangi daJehova. Vanavazinyetu ntani nava wopeke va hepa kuyimona asi ose twa wapera kukara vakareli vaKarunga. Karunga kwa kara nonompango dokukuhuka, ntani ose kukondja tu di sikise mo. Vanavazinyetu ava ava dwara nawa nokulikida nkareso zongwa kuyivapandwira morwa ayo kukoka vantu va tambure mbudi ezi azi twaredesa komwenyo gwanarunye ntani awo kufumadeka nokuhafesa Jehova. Kutura po matokoro gomawa kuhamena ndwareso zetu, nga yi fumadekesa ko Karunga gwetu.—Epis. 104:1, 2.