Egaununo olyo kulikida asi mupositoli Paurusa kwa tembe kombudi ndi kononkango dokuhamena sitambo saKarunga edi da kara moBibeli.

Etjangwa lyoVahebeli 4:12 nkenye apa kuliruganesa moyimbapiratjangwa yetu mokulikida asi Bibeli kwa kara nononkondo dokurundurura eparu lyovantu ntani ya wapa kuliruganesa morupe rwangoso. Nye mulyo kutarurura oku lya tamekera egaununo lyoVahebeli 4:12. Megaununo olyo, Paurusa kwa tumangedere Vakriste woVahebeli mokukwatesa ko sitambo saKarunga. Sitambo oso kwa si tumbwire momatjangwa. Paurusa kwa ruganesere sihonena soVaisraeli ava va zowere moEgipite. Awo kwa kere nehuguvaro lyokuza kosirongo esi sa “zura masini nousi,” oku ngano va ka kere mombili ndi mepwizumuko.—Ex. 3:8; Deut. 12:9, 10.

Oso yiso sa kere sitambo saKarunga. Nye, konyima Vaisraeli kwa ya kere nonomutjima donondona kapi va kere nepuro, makura sinzi sawo kapi va zire mepwizumuko lina. (Num. 14:30; Jos. 14:6-10) Paurusa kwa uyungire hena asi “etumbwidiro lyokuza mepwizumuko lyaKarunga” simpe polili. (Heb. 3:16-19; 4:1) “Etumbwidiro” olyo kuna kara ruha rositambo saKarunga. Ngwendi moomu va yi rugene Vakriste woVahebeli, nose kuvhura tu lironge kuhamena sitambo oso nokusikwatesa ko. Mokupameka asi etumbwidiro eli kwa tunda moMatjangwa, Paurusa kwa temwininine Genesis 2:2 ntani Episarome 95:11.

Twa hepa kudiworoka asi “etumbwidiro lyokuza mepwizumuko lyaKarunga simpe polili.” Ose twa kara nepuro asi etumbwidiro lyokuza mepwizumuko lyaKarunga ngali sika mo ntani ose hena twa rugana ko yuma mokuza mo. Kugusa ko tupu kusikisa mo Veta zaMosesa ndi kurugana yirugana yoyiwa, twa hepa hena kukara nepuro ngomu tuna kukwatesa ko sitambo saKarunga. Ngamoomu tuna yi tumbura nare, vantu wovanzi uzuni mudima kwa tameka kulironga Bibeli ntani va ya dimburura sitambo saKarunga. Sinzi sawo ya va tumangeda va rundurure eparu lyawo nokukara nepuro ntani nokugwana ekuho ngoVakriste. Marunduruko aga va tura po kulikida asi “nonkango daKarunga kwa kara nomwenyo nononkondo.” Sitambo saKarunga ngomu va si tumbura moBibeli, sa rundurura eparu lyetu ntani kuna kara simpe nononkondo meparu lyetu.