1, 2. Maudigu musinke ava kondjo nago vakareli vaJehova?

KUTUNDILIRA kwaAbeli muntu gokuhova gomulimburukwi dogoro momazuva getu, vakareli wovalimburukwi kwa kondja unene. Mupositoli Paurusa kwa tjangerere Vakriste woVahebeli asi: “One kwa lididimikire mokumuhepeka kweni kokudigu,” ngomu va kondjerere matungiko gaJehova. (Heb. 10:32-34) Paurusa kwa hetakanesere ekondjo lyoVakriste kovantu ava ngava lihameke momaudano goVagereka ngwendi kuduka noudano wonomungunda ntani kutoona nyongo. (Heb. 12:1, 4) Naina, nose kuna kara melirombero lyomwenyo gwanarunye ntani kuna kuligwanekera nononkore edi dina hara kutudonganesa nokutuganda nokutudompesa mutjima ntani tu zumbanese matungiko komeho.

² Pomuhowo, ose ‘kurwanesa’ ndi kulikondjesa naSatana nouzuni wendi woudona. (Efe. 6:12) Ayo mulyo tu nyokere po “nohotepopero dovantu.” Eyi kwa kwatera mo marongo goyimpempa nomagano govantu noyirugana yokunyata ngwendi kuhondera, kukoka makanya nepangwe ntani kunwa unene yikorwesa. Ntani twa hepa kukondja ndi kurwanesa maupirankondo getu ntani nedompo mutjima.—2 Kol. 10:3-6; Koros. 3:5-9.

3. Ngapi omu Karunga a tu deura tu rwanese nonkore detu?

 ³ Kuvhura tu funde po nonkore odo dononkondo ndi? Nhi, nye ntudi twa hepa kukondja. Paurusa kwa ruganesere sihonena somutooni nyongo mosiruwo sanare apa ga uyungire kuhamena mwene asi: ‘Ame ko kapi nina kutoona nyongo ngwendi gogu ana kutoona mompepo.’ (1 Kol. 9:26) Ngwendi moomu mutooni nyongo a rwanesa nkore zendi, nose twa hepa kulikandura kononkore detu. Jehova kutudeura ntani kutuvatera. Age kutupa mavyukiso kupitira moBibeli. Age hena kutuvatera kupitira moyimbapiratjangwa, komapongo ntani koyigongi. Ove kutura pasirugana eyi o lirongo ndi? Nsene kapi o yi rugana, ove ngwendi kuna “kutoona mompepo” ndi kapi ono kurwanesa nonkore doge.

4. Ngapi omu natu nyokera po Satana yipo a dire kutufunda?

⁴ Nonkore detu kuvhura di tu homokere apa atu dili kuyindindira ntani apa atu dompo mutjima, yipo twa hepera kuvangarara. Bibeli kuturondora asi: “Walye omu tarerere udona u mu funde, nye one fundiseni udona kouwa.” (Rom. 12:21) Ekorangedo eli asi walye atu tarerere ‘udona u tu funde’ kulikida asi ose kuvhura tu funde po udona. Ose kuvhura tu yi rugane oyo nsene tu twikira kurwanesa udona. Nye nsene tu dira kuvangarara nokuhageka kukondja, Satana nouzuni wendi ntani upirankondo wetu kuvhura nga yi tu funde. Yipo nye wa ha pulisira Satana a ku tjilise o dire nonkondo dokumufunda po.—1 Pet. 5:9.

5. (a) Yisinke nayi tu vatera tu twikire kukondja yipo Karunga a tu tungike? (b) Yihonena musinke yomoBibeli natu ka konakona?

⁵ Mokuvatompoka, owo vana kukondja va ha divara sitambo sawo seyi vana kukondjera. Mokugwana matungiko kwaKarunga, twa hepa kudemenena kehuguvaro eli atu resa moVahebeli 11:6 asi: “Ogu a zi kwaKarunga, a pure ntani asi Karunga kweli, age hena asi yige a futu ava ava mu papara.” Nkango zoRugereka vatoroka asi ‘kupapara’ kwa tamba kelituromo lyenene. (Yirug. 15:17) MoBibeli kwa kara mo yihonena yovagara novakadi ava va kondjere yipo Jehova a va tungike. Jakopo naRakera naJosefa ntani Paurusa kwa ligwanekerere nomaudigu aga ga va rorwere pamalizuvho noparutu, nye nampili ngoso va ga lididimikilire dogoro tava gwana matungiko. Ngapi omu natu va honena?

6. Yisinke ya vaterere Jakopo a lididimike ntani ngapi omu va mu tungikire? (Tara efano pepenuno 8.)

⁶ Jakopo kwa kondjere nokulididimika morwa kwa here Jehova nokukara norupandu koyininke yopampepo ntani kwa kere nepuro metumbwidiro lyaJehova asi nga tungika ruvharo rwendi. (Gen. 28:3, 4) Eyi yiyo ya ninkisire Jakopo apa ga kere nonomvhura 100 a kondje paapa ga hulira a gwane matungiko kwaKarunga, age hena kwa likondjesere nomuengeli. (Resa Genesis 32:24-28.) Jakopo ga kere nononkondo nelididimiko lyokukondjesa muengeli gwina gononkondo ndi? Hawe. Age kwa tokomenene kukondja ngorooro. Ntani ga ya gwene etungiko morwa elididimiko lyendi. Jakopo va ya mu pere edina Israeli (kutanta asi “kuna kondjo naKarunga”). Jakopo ga gwene matungiko gaJehova aga nose tuna kukondjera.

7. (a) Udigu musinke wounene ga kere nawo Rakera? (b) Ngapi omu ga twikilire kukondja dogoro a gwane matungiko?

 ⁷ Rakera mukadaJakopo nage kwa here kumona omu Jehova ga vhulire kusikisa mo etumbwidiro lyendi kwaJakopo. Nye pwa kere udigu wounene. Age kwa kere nganze. Posiruwo sina, kwa kere eswau lyenene mokukara nganze. Ngapi omu Rakera ga gwene nonkondo dokulididimikira udigu owo wa mu dompesere mutjima nye kwato eyi ga vhulire kurugana ko? Age kapi ga zumbanesere ehuguvaro lyendi. Nye age kwa twikilire kukondja pokukanderera unene. Jehova ga zuvhire ekanderero lyendi ntani ga mu tungikire novana. Oyo kwa hafesere Rakera yipo ga tente asi: ‘Ame kwa rwa yita yoyidigu yiyo na yi dina.’—Gen. 30:8, 20-24.

8. Udigu musinke ga ligwanekerere nawo Josefa ntani yisinke natu lirongera ko kosihonena sendi?

⁸ Sihonena saJakopo naRakera sa vaterere munwawo Josefa a ya vhure kulididimikira maudigu aga ga ya hetekere epuro lyendi. Apa ga kere Josefa nonomvhura 17, kwa ligwanekerere nomaudigu. Vakuru vendi kwa mu randesere koupika morwa mfudu va mu zuvhilire. Ano konyima ga ka lididimikilire kukara modorongo moEgipite ga hana unzoni. (Gen. 37:23-28; 39:7-9, 20-21) Josefa kapi ya mu dompesere mutjima ndi a kare nonkoko. Nye age kwa demenene kelikwatakano lyendi naJehova. (Lev. 19:18; Rom. 12:17-21) Ngano tu lirongere ko kosihonena saJosefa. Pasihonena, nsene asi pounona kwa tu tekwire momudona ndi kuna kara moukaro ou una kutudompesa mutjima, twa hepa kutwikira kukondja nokulididimika. Nsene tu rugana ngoso Jehova nga tu tungika.—Resa Genesis 39:21-23.

9. Ngwendi Jakopo naRakera ntani Josefa, yisinke twa hepa kurugana yipo Jehova nga tu tungike?

⁹ Gazadara udigu ou ono kuligwanekera nawo. Nampo udigu welitondororo ndi walye kuna kukutekura momudona ndi kuna kukuswaura. Ndi nampo gumwe kukurundira morwa mfudu a ku zuvhire. Mevango lyokudompa mutjima, diworoka eyi ya vaterere Jakopo naRakera ntani Josefa va twikire kukarera Jehova noruhafo. Karunga ga va nkondopekere nokuvatungika morwa awo kwa twikilire kulikida rupandu koyininke yopampepo. Ntani va twikilire kukondja nokurugana yokuliza nomakanderero gawo. Ose kuna kuparuka pouhura wouzuni ou woudona, yiyo twa hepera kukwaterera kehuguvaro lyetu lyeyi yokomeho. Ove ono tokomene kukondja yipo Jehova nga ku tungike ndi?

10, 11. (a) Ngapi omu natu kondjera matungiko gaKarunga? (b) Yisinke nayi tu vatera tu ture po matokoro gomawa nokufunda po madonganeso nedompo mutjima?

¹⁰ Momaukaro musinke gamwe aga natu hepa kukondjera matungiko gaKarunga? Ukaro umwe ou ava kondjo nawo vantu wovanzi kuna kara upirankondo wetu. Ano vamwe kukondja va tunge po eharo lyokuzuvhisa. Ndi nampo ove kwa kara nouvera ou wa hepa kulididimikira ndi mukuma morwa udike. Vamwe kuvadigopera kugusira po ogu ga va zonena. Yi kare asi nomvhura dokuhura  kupi twa karera Jehova natuvenye twa hepa kukondja koyininke eyi nayi vhura kutudonganesa mokukarera Karunga ogu a futu valimburukwi.

¹¹ Twa hepa kukondja mokutura po matokoro gomawa nokukara noulimburukwi. Unene po nsene mutjima gwetu kuna kutupukisa. (Jer. 17:9) Nsene ono yi dimburura asi mutjima goge kuna kukupukisa, hundira mpepo zokupongoka. Ekanderero nompepo zokupongoka nga yi kupa nonkondo dokurugana youhunga yipo Jehova nga ku tungike. Rugana kuliza neyi ono kanderere. Hetekera ko kuresa Bibeli nkenye ezuva ntani kara nelirongo lyanyamoge lyoBibeli ntani noUkareli wEpata nkenye apa.—Resa Episarome 119:32.

12, 13. Yisinke ya vaterere Vakriste vavali va nyokere po madowo gomadona?

¹² Pwa kara yihonena yoyinzi eyi ya likida omu Nonkango daKarunga nompepo zendi ntani noyimbapiratjangwa ya vatera Vakriste va nyokere po madowo gomadona. Mudinkantu gumwe kwa resere sirongwa “Ngapi nani nyokera po madowo gomadona?” esi sa kara moAwake! 8 Sindimba 2003. Ngapi omu ga lizuvhire? Age kwa tente asi: “Ame kuna ku kondja kunyokera po magazaro gomadona. Apa na resere mosirongwa oso nokudimburura asi ‘wovanzi kuvadigopera kukondja kunyokera po madowo gomadona,’ ame na lizuvhire asi kapisi nyamelike na kupita moudigu  owo.” Mudinkantu ogo ga gwanena mo hena uwa mosirongwa “Mparukiso musinke a tambura Karunga?” esi sa kara moAwake! 8 Sikukutu 2003. Age kwa tente asi kwavamwe udigu owo kwa fana ngwendi ‘nsonga zina kara morutu.’ (2 Kol. 12:7) Ngomu vana kukondja kunyokera po madowo gomadona, awo kukara nehuguvaro lyewa. Mudinkantu gwina kwa tente asi: “Morwa oyo, ame kulizuvha asi nkenye ezuva kuvhura ni kare noulimburukwi. Tani pandura Jehova mokuruganesa mbunga zendi mokutuvatera tu lididimike nkenye ezuva mouzuni ou woudona.”

¹³ Tu konakoneni hena sihorokwa samunazinyetukadi gomoAmerika. Age kwa tanta asi: “Tani mu pandura pokutupa eyi twa hepa posiruwo esi tuna yi hepere. Ame kulizuvha asi yirongwa eyi nyame va yi tjangera. Ame kwa kondja nomvhura dononzi mokunyokera po edowo eli ga nyenga Jehova. Poyiruwo yimwe kulizuvha ngwendi ni hageke kukondja ndi ni lisigilire. Ame na yi diva asi Jehova munankenda ntani kugusira po, nye morwa na kara nedowo lyedona ntani kapi ani li nyokere po, ame kulizuvha asi kapi ta vatere nge. Udigu owo kwa kundama eparu lyange. . . . Konyima zokuresa sirongwa ‘Wa kara “neharo lyokudiva” Jehova ndi?’ moRuhungu 15 Nsinano 2013, na lizuvhire asi Jehova ana hara a vatere nge.”

14. (a) Ngapi Paurusa ga lizuvhire kuhamena maudigu gendi? (b) Monkedi musinke nayi tu tompoka kurwanesa po maupirankondo getu?

¹⁴ Resa Varoma 7:21-25. Paurusa ga divire omu ya kara udigu kunyokera po madowo gomadona noupirankondo wetu. Nampili ngoso, age ga kere nehuguvaro asi nga vhura kugafunda po pokukanderera kwaJehova nokutura epuro monzambo zaJesus zosizoweseso. Ose ngapi? Nose kuvhura yi tu tompoke ngomu tuna kukondja noupirankondo wetu. Monkedi musinke? Pokuhonena Paurusa nokuhuguvara mwaJehova kapisi mononkondo danyamwetu ntani pokukara nepuro mosizoweseso.

15. Ngapi omu makanderero naga vhura kutuvatera?

¹⁵ Poyiruwo yimwe Karunga kundindira ko kwetu tu mu tantere maudigu getu. Pasihonena, ngapi nsene nyamwetu ndi gekoro kuna kuvera unene ndi kuna kututekura momudona? Twa hepa kuhuguvara unene mwaJehova pokukanderera kwendi a tu nkondopeke yipo tu twikire kumulimburukwa nokumukarera ntani tu dire kudompa mutjima. (Fil. 4:13) Yihorokwa yovantu momazuva gaPaurusa ndi momazuva getu, kulikida nawa-nawa asi makanderero kuvhura ga tu vatere tu kare nononkondo nepuro lyokutwikira kulididimikira.

16, 17. Yisinke ono tokomene kurugana ngomu ono kukondja?

¹⁶ Muzonaguli kuna hara o hageke kukondja yipo a kufunde po. Tokomena ‘kukwaterera koyininke yoyiwa.’ (1 Tes. 5:21) Kara nehuguvaro asi ove kuvhura o funde po Satana nouzuni wendi nomadowo gomadona. Kuvhura hena o funde, pokuhuguvara mwaKarunga asi nga kunkondopeka.—2 Kol. 4:7-9; Gar. 6:9.

¹⁷ Mwanayinye, twikira kurwa nokukondja nokulididimikira. Kara nehuguvaro asi Jehova nga ‘kutjukumwina yoyinzi yoyiwa yomarudi nagenye.’—Mara. 3:10.