1-3. (a) Marunduruko musinke pamwe aga aga kara udigu kutura po konyima zekuho? (b) Nsene asi udigu kutura po marunduruko, mapuro musinke natu lipura? (Tara efano.)

MONOMVHURA DONONZI, Kevin nga dana ukarata nokukoka makanya ntani nga nu unene marovhu. ^[1] Makura yipo ga lirongere kuhamena Jehova ntani ga here kukara kaume kendi. Nye mokukara kaume kaJehova, ga hepere kutura po marunduruko meparu lyendi. Nevatero lyaJehova ntani noBibeli, ya mu tompokere kutura po marunduruko ogo.—Vahebeli 4:12.

² Konyima zapa Kevin ga gwene ekuho, ga hepere simpe kurundurura nkareso zendi yipo a kare Mukriste gomuwa. (Vaefeso 4:31, 32) Pasihonena, age nga handuka usimbu. Ayo ya mu tetukisire apa ga dimbwilire omu ya kara udigu  kulironga kupangera ehandu lyendi. Kevin kwa tanta asi kulironga kupangera ehandu lyendi kwa mu digoperere unene kupitakana kuhageka udona ou nga rugana komeho a gwane ekuho. Nye morwa kulikwambera Jehova a mu vatere ntani nokulironga nkenye apa Bibeli, ayo ya mu tompokere kutura po marunduruko.

³ Komeho tu gwane ekuho, sinzi setu kwa tulire po marunduruko gomanene meparu yipo tu paruke kuliza neyi azi rongo Bibeli. Nye nampili ngesi, ose twa yi dimburura asi twa hepa kutura po marunduruko gongandi mokuhonena Karunga naKristusa. (Vaefeso 5:1, 2; 1 Peturusa 2:21) Pasihonena, kuvhura tu dimburure asi ose kuna kusivana unene ndi kugamba vakwetu nokuvauyunga momudona. Ndi poyiruwo yimwe kuvhura tu tjire eyi nava uyunga vantu kutuhamena. Nampo twa hetekera ko kurundurura nkareso zetu monomvhura dononzi nye simpe kutura mapuko gokulifana. Kuvhura o lipure asi: ‘Morwasinke ayi digoperere nge kutura po marunduruko gangoso gomanunu? Yisinke nani rugana mokusikisa mo eyi azi rongo Bibeli yipo ni twikire kuwapukurura nkareso zange?’

4. Morwasinke pamwe ayi dilire kututompoka kuhafesa Jehova?

⁴ Ose twa hara Jehova, ntani tuna hara kumuhafesa. Morwa kapi twa sikilira mo, pamwe ose kapi ayi tu tompoka kumuhafesa. Ose kulizuvha ngwendi mupositoli Paurusa, ogu ga tente asi: “Eharo lyokurugana uwa lyeli tupu, yi rugana ko nye, hawe mpaga.”—Varoma 7:18; Jakopo 3:2.

5. Marunduruko musinke twa hepere kutura po komeho tu gwane ekuho, nye upirankondo musinke pamwe au tu digopere kupangera?

⁵ Mokuyakara mombungakriste, ose twa hepere kuhageka kurugana eyi ga nyenga Jehova. (1 Vakolinte 6:9, 10) Nye simpe kapi twa sikilira mo. (Vakorosi 3:9, 10) Nampili ngomu twa gwana ekuho, simpe kutura mapuko. Poyiruwo noyiruwo, ose kuvhura tu kare nedowo lyedona ndi yi tu digopere kupangera upirankondo wetu wongandi. Monomvhura dononzi, ose nampo kwa kondja mokufunda po upirankondo owo.

6, 7. (a) Yisinke ayi tu vatere tu kare vakaume vaJehova nampili ngomu twa dira kusikilira mo? (b) Morwasinke natu dilira kulikata-kata mokuhundira Jehova a tu dongwenene po?

⁶ Nampili ngomu twa dira kusikilira mo, simpe kuvhura tu kare vakaume vaJehova nokumukarera. Diworoka omu wa ya kara kaume kendi. Age yige ga mwene yoyiwa moge ntani ga here o mu dive. (Johanesa 6:44) Age ga yi divire asi ngo tura mapuko. Nye Jehova simpe ga hara o kare kaume kendi.

⁷ Jehova kwa tu pa uhwi wouwa, morwa kwa tu hara unene. Age kwa tumine Munwendi pevhu yipo a ya gave mwenyo gwendi mokutuzowora kononzo detu. (Johanesa 3:16) Apa atu lipuka, ose kuhundira Jehova a tu dongwenene po. Morwa sizoweseso, ose twa kara nehuguvaro asi nga tu dongwenena po ntani ngatu kara simpe vakaume vendi. (Varoma 7:24, 25; 1 Johanesa 2:1, 2) Diworoka asi  Jesus kwa fira vananzo ava ava litezurura. Nampili tu lizuvhe asi eyi twa rugana yidona unene, twa hepa kutwikira kuhundira Jehova a tu dongwenene po. Nsene tu dira kumuhundira a tu dongwenene po, ayo kwa fana ngwendi kunyoka kukuhwa mawoko getu nsene gana nyata. Ee, ruhafo musi tuna kara naro kweyi ga tu pulisira Jehova tu kare vakaume vendi nampili ngomu twa dira kusikilira mo!—Resa 1 Timoteusa 1:15.

8. Morwasinke natu dilira kuncenuna maupirankondo getu?

⁸ Yosili, kapi tatu vhuru kuncenuna maupirankondo getu ndi tu ligusa-guse mo. Jehova ga tu tantera omu vakaume vendi va hepa kukara. (Episarome 15:1-5) Nsene tuna hara kukara pepi naJehova, twa hepa kuhetekera ko kumuhonena ntani naMunwendi. Twa hepa kupangera madowo getu gomadona, ntani nokuganyokera po. Yi kare asi nare twa gwana ekuho, twa hepa kuwapukurura nkareso zetu.—2 Vakolinte 13:11.

9. Ngapi tuna yi diva asi kuvhura tu twikire kugusa muntu gomupe?

⁹ Mupositoli Paurusa kwa tanterere Vakriste asi: “Zumbeni muntu gomukuru-kuru, ogu nga pangere ukaro weni nogu a lizonagura mokukwama madowo goyimpempa, mu situnuke, nomutjima deni nonompepo deni di kare nompe. Guseni muntu gomupe, ogu va unga a kare sihwi saKarunga, ogu a lihorora moukaro ou wa hungama, awo wa pongoka. Ukaro wangoso mousili au tundu.” (Vaefeso 4:22-24) Eyi kutanta asi twa hepa kutwikira kutura po marunduruko ntani ‘nokugusa muntu gomupe.’ Yi kare asi nare twa gusa kukarera Jehova, kuvhura kulirongera ko yoyinzi koyikara yendi. Ntani Bibeli kuvhura kutuvatera tu rundurure nkareso zetu yipo tu honene Jehova.

10. Yisinke twa hepa kurugana mokutura po marunduruko, ntani mapuro musinke natu lipura?

¹⁰ Natuvenye kwa hara kukwama eyi azi rongo Bibeli. Nye twa hepa kukondja nsene tuna hara kutura po marunduruko. Morwasinke twa hepera kukondja? Morwasinke Jehova a dilire kuyiturerupikira yipo tu rugane youhunga?

11-13. Morwasinke Jehova ana harere tu kondje mokufunda po maupirankondo getu?

¹¹ Apa atu gazara uzuni nanayinye eyi ya kara mo, ose twa yi pura asi Jehova ga kara nononkondo dokurugana nkenye eyi. Pasihonena, age kwa rugana ezuva, eli lya kara nononkondo unene. Ezuva kugava site noupyu. Alyo kugava tupu upyu wokugwanena po yipo eparu li twikire apa pevhu. (Episarome 74:16; Jesaya 40:26) Jehova nage kugava nonkondo kovakareli vendi vepevhu nsene vana di hepa. (Jesaya 40:29) Jehova kuvhura ayi  tu rerupikire nsene a hara kugusa po maupirankondo getu nokuhagekesa po madowo getu gomadona. Nye morwasinke a dilire kuyirugana?

¹² Jehova kwa tu pa emanguruko lyokutura po matokoro. Age kutupulisira tu horowore nyamwetu nsene tuna hara kumulimburukwa ndi hawe. Apa atu mu limburukwa nokukondja kurugana mpango zendi, ayo kulikida asi twa mu hara ntani tuna hara kumuhafesa. Satana kwa tente asi Jehova kapisi mupangeli gomuwa. Nye apa atu limburukwa Jehova, ose kulikida asi tuna hara a kare Mupangeli gwetu. Ose twa yi diva asi Guhyetu geharo kutara ekondjo lyetu lyokumulimburukwa asi mulyo. (Joba 2:3-5; Yisewe 27:11) Apa atu kondjo mokupangera maupirankondo getu, ayo kulikida asi twa huguvara Jehova ntani asi tuna hara a kare Mupangeli gwetu.

¹³ Jehova kutanta asi twa hepa kukondja mokuhonena yikara yendi. (Vakorosi 3:12; resa 2 Peturusa 1:5-7.) Ntani age kuna tu harere tu kondje mokupangera magazaro nomalizuvho getu. (Varoma 8:5; 12:9) Ose kuhafa apa ayi tu tompoka kutura po marunduruko.

14, 15. Yisinke twa hepa kurugana yipo tu tunge po yikara eyi ga hara Jehova? (Tara kakende “ Bibeli nekanderero kurundurura eparu lyovantu.”)

¹⁴ Yisinke twa hepa kurugana yipo tu tunge po yikara eyi ga hara Jehova? Mevango lyokutokora eyi natu rugana mokutura po marunduruko, twa hepa kupulisira  Karunga a tu pitisire. Varoma 12:2 kutanta asi: “Mwa ha lifana nouzuni ou. Nye sigeni Karunga a rundurure magazaro geni, mu situnuke nawa-nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.” Mokudiva eyi ga hara Jehova, twa hepa kutambura evatero eli a gava. Twa hepa kuresa Bibeli nkenye ezuva, nokuteda ko kweyi tuna resa ntani nokuhundira Jehova a tu pe mpepo zendi zokupongoka. (Rukasa 11:13; Vagarata 5:22, 23) Monkedi zangoso, Jehova nga tu vatera tu dive eyi ayi mu hafesa, ntani ngatu lironga kugazara omu a gazara. Ngoyitundwamo, eyi atu gazara neyi atu uyunga neyi atu rugana ngayi hafesa Jehova ntani ngatu lironga kupangera maupirankondo getu. Nye nampili ngoso, ngatu hepa simpe kukondja.—Yisewe 4:23.

¹⁵ Kugusa ko kuresa Bibeli nkenye ezuva, twa hepa kuzilironga pokuruganesa yimbapiratjangwa ngwendi Ruhungu noAwake! Yirongwa yoyinzi yomoyifo oyo kuturonga omu natu honena yikara yaJehova ntani nomu natu pangera maupirankondo getu. Kuvhura tu gwane yirongwa ndi matjangwa gongandi aga naga tu vatera. Ose kuvhura tu pungure matjangwa noyirongwa oyo yipo ngatu rugurure kuyiresa poyiruwo noyiruwo.

16. Morwasinke natu dilira kudompa mutjima nsene kapi tuna kutura po marunduruko usimbu?

 ¹⁶ Ayo kugusa siruwo mokulironga kuhonena yikara yaJehova. Nsene kuna kulizuvha asi kapi wa tura po marunduruko moomu wa yi gazarere, wa ha dompa mutjima. Pomuhowo, wa hepa kulironga kusikisa mo eyi azi uyunga Bibeli. Moomu ono kugazara nokukara omu ga ku harera Jehova, yimo ngayi ku rerupira kugazara omu a gazara ntani nokurugana youhunga.—Episarome 37:31; Yisewe 23:12; Vagarata 5:16, 17.

17. Meho musinke zongwa zina kutundindira nsene tu limburukwa Jehova?

¹⁷ Ose kuna kundindira siruwo apa ngatu ka sikilira mo nokukakarera Jehova narunye nanarunye. Posiruwo oso, kapi ngatu ka kondja kufunda po maupirankondo getu, ntani ngayi ka tu rerupira kuhonena Jehova. Nye nampili ngesi ose kuvhura kukarera Jehova morwa ga tu pa sizoweseso. Nampili ngomu twa dira kusikilira mo, ose kuvhura tu mu hafese nsene tu twikira kukondja kutura po marunduruko ntani nokukwama eyi azi tu rongo Bibeli.

18, 19. Ngapi tuna yi diva asi Bibeli za kara nononkondo dokurundurura eparu lyetu?

¹⁸ Kevin kwa kondjere kulironga kupangera ehandu lyendi. Age kwa tedere ko kweyi nga resa moBibeli nokuhetekera ko kurundurura nkareso zendi. Age hena kwa kweme epukururo eli va mu pere Vakriste vakwawo. Nampili ngomu Kevin ya mu gusire nomvhura dongandi mokutura po marunduruko, age ya ya mu tompokere mokukara mukwafimbunga. Age ngesi kwa kara mukuronambunga nomvhura edi 20 da ka pita. Nye nampili ngoso, ga yi diva asi ga hepa kutwikira kufunda po maupirankondo gendi.

¹⁹ Nose kuvhura tu wapukurure nkareso zetu ngwendi Kevin. Eyi ngayi tu vatera tu twikire kukara pepi naJehova. (Episarome 25:14) Age nga tu vatera yi tu tompoke nsene tu kondja kutura po marunduruko yipo tu mu hafese. Makura ngatu diva asi nevatero lyoBibeli, ose kuvhura tu twikire kutura po marunduruko meparu.—Episarome 34:8.