1, 2. (a) Ngapi adi lizuvhu Nombangi kuhamena Bibeli? (b) Nobuke musinke wa hara unene moBibeli?

NGONOMBANGI DAJEHOVA, ose kwa hara Bibeli. Azo kutuhengagwida ntani kuturonga tu kare nehuguvaro. (Varoma 15:4) Amo kwa kara mo “nonkango daKarunga” kapisi dovantu.—1 Vatesaronika 2:13.

² Natuvenye kodili nobuke dimwe domoBibeli edi twa hara unene. Vamwe kwa hara Mavangeli morwa ago kwa likida yikara yaJehova kupitira mwaJesus. (Johanesa 14:9) Vamwe kwa hara nobuke domauporofete ngwendi Ehororo, ezi azi likida “eyi nayi horoka mongenderera.” (Ehororo 1:1) Vamwe apa ava resa Mapisarome kuvahengagwida, ano vamwe kuhafera mavyukiso aga ava resa mobuke zoYisewe. Yosili, Bibeli kwa zi tjangera vantu navenye.

3, 4. (a) Ngapi atu lizuvhu kuhamena yimbapiratjangwa yetu? (b) Yimbapiratjangwa musinke hena yimwe atu gwana?

³ Mokumona asi twa hara Bibeli, ose hena twa hara yimbapiratjangwa morwa kwa tunda moNonkango daKarunga.  Nobuke noyifo eyi atu gwana kuna kara mawapaiko gokutunda kwaJehova. Ayo kutuvatera tu mu hedere pepi ntani tu pameke epuro lyetu.—Titusa 2:2.

⁴ Sinzi soyimbapiratjangwa yetu kuyitjangera Nombangi nadinye. Nye, pwa kara yimbapiratjangwa eyi va tjangera vadinkantu ndi vareti. Novidiyo noyirongwa eyi ya kara koIntaneta zetu kwa yi tjangera vantu va hana asi Nombangi. Nayinye eyi kulikida asi Jehova kusikisa mo etumbwidiro lyendi lyokuwapaikira vantu navenye sipito.—Jesaya 25:6.

5. Yisinke ayi hafesa Jehova?

⁵ Sinzi setu kwa hara kugwana siruwo sokuresa Bibeli noyimbapiratjangwa yetu. Kuvhura tu dire kugwana siruwo sokulironga nkenye simbapiratjangwa atu gwana. Tuna kara nehuguvaro asi ayo kuhafesa Jehova apa atu ruganesa nawa siruwo setu mokuresa nokulironga Bibeli noyimbapiratjangwa yetu. (Vaefeso 5:15, 16) Nye twa hepa kutakamesa. Kosinke twa hepa kutakamesa?

6. Yisinke nayi tu ninkisa tu dire kugwanena mo uwa momawapaiko gaJehova?

⁶ Nsene kapi tuna kutakamesa, kuvhura tu gazare asi nobuke dimwe domoBibeli ndi yimbapiratjangwa yimwe kapisi nyose va yi tjangera. Pasihonena, ngapi nsene buke zomoBibeli kapi zina lizi noukaro wetu? Ngapi nsene asi kapisi nyose va tjangera simbapiratjangwa oso? Ose kugenderera kusiresa ndi kusitulira ntere? Nsene yimo, ose ngoso kapi tatu gwanene mo uwa. Ngapi natu yi nyokera po oyo? Twa hepa kudiworoka asi nombudi nadinye kutundilira kwaJehova. Bibeli kutanta asi: “Ame nyame HOMPA Karunga goge, ogu ga hara kukuronga morwauwa waamoge.” (Jesaya 48:17) Mosirongwa esi, tatu ka zogera magano gatatu aga naga tu vatera tu gwanene mo uwa momawapaiko gaJehova.

7. Morwasinke natu litulira mo nyamwetu nsene kuna kuresa Bibeli?

⁷ Litura mo nyamoge. Nobuke dimwe domoBibeli kwa di tjangera vantu wongandi. Nye, Bibeli kutanta asi: “Nkenye etjangwa, eli za retesa po Mpepo zaKarunga, kwa kara nomulyo.” (2 Timoteusa 3:16) Yiyo nye twa hepera kulitura mo nyamwetu nsene kuna kuresa Bibeli. Munazinyetu gumwe kuhetekera ko kudiworoka eyi ana lirongere ko kosihorokwa simwe somoBibeli. Ayo kumuvatera a dimburure yirongwa eyi ayi moneka ngwendi kwato eyi na lirongera ko. Komeho zokuresa Bibeli, twa hepa kuhundira Jehova a tu vatere tu liture mo ntani tu gwane unongo wokukwata egano eyi ana tu harere tu dive.—Esira 7:10; resa Jakopo 1:5.

8, 9. (a) Mapuro musinke natu lipura nsene kuna kuresa Bibeli? (b) Nkareso ezi ga hepa kukara nazo mukuronambunga, yisinke azi tu rongo kuhamena Jehova?

⁸ Lipura mapuro. Nsene kuna kuresa Bibeli, lipura mapuro aga asi: ‘Yisinke yina ku ronga nge eyi kuhamena Jehova? Ngapi nani tura magano aga pasirugana? Ngapi nani ga ruganesa ni vatere wopeke?’ Nsene tu teda ko komapuro gangoso,  ngatu gwanena mo uwa mereso lyetu lyoBibeli. Ngesi tatu ka konakona sihonena simwe. Bibeli kwa singonona nkareso ezi va hepa kukara nazo vakuronambunga. (Resa 1 Timoteusa 3:2-7.) Sinzi setu kapisi tu vakuronambunga, makura kuvhura tu gazare asi kwato eyi natu lirongera ko komagano ogo. Ngesi tatu ka zogera mapuro ogo gatatu tu ka dimburure omu nkareso ozo nazi tu vatera.

⁹ “Yisinke yina ku ronga nge eyi kuhamena Jehova?” Jehova ga tura po yihepwa eyi ga hepa kusikisa mo muntu mokukara mukuronambunga. Jehova kwa harera vagara owo va pakere mbili mbungakriste. Eyi kulikida asi mbungakriste mulyo kwendi. Bibeli kutanta asi age kwa zi randa ‘nonomfa daMunwendi thi.’ (Yirugana 20:28) Jehova kuna hara vakuronambunga va kare nosihonena sosiwa, morwa ngava ka yi zeresa kwendi monkedi omu ava tekura mbungakriste. Age kuna hara tu gwane uvando mwawo. (Jesaya 32:1, 2) Yipo nye, apa atu resa yihepwa oyo, ose kudimburura omu Jehova a tu pakere mbili.

10, 11. (a) Apa atu resa nkareso ezi va hepa kukara nazo vakuronambunga, ngapi natu tura magano ogo pasirugana? (b) Ngapi natu ga ruganesa tu vatere wopeke?

¹⁰ “Ngapi nani tura magano aga pasirugana?”  Nsene ove mukuronambunga, wa hepa kutarurura nkenye apa yihepwa oyo nokutura po marunduruko. Nsene kuna ‘hara kukara mupitisili gombungakriste,’ wa hepa kukondja mokukara nonkareso ozo. (1 Timoteusa 3:1) Nye Vakriste navenye kuvhura kulirongera ko konkareso ozo. Pasihonena, Jehova kuna tu harere tu dire kudowokera yimaliwa nemona ntani tu tambure vagenda momambo getu. (1 Timoteusa 6:9, 10; Varoma 12:13) Apa vakuronambunga ava kara “sihonena kombunga,” ose kulirongera ko kwawo ‘nokuhonena epuro lyawo.’—1 Peturusa 5:3; Vahebeli 13:7.

¹¹ “Ngapi nani ga ruganesa ni vatere wopeke?” Ose kuvhura kutumbura nkareso zangoso mokuvatera varongwa woBibeli ntani nava vana hara kukwata egano omu vakuronambunga va lisiga novampitisili wonongereka. Nkareso ozo kuvhura kutuvatera tu diworoke yirugana eyi ava rugana vakuronambunga. Eyi ngayi tu vatera tu fumadeke vanavazinyetu owo. (1 Vatesaronika 5:12) Moomu tuna kuvafumadeka, yimo ngava hafera sirugana sawo.—Vahebeli 13:17.

12, 13. (a) Epaparo musinke twa hepa kurugana pokuruganesa yiruganeso eyi twa kara nayo? (b) Ngapi ntundiliro zomauzera azi horora mulyo goyininke eyi atu mono ngwendi kwato eyi natu lirongera ko? Gava sihonena.

¹² Rugana epaparo. Nsene tatu lirongo Bibeli, kuvhura tu papare malimbururo komapuro aga:

• Yilye ga tjenge buke ezi zoBibeli?

• Kevango musinke va zi tjangerere ntani siruwoke?

• Yisinke ya horokerere apa va zi tjenge?

Mauzera gangoso kuvhura ga tu vatere tu dimburure mulyo goyininke eyi atu mono ngwendi kwato eyi natu lirongera ko.

¹³ Pasihonena, Hesekiyeli 14:13, 14 kutanta asi: “Sirongo nsene si zona si dire kulimburukwa kwange, ngani gonona kuwoko kwange ni hanagure po ekwafo lyonondya. Ngani tuma erumbu li dipage novantu noyikorama. Nampili ngano vagara vena oNowa naNdaniyera naJoba, yiwo vana kara mo, uwa wawo ngano wokuparura nomwenyo dawo delike. HOMPA Mupangeli ana yi uyunga.” Nsene tu rugana epaparo, tatu diva asi Hesekiyeli kwa tjenge nonkango odo konyara nomvhura 612 komeho a wize Kristusa. Posiruwo oso, Nowa naJoba awo nare va fa, nye Jehova simpe kwa va diworokere morwa ulimburukwi wawo. Nye Ndaniyera age kwa kere simpe muzuni. Age nampo kwa kere nonomvhura 20, apa Jehova ga uyungire asi age mulimburukwi gwendi Nowa naJoba. Yisinke natu lirongera ko? Jehova kutara vakareli vendi wovalimburukwi  asi mulyo, kukwatera mo vadinkantu.—Episarome 148:12-14.

GWANENA MO UWA MOYIMBAPIRATJANGWA

14. Ngapi yimbapiratjangwa eyi va tjangera vadinkantu nayi va vatera, ntani ngapi nava gwanena mo uwa wopeke? (Tara efano pepenuno 27.)

¹⁴ Yimbapiratjangwa eyi va tjangera vadinkantu. Tuna lirongo asi kuvhura tu gwanene mo uwa monobuke nadinye domoBibeli. Mokulifana, kuvhura tu gwanene mo uwa moyimbapiratjangwa yetu nayinye. Ngesi tatu ka zogera yihonena yongandi. Monomvhura dantani, Jehova kugava nombudi dononzi kovadinkantu. ^[1] Nombudi edi kuvavatera va funde po makondjeso govakaume ntani nokulididimikira maudigu gosiudinkantu. Ngapi natu gwanena mo uwa natuvenye mokuresa nobuke noyirongwa eyi va tjangera vadinkantu? Nsene tu resa nombudi odo, ose ngatu diva maudigu aga ava ligwanekere nago vadinkantu ntani ngatu diva omu natu va vatera nokuvakorangeda.

15. Morwasinke vakurona nava resera yirongwa eyi va tjangera vadinkantu?

¹⁵ Vakurona nawo va hepa kuresa yirongwa eyi va tjangera vadinkantu. Maudigu aga va zogera moyirongwa oyo kukundama Vakriste navenye. Pasihonena, natuvenye twa hepa kupopera epuro lyetu nokupangera malizuvho getu nokunyokera po makondjeso ntani novakaume noyilihafeso yoyidona. Nampili ngomu yimbapiratjangwa oyo va yi tjangera vadinkantu, nombudi damo kwa tunda moBibeli ntani Vakriste navenye kuvhura kugwanena mo uwa.

16. Ngapi yimbapiratjangwa ayi vatere vadinkantu?

¹⁶ Yimbapiratjangwa eyi va tjangera vadinkantu kuvhura yi va vatere va nkondopeke ukaume wawo naJehova. (Resa Muudisi 12:1, 13.) Vakurona nawo kuvhura yi va vatere. Pasihonena, sifo soAwake! saKudumogona 2009 kwa kara mo sirongwa “Vadinkantu tava pura . . . Ngapi omu nani hafera ereso lyange lyoBibeli?” moRuingilisa. Sirongwa oso kwa kara mo magano gomulyo ntani kakende aka no vhura kutenga mo nokukapungura yipo o ka ruganese pelirongo. Vakurona nawo va gwanena mo uwa ndi? Zinya gumwe kwa tanta asi ereso lyoBibeli nkenye apa ngali mu digopere. Nye apa ga ruganesa magano gomosirongwa oso, age ngesi kuna kuhafera kuresa ereso lyoBibeli. Age kwa tanta asi ana hafa pokudiva omu nobuke domoBibeli da likwatakana nokugweda ko asi: “Ame ngesi kuna kuhafera kuresa Bibeli kupitakana pwanare.”

17, 18. Ngapi natu gwanena mo uwa nsene tu resa Ruhungu rokuhanesa? Gava sihonena.

¹⁷ Yimbapiratjangwa yokuhanesa.  Kutundilira momvhura 2008, ose kwa hafera Ruhungu rwelirongo. Aro kwa ru tjangera Nombangi, nye twa kara hena noRuhungu oru va tjangera vantu navenye. Ngapi nose natu gwanena mo uwa? Pasihonena, nsene o zigida muntu a wize kepongo makura a ya moneke, ove ku hafa. Nsene muuyungi kuna kugava siuyungwa, gazara omu siuyungwa oso nasi guma mugenda goge komutjima. Monkedi ezi, nove ngayi guma mutjima goge ntani ngo hafera siuyungwa oso.

¹⁸ Yininke yokulifana kuvhura yi tu horokere nose nsene tu resa Ruhungu rokuhanesa. Pasihonena, Ruhungu rokuhanesa ntani noyirongwa yoko-jw.org kufaturura nonkango domoBibeli monkedi zoureru kukwata egano. Nsene tu resa nombudi odo, nose ngatu kwata nawa egano usili woBibeli ou twa diva nare ntani nokuuhara. Ntani kuturonga nonkedi donompe omu natu faturura epuro lyetu kwava atu zuvhisire. Mokulifana, sifo Awake! kutunkondopeka tu pure asi pwa kara Musiti. Aso hena kutuvatera tu dive omu natu popera epuro lyetu.—Resa 1 Peturusa 3:15, 16.

19. Ngapi natu likida asi twa hafera mawapaiko gaJehova?

¹⁹ Yosili, Jehova kutupa mavyukiso yipo tu gwanene mo uwa. (Rukasa 11:28) Tu twikireni kuresa nokutura pasirugana nombudi edi a tu pe Jehova. Nsene tu yi rugana, ngatu gwanena mo uwa ntani ngatu likida Jehova asi ose twa hafera mawapaiko gendi nagenye.—Jesaya 48:17.