1, 2. Yisinke vamwe ava gazara kuhamena nonkango daJesus domwaMateusa 24:14?

JESUS kwa tente asi pomazuva gopouhura, mbudi zongwa zoUhompa ngava zi divisa kovantu navenye. (Mateusa 24:14) NgoNombangi, ose kwa tu divira kosirugana setu sokuzuvhisa. Vamwe kwa hara mbudi ezi atu zuvhisa, nye vamwe kapi va zi hara. Nampili ngomu vamwe va dira kuhara mbudi zetu, awo kufumadeka sirugana setu. Ose kuuyunga asi nyose tuna kurugana sirugana esi ga tente Jesus. Nye twa fira kuuyunga ngoso ndi? Ngapi natu diva asi kuna kurugana sili sirugana sokuzuvhisa esi ga tente Jesus?

² Vanangereka wovanzi kuuyunga asi awo kuzuvhisa mbudi ezi ga zuvhisire Jesus. Nye awo kuzuvhisira tupu monongereka nokotivi ndi koIntaneta ndi kutantera tupu wopeke eyi vana ka lironga kuhamena Jesus. Vamwe kugazara asi kuvatera vantu kweyi vana hepa ndi kukara  ndokotora ndi nesa ndi mitili kuna kara nkedi zokuzuvhisa. Nye oyo yiyo ga tembe Jesus kuhamena sirugana sokuzuvhisa ndi?

3. Yininke musinke yine nava rugana vasikuli vaJesus va tumbura mwaMateusa 28:19, 20?

³ Jesus kwa harera varongwa vendi va ndindire vantu vava wizire ndi? Hawe! Apa ga vhumbukire Jesus, age kwa tanterere vasikuli vendi asi: ‘Yipo nye nomu zira konomuhoko nadinye, mu ka di ninke di kare varongwa vange, mu ka di kuhwe. Ka di rongeni, di ka limburukwire nayinye eyi na mu rekera.’ (Mateusa 28:19, 20) Ngovasikuli vaJesus, twa hepa kurugana yininke yine. Twa hepa kutulisa po varongwa nokuvakuhwa ntani nokuvaronga. Nye pomuhowo, twa hepa kuza kovantu. Mulirongi gumwe goBibeli kwa faturura asi: “‘Kuza’ kuna kara situmbukira sankenye mupuli, yi kare asi kupi ga tunga.”—Mateusa 10:7; Rukasa 10:3.

4. Yisinke ya hamena mo kukara “vakwati wovantu”?

⁴ Yisinke Jesus ana harere varongwa vendi? Age kuna va harere va zuvhise pwavene ndi va va wapaike ngombunga? Mokumona si nokuvhura si muntu gumwe kuzuvhisira ‘nomuhoko nadinye,’ varongwa vendi va hepa kuvawapaika ngombunga. Eyi yiyo ga tembe Jesus apa ga zigidire varongwa vendi va kare “vakwati wovantu.” (Resa Mateusa 4:18-22.) Jesus kapi ga tembe komukwati gonomfi ana kuruganesa erowo ntani ndjo, a ndindire mfi zi lye ko. Nye, kukwata oku ga tembe Jesus kwa hamena mo kuruganesa ekwe. Sirugana oso kwa hamena mo kukondja nokuwapaika ntani vantu va hepa kuruganena kumwe.—Rukasa 5:1-11.

5. Mapuro musinke twa hepa kulimburura, ntani morwasinke?

⁵ Mokudiva ava vana kuzuvhisa mbudi zongwa, twa hepa kulimburura mapuro aga gane:

• Mbudi musinke ava zuvhisa vasikuli vaJesus?

• Sitambo musinke ava zuvhisire?

• Nonkedi musinke ava ruganesa?

• Ngapi omu sina lihana sirugana sawo, ntani siruwo sokuhura kupi ngasi twikira?

Kugwana malimbururo komapuro aga, ngayi tu vatera tu dimburure ava vana kuzuvhisa ntani ngayi nkondopeka eharo lyetu lyokuzuvhisa.—1 Timoteusa 4:16.

6. Morwasinke natu uyungira asi Nombangi kuna kuzuvhisa mbudi zouhunga?

⁶ Resa Rukasa 4:43. Jesus kwa zuvhisire “mbudi zongwa zoUntungi waKarunga,” ntani ana hara varongwa vendi va rugane yokulifana. Wolye vana kuzuvhisa mbudi kovantu navenye? Nombangi daJehova.  Nampili vantu ava va dira kutuhara nawo va yi kwatesa ko. Pasihonena, koneka eyi muruti ogu nga dingura yirongo ga tantererere Nombangi daJehova. Mwankenye sirongo, muruti ogo kwa pulire Nombangi daJehova mbudi ezi ava zuvhisa. Muruti kwa tanta asi: “Awo navenye kwa limbwilire asi: ‘Mbudi zongwa zoUhompa.’” Eyi ga uyunga muruti kulikida nawa-nawa asi ose kwa kara mouumwe ngoVakriste wousili. (1 Vakolinte 1:10) Uhompa waKarunga kuna kara hena mbudi zomosifo Ruhungu kudivisa Uhompa waJehova. Sifo esi kwa kara momaraka 254 ntani kusinduruka momatjangururo konyara 59 000 000 nkenye kwedi, ano eyi kutuvatera tu si hanese uzuni mudima.

7. Ngapi tuna yi diva asi vampitisili wonongereka kapi ava zuvhisa mbudi zouhunga?

⁷ Vampitisili wonongereka kapi ava zuvhisa kuhamena Uhompa waKarunga. Sinzi sawo kuuyunga kuhamena Uhompa asi sininke sa kara momutjima. (Rukasa 17:21) Awo kapi ava rongo vantu asi Uhompa kuna kara epangero lyemeguru eli ana kupangera Jesus. Nye awo kuronga tupu kuhamena Jesus poKrismesa ndi poMavhumbukiro. Awo kapi ava faturura asi Uhompa ngau ka gusa po maudigu govantu ntani asi ntaantani u ka guse po vadinikarunga pevhu. (Ehororo 19:11-21) Yosili, vampitisili wonongereka kapi va diva eyi nga ka rugana Jesus ngaHompa goUhompa waKarunga. Ntani kapi va kwata egano mbudi ezi ga zuvhisire Jesus ntani neyi nava zi zuvhisira.

8. Sitambo musinke va kara naso vanangereka kosirugana sokuzuvhisa?

⁸ Varongwa vaJesus kapi ava zuvhisire va gwane yimaliwa ndi va tunge mambo. Jesus kwa tente asi: “Mawoko-woko muna yi gwana, none ka yi gaveni mawoko-woko.” (Mateusa 10:8) Sirugana sokuzuvhisa kapisi si kare ngwendi ngesefa. (2 Vakolinte 2:17) Varongwa vaJesus kapi ava zuvhisire morwa kuvafuta. (Resa Yirugana 20:33-35.) Nampili ngomu ga yi zeresere Jesus, sinzi sonongereka awo kupura yimaliwa yipo va tunge nongereka nokufuta vampitisili vawo ntani varugani vawo. Eyi yiyo vampitisili wonongereka wovanzi va karera nongawo.—Ehororo 17:4, 5.

9. Sitambo musinke adi zuvhisire Nombangi daJehova?

⁹ Nombangi daJehova kugendesa yikumba monombungakriste nopoyigongi yipo vantu va ture po yimaliwa ndi? Hawe! Yigava yokutundilira komutjima yiyo ayi kwatesa ko sirugana sawo. (2 Vakolinte 9:7) Mvhura za ka pita, Nombangi kwa rugana novili mabiliyona gavali mokuzuvhisa mbudi zongwa nokurugana malirongo goBibeli gokupitakana pomamiliyona ntane nkenye kwedi.  Awo kapi ava va futu, nye kugwana ruhafo apa ava ruganesa yimaliwa yawo mosirugana sokuzuvhisa. Mupapali mauzera gumwe kwa uyungire kuhamena sirugana soNombangi daJehova asi: “Sitambo sawo kuna kara kuzuvhisa nokuronga.” Age hena kwa tente asi Nombangi daJehova kapi va kara novampitisili ava va hara asi va va fute. Nsene asi kapi atu zuvhisire morwa yimaliwa, sitambo musinke atu zuvhisire? Ose kuzuvhisa morwa twa hara Jehova novantu. Nkareso zangoso kusikisa mo uporofete wemEpisarome 110:3. (Resa.)

10. Nonkedi musinke ga ruganesere Jesus novarongwa vendi mokuzuvhisa?

¹⁰ Nonkedi musinke ga ruganesere Jesus novarongwa vendi mokuzuvhisa? Awo ngava zuvhisire nkenye oku ngava gwana vantu. Pasihonena, ngava zuvhisire mononzira nopomarandesero. Ntani ngava zuvhisire momambo. (Mateusa 10:11; Rukasa 8:1; Yirugana 5:42; 20:20) Nkedi zimwe zongwa zokugwana vantu navenye kwa kere zokuzuvhisira tunda embo zende embo.

11, 12. Ngapi vanangereka va lisiga noNombangi daJehova kuhamena kuzuvhisa mbudi zongwa?

¹¹ Vanangereka nawo kuzuvhisa mbudi zongwa ngwendi Jesus ndi? Vampitisili kuzuvhisira tupu vantu womonongereka dawo. Awo kapi ava tulisa po varongwa wovape. Poyiruwo yimwe, kuhetekera ko kukorangeda vantu womonongereka dawo va zuvhise. Pasihonena, momvhura  2001, mupapa John Paul gwauvali kwa tjenge mombilive asi vanangereka va hepa kuzuvhisa mbudi zongwa nokukara noupampi ngwendi mupositoli Paurusa ogu ga tente asi: “Nane vakwetu nsene ni dira kuudisa Mbudi zoNgwa!” Mupapa kwa tente hena asi sirugana esi sokuzuvhisa va hepa kusirugana vantu wonongereka nadinye kapisi vampitisili tupu. Nye, wovasesu tupu va yi rugene.

¹² Ngapi kuhamena Nombangi daJehova? Awo yiwo ava zuvhisa asi Jesus kwa tamekere kupangera momvhura 1914. Awo kulimburukwa Jesus nokutura sirugana sokuzuvhisa muhowo. (Marukusa 13:10) Buke zimwe kwa tanta asi sirugana sokuzuvhisa mulyo unene koNombangi daJehova. Azo kwa tanta hena asi apa ava gwana vantu wonzara nava womukuma ntani wokuvera, awo kuhetekera ko kuvavatera, nye kapi ava divara sitambo sawo sokuzuvhisa kuhamena uhura wouzuni ou ntani nokuronga vantu kuhamena eparuro. Nombangi kutwikira kuzuvhisa mbudi ozo nokuhonena nonkedi edi nga ruganesa Jesus novarongwa vendi mokuzuvhisa.—Pillars of Faith—American Congregations and Their Partners.

13. Ngapi omu sina lihana sirugana sokuzuvhisa?

¹³ Jesus kwa tente asi vasikuli vendi ngava zuvhisa nokuronga mbudi zongwa “mwa za uzuni mudima.” Awo kwa va pangera va tulisire po varongwa ‘monomuhoko nadinye.’ (Mateusa 24:14; 28:19, 20) Eyi kutanta asi mbudi zongwa va hepa kuzizuvhisa uzuni mudima.

14, 15. Yisinke yina kulikida asi Nombangi kuna kusikisa mo uporofete waJesus wokuzuvhisira uzuni mudima? (Tara efano pepenuno 9.)

¹⁴ Nombangi daJehova delike dina kusikisa mo uporofete waJesus wokuzuvhisa mbudi zongwa uzuni mudima. Ngapi omu twa yi diva oyo? MoAmerika, kwa kara mo vampitisili wonongereka wokusika 600 000, ano Nombangi daJehova dokusika konyara 1 200 000 kuna kuzuvhisa mbudi zongwa mosirongo oso. Mouzuni mudima, kwa kara mo varuti woVakatolika wokusika 400 000, nye Nombangi daJehova dokupitakana pomamiliyona 8 kuna kuzuvhisa mbudi zongwa moyirongo 240. Yosili, Nombangi kuna kuzuvhisa mbudi zongwa mouzuni mudima, eyi kuretera Jehova efumano neyererepeko.—Episarome 34:1; 51:15.

¹⁵ NgoNombangi, sitambo setu kuna kara sokuzuvhisa mbudi zongwa kovantu wovanzi komeho u wize uhura. Mokusikisa mo sirugana esi, ose kwa toroka nokunduruka nobuke noyifo noyitratate yoyinzi, ntani noyimbapira yezigido koyigongi nokoMurarero momaraka gokupitakana 700. Ose kuyigavera kovantu mawoko-woko. Mvhura zina ka pita, ose kwa nduruka yimbapiratjangwa konyara mabiliyona 4,5. Ntani kwa nduruka hena matjangururo goBibeli New World  Translation of the Holy Scriptures gokupitakana pomamiliyona 200 momaraka gokupitakana 130. Ntani Intaneta zetu kuna kara momaraka gokupitakana 750. Nombangi delike dina kurugana sirugana oso.

16. Ngapi twa yi diva asi Nombangi daJehova kuvapitisira mpepo zaKarunga?

¹⁶ Siruwo sokuhura kupi ngasi twikira sirugana sokuzuvhisa? Jesus kwa tente asi mbudi zongwa ngava zi zuvhisa dogoro u wize uhura. NgoNombangi, mpepo zokupongoka zaJehova kutuvatera tu twikire kuzuvhisa momazuva aga gopouhura. (Yirugana 1:8; 1 Peturusa 4:14) Vanangereka vamwe nawo kutanta asi: “Kuvapitisira mpepo zokupongoka.” Nye awo kurugana sirugana esi adi rugana Nombangi daJehova momazuva aga gopouhura ndi? Vamwe kwa hetekera ko kuzuvhisa, nye kapi ya va tompoka. Vapeke kwa hara kuzuvhisa, nye pokaruwogona tupu. Vamwe kuvhura va zuvhisire momambo, nye kapi ava zuvhisa mbudi zongwa zoUhompa. Yipo nye, awo kapi vana kusikisa mo sirugana esi ga tamekere Jesus.

17, 18. (a) Morwasinke natu uyungira asi Nombangi daJehova yido dina kuzuvhisa mbudi zongwa zoUhompa kovantu? (b) Ngapi ayi tu tompoka tu twikire kuzuvhisa?

¹⁷ Wolye vana kuzuvhisa mbudi zongwa zoUhompa kovantu? Nombangi daJehova. Ngapi tuna yi diva eyi? Morwa ado kuzuvhisa mbudi zouhunga, mbudi zongwa zoUhompa. Ado kuzira vantu momambo gawo, ngoso kuna kuruganesa nonkedi douhunga. Ado kuzuvhisa nositambo souhunga, morwa kwa hara Jehova novantu. Sirugana sawo sina lihana unene morwa kuzuvhisira vantu wonomuhoko nomaraka nagenye. Ntani ngava twikira kuzuvhisa mbudi zongwa zoUhompa dogoro ngau wize uhura.

¹⁸ Ayo kutetukisa sili mokumona vantu vaJehova omu vana kuzuvhisa mbudi zongwa pomazuva aga gopouhura. Ngapi ayi tu tompoka? Mupositoli Paurusa kwa fatwilire asi: “Karunga yige a rugana mweni, mu kare neharo nononkondo dokusikisa mo eyi ga panga.” (Vafilipi 2:13) Ngano Jehova a twikire kutupa nonkondo yipo tu twikire kuzuvhisa mbudi zongwa!—2 Timoteusa 4:5.