Wa hepa nkenye apa noveta domoBibeli ndi?

APA wa kere munona, vakondi woge kwa ku tulire po noveta dononzi. Ngomu wa kulilire, ove wa ya yi kwete egano asi vakondi woge kwa kere nosinka kukuhamena. Ngomukurona, ove nampo simpe kuparuka kuliza nonoveta dongandi edi va ku tulire po, nampili ngomu ono dili kukara ngesi mepangero lyawo.

Guhyetu gemeguru, Jehova kwa tu pa noveta dongandi dokuvyukilira kupitira moNonkango dendi Bibeli. Pasihonena, age kwa silika kukarera mafano, kuhondera, kuteza po nonkwara, ntani kuvaka. (Exodus 20:1-17; Yirugana 15:28, 29) Ngomu tuna ‘kukura’ ndi tuna kudiva yininke eyi, ose kuyayikwata egano asi Jehova kwa kara nosinka kwetu ntani noveta dendi kapisi udigu unene.​—Vaefeso 4:15; Jesaya 48:17, 18; 54:13.

Nampili ngoso, pwa kara maukaro omu no dira kugwana noveta dokuvyukilira. Momaukaro omu mwa dira veta zokuvyukilira zomoBibeli, vamwe kugazara asi kuvhura va rugane nkenye eyi vana hara. Awo kulipatana asi ngano Karunga ga mwene asi mulyo, ngano ga gava veta zokuvyukilira komaukaro ogo.

Vantu ava ava gazara ngoso narunye kutura po matokoro gepuko aga ava ya livere konyima zosiruwo. Awo kapi ava dimburura asi moBibeli kapi mwa kara tupu noveta nye hena monkedi omu a Karunga a tara yininke. Moomu tuna kulironga Bibeli nokudiva omu Jehova a tara yininke, ose kuyakara nezwi lyokomutjima eli twa deura kuliza noBibeli eli ngali tu vatera tu ture po matokoro aga aga lizi nomu a gazara Karunga. Mokurugana ngoso, ose kuhafesa mutjima gwendi ntani kugwanena mo mauwa aga aga tundu mokutura po matokoro gomawa.​—Vaefeso 5:1.

Yihonena yomoBibeli yoyiwa

Apa atu resa yihorokwa yomoBibeli yovakareli vaKarunga vanare, ose kugwana mo maukaro omu va tulire po matokoro kuliza nomu Jehova a tara yininke nampili maukaro ogo ga dilire veta zokuvyukilira. Koneka sihonena saJosefa. Posiruwo sina ga here mukadaPotifara kurara naJosefa, azo veta zokusilika kuteza po nonkwara simpe kapi zina kara patjangwa. Nye nampili ngomu pwa pilire veta zokuvyukilira, Josefa ga yi kwete egano asi kuhondera nzo, kapi tupu ya lirwanesere nezwi lyendi lyokomutjima nye hena ngano ga ‘zonene kwaKarunga.’ (Genesis 39:9) Yosili, Josefa ga yi dimbwilire asi kuhondera kwa lilimbire nomagazaro gaKarunga nompango zendi, ngomu ga yi tumbwire mosipata saEdeni.​—Genesis 2:24.

Koneka sihonena simwe. MoYirugana 16:3, tuna lirongo asi Paurusa komeho a ze naTimoteusa morugendo rwawo rokuzuvhisa, ta rugana Timoteusa yovamba. Nye movelise 4 tatu resa asi Paurusa naTimoteusa apa va gendagwire moyitata kwa geve ‘nompangera edi va penge vapositoli novakurona ava va kere moJerusarema.’ Monompangera odo kwa hamenene mo etokoro lyokutantera Vakriste asi kapi vana kara hena konhi zoveta zokuhamena vamba. (Yirugana 15:​5, 6, 28, 29) Morwasinke Paurusa ga lizuvhilire asi ya kara nomulyo kurugana Timoteusa yovamba? “Morwa Vajuda ava va kara moyirongo oyo, yeeyi navenye va yi divire asi guhwe Mugereka.” Paurusa kapi ga here kuvapundukisa ndi kuvahandukisa. Age kwa kere nosinka asi Vakriste va “lipopere kosipara saKarunga kwankenye muntu, ogu a purakene ezwi lyokomutjima gwendi.”​—2 Vakolinte 4:2; 1 Vakolinte 9:19-23.

Magazaro gangesi yigo ga kere mwaPaurusa naTimoteusa. Resa matjangwa ngwendi Varoma 14:15, 20, 21 ntani 1 Vakolinte 8:9-13; 10:23-33, makura o dimburura omu Paurusa ga kere nosinka kuhamena elikwatakano lyovakwawo naKarunga, unene po ava ngayi pundukisa yininke eyi ya kara asi kwato epuko mwayene. Ntani Paurusa kwa tjangerere Timoteusa asi: “Timoteusa yige gelike thi ga konda nge sininga, age hena yige nga ya mu pakera mbili nawa-nawa. Ano navenye kuna kupapara uwa wavene, kapisi waJesus Kristusa. Nye kudidimika kwendi mwa ku diva mokurugana kumwe name yoMbudi zoNgwa moomu ga likara muna naguhwe.” (Vafilipi 2:20-22) Ee, sihonena musi kouwa va tu tulira po vagara owo vavali naina! Mevango lyokutura yihepwa yawo muhowo ndi eyi va hara vene, awo kwa honenene eharo lyaJehova naMunwendi pokugazadara ko omu matokoro gawo naga vhura kukundama elikwatakano lyovakwawo naKarunga nampili moukaro ou ga dira Karunga kutumbura veta zokuvyukilira.

Konakona Jesus Kristusa, sihonena setu. PeUdiso lyendi lyopoNdudndu, age kwa fatwilire asi ava ava kwata egano nompango domoveta zaKarunga ngava di limburukwa nampili yuma oyo kapi va yi tumbura kuvyukilira ndi kapi va yi silika. (Mateusa 5:21, 22, 27, 28) Nampili Jesus naPaurusa naTimoteusa ntani Josefa narumwesi va gazarere asi muntu kuvhura a rugane eyi ana hara nsene ukaro owo veta zaKarunga kapi za vyukilira kuutumbura. Mokuhonena nkedi ezi a gazara Karunga, vagara owo kwa parukire kuliza noyipango yivali yoyinene po eyi ga tumbwire Jesus asi o hare Karunga ntani o hare mukweni.​—Mateusa 22:36-40.

Ngapi kuhamena Vakriste naina?

Ayo kulikida nawa-nawa asi kapisi tu tare Bibeli ngobuke zopaveta, nokundindira asi zi tumbure nkenye veta kuvyukilira. Nsene tu tura po matokoro kuliza nomu a gazara Jehova nampili pa dire kukara veta zokuvyukilira moBibeli, ayo ngayi mu hafesa. Eyi kutanta asi mevango lyokututantera nkenye apa mpango zokuvyukilira zomoBibeli, twa hepa ‘kukondjera kudiva eyi ana tu harere’ Jehova tu rugane. (Vaefeso 5:17; Varoma 12:2) Morwasinke nayi hafesera Jehova? Morwa kulikida asi ose kapi tuna kudemenena kweyi twa hara nye kweyi ayi mu hafesa. Ntani hena kulikida rupandu rwetu keharo lyendi asi tuna hara kulihonena, pokupulisira eharo lyangoso li tu tumangede. (Yisewe 23:15; 27:11) Ntani hena, kutura pasirugana eyi ya kara moMatjangwa kutuvatera tu kare nelikwatakano lyewa naKarunga noukanguki wouwa.

Tu zeni tu tare omu mpango ezi natu vhura kuzitura pasirugana meparu lyetu.

Kuhorowora yilihafeso

Gazadara ko ukaro womumati ogu ana hara kuranda nomusika edi va kwateka. Eyi ga zuvha monomusika odo kuna kumukoka, nye ana kara nosinka morwa pontunda zonomusika odo kwa kara po nonkango dokuhamena eligwanekero panyama ntani donondona. Ntani ana kara nosinka morwa monomusika odo sinzi sononkango da kara mo dehandu ntani donyanya. Morwa kwa hara Jehova, mumati ana hara kuhafesa Jehova momagazaro ntani nomu a lizuvhu. Ngapi na vhura kulimburukwa mpango zaKarunga moyuma eyi?

Mombilive zomupositoli Paurusa zokoVagarata, age kwa tumbura yirugana yorutu ntani yiyimwa yompepo zaKarunga. Nampo nove wa diva asi yiyimwa yompepo zaKarunga kwa hamena mo: eharo, ehafo, mbili, edidimiko, nkenda, uwa, epuro, ugomoki ntani elipangero. Nye yininke musinke ayi likida yirugana yorutu? Paurusa kwa tjenge asi: “Yirugana yorutu ya lihorora, ayo kuna kara ruhonda, nkareso zokudira kukuhuka, nkareso zokunyata, kukarera yikarunga yoyimpempa, umpure, unkore, marwanambo, mfudu, ehandu lyenene, nomutangu dononene, maligaunuko, kukwama marongo govantu, kunyenena, unkorwe, yipito yoyidona nayimwe hena ngoso. Tani mu rondora hena kuhamena yininke eyi moomu na mu rondwere nare asi ava ava rugana yininke eyi kapi ngava ka pinga Uhompa waKarunga.​—Vagarata 5:19-23.

Koneka nonkango dokuhulilira moyininke eyi ga tumbwire asi “nayimwe hena ngoso.” Paurusa kapi ga tumbwire yininke nayinye eyi ngano ya hamena koyirugana yorutu. Eyi kapi yina kutanta asi muntu kuvhura a gave konda asi ‘Matjangwa ga pulisira nge kulihameka mwankenye eyi ga dira kutumbura Paurusa melikwamo lyoyirugana yorutu.’ Nampili ngoso, muntu ga hepa kuruganesa nondunge yipo a dimburure yininke eyi va dira kuhamesera melikwamo olyo nye nampo kwa hamena moruha oru asi “nayimwe hena.” Ava ava lihameke moyininke eyi va dira kutumbura nye ya hamena moruha oru asi “nayimwe hena” kapi ngava ka pinga Uhompa waKarunga.

Yiyo nye twa hepera kudiva ndi kudimburura eyi ayi dili kuhafesa Karunga. Oyo kapisi udigu.Tu tante asi ndokotora goge ta ku tantere o lye manyango noyikwahidi nye o nyokere po yikuki nomautovara ntani nayimwe hena ngoso. Ngoso tayi ku digopere kudiva eyi vana tumbura asi nayimwe hena ngoso ndi? Ngesi tara hena yiyimwa yompepo ntani noyirugana yorutu. Melikwamo musinke dina hamene nomusika edi vana tumbura keguru? Yosili, monomusika odo kapi muna kara yikara eyi: eharo, uwa, elipangero ndi yimwe eyi ya likwatakana noyiyimwa yompepo zaKarunga. Kapi twa hepa veta zokuvyukilira mokudiva asi nomusika musinke da dira kuliza nomu a gazara Karunga. Nompango doodo dokulifana kuvhura kurugana koyininke yokuresa nonomuvi nomalikwamo gokotivi nomaudano gokokompiuta ndi koIntaneta ntani nayimwe ngoso.

Kutambura emoneko lyomuntu

Bibeli kugwana mo hena nompango da hamena kondwareso nomaliwapaiko. Ado kuvatera nkenye Mukriste a dive omu na dwara ntani nomu na moneka nawa. Mokulifana, ogu ga hara Jehova kuyidimburura asi ezi kuna kara mpito zokurugana eyi ayi hafesa Guhyetu gemeguru nye kapisi mwene. Moomu tuna yi zogere nare, mokumona asi Jehova kapi ga gava noveta dokuvyukilira kwankenye ukaro, eyi kapi yina kutanta asi kapi a pakere mbili eyi ava rugana vantu vendi. Ndwareso za lisiga tunda sirongo zende sirongo, ntani nampili mosirongo simwe azo kulitjindja poyiruwo noyiruwo. Nye nampili ngoso, Karunga ga gava nompango edi nadi vhura kupitisira vantu vendi nkenye siruwo ntani nkenye oku va tunga.

Pasihonena, mwa-1 Timoteusa 2:9, 10 kutanta asi: “Ntani hena, ame kwa hara asi vakadi ava gazadare ko nawa yipo va liwapeke monkedi zefumadeko nokudwara yidwara yokuwapera. Walye ava litakere yininke yokudira kuzira mo nokulitjapera ngorodo ndi kudwara yikoverero yondiro unene, nye ava liwapeke monkedi ezi za wapera vakadi ava ava karere Karunga. Ava rugane yirugana yoyiwa, eyi yiyo ayi va wapeke.” Yipo nye, vagara novakadi woVakriste va hepa kugazadara ko asi emoneko musinke ava ndindilire vantu womomukunda kwava ava “karere Karunga.” Unene po Mukriste a gazadare ko kemoneko eli nali ninkisa wopeke va gazare mbudi zomoBibeli ezi a zuvhisa. (2 Vakolinte 6:3) Mukriste gosihonena sosiwa kapi nga demenena kweyi ga hara ndi kounankondo wendi nye nga demenena unene kokudira kupundukisa wopeke.​—Mateusa 18:6; Vafilipi 1:10.

Apa Mukriste a nongonona asi maliwapaiko gendi kuhandukisa ndi kupundukisa wopeke, kuvhura a honene mupositoli Paurusa pokutura elikwatakano lyava wopeke naKarunga muhowo mevango lyokurugana eyi ga hara mwene. Paurusa kwa tente asi: “Omu honene nge ame, moomu ani honene name Kristusa.” (1 Vakolinte 11:1) Ano kuhamena Jesus, Paurusa kwa tjenge asi: “Yeeyi nampili Kristusa kapi nga kondjere uwa.” Epukururo eli ga geve Paurusa koVakriste navenye lya zere. Bibeli kutanta asi: “Ose ava tuna koro twa hepa kugazadara ko upirankondo wava va dira kukora, kapisi tu gazadare tupu uwa wanyamwetu. Nkenye gumwe gwetu a kondjere uwa wamukwawo, yipo a mu nkondopeke.”—Varoma 15:1-3.

Kukulika nondunge detu

Ngapi omu natu kulika nondunge detu yipo tu dive omu natu hafesa Jehova nampili moukaro ou Bibeli za dira kugava veta zokuvyukilira? Nsene tu resa Nonkango daKarunga nkenye ezuva nokudilironga ntani kuteda ko kweyi tuna kuresa, ose ngatu kulika nondunge detu. Ekuro lyangoso kapi ali wiza po pangenderera. Ngwendi moomu a kuru munona parutu, ekuro lyopampepo kapi ali moneka usimbu nye kugusa siruwo. Yiyo nye twa hepera kulididimikira ntani kapisi yi tu nyegenyese nsene ekuro lyangoso kapi lina kumoneka usimbu. Ntani hena kapi yina kutanta asi moomu sina kupita siruwo yimo dina kukura nondunge detu. Nye siruwo sangoso twa hepa kusiruganesa mokuteda ko koNonkango daKarunga, ntani nokudipulisira di rundurure eparu lyetu.​—Vahebeli 5:14.

Kuvhura tu tante asi moomu noveta daKarunga adi heteke ulimburukwi wetu, yimo nompango dendi adi heteke ekuro lyetu lyopampepo neharo lyetu lyokuhara kumuhafesa. Moomu tuna kukura pampepo, yimo ngatu hetekera ko paapa twa hulira kuhonena Jehova naMunwendi. Makura ose ngatu tulisa po matokoro kuliza nomutaro gwaJehova ngomu va yi likida moMatjangwa. Moomu ngatu hafesa Guhyetu gemeguru mwanayinye eyi atu rugana, yimo hena ngatu gwederera ruhafo rwetu.

[Mafano]

Ndwareso za lisiga tunda sirongo zende sirongo, nye nompango domoBibeli da hepa kutupitisira momatokoro getu