TU NINKE nye asi munekuto ta ku hundire asi o mu tware netuwa kepongo lyomulyo. Nominute dongandi tupu dina hupu ko o ze o ka mu simbe, to dimburura asi metuwa kapi muna kara mawoli gokugwanena po. Makura to genderere kusinga o ka nwise mo. Tupu ono kutunda po, munekuto ogo ta ya siki. Ta tara nakunye nye kapi ana ku kumona. Age kapi ana kara nosiruwo sokukundindira, makura ta hundire gumwe gwapeke a mu tware. Tupu ono kuyasika to dimburura asi munekuto ana zi. Ngapi omu no lizuvha?

1-3. (a) Maukaro musinke gavali aga naga tu vatera tu kwate egano sitwa soyifanekeso yivali yaJesus? (b) Mapuro musinke natu ka limburura?

² Ngesi gazara asi ove munekuto, komeho o ze morugendo to horowora vantu vatatu va pakere mbili sirugana simwe somulyo. To va fatwilire sirugana oso, ano navenye moutatu wawo tava si tambura. Apa no ka tengura, to ya dimburura asi vavali tupu yiwo vana sikisa mo sirugana sawo. Ano ogu ana dili kusikisa mo sirugana sendi ta ligusa-gusa mo. Age kapi ana hetekere ko kusirugana. Ngapi omu no lizuvha?

³ Moyifanekeso yendi yovakadona murongo novakareli ava va sigilire emona, Jesus kwa ruganesere maukaro gokulifana mokulikida eyi ngava limburukwira Vakriste vamwe wovagwavekwa pomazuva gopouhura ano vamwe va dire kulimburukwa. * (Mat. 25:1-30) Jesus kwa nkondopekere sitwa sendi pokutanta asi: “Yipo nye nomu rungararera, yeeyi mwa dira kudiva ezuva novili,” eyi kutanta siruwo esi nga zonagura po Jesus uzuni waSatana. (Mat. 25:13) Nose twa hepa kutura pasirugana epukururo eli. Ngapi omu natu gwanena mo uwa mokuvangarara, ngwendi moomu ga tu  korangedere Jesus? Wolye ava va kere vana liwapaikire mokuvangarara? Ntani yisinke twa hepa kurugana ngesi yipo tu vangarare?

4. Morwasinke kuvangarara aku dilire kutanta asi twa hepa kudiva nawa-nawa ezuva novili?

⁴ Poyiruwo yimwe ya kara nomulyo kudiva nawa-nawa siruwo. Pasihonena, nsene ove to zi koyirugana ndi kwandokotora ndi to ka ronda mbesa wa hepa kutara nkenye apa vili zoge yipo o dire kuhulilira. Nye muntu ogu ana kudimisa mundiro ndi kupopera eparu lyomuntu ogu ana kara mosimpagwa kapisi a tare nkenye apa kovili zendi, morwa oyo kuvhura kudonganesa ndi kureta siponga. Momaukaro gangoso ya kara nomulyo kudemenena kosirugana kupitakana kutara povili. Ngomu uhura wouzuni una kuhedera popepi, sirugana setu sokuzuvhisa sa kara nomulyo morwa kuvatera vantu va ka paruke. Kuvangarara kapi ayi tanta asi twa hepa kudiva nawa-nawa ezuva novili. Pwa kara nonkedi ntano omu natu gwanena mo mauwa mokudira kudiva ezuva novili apa ngau wiza uhura.

5. Ngapi kudira kudiva ezuva novili ayi tu ninkisa tu horore eyi ya kara monomutjima detu?

⁵ Nkedi zokuhova, kudira kudiva kwetu uhura apa ngau wiza kutuninkisa tu horore eyi ya kara monomutjima detu. Jehova kwa tu pa mfumwa pokutupulisira tu tokore nsene tuna hara kumukarera ndi hawe. Ose kukarera Jehova morwa twa mu hara, kapisi morwa kuhara tupu kukagwana mwenyo gwanarunye. (Resa Episarome 37:4.) Ose kugwana ruhafo mokurugana mpango zendi, nokudimburura asi Karunga kuna kuturonga morwa uwa wanyamwetu. (Jes. 48:17) Ntani yipango yendi, kapi ya paka udigu.—1 Joh. 5:3.

6. Apa atu karere Karunga kutundilira meharo, ngapi omu a lizuvhu ntani morwasinke?

⁶ Zauvali, kudira kudiva ezuva novili kutupa mpito zokuhafesa mutjima gwaJehova. Apa atu mu karere kutundilira meharo, kapisi morwa uhura pepi una kara ndi mfeto, ose ngoso kuna kukwatesa ko Jehova pokulikida asi nkore zendi Satana munayimpempa. (Joba 2:4, 5; resa Yisewe 27:11.) Pokudiva ruhepo oru ga retesa po Satana, ose kuhafa mokukwatesa ko upangeli waJehova nokunyokera po waSatana.

7. Morwasinke ono harere kuruganesa eparu lyoge mokukarera Karunga nokuvatera vantu?

⁷ Zautatu, kudira kudiva kwetu ezuva novili kutunkondopeka tu ruganese eparu lyetu mokukarera Karunga nokuvatera vantu. Naina, vamwe ava va dira kudiva Karunga nawo va pura uhura wouzuni. Morwa kutjira yimpagwa eyi ayi horoka, awo kutanta asi: “Tu lyeni nye oku tatu nu, yeeyi mungura tatu fu.” (1 Kol. 15:32) Nye ose kapi twa kara noutjirwe. Ntani kapi atu lihafesa tupu nyamwetu. (Yis. 18:1) Nye, ose kulidina nyamwetu nokuruganesa siruwo setu nononkondo detu noyiweka yetu yipo tu divise mbudi zongwa zoUhompa waKarunga kovantu. (Resa Mateusa 16:24.) Ose kugwanena mo ruhafo mokukarera Karunga, unene po apa atu vatere vantu va mu dive.

8. Sihonena musinke somoBibeli asi likida eyi twa hepera kuhuguvara unene mwaJehova nomoNonkango dendi?

⁸ Zaune, pokudira kudiva ezuva novili kutuvatera tu huguvare unene mwaJehova nokulitulira po sitambo sokutura Nonkango dendi pasirugana. Morwa kapi twa sikilira mo, ayo kuturerupira tu lihuguvare nyamwetu. Paurusa kwa korangedere Vakriste navenye asi: “Ogu ana kugazara asi age kuna sikama nawa-nawa, a takamese ga ha liganda.” Age kwa tumbwire mayovi nomurongo mbali nagatatu goVaisraeli ava va dilire kulimburukwa kwaJehova ntani  va fire komeho tupu zokukahwilira moSirongo sEtumbwidiro. Paurusa kwa tente asi: “Yininke nayinye eyi . . . kwa yi tjangera yi kare erondoro lyetu, ose tuna ya karere pouhura wouzuni ou.”—1 Kol. 10:8, 11, 12.

9. Ngapi omu maudigu aga tu nkondopeke nokutuhedesa kwaKarunga?

⁹ Nkedi zautano, pokudira kudiva apa uhura ngau wiza kutupulisira yipo tu lirongere ko komaudigu nokunkondopeka epuro lyetu. (Resa Episarome 119:71.) Mazuva gouhura wouzuni ou kuna kara “yiruwo yoyidigu.” (2 Tim. 3:1-5) Wovanzi mouzuni ou waSatana kwa tu nyenga, yiyo nye ava tu hepekere morwa epuro lyetu. (Joh. 15:19; 16:2) Nsene tu linunupika nokupapara evyukiso lyaKarunga posiruwo somaheteko, epuro lyetu ngali nkondopara ngwendi moomu mundiro agu kuhura sivera. Kapi ngatu hageka kukarera Jehova. Nye, ose ngatu hedera Jehova pepi kupitakana omu twa yi ndindilire.—Jak. 1:2-4; 4:8.

10. Yisinke ayi ninkisa siruwo si genderere unene?

¹⁰ Siruwo kuvhura si moneke ngwendi kuna kugenderera ndi kuna kuliwora. Apa atu kara moyiviyauka twa hana kutara kovili, siruwo kugenderera unene. Mokulifana, nsene tu kara moyiviyauka mosirugana esi ga tu pa Jehova, uhura ngau genderera kupitakana omu atu u gazarere. Sinzi sovagwavekwa kuna kara sihonena sosiwa kwetu morwa awo kuviyauka unene mosirugana saKarunga. Tu tarurureni eyi ya horokere apa Jesus va mu tumbire a kare Hompa mo-1914 nomu vagwavekwa vamwe va vangararere, ano vamwe kapi va vangararere.

11. Konyima zomvhura 1914, morwasinke vagwavekwa vamwe va gazarere asi Jesus kuna kuliwora?

¹¹ Diworoka yifanekeso yaJesus yovakadona murongo nava va sigililire emona. Vakadona ndi vakareli ava va sigililire emona ngano va divire asi siruwo musinke mukwali ndi Hekurwawo na wiza, ngano kapi va kere nohepero zokuvangarara. Nye kapi va divire siruwo, yipo va hepere kuvangarara. Nampili ngomu vagwavekwa va ndindilire nomvhura dononzi 1914 ngomvhura zokulikarera, awo kapi va divire nawa-nawa asi yisinke ngayi horoka. Apa yininke ya dilire kuhoroka ngomu va yi ndindilire vagwavekwa, vamwe vawo kwa gazarere asi Jesus kuna kuliwora. Konyima munazinyetugara gumwe kwa tente asi: “Vamwe vetu kwa gazarere asi tatu zi meguru mosivike sokuhova saSikukutu 1914.”

12. Ngapi omu vagwavekwa va yi likidire asi awo valimburukwi novanandunge?

¹² Gazara tupu omu ya digopere mokundindira uhura nye kapi wa wizire! Ntani hena, vanavazinyetu kwa ligwanekerere nomahepeko poYita yoPomuhowo yoUzuni! Sirugana sokuzuvhisa nkare si hage. Kwa kere ngwendi vagwavekwa kwa rere pampepo. Nye mo-1919, koyili yimwe ya va pindwire pampepo. Jesus kwa wizire a ya konakone vagwavekwa navenye. Nye vagwavekwa vamwe kwa ya va gwene va hana kuvangarara ntani kapi vana kurugana sirugana esi ga va sigilire Hekurwawo, Jesus. (Mat. 25:16) Awo kwa kere ngwendi vakadona vena womagova va dilire kupitura mawoli gomonoramba dawo. Ntani kwa fene ngwendi mukareli gomudona, morwa kapi va kere neharo lyokutura po malizambero mosirugana soUhompa. Nye sinzi sovagwavekwa kwa likidire ulimburukwi wokulikarera nokukara neharo lyenene lyokuruganena Hekurwawo monomvhura odo doyita.

13. Nkareso musinke va kere nazo vagwavekwa mo-1914, ntani nkareso musinke vana kara nazo naina?

¹³ Momvhura 1914 Ruhungu kwa fatwilire asi vagwavekwa ava va kere nonkareso zouhunga kapi ya va dompesere mutjima. Aro kwa twikilire ko asi: “Ose kapi twa here asi mpango zetu zi sike mo, yipo nye  apa twa yi dimbwilire asi eyi twa ndindilire mwaSikukutu 1914 kwa kere epuko, makura twa hefe asi Hompa kapi ga rundwilire sitambo sendi si lize nesi setu. Kapisi yimo twa yi gazarere ngoso.” Awo va here kukwata nawa egano sitambo saKarunga. Vagwavekwa vanaina nawo kuna kulikida nkareso zokulinunupika neharo lyokurugana mpango zaKarunga. Awo kwa tokomenene kurugana sirugana esi ga va sigililire Jesus. Ano ngesi ‘emukurumbunga lyononzwi dapeke,’ Vakriste ava va kara nehuguvaro lyokuparukira pevhu, kuna kutemwinina sihonena sawo.—Ehor. 7:9; Joh. 10:16.

14. Ngapi omu kukwaterera kewapaiko lyaKarunga lyokugava nondya dopampepo aku tu nkondopeke?

¹⁴ Mukareli gokulimburukwa gonondunge kukwaterera kewapaiko lyaKarunga lyokugava nondya dopampepo posiruwo sado. Awo kuronga emukurumbunga li gwanene mo uwa moNonkango daKarunga nomompepo zendi, kwa lifana ngwendi nawo kuna kuzwida mawoli monoramba dawo. (Resa Episarome 119:130; Johanesa 16:13.) Oyo kwa va nkondopekere va kare vana vangarara kewizo lyaKristusa nampili ngomu va ligwanekerere nomaheteko gomanene. Pasihonena, modorongo zimwe zoVanazi, vanavazinyetu kwa kere tupu noBibeli zimwe. Yipo ngava kanderere va gwane nondya dononzi dopampepo. Konyima yipo va ya zuvhire asi munadorongo gomupe ya mu tompokere mokuzweka yifo yimwe yoyipe yoRuhungu meguru lyendi lyositji. Munazinyetu gomugwavekwa gumwe ogu ga parukire gedina Ernst Wauer, konyima kwa diworokere asi: “Jehova kwa tu vaterere monkedi zokutetukisa tu kwate yirongwa oyo yokukorangeda momutwe.” Ntani kwa tanta hena asi: “Naina ureru kugwana nondya dopampepo, nye ose kuditara asi mulyo ndi? Ame nina si huguvara asi Jehova kwa pungwira owo va huguvara mwendi nokukara noulimburukwi nondya dononzi positafura sendi.”

15, 16. Ngapi omu valikwali vamwe va gwene matungiko mosirugana sokuzuvhisa, ntani yisinke no lirongera ko kosihorokwa oso?

¹⁵ Nonzwi dapeke kuvatera vamumbya vaKristusa pokuviyauka unene mosirugana sokuzuvhisa. (Mat. 25:40) Awo kapi va fana ngwendi mukareli gomudona goudwa gomosifanekeso saJesus, awo kwa  kara neharo lyokurugana unene nelizambero mokutura muhowo Uhompa waKarunga meparu lyawo. Pasihonena, apa Jon naMasako va va zigidire koKenya va ka zuvhisire vantu ava ava uyunga Rutjina, pomuhowo kapi va here kuza ko. Konyima zokukonakona ukaro wawo makura tava kanderere kuhamena yuma oyo yipo va tokwere kuza.

¹⁶ Morwa kwa litulire mo unene yiyo va gwene matungiko. Awo kwa tente asi: “Sirugana sokuzuvhisa kwa kere sokuhafesa.” Awo kwa tamekere novarongwa woBibeli ntambali ntani va ligwanekerere noyilimonena yoyiwa yoyinzi. Awo kwa gwedererere ko asi: “Ose kupandura Jehova nkenye ezuva kweyi ga tu pulisira tu wize oku.” Vanavazinyetu wovanzi va yi likida asi apa ngau wiza uhura, ngau va gwana awo kuna kuviyauka unene mokukarera Karunga. Gazara mayovi gava va za koSikora zaGiliyata nokukara vatumwa. Ove kuvhura kulironga yoyinzi kuhamena sirugana soutumwa mosirongwa “Ose kurugana paapa twa hulira!” esi sa kara moRuhungu 15 Sikukutu 2001. Ngomu no ka resa sirongwa sokuhafesa kuhamena eparu lyoutumwa, gazadara ko omu kurugana unene mosirugana saKarunga aku mu yererepeke nokukuretera ruhafo rorunene.

17. Ngapi omu kudira kudiva ezuva novili kuna kara etungiko?

¹⁷ Morwa kudira kudiva ezuva novili apa ngau wiza uhura wouzuni ou, ayo kuna kara etungiko kwetu. Mevango lyokunyegenya ndi tu dompe mutjima, ose kuhedera pepi Guhyetu geharo Jehova, ngomu tuna kulitura mo unene mokurugana mpango zendi. Morwa twa tameka kupurura pampepo nokunyokera po madonganeso, ose kugwana ruhafo mosirugana saHekurwetu.—Ruk. 9:62.

18. Morwasinke tuna dilire kuhara kuguvisa Jehova naJesus?

¹⁸ Ose kuna kuhedera pepi nouhura wouzuni ou. Kwato gumwe gwetu ogu ana hara kuguvisa Jehova naJesus. Awo kwa tu pa sirugana sosiwa momazuva aga gopouhura. Ee, ruhafo musinke tuna kara naro morwa awo kwa tu huguvara!—Resa 1 Timoteusa 1:12.

19. Ngapi omu natu liwapaikira yipo tu vangarare?

¹⁹ Li kare asi ehuguvaro lyetu lyokukaparukira meguru ndi moParadisa pevhu, ose ngatu twikira kulimburukwa mpango zaKarunga zokuzuvhisa nokutulisa po varongwa. Kapi twa hepa kudiva ezuva novili apa ngali wiza ezuva lyaJehova. Ose ngatu twikira ngorooro kuliwapaikira yipo tu vangarare. (Mar. 13:32; Mat. 24:44) Tuna si huguvara asi nsene ngatu kara ngorooro nehuguvaro mwaJehova nokutura muhowo Uhompa wendi, kapi ngatu fisa nomuga.—Rom. 10:11.