KUVHURA o gazadare ko yininke nayinye yoyiwa eyi ngali ka ruganena epangero lyononkondo lyonkenda vantu valyo monomumvho eyovi ndi? “Emukurumbunga” ngali ka hafera yininke oyo, eli ngali ka paruka ‘mahepeko gomanene’ aga ngaga ka reta uhura kouzuni ou woudona.—Ehor. 7:9, 14.

2. Yisinke va ligwanekera nayo vantu monomvhura 6 000 da ka pita?

² Nomvhura 6 000 da ka pita vantu kwa hetekera ko kulipangera vene, ano eyi kwa retera vantu kukora kokunene noruhepo. Bibeli kwa tanta asi: ‘Vanankondo kuhepekera mo vakwaawo.’ (Muud. 8:9) Yisinke eyi tuna kumona naina? Kugusa ko yita nourwanesi, pana kara hena maudigu ngwendi ruhepo, mauvera, ezonauko lyonkarapamwe, erunduruko lyomukarompepo ntani nayinye hena ngoso. Vapangeli va rondora asi yitundwamo ngayi kara yoyidona unene nsene kapi vana kutura po marunduruko ndi va hageke kuzonagura evhu.

3. Yisinke ngayi ka horoka mEpangero lyoNomumvho Eyovi?

³ Mepangero lyaJesus, Hompa gwaKarunga goUmesiyasa, novantu 144 000 ava nga ka pangera kumwe nendi moUhompa waKarunga, ngava ka gusa po ezonauko eli va rugana kevhu. MEpangero lyoNomumvho Eyovi, etumbwidiro lyaJehova Karunga ngali ka sikilira mo: “Ame tani ungu evhu lyepe neguru lyepe. Yihoroka yanare ngava yi divara nuunu.” (Jes. 65:17) Yihorokwa musinke yokutetukisa eyi tuna kundindira komeho? Mauporofete goBibeli kuvhura kutuvatera tu kwate egano yihorokwa oyo yokutetukisa, nampili ngomu “ayi dili kumoneka” simpe.—2 Kol. 4:18.

4. Momambo musinke vana kutunga vantu naina?

⁴ Yilye ogu ga dira kuhara kukara nembo lyamwene, omu na kara kumwe nepata lyendi nokulizuvha egameno? Nampili ngoso, mouzuni ou wanaina mwa kara udigu womambo. Vantu wovanzi kwa tunga mompatakani nomomambo goyisasara. Kwawo kukara nembo lyavene kwa kara ngwendi nzodi.

5, 6. (a) Ngapi omu etjangwa lyaJesaya 65:21 neli lyaMika 4:4 ngali sikilira mo? (b) Ngapi omu natu vhura kugwana matungiko ogo?

⁵ Mepangero lyoUhompa, eharo lyokukara nembo lyanyamoge ngali ka sika mo, morwa kwa yi pumbire kupitira mwaJesaya asi: ‘Vantu ngava litungira mambo omu ngava kara. Awo ngava tapeka moyipata, tava lipanda vhinyu.’ (Jes. 65:21) Kukara nomambo gavene kapisi yilyo lyelike ehuguvaro vana kundindira. Naina vantu vamwe kwa tunga momambo gavene, ano vamwe kwa kara nomambo gomanene. Nye awo kukara nosinka asi kapi tava vhuru kugafutira ndi vawidi kuvhura va ya ga teze. Mepangero lyoUhompa kwato ogu nga ka kara nosinka sangoso. Muporofete Mika kwa tjenge asi: “Nkenye ogu nga kara mompora moyikunino yamwene yoyindjembere nomaukuzu, kutupu ogu nga mu tjilisa.”—Mika 4:4.

⁶ Yisinke eyi twa hepa kurugana nsene tuna hara kukaparuka mepangero lyoUhompa? Yosili, natuvenye twa hepa embo lyokutunga. Kapisi tu kondjere ngesi mokukara nomambo gomawa gomanene makura tu kare momakongo, nye ya wapa kuparuka monkedi ezi azi likida asi kuna kudemenena komatumbwidiro gaJehova. Jesus kwa tente asi: “Vambanze kwa kara nomakero gawo, ano yidira noyikorogo yayo, nye MunwaMuntu kapi ga paka evega lyokurara a pwizumuke.” (Ruk. 9:58) Jesus ngano ga vhulire kutunga ndi kukara nembo lyewa unene. Morwasinke ga dilire kuyirugana oyo? Morwa kapi ga here kulihameka moyininke eyi ngano ya mu donganesere a dire kutura Uhompa muhowo. Kuvhura tu kwame sihonena sendi tu dire kupulisira yininke yopanyama yi kare muhowo meparu lyetu nokuturetera sinka ndi?—Mat. 6:33, 34.

7. Mpangera musinke ga geve Jehova kovantu kuhamena yikorama?

⁷ Apa Jehova ga sitire yininke yepevhu, muntu yige ga ya hulililire kuunga. Age kwa tanterere Nkurungu zendi, Jesus, eyi ga ungilire vantu asi: “Ntaantani tatu ungeni po nye vantu; muntu nga kare ngwendi nyose a tu fane. Age nga pangere nomfi domomema noyidira yekeguru noyimuna noyikorama nayinye yoyinene neyi yoyinunu yepevhu.” (Gen. 1:26) Adamu naEva novantu navenye, kwa va pere mpangera zokupangera yikorama.

8. Malizuvho musinke ayi likida yikorama?

⁸ Kuvhura sili vantu va pangere yikorama nayinye nokukara nombili kumwe nayo ndi? Vantu wovanzi kuhara unene yikorama eyi va weka, ngwendi yimbwa noyimbisi. Ngapi kuhamena yikasama? Munambudi gumwe kwa tanta asi: “Vadiviunsitwe ava ava kara pepi noyikasama nokuyilironga kwa yi dimburura asi yikorama nayinye eyi ayi zamweke ya kara nomalizuvho.” Ose twa yi diva asi yikorama kutukuka ndi kuhanduka apa ava yi tjilisa, nye kuvhura yi likide nkenda ndi? Vadiviunsitwe kwa tanta asi apa yikorama eyi ayi zamweke  ayi rere vana vayo, ayo kulikida nkenda zonene.

9. Ngapi omu yikorama ngayi ka litjindja komeho?

⁹ Yipo nye, ya ha tu tetukisa asi Bibeli kwa tanta asi ngapa kara mbili pokatji koyikorama novantu. (Resa Jesaya 11:6-9; 65:25.) Morwasinke? Diworoka asi apa Nowa nepata lyendi va pwege memuwato konyima zoRuhanzo, Jehova kwa va tanterere asi: “Yikorama nayinye yepevhu, . . . ngayi mu tjira.” Karunga kwa yi rugene yipo vantu va dire kudipaga yikorama nayinye. (Gen. 9:2, 3) Nye Jehova kuvhura kuugusa po utjirwe owo, yipo elikwatakano lyovantu noyikorama li ka kare po ngwendi moomu ga yi harerere muhowo. (Hos. 2:18) Aso ngasi ka kara siruwo soruhafo kwanavenye ava ngava ka tunga pevhu!

10. Morwasinke vantu ava lilire?

¹⁰ Apa Saromo ga mwene ‘uhasili ou wa kara mouzuni ou,’ age kwa uyungire neguwo asi: “Ava ava hepeke kulira kwelike va kerera, nagumwe si gokuvakwafa.” (Muud. 4:1) Naina yina donapa nye unene kupitakanena. Yilye gumwe gwetu ga dira kulira rumwe? Poyiruwo yimwe, ose kulira morwa ruhafo. Nye yiruwo yoyinzi, ose kulira morwa ruguwo.

11. Sihorokwa musinke somoBibeli asi ku kundama unene?

¹¹ Gazadara ko yihorokwa yoyinzi eyi atu resa moBibeli yovantu ava va lilire. Apa Sara ga fire age nomvhura dendi 127, “Abirahamu makura ta zi ko a ya lire Sara.” (Gen. 23:1, 2) Apa Naomi ga rekerere vangumweyi zendi “tava tende mo va lire” makura “tava tende mo hena va lire.” (Rutu 1:9, 14) Apa hompa Hisikiya ga verere unene-nene pokufa ga karererere, age kwa kandererere kwaKarunga makura “ta tameke kulira unene-nene,” dogoro tayi kundamene mo Jehova. (2 Vah. 20:1-5) Mupositoli Peturusa ga patanene Jesus. Apa ga zuvhire sikondomboro kwa kuziga, Peturusa “makura ta pwaga, ta ka lira makurulira.”—Mat. 26:75.

12. Ngapi epangero lyoUhompa ngali ka retera rufuwo vantu?

¹² Yininke yokuguvisa kuna kuhorokera vantu, makura va hepa ehengagwido norufuwo. MEpangero lyoNomumvho Eyovi lyaKristusa, Karunga “nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.” (Ehor. 21:4) Ayo kuhafesa kudiva asi kukora noruhepo kapi ngayi ka kara ko hena ntani asi Karunga ga tumbwidira kukagusa po nomfa. Ngapi nga ka di gusa po?

13. Ngapi omu nomfa da kundama vantu kutundilira tupu apa ga zonene Adamu?

¹³ Kutundilira tupu apa ga zonene Adamu, nomfa kwa pangera vantu navenye. Nkore ezi, kwato muntu gononzo gokuvhura kuzifunda ndi kuzihenduka, ntani azo kureta kukora noruguwo. (Rom. 5:12, 14) Mamiliyona govantu kwa kara “moupika wetjiro lyonomfa.”—Heb. 2:15.

14. Yisinke ngayi ka horoka apa ngava ka di zonagura po nomfa?

¹⁴ Bibeli kutumbura siruwo esi ‘ngava ka zonagura po nomfa.’ (1 Kol. 15:26) “Emukurumbunga” eli lina kuparuka ngesi ngali ka yi tompoka kukaparuka narunye-nanarunye mouzuni woupe. Ntani hena mabiliyona govantu ava va fa ngava ka va vhumbura. Gazara koruhafo  apa ‘vemukurumbunga’ ngava ka tambura ava ngava ka vhumbuka! Nsene tu resa nawa yihorokwa yomoBibeli yovantu ava va vhumbwire, ngatu kwata egano omu ngayi ka kara apa ngava ka va vhumbura vantu.—Resa Marukusa 5:38-43; Rukasa 7:11-17.

15. Ngapi omu ngo lizuvha nsene ngo ka mona vahali woge kuna kuvatengwidira hena keparu?

¹⁵ Gazara nonkango edi “awo tayi va pe sikumwamurungu” makura “tava hamberere Karunga.” Ngano asi nove yipo wa kere apa va vhumbwire vantu vena, nampo ngano nove wa kere nomalizuvho gangoso. Ayo ngayi ka tu hafesa nokututetukisa pokukamona vahali vetu kuna kuvatengwidira hena keparu. Eyi yiyo ga uyungilire Jesus asi: “Siruwo ngasi wiza, apa ngava zuvha ezwi lyendi navenye ava va kara monontoko, makura tava pwaga mo.” (Joh. 5:28, 29) Nampili ngomu ya kara asi kwato gumwe gwetu ga mona yininke yangoso yi horoke, yosili aso ngasi ka kara sininke sosinene ngoyininke ‘eyi ayi dili kumoneka.’

16. (a) Morwasinke natu karera neharo lyokuuyunga matungiko gokomeho? (b) Yisinke eyi ga uyungire Paurusa mokukorangeda Vakriste vakwawo?

¹⁶ Vantu ava vana kara noulimburukwi kwaJehova momazuva aga gomaudigu kuna kara nomeho zoruhafo! Nampili ngomu twa dira kugwana simpe matungiko aga gana kuwiza, twa hepa kugagazara, ano oyo ngayi tu vatera tu demenene koyininke yomulyo nokutwikira kukarera Jehova nokunyokera po madonganeso  goyininke yomouzuni ou. (Ruk. 21:34; 1 Tim. 6:17-19) Pelirongo nopoukareli wepata napa atu uyunga novanavazinyetu ntani napa atu zogere novarongwa vetu woBibeli, ngano tu uyunge nomukumo kuhamena ehuguvaro lyetu lyokomeho. Eyi ngayi ninkisa ehuguvaro lyetu li kare lyousili. Mupositoli Paurusa yiyo ga rugene apa ga korangedere Vakriste vakwaawo. Nonkango dendi da va vaterere va gazare yininke eyi ngayi horoka kouhura wEpangero lyoNomumvho Eyovi lyaKristusa. Hetekera ko kukwata egano nonkango daPaurusa domo-1 Vakolinte 15:24, 25, 28.—Resa.

17, 18. (a) Monkedi musinke Jehova ga kere “gelike mupangeli goyininke nayinye”? (b) Yisinke nga ka rugana Jesus a ka tengwidire po uumwe nombili?

¹⁷ Nonkango odo kwa singonona asi kouhura wonomumvho eyovi ‘Karunga nga kara gelike mupangeli goyininke nayinye.’ Yisinke ayi tanta eyi? Gazadara ko kosiruwo esi Adamu naEva va kere mosikunino saEdeni apa va kere ruha rwepata lyaJehova lyombili. Jehova, Mupangeli gwanayinye, kwa pangerere kuvyukilira yisitwa yendi yemeguru neyi yepevhu. Awo ngava zogere naJehova nokumukarera ntani ga va tungikire. Age kwa kere “gelike mupangeli goyininke nayinye.”

¹⁸ Elikwatakano olyo lyombili kwa li tezere po apa Satana ga pukisire vantu va rwanese upangeli waJehova. Kutundilira momvhura 1914, Uhompa woUmesiyasa kwa rugana ko yuma pokutengwidira po uumwe nombili. (Efe. 1:9, 10) MEpangero lyoNomumvho Eyovi, yininke yokutetukisa ‘eyi ayi dili kumoneka’ ngayi ka sikilira mo. Ntani nye ngali wiza “ehuro” kutanta asi ehagero lyEpangero lyoNomumvho Eyovi lyaKristusa. Yisinke ngayi ka horoka? Nampili ngomu Jesus va mu pa ‘nonkondo nadinye demeguru, nedi depevhu,’ kapi ga linenepeka. Ntani kapi ga hara kugusa sipundi saJehova. Nelinunupiko age ‘nga gava uhompa kwaKarunga Guhwe.’ Age nga ruganesa situmbukira sendi nononkondo dendi dokulikarera “mokuyererepeka Karunga Guhwe.”—Mat. 28:18; Fil. 2:9-11.

19, 20. (a) Ngapi omu ava ngau ka pangera Uhompa nava yi likida asi kuna kukwatesa ko upangeli waJehova? (b) Yininke musinke yoyiwa ngatu ka hafera komeho?

¹⁹ Posiruwo oso, navenye ava ngava paruka pevhu mepangero lyoUhompa ngava ka sikilira mo. Awo ngava kwama sihonena saJesus ntani ngava tambura nelinunupiko upangeli waJehova. Nsene ngava likida asi kwa hara Jehova a va pangere awo ngava pita meheteko lyokuhulilira. (Ehor. 20:7-10) Konyima zoyo, varwanesi navenye, va kare asi vaengeli ndi vantu, ngava ka va zonagura po narunye. Aso ngasi kara sili siruwo soruhafo! Navenye vemepata lyaJehova vemeguru nava vepevhu ngava ka mu hamberera, morwa yige “gelike mupangeli goyininke nayinye.”—Resa Episarome 99:1-3.

²⁰ Kuvhura yininke yoyiwa eyi ngau ka rugana Uhompa yi ku tumangede o demenene magazaro nelituromo lyoge mokurugana mpango zaJehova ndi? Kuvhura o nyokere po ehuguvaro nehengagwido lyoyimpempa eli au gava uzuni waSatana ndi? Kuvhura o nkondopeke etokomeno lyoge lyokukwatesa ko nokukwaterera koupangeli waJehova ndi? Ngano yirugana yoge yi likide asi ono hara kuyirugana oyo dogoro narunye. Makura ngo hafere mbili nomatungiko, kapisi monomvhura eyovi tupu nye dogoro narunye!