JEHOVA, Murongi gwetu goMunene kuna hara ‘kuturonga.’ (Jes. 30:20) Eharo yilyo ali mu tumangeda a ronge nokudeura wopeke. Pasihonena, morwa kumutumangeda eharo lyenene, Jehova kwa likida Jesus “nayinye eyi a rugana mwene.” (Joh. 5:20) Eharo lyokutuhara ose Nombangi dendi, kutumangeda Jehova a tu ‘ronge eyi natu uyunga,’ ngomu tuna kulitura mo unene mokumuyererepeka nokuvatera vapeke.—Jes. 50:4.

Mokutemwinina sihonena saJehova seharo, Komitiye zerongo zoMbungagendesi kuruganesa nosikora doukareli murongo va deure vantu ava va kara neharo noukaro ou nau va pulisira va lihameke mo. Ove kutara nosikora odo ngeharo lyaJehova ndi?

Hafera etwaromo lyonosikora doukareli nomakumbururo ko gavamwe ava va lihameka mo. Ntani lipura asi: ‘Ngapi omu nani gwanena mo uwa merongo eli lyaKarunga?’

‘NgaKarunga geharo,’ Jehova kwa tura po edeuro eli ali tu retere uwa meparu nokutuwapaikira tu lididimikire maudigu nokutuvatera tu gwane ruhafo rorunene mosirugana sokuzuvhisa. (2 Kol. 13:11) Ngwendi varongwa vanare, nose kwa tu wapaika tu vatere wopeke ‘pokuvaronga, va limburukwire nayinye’ eyi va tu rekera.—Mat. 28:20.

Nampili ngomu natu dira kulihameka mo monosikora nadinye odo, ose kuvhura kugwanena mo uwa mwado. Ntani kuvhura tu ture pasirugana erongo eli atu gwana moBibeli. Ntani ose kuvhura kutamununa sirugana setu sokuzuvhisa pokurugana kumwe novakareli vaJehova ava va deura nawa.

Lipura asi: ‘Ukaro wange kuvhura u pulisire nge ni lihameke mo mwazimwe zonosikora odo ndi?’

Vakareli vaJehova kuyitara oyo asi situmbukira sokukwatesa ko nosikora odo nokuvaronga. Ngano edeuro eli o gwana li ku hedesere pepi naKarunga nokukuwapaika o sikise mo yitumbukira yoge, unene po sirugana sokuzuvhisa mbudi zongwa!