YIHOROKWA yokutukukisa ntaantani yi ka horoke apa pevhu. Masikiliromo gomauporofete kuyipameka eyi, yipo nye twa hepera kuvangarara. Yisinke ngayi tu vatera tu vangarare? Mupositoli Paurusa kutukorangeda tu ‘tambesere meho getu koyininke eyi ayi dili kumoneka.’ Twa hepa kudiworoka asi Jehova nga tu pa mwenyo gwanarunye, yi kare asi meguru ndi pevhu. Paurusa kwa tjenge nonkango edi yipo a korangede vapuli vakwawo va demenene komfeto ezi ngava ka gwana morwa ulimburukwi wawo. Pokurugana ngoso, ngayi va vatera va lididimikire maudigu nomahepeko.—2 Kol. 4:8, 9, 16-18; 5:7.

2. (a) Mokunkondopeka ehuguvaro lyetu, yisinke twa hepa kurugana? (b) Yisinke natu ka zogera mosirongwa esi nesi sokukwama ko?

² Epukururo lyaPaurusa kuturonga sirongwa somulyo: Nsene tuna hara kunkondopeka ehuguvaro lyetu, twa hepa kudemenena koyininke yomulyo eyi simpe ayi dili kumoneka. (Heb. 11:1; 12:1, 2) Tatu ka zogera yihorokwa murongo eyi ngayi ka horoka komeho eyi ya likwatakana nehuguvaro lyetu lyomwenyo gwanarunye. *

3. (a) Sininke musinke va singonona 1 Vatesaronika 5:2, 3? (b) Yisinke ngava rugana vampitisili woupolitika, ntani wolye ngava lipakererera nawo?

³ Paurusa kwa tjenge kuhamena sininke esi ngasi ka horoka mombilive zendi zokoVatesaronika. (Resa  1 Vatesaronika 5:2, 3.) Age kwa tumbwire “ezuva lyaHompa.” Ezuva eli ngali tameka nezonauko lyomaukarelikarunga goyimpempa, ano ngali ka haga noyita yaHarumagedoni. Komeho tupu ezuva lyaJehova li ka tameke, vapangeli wouzuni ngava tanta asi: “Nayinye mompora, kutupu upyakadi!” Eyi kuvhura kutamba sihorokwa simwe ndi yokulisiga-siga. Nomuhoko kuvhura ngadi gazare asi ntaantani di kohonone po maudigu gado gomanene. Yisinke vampitisili womaukarelikarunga ngava rugana? Awo kuna kara ruha rouzuni ou, yiyo nye ngava lipakererera novampitisili woupolitika. (Ehor. 17:1, 2) Mokurugana ngoso, vampitisili womaukarelikarunga ngava rugana ngwendi vaporofete woyimpempa womoJuda zanare. Jehova kwa uyungire kuvahamena asi: ‘Awo kuna kutanta asi: “Nayinye yina wapa” ayo ya hana nye kuwapa.’—Jer. 6:14; 23:16, 17.

4. Kapisi ngwendi sinzi sovantu, ose yisinke atu kwata egano?

⁴ Yi kare asi yilye nga tanta asi: “Nayinye mompora, kutupu upyakadi” eyi ngayi likida asi ezuva lyaJehova kuna kuhara kutameka. Eyi yiyo ga uyungilire Paurusa asi: “One vakwetu, kapi mwa kara momundema, olyo ezuva asi ngali mu kondekedere mo pamuwidi. One namuvenye mu vantu ava mwa hamena kouzera.” (1 Tes. 5:4, 5) Kapisi ngwendi sinzi sovantu womouzuni, ose kukwata egano eyi za uyunga ko Bibeli kuhamena yihorokwa eyi yina kuhoroka naina. Ngapi uporofete ou: “Nayinye mompora, kutupu upyakadi” ngau ka sikilira mo? Twa hepa kundindira tu ka yi mone. Yipo nye twa hepera kutokomena tu ‘vangarere, tu kare vandjewa-ndjewa.’—1 Tes. 5:6; Sef. 3:8.

5. (a) Ngapi omu “udigu wounene” ngau tameka? (b) Yilye “hompa gomukadi” ogu a gazara asi kapi nga ligwanekera neguwo?

⁵ Yisinke ngayi kwama ko? Paurusa kwa tente asi: “Nsene ngava tanta asi: ‘“Nayinye mompora, kutupu upyakadi,” yipo ngali va gwanena ezonauko poopo.’ Ezonauko ngali tameka nehomokero lyomaukarelikarunga nagenye goyimpempa, aga za tumbura Bibeli asi “Babironi zonene” ndi “hondedi.” (Ehor. 17:5, 6, 15) Ehomokero olyo lyomaukarelikarunga nagenye goyimpempa, kukwatera mo nongereka, ngali kara etameko ‘lyoudigu wounene.’ (Mat. 24:21; 2 Tes. 2:8) Vantu wovanzi ngayi va tetukisa apa ngayi horoka eyi. Morwasinke? Morwa posiruwo oso, hondedi ngazi gazara asi yizo ‘hompa  gomukadi’ ogu nga ‘dira kuligwanekera neguwo.’ Haruka ko tupu ngazi ya yi dimburura asi mepuko za kere. Ngava zi zonagura po hararasi ngwendi “ezuva limwe tupu.”—Ehor. 18:7, 8.

6. Yilye ogu nga zonagura po maukarelikarunga goyimpempa?

⁶ Nonkango daKarunga kwa horora asi ‘sikasama sonombinga murongo’ ngasi homokera hondedi. Apa atu konakona buke zEhororo, ose kulironga asi sikasama oso kwa tamba kombunga zElipakerero lyoNomuhoko (UN). ‘Nombinga murongo’ kwa fanekesa mapangero nagenye gantaantani aga aga kwatesa ko ‘sikasama oso sosigeha ge.’ * (Ehor. 17:3, 5, 11, 12) Ngapi omu ngali kara ehomokero olyo? Mapangero aga ga hamena kElipakerero lyoNomuhoko ngaga gusa emona lyohondedi, nokuhorora udona wendi nokumuzonagura ntani ‘nokumuhwika nomundiro.’ Hondedi ngava zi zonagura po nuunu.—Resa Ehororo 17:16.

7. Ngapi omu ngali tameka ehomokero ‘lyosikasama’?

⁷ Uporofete woBibeli kwa likida hena omu ngali tameka ehomokero olyo. Jehova yige nga tura monomutjima dovapangeli ‘yigazo yokusikisa mo eyi ga panga,’ yipo ngava zonagure po hondedi. (Ehor. 17:17) Maukarelikarunga kwa retesa po yita nomaudigu gomanzi mouzuni, yipo nye vapangeli ngava gazarera asi ntudi va hepa kuzonagura po hondedi ntani nava gwanena mo uwa. Apa vapangeli ngava homokera hondedi, awo ngava gazara asi kuna kusikisa mo “yigazo” yawo. Nye Karunga yige nga va ruganesa va zonagure po maukarelikarunga nagenye goyimpempa. Yipo nye, ruha rumwe rouzuni waSatana ngaru homokera rukwawo, ano Satana kapi nga vhura kuyikandana po.—Mat. 12:25, 26.

8. Ehomokero musinke ‘lyaGogo mosirongo saMagogo’?

⁸ Apa ngava zonagura po maukarelikarunga nagenye goyimpempa, vakareli vaKarunga awo simpe ngava ‘kara mompora’ ntani ‘moyitata ya hana makuma.’ (Hes. 38:11, 14) Yisinke ngayi horokera mbunga zovantu ava ava karere Jehova ezi azi moneka ngwendi kapi za kara negameno? Ngazi va homokera “mbunga zonene.” Nonkango daKarunga kwa singonona ukaro ou ngehomokero ‘lyaGogo mosirongo saMagogo.’ (Resa Hesekiyeli 38:2, 15, 16.) Ngapi omu atu lizuvhu kuhamena ehomokero olyo?

9. (a) Yisinke sinka setu sosinene? (b) Yisinke twa hepa kurugana ngesi tu nkondopeke epuro lyetu?

 ⁹ Mokudiva asi Gogo nga homokera vantu vaKarunga kapisi yi tu ninkise tu kare nosinka sokupitakanena. Sinka setu sosinene kuna kara sokupongora edina lyaJehova nokuhungameka upangeli wendi wanayinye, kapisi ezoworo lyetu. Jehova kwa divisire kupitakana yikando 60 asi: ‘Ngava diva asi ame nyame’ Jehova. (Hes. 6:7) Ose kuna kundindira nononkondo esikiliromo lyouporofete waHesekiyeli, ntani twa yi diva asi Jehova “ga diva omu a yoworora vatjilikarunga momaheteko gawo.” (2 Pet. 2:9) Ano ngesi tuna hara kurugana unene tu nkondopeke epuro lyetu yipo tu kwaterere koulimburukwi wetu kwaJehova, ga kare asi maheteko musinke tuna kuligwanekera nago. Yisinke twa hepa kurugana? Twa hepa kukanderera nokulironga Nonkango daKarunga nokuteda ko nokuzuvhisa mbudi zoUhompa. Pokurugana ngoso, ose ngatu pameka ehuguvaro lyetu lyomwenyo gwanarunye eli lya fana ngwendi “sisikameso.”—Heb. 6:19; Epis. 25:21.

10, 11. Ngapi omu ngazi tameka Harumagedoni, ntani yisinke ngayi horoka posiruwo oso?

¹⁰ Sihorokwa musinke sokutukukisa ngasi retesa po ehomokero lyovakareli vaKarunga? Jehova nga ruganesa Jesus novakwayita vemeguru va vatere vantu vendi. (Ehor. 19:11-16) Eyi ngayi kara “yita mezuva olyo lyenene lyaKarunga Munankondo,” eyi ava tumbura asi Harumagedoni.—Ehor. 16:14, 16.

¹¹ Kuhamena yita oyo, Jehova kwa tanta asi: “Gogo ngani mu tjilisa nomahudi peke-peke. Ame HOMPA Mupangeli, nyame na yi uyunga. Vantu vendi ngava lipirukira va litwaatwe vene navene nomfuro.” Ava va hamena kwaSatana ngava piyagana nokutukuka ntani ngava tameka kulidipaga vene navene. Kombinga zaSatana, Jehova kwa tanta hena asi: ‘Mamanya gomundiro, ngaga mu powomokera kumwe nombunga zendi zovakwayita nokonomuhoko dononzi edi da hama kwendi.’ (Hes. 38:21, 22) Yitundwamo musinke ngayi kara?

12. Nomuhoko ngadi di ninkisa di dive yilye?

¹² Nomuhoko ngadi yi dimburura asi ado kuna kudizonagura po morwa Jehova yige ga yi panga. Makura vantu ava va hamena kwaSatana ngava uyunga ngwendi moomu va uyungire Vaegipite vanare ava va sikwire Vaisraeli pEfuta lyEgeha pokuzigira asi: “HOMPA yige ana kuvarwira mo!” (Ex. 14:25) Eyi ngayi ninkisa nomuhoko di dive Jehova. (Resa Hesekiyeli 38:23.) Siruwo sokuhura kupi sina hupu ko yipo yihorokwa oyo yi ka horoke?

13. Yisinke twa diva kuhamena ruha rwautano rosinhwi sefano eli ga singwenene Ndaniyera?

¹³ Uporofete waNdaniyera kutuvatera tu kwate egano omu udigu wounene una kuhedera popepi. Ndaniyera kwa singonona sinhwi sefano sokufana ngwendi muntu esi va ruganesa koyivera yokulisiga-siga. (Ndan. 2:28, 31-33) Aso kwa fanekesa mapangero gononkondo gomouzuni aga ga kundama vantu vaKarunga womosiruwo sanare nomosiruwo setu. Ago kuna kara Babironiya, Mediya naPeresiya, Gereka naRoma ntani epangero lyononkondo lina kara ngesi momazuva getu. Mouporofete waNdaniyera twa lironga asi nompadi nomambwara kwa fanekesa epangero olyo. MoYita yoPomuhowo yoUzuni, Britaniya naAmerika kwa tulisire po elikwatakano lyokulikarera. Ruha rwautano rosinhwi sefano lyaNdaniyera kuna kara epangero  lyaBritaniya naAmerika. Nompadi kuna kara ruha rokuhulilira rosinhwi sefano, eyi kulikida asi kwato epangero lyovantu eli ngali kwama ko. Nompadi nomambwara eyi ya livhonga sivera nerova, kulikida esesupo lyononkondo depangero lyaBritaniya naAmerika.

14. Epangero musinke ngali pangera dogoro ngazi wize Harumagedoni?

¹⁴ Mouporofete ou, Uhompa waKarunga kwa u fanekesa kemanya lyenene eli lya bomokere momvhura 1914 kondundu ezi azi fanekesa upangeli waJehova. Emanya olyo ntaantani li ya hanagure po nompadi defano. PoHarumagedoni, nompadi nefano nalinye ngava yi myona po. (Resa Ndaniyera 2:44, 45.) Yipo nye, epangero lyaBritaniya naAmerika yilyo ngali pangera dogoro ngazi wize Harumagedoni. Ee, omu tupu ayi hafesa mokukamona uporofete ou kuna kusikilira mo! * Nye yisinke nga rugana Jehova kwaSatana?

15. Yisinke ngayi horokera Satana novaengeli vendi konyima zaHarumagedoni?

¹⁵ Pomuhowo, Satana nga mona mbunga zendi apa pevhu omu vana kuzizonagura po. Makura koyili eyi ngayi horokera Satana mwene. Mupositoli Johanesa ga divisa yuma oyo. (Resa Ehororo 20:1-3.) Jesus Kristusa, ‘muengeli ogu ana kwaterere nsapi zosirongo sokonhi’ nga zugumina Satana novaengeli vendi mosirongo sokonhi, ngava kare mo nomumvho eyovi limwe. (Ruk. 8:30, 31; 1 Joh. 3:8) Monkedi zangoso, yimo ngava tameka kumyona mutwe gwezoka. *—Gen. 3:15.

16. Kukara kwaSatana ‘mosirongo sokonhi,’ yisinke aku tanta?

¹⁶ Yisinke ‘sirongo sokonhi’ esi ngava zugumina Satana novaengeli vendi? Aso kuna kara evega lyokonhi-nhi, ure kwanavenye ntudi Karunga nomuengeli ogu ga kara ‘nonsapi zokosirongo sokonhi’ yiwo wokuvhura kusika ko. Omo, Satana ngava ka mu manga a kare ngwendi ana fu a “dire kupukisa nomuhoko.” Yosili, “nyime gokununga” nga ka mwena teete!—1 Pet. 5:8.

17, 18. (a) Yihorokwa musinke tuna lirongo eyi ayi dili kumoneka simpe? (b) Konyima zoyihorokwa oyo, yisinke ngatu ka hafera?

¹⁷ Yihorokwa yomulyo yokutukukisa ntaantani yi ka horoke. Ose kuna kundindira nononkondo tu ka mone omu dina kusikilira mo nonkango edi: “Nayinye mompora, kutupu upyakadi!” Ngatu ka mona hena ezonauko lyaBabironi zonene nehomokero lyaGogo zaMagogo noyita yaHarumagedoni ntani nezugumo lyaSatana novaengeli vendi mosirongo sokonhi. Konyima zoyihorokwa oyo, apa yininke yoyidona nayinye ngayi ka dongonoka po, ntani nye ngatu ka hafera “mpora zonene” mEpangero lyoNomumvho Eyovi lyaKristusa.—Epis. 37:10, 11.

¹⁸ Tuna lirongo kuhamena yihorokwa yitano eyi ya dira kuhoroka simpe. Mosirongwa sokukwama ko ngatu ka zogera yininke yimwe hena ‘eyi ayi dili kumoneka’ kweyi twa hepa ‘kutambesera meho getu.’