NOMVHURA dongandi da ka pita, Rúbia (1), munazinyetukadi ogu ana kara ngesi nonomvhura 30, kwa ka dingwire Sandra (2), muzuvhisi gokukarerera ogu ga kere mombungakriste zonunu zokoMbindakano zaBrasilia. Pedinguro lyendi, Rúbia koyili yimwe eyi ya mu kundamene unene yiyo ga rundwilire eparu lyendi. Yininke musinke oyo? Tu zeni tu ka yi konakone.

Sandra kwa zire naRúbia komurongwa gwendi goBibeli gomukadi. Posiruwo selirongo mukadi kwa tanterere Sandra asi vakadona vatatu wokoyirugana yawo nawo vana hara kulironga Bibeli. Nye mukadi kwa va tanterere asi Sandra kapi ana kara nosiruwo sokulironga nomuntu hena ntudi va hepa kundindira mvhura mudima. Rúbia kapi ga  ndindilire asi kuvhura yi kare ngoso asi vantu va ndindilire siruwo sawo sokulironga Bibeli! Age kwa tanta asi: “Mombungakriste zetu, ame kwa digoperere nge kugwana nampili murongwa gumwe goBibeli. Moomo membo lyomurongwa goBibeli, ame na lizuvhire eharo lyenene lyokuvatera vantu modoropagona ozo. Konyima zoyo yipo na sigire sitata sosinene omu na tungire ni dirukire modoropa omu nga zuvhisire Sandra.”

Yisinke ga ya limonenene Rúbia? Age kwa simwitira asi: “Konyima tupu zokudirukira modoropa ozo, ame na ya kere novarongwa woBibeli wokusika po-15.” Ngwendi Sandra, Rúbia ga ya kere nelikwamo lyomadina govantu ava va ndindilire elirongo lyoBibeli!

Diego (3), munazinyetugara ogu ana kara ngesi nonomvhura 20, kwa ka dingwire vazuvhisi wongandi wokukarerera womodoropagona zokoMbindakano zaBrasilia zedina Prudentópolis. Edinguro eli lya mu tumangedere a gazadare ko kosirugana sendi sokuzuvhisa. Mombungakriste zawo, age nga rugana tupu novili dononsesu moyirugana yokuzuvhisa nkenye kwedi. Nye apa ga ka dingwire vazuvhisi owo wokukarerera nokupurakena koyilimonena yawo, ya likidire nawa-nawa asi awo ngava hafere unene sirugana sawo sokuzuvhisa kumupitakana. Diego kwa tanta asi: “Apa na mwene ruhafo rwawo, name kwa lizuvhire ngwendi ni kare noruhafo ngwendi yiwo.” Konyima zedinguro olyo, yipo ga tamekere kurugana uzuvhisi wokukarerera.

Ove mudinkantu goMbangi ndi? Ngwendi Diego, nampo ove kuza moyirugana yokuzuvhisa nokomapongo nye simpe kuna kulizuvha asi moyirugana yoge yokuzuvhisa kapi ono kugwana mo ruhafo. Nsene yimo, kuvhura o ture po marunduruko meparu lyoge yipo o gwane ruhafo moyirugana yoge yokuzuvhisa ndi? Ayo yimo ya kara ngorooro asi kusiga eparu lyewa kapisi ureru. Nampili ngoso, vadinkantu wovanzi kwa tura po marunduruko gangoso. Awo kwa kara nouradi wokurundurura yitambo yawo neyi va hara yipo va rugane unene mosirugana saJehova. Tarurura sihonena saBruno.

Nomvhura dongandi da ka pita, Bruno (4), ogu ana kara ngesi nonomvhura 28, kwa ka lirongerere musika kosure ezi za divikwa. Age kwa here kukara mupitisili gomusika.  Ga rugene nawa melirongo lyendi yipo ngava mu zigida nkenye siruwo a ka pitisire musika. Ayo kwa monekere asi sitambo sendi sa mu tompokere. Nye Bruno kwa tanta asi: “Ame kwa lizuvhire asi koyili eyi ya pilire mo meparu lyange. Kwa ligeve kwaJehova, nye na yi divire asi kapi nina kumuruganena momunene, ayo ngayi rorora nge unene. Mekanderero yipo na tanterere Jehova malizuvho gange, ntani na uyungire hena novanavazinyetu womombungakriste ava va kura pampepo.” Konyima zokugazadara ko unene koukaro wendi, Bruno kwa tokwere kutura sirugana sendi sokuzuvhisa muhowo, nokusiga sure zomusika, nokudirukira kevango oku va hepere vazuvhisi. Mauwa musinke ga gwene mo metokoro lyendi?

Bruno kwa dirukilire kodoropa zedina Guapiara. Kutunda kositata saSão Paulo, azo kwa kara ure wonokilometa 260 ntani kwa kara mo vantu konyara 7 000. Alyo kwa kere erunduruko lyenene. Ta tanta asi: “Ame kwa dirukilire monzugo zonunu mwa hana eyisikasi ndi tivi ndi Interneta. Nampili ngoso, nzugo ozo kwa kere neyi na dilire kukara nayo muhowo, ngwendi sipata soyikwahidi noyitji yenyango!” Ngomu ana kukarera mombungakriste zonunu, rumwe mosivike age kutura mondjato zendi nondya nomema noyimbapiratjangwa nokuronda posimoto sendi a ka zuvhisire konomukunda doponze zodoropa. Vantu wovanzi ava va kara momukunda ogo kapi va zuvha simpe mbudi zongwa. Age kwa tanta asi: “Ame kurugana malirongo goBibeli gokusika 18. Pokumona omu varongwa vana kutura po marunduruko meparu lyawo, ayo kuhafesa nge unene!” Ta twikire ko asi: “Ngesi, nina yi dimburura asi nina gwana eyi ya pilire mo meparu lyange, aro ruhafo rosili oru aru tundu mokutura Uhompa muhowo.” Age ga yi divire asi ngano ga twikilire nositambo sendi somusika ngano kapi ga gwana ruhafo oro. Ntani ngapi Bruno ali vatere mwene kuhamena yimaliwa modoropa Guapiara? Age ta uyunga nemenyamenyo asi: “Pokuronga vantu omu nava sika sikitara.” Monkedi zangesi, age simpe murongi gomusika.

Mariana (5), ogu ana kara ngesi nonomvhura dokupitakana po-25, kwa kere moukaro ngwendi waBruno. Nampili ngomu nga gwana yimaliwa yoyinzi ngomuhahende, nye kapi ga gwene ruhafo. Age kwa tanta asi: “Ame kwa lizuvhire ngwendi kuna ‘kutjida tupu  mpepo.’” (Muud. 1:17) Vanavazinyetu wovanzi kwa mu korangedere a gazadare ko kouzuvhisi wokukarerera. Konyima zokugazadara ko, Mariana kumwe novakaume vendi Bianca (6), naJuliana (7), naCaroline (8), kwa tokwere va ka vatere mombungakriste zomoBarra do Bugres, doropa ezi za kara pepi naBolivia, ure wonokilometa mayovi kutunda komambo gawo. Yisinke ya kweme ko?

Mariana kwa tanta asi: “Sitambo sange kwa kere sokukakara ko makwedi gatatu. Nye konyima zomakwedi ogo, ame kwa kere novarongwa woBibeli 15! Awo va hepere evatero lyenene mokutura po ezokomeho mousili. Kapi na vhulire kuvatantera asi tani tengura. Na hepere kukara.” Oyo yiyo va rugene vanavazinyetu ava vane. Mariana kwa lizuvhire asi ngesi ana gwana ruhafo meparu. Age kwa tanta asi: “Omu ana kuruganesa nge Jehova ni vatere vantu va rundurure eparu lyawo ame kuna kulizuvha ruhafo rorunene. Ayo kuretera nge uwa mokudiva asi ame ngesi kuna kuruganesa siruwo sange nononkondo dange mosirugana somulyo.” Caroline ogu ga singonona malizuvho govanavazinyetu vane, kwa tanta asi: “Apa ani rara masiku, ame kulizuvha ruhafo rorunene morwa kuruganesa siruwo sange mosirugana soUhompa. Eparu lyange kudemenena tupu mokuvatera varongwa vange woBibeli. Ayo kuhafesa mokumona omu vana kutura po ezokomeho. Ame kuna kulimonena usili wononkango edi asi: ‘Hetekeni mu tare asi HOMPA ngapi omu ga wapa!’”—Epis. 34:8.

Jehova age kuhafa apa a mono vadinkantu wovanzi mouzuni mudima kuna kudirukira konomukunda dokoure va ka zuvhise mbudi zongwa zoUhompa wendi ‘pokuligava vene.’ (Epis. 110:3; Yis. 27:11) Navenye ava ava rugana ngoso, Jehova kuvatungika.—Yis. 10:22.