OSE kuna kuparuka mosiruwo somaudigu. Pevhu kuna kuhorauka po yimpagwa. Vantu kuna kuvakundama makankamo gevhu nomamunkupi gomanene nompire noruhanzo nomundiro ogu agu pwaga monondundu nomamukundungu gomanene. Ntani hena, maudigu gemepata naga ganyamwetu kuretesa po ruguwo noutjirwe. Ngwendi moomu za yi likida Bibeli, yosili “ehudi kuhorokera nkenye ogu.”—Muud. 9:11.

1, 2. Maudigu musinke vana kuligwanekera nago vantu, nye yisinke vana hara kurugana vakareli vaKarunga?

² Vakareli vaKarunga kwa twikira kumukarera noruhafo nampili momaukaro ogo gomadigu. Nye natuvenye tuna hara kulididimikira nkenye udigu ou ngatu ligwanekera nawo komeho ngomu uhura wouzuni ou una kuhedera pepi. Ngapi natu twikira kukarera Karunga noruhafo nampili momaudigu? Yisinke ngayi tu vatera tu kare nouradi?

3. Ngomu va yi likida moVaroma 15:4, ngapi omu natu gwana ehengagwido apa atu ligwanekere nomaudigu?

³ Nampili ngomu maudigu gana kukundama unene vantu kupitakana pwanare, maudigu yipo ga kara kutunda kwanare. Tu tarurureni eyi natu lirongera ko kovakareli vamwe vaKarunga vanare ava va likidire uradi momaukaro gomadigu.—Rom. 15:4.

4. Maudigu musinke ga lididimikilire Ndafita, ntani yisinke ya mu vaterere?

⁴ Gazadara ko yimwe eyi ga lididimikilire Ndafita. Hompa Sauru kwa here kumudipaga. Ano nonkore dendi kwa mu homwene nokutwara vakadi vendi, vamwe wovakwayita vendi nava vekoro lyendi kwa mu gombekere, ano poyiruwo yimwe kwa dompere mutjima.  (1 Sam. 18:8, 9; 30:1-5; 2 Sam. 17:1-3; 24:15, 17; Epis. 38:4-8) Bibeli kulikida omu ga hepere Ndafita morwa maudigu ogo. Nampili ngoso, ayo kapi ya sesupikire ehuguvaro lyendi mwaJehova. Age kwa tente asi: “HOMPA kupopera nge koyimpagwa nayinye; nagumwe si ogu nani kankama.”—Epis. 27:1; resa Episarome 27:5, 10.

5. Yisinke ya vaterere Abirahamu naSara va lididimikire maudigu?

⁵ Abirahamu naSara kwa tungire monotenda ngovanayirongo. Eparu kwa va digoperere. Awo kwa lididimikilire erumbu noyiponga konomuhoko edi da va kundurukidire. (Gen. 12:10; 14:14-16) Yisinke ya va vaterere va lididimikire? Nonkango daKarunga kututantera asi Abirahamu “kwa ndindilire sitata esi sa kara nomatateko, ano musundi nomutateki gwaso, Karunga.” (Heb. 11:8-10) Abirahamu naSara kapi va pulisilire maudigu ogo ga va guvise, nye awo kwa demenenene kweyi ga va tumbwidilire Karunga.

6. Ngapi omu natu honena Joba?

⁶ Joba kwa hepere unene. Gazara tupu omu ga lizuvhire apa ya mu yipilire nayinye meparu! (Joba 3:1-2, 11) Ntani hena, kapi ga kwete nawa-nawa egano eyi ya mu horokererere ngoso. Nye eyi kapi ya mu dompesere mutjima. Age kwa kwatererere koulimburukwi wendi nokuhuguvara mwaKarunga. (Resa Joba 2:3.) Ee, sihonena musi kouwa twa hepa kuhonena!

7. Maudigu musinke ga ligwanekerere nago Paurusa, nye yisinke ya mu vaterere a kare nouradi?

⁷ Gazadara ko hena sihonena somupositoli Paurusa. Age kwa kere “moyimpagwa yomoyitata nomu mweyi yomomburundu nomu mweyi yemefuta.” Age kwa kere hena ‘nonzara nenota, nomufu ntani rutu-rutu.’ Rutatu ‘kwa mu tekererere sikepa, rumwe kwa pupagerere masiku nomutenya mefuta.’ (2 Kol. 11:23-27) Nampili ngomu ga kere mosiponga, age kwa kere nonkareso zongwa. Posikando simwe apa nkare a fe, age kwa tente asi: “Eyi kwa horokerere asi tu dire kulihuguvara nyamwetu, nye asi tu huguvare Karunga ogu a pindura novafe vaava. Age yige ga tu yoworora koyihuna yoyinene yonomfa, age hena simpe kuna kutuyoworora.” (2 Kol. 1:8-10) Sinzi sovantu kapi va ligwanekera noyiponga eyi ga ligwanekerere nayo Paurusa. Nye sinzi setu poyiruwo yimwe kulizuvha ngwendi moomu ga lizuvhire Paurusa, yipo nye natu gwanena ehengagwido mosihonena sendi souradi.

8. Ngapi omu aga tu kundama maudigu? Faturura.

⁸ Mouzuni ou wanaina kuna vhuka mo yimpagwa nomaudigu nomakondjeso, ano wovanzi kuvadompesa mutjima. Nampili Vakriste vamwe nawo kulizuvha ngoso. Lani, * ogu ga haferere sirugana sosiruwo nasinye namugara gwendi moAustralia, kwa uyunga asi apa va mu kwatekere kankera zekevere, kwa mu guvisire unene. Age kwa tanta asi: “Uhaku ou va pere nge kwa veresere nge unene, ntani ame kwa lizuvhire ngwendi kwato mulyo.” Ntani hena, age ga hepere kupakera mbili mugara gwendi, ogu va tawire sisupa somugongo. Nsene nose tu ligwanekera noukaro wangoso, yisinke natu vhura kurugana?

9, 10. (a) Yisinke natu dira kupulisira Satana a rugane? (b) Ngapi natu lididimikira eyi va tumbura moYirugana 14:22?

⁹ Twa hepa kudiworoka asi Satana kuna hara kuzonagura epuro lyetu kupitira momaudigu. Nampili ngoso, twa ha mu pulisira a guse ruhafo rwetu monkedi zangesi. Yisewe 24:10 kwa tanta asi: “Nsene ove o munkundi momahepeko, o munkundi hena moyirugana.” Kuteda ko koyihonena yomoBibeli ngwendi eyi tuna zogere,  ngayi tu vatera tu kare nouradi nampili momaudigu.

¹⁰ Ntani ya wapa hena mokudiworoka asi kapi tatu vhuru kugusa po maudigu nagenye. (2 Tim. 3:12) Yirugana 14:22 kututantera asi: “Mokuza moUntungi waKarunga, nyose kupita momaudigu gomanzi ntani.” Mevango lyokupulisira maudigu ga ku dompese mutjima, ngano o ga tare ngompito omu no likida ehuguvaro lyoge mononkondo daKarunga dokukuvatera.

11. Ngapi natu nyokera po yihorokwa yoyidona yi dire kutudompesa mutjima?

¹¹ Ose twa hepa kudemenena koyininke yoyiwa. Nonkango daKarunga kututantera asi: “Vantu nsene vana hafa, kumenya-menya, nye nsene vana guwu, kusuva yipara.” (Yis. 15:13) Vandokotora va dimburura nare mulyo gokukara nomagazaro gomawa. Awo pamwe kukumbagera vaveli nokuvapa yininke yokufana ngwendi mutji, ano vaveli kuveruka morwa kukara nomagazaro asi nomutji odo kuna kuvavatera. Nye muveli nsene a gazara asi nomutji edi vana kumupa yido dina kumuveresa, kapi ta veruka. Mokulifana, nsene tu gazadara nkenye apa maukaro aga natu dira kuvhura kurundurura meparu, tayi tu dompesa mutjima. Ose kupandura Jehova kweyi a tu pe evatero. Nampili moyiruwo yoyimpagwa, age kutupa ekorangedo kupitira moNonkango dendi nemevatero lyovanavazinyetu nokutunkondopeka kupitira mompepo zendi zokupongoka. Kudemenena koyininke yangoso, ngayi tu retera ruhafo. Mevango lyokudemenena koyihorokwa yoyidona, rugana ko yuma o lididimikire nkenye udigu ntani o demenene koyininke yoyiwa.—Yis. 17:22.

12, 13. (a) Yisinke ya vatera vakareli vaKarunga va lididimikire yimpagwa? Faturura. (b) Ngapi omu yimpagwa nayi tu ninkisa tu dimburure eyi twa hepa kutura muhowo meparu?

¹² Moyiruwo yantani, yimpagwa yoyinene kuna kuhoroka moyirongo yimwe. Kuvhura tu lirongere ko omu vanavazinyetu va lididimikira maukaro gangoso nampili ngomu ya va digoperere. MwaMurongankuru 2010, ekankamo lyenene lyevhu nomamunkupi mosirongo saTjili kwa zonagwire mambo noyiweka yovanavazinyetu wovanzi. Nampili ngoso, vanavazinyetu kwa litulire mo unene mosirugana saJehova. Samuel, ogu embo lyendi lya zonaukire, kwa tanta asi: “Nampili momaukaro gangoso, name namukadange ngatu twikire kuza komapongo nomoyirugana yokuzuvhisa. Ame nayi dimbwilire asi eyi ya tu vaterere tu dire kudompa mutjima.” Vanavazinyetu vamwe nawo kapi va pulisilire yimpagwa yi va dompese mutjima nye va twikilire kukarera Jehova nomupampi.

¹³ MwaSitarara 2009, mvhura zonene kwa zonagwire sitata saManila, mosirongo saPhilippine. Mugara gumwe gongawo ogu ga zumbanesere yiweka yendi, kwa tanta asi: “Ruhanzo kwa kundamene nkenye ogu, a kare asi ngawo ndi muhepwe.” Eyi kutudiworokesa epukururo lyaJesus eli asi: “Omu lipongaikire emona meguru, omu mwa pira yimbumburu nonkerewe zokulizonagura, nomu mwa pira vawidi wokububagura, va li vake.” (Mat. 6:20) Vantu ava ava huguvara memona eli ali zonauka po, narunye kuvadompesa nomutjima. Ayo ya wapa kutura muhowo Jehova meparu lyetu morwa ose ngatu kara vakaume vendi yi kare asi yisinke nayi tu horokera!—Resa Vahebeli 13:5, 6.

14. Morwasinke natu likidira uradi?

¹⁴ Jesus ga yi divire asi ngapa kara maudigu posiruwo sekaropo lyendi, nye kwa tente asi: “Gwa ha mu pwaga.” (Ruk. 21:9) Ose kuvhura kulikida uradi morwa Hompa gwetu Jesus Kristusa naJehova, Musiti gwanayinye, kutuvatera. Paurusa kwa korangedere  Timoteusa pokutanta asi: “Karunga kapi ga tu pa mpepo zowoma, nani nye kwa tu pa mpepo zononkondo nezi zeharo nezi zokulipangera.”—2 Tim. 1:7.

15. Yisinke va uyunga ko vakareli vamwe vaKarunga kuhamena ehuguvaro lyawo mwendi, ntani ngapi omu natu honena uradi wawo?

¹⁵ Bibeli kututantera eyi va uyunga ko vakareli vamwe vaKarunga kuhamena ehuguvaro lyawo mwendi. Ndafita kwa tente asi: “HOMPA kugamena, ta popere nge; ame kwa huguvara mwendi. Age kwa kwafa nge, yiyo yina hafesa nge.” (Epis. 28:7) Paurusa kwa tente asi: “Mwanayinye eyi ose tu vafundi twa pitakanena, mogu ga tu hara.” (Rom. 8:37) Apa Jesus ga yi divire asi ntaantani va ka mu kwate nokumudipaga, age ga yi likidire asi ga kara nelikwatakano lyenene naKarunga, pokutanta asi: “Nye ame kapisi nyamelike na kara, Tate kumwe name ga kara.” (Joh. 16:32) Yisinke adi likida nonkango dawo? Ado kulikida ehuguvaro lyawo lyenene mwaJehova. Nsene tu lironga kuhuguvara mwaKarunga ngwendi yiwo, nose ngatu kara nouradi mwankenye udigu.—Resa Episarome 46:1-3.

16. Morwasinke ya karera nomulyo kwetu kulironga Nonkango daKarunga?

¹⁶ Ose kapi twa kara nouradi morwa kulihuguvara nyamwetu, nye morwa kuhuguvara mwaKarunga. Apa atu lirongo nkenye apa Bibeli, ose kuyadiva Karunga nokumuhuguvara. Munazinyetukadi ogu ana kuhepa kouvera wokuguva kwa faturura asi apa a resa-resa novelise dehengagwido moBibeli, kulizuvhu nawa. Ose kulimburukwa kepukururo lyokukara noukareli wepata nkenye apa ndi? Kurugana ngoso ngayi tu vatera tu kare nonkareso zomuepisarome ogu ga tente asi: “Ee, yireru omu na hara Veta zoge! Ame kuziteda ezuva mudima.”—Epis. 119:97.

17. (a) Ewapaiko musinke nali tu vatera tu kare nouradi? (b) Gava sihonena omu sa ku vatera sihorokwa semeparu somoyifo yetu.

¹⁷ Ose twa kara hena noyimbapiratjangwa yoBibeli eyi ayi tu vatere tu huguvare mwaJehova. Pasihonena, yihorokwa yemeparu eyi ya kara moyifo yetu kwa vatera wovanzi. Munazinyetukadi gumwe gomoAsia ogu ana kuhepa kouvera womalizuvho gokurunduruka-runduruka kwa mu korangedere apa ga resere sihorokwa semeparu samunazinyetu gomugara gomutumwa ogu ga lididimikilire uvera wokulifana. Age kwa tjenge asi: “Ayo kwa vaterere nge ni kwate egano udigu wange nokupa nge ehuguvaro.”

18. Morwasinke natu kanderera nkenye apa?

¹⁸ Ekanderero kutuvatera mwankenye ukaro. Mupositoli Paurusa kwa nkondopekere mulyo gwekanderero pokutanta asi:  “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Ose kukanderera nkenye apa yipo tu lididimikire maukaro goudigu ndi? Alex, munazinyetugara gomoBritania ogu ana kuhepa kouvera wokuguva kwa tanta asi: “Kukanderera kwaJehova nokupurakena kwendi kupitira moNonkango dendi kwa vatera nge unene.”

19. Ngapi omu mapongo ga kara nomulyo?

¹⁹ Ewapaiko hena eli ali tu vatere tu kare nouradi kuna kara mapongo. Muepisarome kwa tjenge asi: “Ee, yireru omu na hara kukara mo! Ame kuna diworoka nomukara dontembeli zaHOMPA.” (Epis. 84:2) Nose yimo atu lizuvhu ngoso ndi? Lani, ogu vana tumbura nare, kwa faturura asi ayo kwa kara nomulyo unene kwendi mokuza komapongo nokukakara kumwe novanavazina. Age kwa tanta asi: “Ame na yi divire asi na hepere kukara mo mokuninka asi Jehova a vatere nge.”

20. Ngapi omu kulihameka mosirugana sokuzuvhisa asi tu vatere?

²⁰ Ewapaiko limwe hena eli ali tu vatere tu kare nouradi kuna kara kulihameka mokuzuvhisa Uhompa. (1 Tim. 4:16) Munazinyetukadi gomoAustralia ogu ga ligwanekerere nomaudigu gomanzi kwa tanta asi: “Kuzuvhisa kwa kere sininke esi na dilire kuhara kurugana, nye mukuronambunga kwa zigidire nge tu ze nage mokuzuvhisa. Yipo na zire. Jehova kwa vaterere nge, ano nkenye apa ngani lihameke mo mokuzuvhisa ngani lizuvhu ruhafo.” (Yis. 16:20) Wovanzi va yi dimburura asi kuvatera wopeke va kare nepuro mwaJehova, kwa nkondopeka epuro lyawo. Kurugana ngoso, ya va vatera va divare maudigu gawo nokudemenena koyininke yoyiwa po.—Fil. 1:10, 11.

21. Ehuguvaro musinke twa kara nalyo nampili tu ligwanekere nomaudigu?

²¹ Jehova kwa tu pa mawapaiko gomanzi aga naga tu vatera tu lididimikire maudigu getu nouradi. Pokuruganesa mawapaiko nagenye aga nopokuteda ko nokutemwinina yihonena yovakareli vaKarunga wouradi, ayo ngayi tu vatera tu lididimikire maudigu. Nampili ngomu tuna kuligwanekera nomaudigu gomanzi ngomu una kuhedera pepi uhura wouzuni ou, ose kuvhura tu lizuvhe ngwendi Paurusa ogu ga tente asi: “Kuturugana momudona, nye kapi va tu zonagura po. . . . Ose nokufa si unye.” (2 Kol. 4:9, 16) Nevatero lyaJehova, kuvhura tu lididimikire maudigu nouradi.—Resa 2 Vakolinte 4:17, 18.