Nsene muna tanta asi nhi zi kare nhi
“Omu ninke tupu asi ‘Nhi’, ndi asi ‘Hawe.’”—MAT. 5:37.
KAPI ya kara hepero koVakriste wousili va gane mokupameka usili wononkango dawo. Morwa kwa kulimburukwa Jesus ogu ga tente asi: “Omu ninke tupu asi ‘Nhi’, ndi asi ‘Hawe.’” Age kwa tembe asi muntu ga hepa kusikisa mo eyi ana uyunga. Jesus kwa pamekere nonkango odo pokuuyunga asi: “Nokugana walye omu gana.” Age kwa yi uyungire eyi morwa vantu wovanzi kwa kara nonkareso zokutumbwidira ndi zokugana nye kapi ava yi sikisa mo. Apa ava dili kusikisa mo vantu eyi ava uyunga kulikida asi nokuvhura si kuvahuguvara ntani awo kwa kara mepangero ‘lyoMudona.’—Resa Mateusa 5:33-37.
2. Morwasinke ya dilira kukara pamwe epuko kugana?
2 Ngoso Jesus kwa tembe asi epuko kugana ndi? Ngwendi moomu katu yi lirongere mosirongwa sina ka pita, Jehova Karunga nomukareli gwendi gomulimburukwi Abirahamu kwa gene koyininke yomulyo. Ntani, Veta zaKarunga kwa pulisilire kugana mokukohonona po maudigu. (Ex. 22:10, 11; Num. 5:21, 22) Mompagwiliro kuvhura yi kare hepero koMukriste a gane. Ndi poyiruwo yimwe, Mukriste kuvhura a gane pokupameka usili wononkango dendi. Jesus nage kwa gene posigongi somasimbi goVajuda apa va mu pulire. (Mat. 26:63, 64) Ayo kapi ya kere hepero kwaJesus a gane komuntu. Nye mokupameka usili wombudi zendi, age nga uyunga nkenye apa asi: “Yosili na kumutantera.” (Joh. 1:51; 13:16, 20, 21, 38) Ngesi tatu ka konakona eyi natu lirongera ko kosihonena saJesus nesi saPaurusa ntani navamwe ava va sikisire mo eyi va uyungire.
JESUS KWA TULIRE PO SIHONENA SOSIWA
Jesus kwa sikisire mo eyi ga tumbwidilire Guhwe, kutundilira pekuho lyendi dogoro konomfa
3. Yisinke Jesus ga tumbwidilire Karunga mekanderero, ntani yisinke va limbwilire oGuhwe?
3 “Hompa, nyame ogu nina wiza ni ya sikise mo mpango zoge.” (Heb. 10:7) Mekanderero eli Jesus kwa tumbwidilire kusikisa mo eyi va pumbire kuhamena Ruvharo rwetumbwidiro kukwatera mo kupulisira Satana a mu ‘hume kosinsinsina.’ (Gen. 3:15) Kwato muntu gwapeke ga lizambera a rugane yininke oyo yoyidigu. Jehova kwa limbwilire kutundilira meguru mokulikida ehuguvaro mwaMunwendi, nampili ngomu ga dilire kundindira ko kwaJesus asi a ture po mugano gokusikisa mo etumbwidiro lyendi.—Ruk. 3:21, 22.
4. Yisinke ga rugene Jesus yipo a sikise mo eyi ga uyungire?
4 Jesus nkenye apa nga sikisa mo eyi nga uyunga. Kapi ga pulisilire yininke yi mu donganese mokusikisa mo sirugana esi va mu pere oGuhwe sokuzuvhisa mbudi zongwa zoUhompa waKarunga nokutura po varongwa ava nga kokere Karunga kwaJesus. (Joh. 6:44) Bibeli za yi kwatesa ko asi Jesus ga sikisire mo etumbwidiro lyendi lyokurugana mpango zaKarunga asi: ‘Nkenye apa ga hulira matumbwidiro gaKarunga, Jesus yige esikiliromo lyago nagenye.’ (2 Kol. 1:20) Yosili, Jesus kuna kara sihonena sosiwa sogu ga sikisa mo eyi ga tumbwidilire Guhwe. Ngesi tatu ka konakona muntu ogu ga rugene paapa ga hulira a honene Jesus.
PAURUSA NGA SIKISA MO EYI NGA UYUNGA
5. Sihonena musinke ga tulire po mupositoli Paurusa?
5 “Yinke nani rugana Hompa?” (Yirug. 22:10) Paurusa, ogu ngava tumbura pomuhowo asi Sauru, kwa limbwilire nonkango odo apa ga mu monekerere Hompa Jesus Kristusa, a mu hagekese kuhepeka varongwa vendi. Sauru ga litezwilire tava mu kuhu, ntani ga tambwire situmbukira sokulikarera sokuzuvhisira konomuhoko mbudi zongwa kuhamena Jesus. Meparu lyendi nalinye pevhu, Paurusa kwa twikilire kulimburukwa nokutumbura Jesus asi “Hompa” gwendi. (Yirug. 22:6-16; 2 Kol. 4:5; 2 Tim. 4:8) Paurusa kapi ga fene ngwendi vamwe ava ga tanterere Jesus asi: “Yinke nye eyi omu tumbwire nge asi, ‘Hompa, Hompa,’ one mwa hana kurugana eyi ani mu tantere?” (Ruk. 6:46) Jesus kwa hara asi navenye ava ava mu tumbura asi Hompa va sikise mo eyi ava uyunga ngwendi mupositoli Paurusa.
6, 7. (a) Morwasinke Paurusa ga rundwilire edinguro lyendi lyokoKolinte, ntani morwasinke ya karere epuko kwa vamwe mokumutumbura asi munayimpempa? (b) Nkareso musinke natu likida kowo va tura po mokutupitisira?
6 Paurusa kwa udisire noupampi mbudi zoUhompa moAsia zonunu dogoro koEuropa, age kwa tulisire po nombungakriste dononzi nokudidingura. Poyiruwo yimwe, age nga gana mokulikida asi eyi ga tjenge usili. (Gar. 1:20) Apa vamwe womoKolinte va rundilire Paurusa asi munayimpempa, age kwa tjenge asi: “Karunga na kugana asi, nonkango detu kweni kapi da kere dapavali!” (2 Kol. 1:18) Apa ga tjenge nonkango odo, Paurusa kwa tundire moEfeso a pite moMakedoniya a ze koKolinte. Sitambo sendi kwa kere sokutengwira ko koKolinte komeho a ze koMakedoniya. (2 Kol. 1:15, 16) Ngwendi Paurusa, vatareli wonombunga poyiruwo yimwe kurundurura mazuva aga nkare va ya dingure nombungakriste. Kapi tupu ava rundurura madinguro gawo pwa hana konda zomulyo. Paurusa nage ga kere nokonda zongwa zeyi ga rundwilire edinguro lyendi lyokuza kombungakriste zoVakolinte. Morwasinke?
7 Apa Paurusa ga kere moEfeso, kwa zuvhire nombudi donondona asi mombungakriste zoVakolinte kapi mwa kere uumwe ntani ngava pulisire yirugana yokunyata. (1 Kol. 1:11; 5:1) Paurusa yipo ga tjenge mbilive zokuhova zoVakolinte a gave mapukururo gononkondo gokukohonona po maudigu gawo. Mevango lyokuza poopo koKolinte, Paurusa yipo ga tokwere tanko kuvapa ko siruwo va ture pasirugana mapukururo gendi. Mombilive zendi zauvali Paurusa yipo ga tjenge konda zeyi ga rundwilire edinguro lyendi asi: “Karunga yige ndipo zange – yeeyi age ga diva mutjima gwange asi eyi na dilire kuwiza koKolinte, yeeyi kapi na here asi mu hepe mwarwange.” (2 Kol. 1:23) Kapisi tu fane ngwendi vena va rundilire Paurusa, nye twa hepa kulikida efumadeko lyenene kowo va tura po mokutupitisira. Paurusa ga sikisire mo eyi ga tumbwidilire, twa hepa kumuhonena ngwendi moomu ga honenene Kristusa.—1 Kol. 11:1; Heb. 13:7.
YIHONENA YIMWE YOYIWA
8. Sihonena musinke ga tulire po Repeka?
8 “Nhi, na hara kuza.” (Gen. 24:58) Yimo Repeka ga limbwilire ozina nampanzendi kuhamena etokoro lyendi lyokuza morugendo nokilometa 800 nomuntu ga dira kudiva yipo a ka kare mukadaIsaka munwaAbirahamu. (Gen. 24:50-58) Repeka ga sikisire mo eyi ga tumbwidilire, age kwa kere mukadaIsaka gomuwa ogu nga karere Karunga noulimburukwi. Eparu lyendi nalinye, age kwa tungire monotenta ngomunayirongo moSirongo sEtumbwidiro. Karunga ga tungikire Repeka morwa kusikisa mo eyi ga tumbwidilire, age kwa ya kere zinyakurwa goRuvharo rwetumbwidiro, Jesus Kristusa.—Heb. 11:9, 13.
9. Ngapi omu Rutu ga sikisire mo eyi ga uyungire?
9 “Hawe! Ose kuna hara, tu ze noge kombunga zoge.” (Rutu 1:10) Vafisavayawo woVamowaba Orupa naRutu kwa twikilire kutantera nonkango odo ngumweyi zawo Naomi gomufisayendi ogu ga tundire koMowaba a ze koBeterehema. Naomi kwa va korangedere va tengure, ano Orupa yipo ga tengwire kembo lyawo. Nye Rutu ga sikisire eyi ga uyungire. (Resa Rutu 1:16, 17.) Age kwa kweme Naomi, ta sigi ekoro lyendi noukarelikarunga woyimpempa woVamowoba. Rutu kwa karerere Jehova eparu lyendi nalinye, ntani va mu tungikire pokukara gumwe govakadi vatano ava ga tumbwire Mateusa momalikwamo gezimo lyaKristusa.—Mat. 1:1, 3, 5, 6, 16.
10. Sihonena musinke sosiwa ga tulire po Jesaya?
10 “Nyame ogu, tuma nge!” (Jes. 6:8) Komeho a uyunge nonkango odo, Jesaya kwa mwene emoneko lyouyerere waJehova ana hingire posipundi sendi keguru lyontembeli zoVaisraeli. Memoneko olyo, Jesaya kwa zuvhire Jehova ana kutanta asi: “Ogu nani tuma hena yilye? Yilye na kara ntumi zetu?” Jehova kwa here kutuma muntu ogu na twara mbudi kovantu vendi wokudira kulimburukwa. Jesaya ga sikisire mo eyi ga tumbwidilire mononkango dendi. Nomvhura dokupitakana 46, Jesaya kwa pumbire asi Karunga nga futisa vantu vendi wokudira kulimburukwa ntani konyima age nga va tengwida kevango oku ga va harera va mu karere.
11. (a) Morwasinke ya karera nomulyo kusikisa mo eyi atu uyunga? (b) Wolye ava va dilire kusikisa mo eyi va uyungire?
11 Morwasinke Jehova ga harerere yihonena yovantu ava vana tumbura va yi tjange moBibeli? Morwasinke ya karera nomulyo kusikisa mo eyi atu uyunga? Bibeli za rondora kuvyukilira asi ‘muntu goyimpempa’ age ‘mfuto zendi nomfa.’ (Rom. 1:29, 32) Farawo hompa goVaegipite naSedekiya hompa goVajuda ntani Ananiyasa namukadendi Safira kuna kara vamwe ava va dilire kusikisa mo eyi va uyungire. Awo va ligwanekerere noyitundwamo yoyidona, ano yihonena yawo kuna kara erondoro kwetu.—Ex. 9:27, 28, 34, 35; Hes. 17:13-15, 19, 20; Yirug. 5:1-10.
12. Yisinke ngayi tu vatera tu sikise eyi atu uyunga?
12 Morwa kuna kuparuka “pomazuva gopouhura,” ose kwa kara movantu ava va dira ‘kupongoka,’ ava ava ‘moneka ngwendi vakereliKarunga.’ (2 Tim. 3:1-5) Twa hepa nye kukondja mokunyokera po kulikwatakana novantu vangoso. Nye, twa hepa kuponga novantu ava ava hetekere ko nkenye apa kusikisa mo eyi ava uyunga.—Heb. 10:24, 25.
ETUMBWIDIRO LYOMULYO PO
13. Etumbwidiro musinke lyomulyo po ava tura po vasikuli vaJesus?
13 Etumbwidiro lyomulyo po eli ga hepa kutura po muntu lyokuligava kwaKarunga. Ava vana hara kukara vasikuli vaJesus kuvapura yikando yitatu nsene vana hara sili kurugana eyi vana tumbwidire. (Mat. 16:24) Sikando sokuhova kuna kara apa vakuronambunga vavali ava pura mapuro muntu ogu ana hara kukara muzuvhisi gokudira kugwana ekuho, awo kumupura asi: “Ono hara sili kukara gumwe goNombangi daJehova ndi?” Sikando sauvali kuna kara apa muntu a tura po ezokomeho makura ana hara kugwana ekuho vakuronambunga tava mu pura asi: “Wa tura po eligawo lyanyamoge kwaJehova kupitira mekanderero ndi?” Sikando sautatu kuna kara ezuva lyekuho, vagwani ekuho kuvapura asi: “Kuliza nonzambo zaJesus Kristusa, one mwa litezurura kononzo deni nokuligava nyamweni kwaJehova mokurugana mpango zendi ndi?” Moyitarameho yovantu vagwani ekuho kulimburura asi “Nhi” mokulikida etumbwidiro lyawo lyokukarera Karunga narunye.
Ove kuna kusikisa mo etumbwidiro lyoge lyomulyo ndi?
14. Mapuro musinke twa hepa kulipura nkenye apa?
14 Yi kare asi ntaantani ko gwene ekuho ndi nare wa gusa kukarera Jehova, nkenye apa wa hepa kulikonakona pokulipura mapuro aga asi: ‘Ame kuna kuhonena Jesus pokusikisa mo etumbwidiro lyange kwaJehova ndi? Ame kuna kutwikira kulimburukwa Jesus mokutura muhowo meparu lyange sirugana sokuzuvhisa nesi sokutura po varongwa ndi?’—Resa 2 Vakolinte 13:5.
15. Moyininke hena musinke yomulyo omu twa hepa kusikisa mo etumbwidiro lyetu?
15 Mokusikisa mo etumbwidiro lyetu lyokuligava kwaKarunga, twa hepa hena kusikisa mo etumbwidiro lyetu moyininke hena yimwe yomulyo. Pasihonena, nsene wa kwara wa hepa kusikisa mo mugano ogu wa tulire po gokuhara nokuhafera mulikwali goge. Nsene ove kwa saina kondaraka zongesefa ndi wa zwida foroma zokurugana sirugana mombunga zaJehova, wa hepa kusikisa mo etumbwidiro lyoge. Nampo wa tambura ezigido lyokukalya membo lyagumwe goruhepo, wa hepa kusikisa mo etumbwidiro lyoge nampili vapeke ava va weka yoyiwa va ku zigide hena. Nsene ono tumbwidire mokukatengwira ko komuntu ogu ono gwana moyirugana yokuzuvhisa wa hepa kusikisa mo etumbwidiro lyoge. Ano Jehova nga tungika yirugana yoge yokuzuvhisa.—Resa Rukasa 16:10.
HOMPA JESUS, MUPRISTELI GOMUNENE KUTUVATERA
16. Nsene kapi tuna sikisa mo eyi twa tumbwidira, yisinke twa hepa kurugana?
16 Bibeli kwa uyunga asi ngovantu wokudira kusikilira mo “natuvenye kupuka popanzi,” unene po mononkango. (Jak. 3:2) Nsene tuna yi dimburura asi kapi tuna sikisa mo eyi twa tumbwidira, yisinke twa hepa kurugana? Veta ezi ga pere Karunga Vaisraeli kwa likidire nkenda komuntu ogu ga ‘gendererere kugana, nye kapisi mowina.’ (Lev. 5:4-7, 11) Mukriste nage kuvhura kumugusira po nsene kapi ana sikisa mo eyi ga tumbwidira. Nsene tu tongonona nonzo detu kwaJehova, age nga tu gusira po kupitira mwaJesus Kristusa, Mupristeli goMunene. (1 Joh. 2:1, 2) Mokuninka asi Karunga a tu hafere, twa hepa kulikida nkareso zokulitezurura nokurugana ko yuma tu kohonone po maudigu aga tuna retesa po morwa nonkango edi tuna uyunga. (Yis. 6:2, 3) Ya kara nomulyo pomuhowo kugazadara ko komeho tu ture po etumbwidiro eli ngatu dira kuvhura kusikisa mo.—Resa Muudisi 5:2.
17, 18. Meho musinke zongwa zina kundindira navenye ava ava kondjo kusikisa mo eyi ava uyunga?
17 Meho zongwa kuna kundindira vakareli vaJehova ava ava sikisa mo eyi ava uyunga. Vagwavekwa 144 000 ngava ka gwana mwenyo gokudira kufa meguru, omu ngava ka lipakerera naJesus moUhompa wendi “ngava pangera kumwe nendi nomumvho eyovi.” (Ehor. 20:6) Ano mamiliyona govantu, ngava ka gwanena mo mauwa mepangero lyaKristusa moparadisa pevhu. Awo ngava ka va vatera va ka sikilire mo parutu nopanandunge.—Ehor. 21:3-5.
18 Kehagero lyepangero lyaJesus, ngali ka kara ko eheteko lyokuhulilira, nsene ngatu ka limburukwa, ose ngatu ka kara moparadisa omu navenye ngava ka lihuguvara-huguvara. (Ehor. 20:7-10) Navenye ngava ka sikisa mo matumbwidiro gawo. Vantu navenye ngava ka honena Guhyetu geharo, Jehova ‘Karunga goMunasili.’—Deut. 32:4.
