1-3. (a) Ngapi vamwe ava lizuvhu koyininke eyi va rugana ndi va dira kurugana, ntani ngapi mapuko getu ganare aga tu kundama? (b) Yisinke natu lirongera ko kosihonena saPaurusa?

SINZI sovantu narunye kuruganesa nonkango edi asi: “ngano yimo ngesi ya keree!” mokupwagesa maliverero gawo. Vantu kuuyunga nonkango odo apa ava gazara omu ngano lina kara eparu nsene ngano va rugene yininke monkedi zapeke. Natuvenye kuvhura kugazara yininke eyi ngano twa rugene monkedi zapeke. Nye vamwe nkenye apa kulivera ndi kuguva unene morwa yininke eyi va rugana ndi eyi va dira kurugana. Nove yimo o lizuvhu ngoso koyininke yimwe eyi wa rugene ndi?

² Vantu vamwe kwa tura mapuko gomanene ndi kwa rugana yininke yoyidona unene. Vamwe kukara nomasinganyeko nsene matokoro aga va tura po meparu yigo gomawa po. Vantu vamwe ya va tompoka kuhageka kugazara yanare nokutwikira neparu lyepe. Ano vapeke kutwikira kulivera komatokoro gawo aga va tulire po nokugazara asi ngano ‘na yi rugene monkedi zapeke.’ (Epis. 51:3) Ove ngapi o lizuvhu? Ono hara kurugana paapa wa hulira mosirugana saKarunga wa hana kugazara nkenye apa mapuko aga wa tulire po ndi? MoBibeli mwa kara sihonena sagumwe ogu ya tompoka oyo ndi? Nhi, mupositoli Paurusa.

³ Paurusa kwa tulire mapuko gomanene ntani matokoro gomawa. Age kwa liverere unene komapuko gendi, nye hena ga lirongere kudemenena kurugana unene mosirugana saKarunga. Tu zeni tu konakone eyi natu vhura kulirongera ko kosihonena sendi.

4. Yisinke ga ya liverere mupositoli Paurusa konyima?

⁴ Ngomudinkantu goMufalisayi, Paurusa kwa rugene yininke eyi ga ya liverere konyima. Pasihonena, age kwa hepekere momudona varongwa vaKristusa. Bibeli kwa tanta asi konyima tupu zokudipaga Sitefanusa, Sauru, ogu va ya tumbwire asi Paurusa “ta hanagura mbungakriste oku ta bubura a purutute mo vagara novakadi, a va gave kodorongo.” (Yirug. 8:3) Mulirongi goBibeli Albert Barnes kwa tanta asi “kuhanagura” kutanta asi Sauru kwa homokerere nonyanya mbungakriste “ngwendi sikasama somowiza.” Sauru kwa kere Mujuda gomupampi ogu ga pulire asi Karunga yige ana yi mu harere a zonagure po mbungakriste. Yipo nye ga yoronganesere momudona Vakriste nokudipaga ‘vagara novakadi.’—Yirug. 9:1, 2; 22:4. *

5. Yisinke ya ninkisire Sauru a hageke kuhepeka varongwa vaJesus ntani a tameke kuzuvhisa?

⁵ Konyima Sauru kwa here kuza koDamasikusi a ka bubure Vakriste momambo gawo nokuvapurututa ava gave kosigongi somasimbi. Nye Jesus mupangeli gombungakriste kwa hagekesere Sauru. (Efe. 5:23) Sauru monzira zendi zokuza koDamasikusi, Jesus ta mu monekere makura uzera wokutunda meguru tau mu twiza meho. Jesus yipo ga tumine Sauru koDamasikusi va ka mu tantere eyi na rugana. Ose twa yi diva eyi ya ka horokere konyima zoyo.—Yirug. 9:3-22.

6, 7. Yisinke ayi likida asi Paurusa ga dimbwilire mapuko gendi gomanene aga ga rugene?

⁶ Apa tupu Paurusa ga yi dimbwilire asi eyi nga rugana epuko, yipo ga hagekere kuhepeka varongwa vaKristusa nokutameka kuzuvhisa nomupampi kuhamena Kristusa. Nampili ngoso, Paurusa ga ya tjenge asi: “Yikara yange yanare yopaSijuda mwa yi zuvha, omu ngani hepeke mbungakriste zaKarunga momudona, ni kondje paapa na hulira asi ni zi hanagure po.” (Gar. 1:13) Age ga ya tumbwire hena mapuko gendi apa ga tjangerere Vakolinte noVafilipi naTimoteusa. (Resa 1 Vakolinte 15:9; Fil. 3:6; 1 Tim. 1:13) Paurusa kwa lifire nomuga koyininke eyi nga rugana, nye age kapi ga ligusa-gusire mo. Age ga yi divire asi kwa tulire mapuko gomanene.—Yirug. 26:9-11.

⁷ Mulirongi goBibeli Frederic W. Farrar kwa tjenge asi apa atu gazara kuhamena omu Paurusa ga hepekere unene Vakriste, ose kuvhura kukwata egano ruguwo oru ga lizuvhire nomu vapeke va mu rwanesere. Apa Paurusa ga ka dingwire nombungakriste dokulisiga-siga, vapuli vakwawo ava ga gwanekerere nawo pomuhowo nampo kwa tente asi: ‘Nyove Paurusa, ogu wa tu hepekere!’—Yirug. 9:21.

8. Ngapi Paurusa ga lizuvhire konkenda neharo eli ga mu likidire Jehova naJesus, ntani yisinke tuna lirongere ko kosihonena sendi?

⁸ Paurusa ga dimbwilire asi age ga vhulire kukara mupositoli kupitira tupu monkenda zaKarunga. Age kwa tumbura nkenda zaKarunga konyara yikando 90 monombilive dendi 14 kupitakana vatjangi vakwawo woBibeli. (Resa 1 Vakolinte 15:10.) Paurusa kwa hefe unene kweyi Karunga  ga mu likida nkenda, ntani nage ga here kulikida rupandu rwendi. Yipo ga rugene unene mosirugana saKarunga kupitakana vapositoli vakwawo. Yisinke natu lirongera ko kosihonena saPaurusa? Nsene tu likida epuro monzambo zaJesus nokutongonona nonzo detu nokuhageka kurugana udona, Jehova ga liwapaikira kutudongwenena po nampili nonzo dononene. Nsene o gazara asi nonzo doge nokuvhura si kudidongonona po kupitira monzambo zaKristusa zosizoweseso, diworoka sihonena saPaurusa. (Resa 1 Timoteusa 1:15, 16.) Nampili ngomu Paurusa ga hepekere Jesus, age ga tjenge asi: ‘MunwaKarunga, ogu ga hara nge, ga gavera nge mwenyo gwendi panzambo.’ (Gar. 2:20; Yirug. 9:5) Paurusa ga dimbwilire asi nsene ta rugana unene mosirugana saKarunga kapi nga livera hena. Nove yiyo ono hara kurugana oyo ndi?

9, 10. (a) Morwasinke natu karera pamwe nomaliverero? (b) Morwasinke ya dilira kuwapa kulipakera sinka komapuko ganare?

⁹ Koyili eyi wa rugana eyi ono kulivera ngesi ndi? Wa ruganesa siruwo nononkondo doge moyininke yokudira mulyo ndi? Wa rugana yininke eyi ya koresere wopeke ndi? Ndi nampo kugazara asi koyili yimwe eyi ngano wa rugene monkedi zapeke. Yisinke no rugana nsene yimo ono kulizuvha ngoso?

¹⁰ Vantu vamwe kukara nosinka nkenye siruwo! Awo kuguva nokulipakera sinka pokugazara mapuko gawo nkenye apa. Kuvhura o kohonone po maudigu pokulipakera sinka ndi? Hawe! Kulipakera sinka kuhepeka siruwo nononkondo. Mevango lyokulipakera sinka, hetekera ko kurugana paapa wa hulira kukohonona po udigu. Hundira egusiropo kogu ono zonene, ntani hetekera ko kutulisa po mbili. Gazadara  ko kweyi ya ku ninkisire o rugane epuko lyangoso yipo ngo dire kulirugana hena komeho. Poyiruwo yimwe wa hepa tupu kulididimikira yitundwamo yomapuko goge. Kulipakera sinka komapuko goge ganare kapi ngayi ku vatera. Ntani kwato eyi ngo gwanena mo.

11. (a) Yisinke natu rugana yipo Jehova a tu likide nkenda neharo? (b) Yisinke twa hepa kurugana yipo tu kare nombili zomomutjima?

¹¹ Vamwe kulizuvha asi mapuko gawo manene ndi asi manzi unene Karunga kapi ta va fire nkenda. Nye yi kare asi mapuko musinke va rugana, awo kuvhura kutambura mapuko gawo nokutura po marunduruko nokuhundira edongwenenopo kwaKarunga. (Yirug. 3:19) Jehova kuvhura a va likide nkenda neharo ngamoomu ga yi rugene kwavamwe. Jehova nga dongwenena po ogu a linunupike nokuhungika nokulivera nonzo dendi. Karunga kwa dongwenene po Joba ogu ga tente asi: “Ni litezwilire mombundu nemenoto.” (Joba 42:6) Mokukara nombili zomomutjima twa hepa kukwama epukururo lyaKarunga eli asi: “Ove kapi ngo ragopa nsene o kambadara kuhoreka nonzo doge. Di sanseka ove o di sige, makura Karunga nga ku fira nkenda.” (Yis. 28:13; Jak. 5:14-16) Twa hepa kutongonona nonzo detu kwaKarunga, nokuhundira egusiropo nokurugana youhunga. (2 Kol. 7:10, 11) Nsene tu yi rugana oyo, ose ngatu hafera nkenda zogu ‘a dongwenene po’ momunene.—Jes. 55:7.

12. (a) Ngapi natu temwinina sihonena saNdafita sosiwa nsene ezwi lyetu lyokomutjima kuna kutupa usima? (b) Morwasinke Bibeli azi tantere asi Jehova kwa ‘liverere,’ ntani ngapi kudiva eyi aku tu vatere? (Tara kakende.)

¹² Karunga kutuvatera kupitira mekanderero. Ndafita kwa likidire epuro lyendi asi Jehova ga limbwilire makanderero gendi. (Resa Episarome 32:1-5.) Komeho a tongonone nonzo dendi kwaKarunga, ezwi lyendi lyokomutjima kwa mu pere usima. Age kwa lizuvhire eguwo lyenene nokukora. Konyima zapa ga tongwenene nonzo dendi kwaKarunga, Ndafita va mu gusilire po ntani ga gwene rufuwo. Jehova ga limbwilire ekanderero lyaNdafita nokumunkondopeka a twikire kurugana youhunga. Mokulifana, nsene kuna kulizuvha usima kononzo edi wa tura, kanderera kwaJehova a ku dongwenene po nokutura po marunduruko aga gana hepa po. Makura kara nehuguvaro asi Jehova ga zuvha makanderero goge nokukundongwenena po.—Epis. 86:5.

13, 14. (a) Kosinke twa hepa kudemenena ngesi? (b) Mapuro musinke naga tu vatera tu gazadare eyi tuna kurugana ngesi?

¹³ Yosili ose kuvhura kulirongera ko komapuko getu ganare, nye twa ha twikira kugagazadara. Twa hepa kudemenena  kweyi tuna kurugana ngesi neyi yokomeho. Lipura asi: ‘Kutundilira ngesi, ame ngani livera komatokoro aga nina kutura po ndi? Ngani uyunga asi ngano na rugene yininke monkedi zapeke ndi? Ame kuna kukarera Karunga noulimburukwi yipo ngani dire kulivera komeho ndi?

¹⁴ Udigu wounene pepi una kara. Ayo ya wapa kulipura asi: ‘Kuvhura ni rugane unene mosirugana saKarunga ndi? Kuvhura ni rugane uzuvhisi wokukarerera ndi? Yisinke yina kukondera nge mokukara mukwafimbunga? Ame kuna kurugana paapa na hulira mokudwara muntu gomupe ndi? Ame muntu ogu ana harere Jehova mouzuni woupe ndi?’ Mevango lyokukara nosinka kweyi wa rugene nare, gazadara kweyi ono kurugana ngesi ntani divilisa asi kuna kurugana unene mosirugana saJehova. Tura po ngesi matokoro aga ngo dira kulivera komeho.—2 Tim. 2:15.

15, 16. (a) Malizambero musinke va tura po wovanzi mokuruganena unene Jehova? (b) Morwasinke natu dilira kulivera komalizambero aga twa tura po yipo tu karere Karunga?

¹⁵ Ove wa tura po malizambero mokukarera Jehova mosirugana sosiruwo nasinye ndi? Nampo wa siga elirongo lyokuzeruka ndi ngesefa zoge yipo o ruganene unene Jehova. Ndi nampo wa tokora mokudira kukwara ndi mokudira kukara novanona yipo o rugane koBeteli ndi kosirugana setungo mouzuni mudima ndi sokudingura nombunga ndi soutumwa. Kuvhura o livere komatokoro ogo wa tura po morwa ngesi kuna kukurupa ndi? Ndi o lizuvhe asi malizambero ogo kwato mulyo ndi wa ga tulire po posiruwo sepuko? Hawe!

¹⁶ Ove kwa tura po matokoro ogo morwa wa hara unene Jehova ntani wa hara kuvatera vapeke nawo va mu ruganene. Wa ha gazara asi eparu lyoge ngano lya wepe nsene wa rugene yininke monkedi zapeke. Hafa unene komatokoro aga wa tura po! Ove wa horowora nkedi zongwa zokukarera Jehova moukaro woge. Jehova kapi nga divara malizambero nagenye aga wa tura po. Age nga ku tungika nomwenyo gwanarunye gosili gomuwa po kupitakana omu ono kuyigazarera ngesi!—Epis. 145:16; 1 Tim. 6:19.

17, 18. (a) Yisinke ga rugene Paurusa mokunyokera po maliverero? (b) Ngapi omu no kwama sihonena saPaurusa?

¹⁷ Yisinke ga rugene Paurusa mokunyokera po maliverero meparu lyendi? Paurusa kwa tente asi age kwa hagekere kukara nosinka komapuko gendi ganare ntani asi age kwa kondjerere mfeto zendi zokomeho. (Resa Vafilipi 3:13, 14.) Paurusa kapi ga twikilire kugazara yininke yoyidona eyi ga rugene apa ga kere moukareli woVajuda. Nye, age kwa ruganesere nonkondo dendi mokukwaterera koulimburukwi wendi yipo a ka gwane mfeto zomwenyo gwanarunye.

¹⁸ Yisinke natu lirongera ko kononkango daPaurusa? Mevango lyokukara nosinka komapuko getu ganare, twa hepa kudemenena kweyi tuna kurugana ngesi yipo ngatu ka gwane matungiko komeho. Kuvhura tu dire kudivarera mapuko getu ganare, nye twa ha lizuvha usima kwago. Kuvhura tu hageke kukara nosinka komapuko getu yipo tu ruganene Karunga paapa twa hulira nokugazara meho zongwa ezi ngatu ka gwana!