1, 2. (a) Yikara musinke nayi tu vatera tu lididimikire maudigu? (b) Yisinke epuro?

SIRUGANA saJehova kuturetera ruhafo. Nampili ngoso, ose kuligwanekera nomaudigu ngwendi vantu navenye ntani kuvhura va tu “hepekere uhungami.” (1 Pet. 3:14; 5:8, 9; 1 Kol. 10:13) Mokulididimikira maudigu gangoso, twa hepa epuro nokukwata mutjima.

² Yisinke epuro? Mupositoli Paurusa kwa tjenge asi: “Epuro yilyo ehuguvaro lya pama lyoyininke eyi twa ndindira, alyo undipo woyininke eyi atu dili kumona.” (Heb. 11:1) Mokumona asi twa kara nehuguvaro asi Karunga nkenye apa kusikisa mo nonkango dendi, ose twa yi pura asi eyi ga tumbwidira Karunga ngayi ka sika mo ntani asi nayinye eyi atu tantere moNonkango dendi usili, nampili ngomu atu dili kuyimona.

3, 4. (a) Yisinke kukwata mutjima? (b) Nkedi musinke zimwe natu nkondopeka epuro lyetu nokukwata mutjima?

³ Kukwata mutjima kutanta asi kuuyunga nomukumo nokurugana yininke wa hana kutjira yilimbikiso noyiponga. Ako kutanta hena asi kukara nehuguvaro nouradi nokukara neharo lyokuhepera eyi twa pura.—Mar. 6:49, 50; 2 Tim. 1:7.

⁴ Epuro nokukwata mutjima kuna kara yikara yomulyo. Nye poyiruwo yimwe kuvhura tu lizuvhe asi tuna hepa epuro lyokupama nokukwata mutjima. Bibeli kwa tumbura mayovi govakareli vaKarunga ava va kere nepuro nokukwata mutjima. Nkedi zimwe natu nkondopeka epuro lyetu nokukwata mutjima kuna kara pokukonakona yimwe yoyihonena oyo.

5. Yisinke ga hepere Josuwa mokukara mupitisili gomuwa?

⁵ Tu konakoneni eyi ya horokere monomvhura  3 500 da ka pita. Apo kwa pitire po nomvhura 40 kutunda apa Jehova ga zowere mamiliyona goVaisraeli moupika waEgipite. Muporofete Mosesa yige ga va pitisilire. Apa ga sikire konomvhura 120, age kwa monenene Sirongo sEtumbwidiro koure makura ta fire pondungu zoNdundu zaNebo. Mukwami gwendi kwa kere Josuwa, mugara ogu ga “zulire ukonentu.” (Deut. 34:1-9) Vaisraeli kwa kere pepi nokugusa sirongo saKanani. Mokukara mupitisili gomuwa, Josuwa ga hepere ukonentu wokutunda kwaKarunga, nepuro nokukwata mutjima, nehuguvaro.—Deut. 31:22, 23.

6. (a) Kuliza naJosuwa 23:6, morwasinke twa hepera kukwata mutjima? (b) Yisinke natu lirongera ko kononkango domoYirugana 4:18-20 nedi domoYirugana 5:29?

⁶ Ukonentu nokukwata mutjima nepuro eyi ga likidire Josuwa kwa nkondopekere Vaisraeli va funde sirongo saKanani. Awo va hepere kukwata mutjima kapisi mokurwa tupu nye hena mokulimburukwa Karunga. Komeho a ka fe, age kwa rekerere Vaisraeli asi: “Koreni unene mokulimburukwa, tomu rugana nkenye aka va tjanga mobuke zoVeta zaMosesa. Nokusempunukisa po si nampili kokanunu.” (Jos. 23:6) Nose twa hepa kukwata mutjima mokulimburukwa Jehova nkenye apa, unene po poyiruwo apa vantu ava tu sininike tu rugane eyi ya lilimba nompango zaKarunga. (Resa Yirugana 4:18-20; 5:29.) Nsene tu huguvara nawa-nawa mwaJehova, age nga tu vatera tu kwate mutjima.

7. Yisinke ga hepere Josuwa mokukwata mutjima nokumuwapera?

⁷ Mokukwata mutjima tu rugane mpango zaKarunga, twa hepa kulironga Nonkango dendi nokuditura pasirugana. Eyi yiyo va tantererere mukwami gwaMosesa, Josuwa asi: “Kora unene o kwate mutjima oku to sikisa mo nawa-nawa Veta ezi ga ku pa Mosesa, muntu gwange. . . . Nonkango edi dobuke ezi zoVeta, walye adi tundu mo mokana koge, nye o di tede mutenya nomasiku, asi o sikise mo nawa-nawa nayinye eyi va tjangera mo. Morwa ntani ngayi ku wapera nononzira doge, ove ngo kare nerago.” (Jos. 1:7, 8) Josuwa kwa limburukwire kepukururo olyo, yipo da ‘mu waperere nonzira dendi.’ Nsene nose tu rugana yokulifana, ngatu kwata mutjima ntani ngayi tu wapera mosirugana saKarunga.

8. Metjangwa musinke va gusa etjangwa lyomvhura 2013, ntani ngapi omu ngadi tu vatera nonkango odo?

⁸ Jehova kwa tanterere hena Josuwa asi: “Kora, o kwate mutjima. Nokukupwaga si ndi asi o tukuke, yeeyi HOMPA Karunga goge pweli poge nkenye oku ngo za.” (Jos. 1:9) Nose Jehova pweli pwetu. Yipo nye ‘gwa ha tu pwaga ndi tu tukuke’ nampili tu ligwanekere nomaudigu. Nonkango domwaJosuwa 1:9 kwa di horowora ngetjangwa lyomvhura 2013. Etjangwa lyomvhura kuna kara asi: “Kora, o kwate mutjima. . . . Jehova Karunga goge pweli poge.” Nonkango odo noyihonena yavamwe ava va likidire epuro nokukwata mutjima, ngayi tu nkondopeka momakwedi gokomeho.

9. Mononkedi musinke Rahabu ga likidire epuro nokukwata mutjima?

⁹ Apa Josuwa ga tumine nondadi mbali koKanani, Rahabu gohondedi yige ga va horekere nokupukisa nonkore dado. Morwa epuro nokukwata mutjima, age nava vembo lyawo kwa va parwire apa Vaisraeli va ya zonagwire sitata saJeliko. (Heb. 11:30, 31; Jak. 2:25) Rahabu ga ya hagekere kukara hondedi yipo a hafese Jehova. Vamwe ava va ya kara Vakriste kwa likida epuro nokukwata mutjima, nokutura po marunduruko yipo va hafese Karunga.

10. Monkedi musinke Rutu ga kwatesere ko ukareli wousili, ntani ngapi Jehova ga mu tungikire?

¹⁰ Konyima zonomfa daJosuwa, Rutu goMumowaba kwa kwete mutjima pokukwatesa ko ukareli wousili. Nampo ga divire ko yimwe kuhamena Jehova morwa kwa mu kwere Muisraeli. Ngumweyi zendi Naomi gomufisayendi, ogu ga tungire moMowaba kwa tokwere kutengura kodoropa zoVaisraeli, Beterehema. Monzira, Naomi kwa korangedere Rutu goMumowaba a tengure kovantu vendi, nye Rutu kwa limbwilire asi: “Wa ha tantera nge asi ni ku sige! . . . Mbunga zoge, name zange ngazi kara, Karunga goge, name Karunga gwange nga kara.” (Rutu 1:16) Rutu kwa sikisire mo nonkango dendi. Mwa za siruwo, Bowasa, ekoro lyaNaomi, kwa ya kwere Rutu, ogu ga ya hampurukire munona gomugara ogu ga ya kere zinyakurwaNdafita naJesus. Jehova kutungika ava ava likida epuro nokukwata mutjima.—Rutu 2:12; 4:17-22; Mat. 1:1-6.

11. Ngapi omu Jehoyada naJehoseba va kwete mutjima, ntani yitundwamo musinke ya kere?

¹¹ Epuro nokukwata mutjima kunkondopara apa atu diva asi Karunga kukara kumwe nowo ava tura eparu lyawo mosiponga morwa kurugana mpango zendi nokupopera vapuli vakwaawo. Tarurura sihonena somupristeli gomunene Jehoyada namukadendi Jehoseba. Apa ga fire hompa Ahasiya, ozina Ataliya kwa dipagere ruvharo rwahompa nokugusa uhompa. Nye Jehoyada naJehoseba kwa tulire eparu lyawo mosiponga pokuhoreka munwaAhasiya gomugara gedina Jowasi nomvhura ntazimwe. Momvhura zauntambali, Jehoyada kwa tulire Jowasi a kare hompa, makura ta gava mpangera va dipage Ataliya. (2 Vah. 11:1-16) Konyima Jehoyada ga ya kwatesere ko hompa Jowasi metungururo lyontembeli. Jehoyada ga fire age nonomvhura 130, ano age kwa mu horekere kumwe novahompa “morwa yirugana eyi ga ruganenene mbunga zaIsraeli naKarunga nontembeli.” (2 Hist. 24:15, 16) Kukwata mutjima oku ga kere nako Jehoyada namukadendi kwa poperere ezimo lyosiuhompa kutundilira kwaNdafita dogoro kwaMesiyasa.

12. Ngapi omu ga kwete mutjima Abedimereki?

¹² Abedimereki, erenga lyombara zahompa Sedekiya, kwa tulire eparu lyalyo mosiponga li popere Jeremiya. Hompa Sedekiya kwa geve Jeremiya komarenga gaJuda, aga ga here kumudipaga makura taga mu zugumine metope asi a fire mo. (Jer. 38:4-6) Nampili ngomu ya kere siponga mokupopera Jeremiya ogu va nyengere, Abedimereki kwa ka uyungilire po Jeremiya kwaSedekiya. Sedekiya ga yi tambwire ntani ga geve vagara 30 va ze kumwe naAbedimereki va ka parure Jeremiya. Kupitira mwaJeremiya, Karunga kwa tumbwidilire Abedimereki asi nga mu zoworora apa Vababironi ngava hanagura po Jerusarema. (Jer. 39:15-18) Karunga kutungika ava ava kwata mutjima.

13. Ngapi omu va kwete mutjima Vahebeli vatatu, ntani ngapi omu natu gwanena mo uwa mosihonena sawo?

 ¹³ Nomvhura 600 komeho zokuwiza Kristusa, vakareli vatatu woVahebeli vaJehova va yi likidire nawa-nawa asi Karunga kutungika ava ava likida epuro nokukwata mutjima. Hompa Nebukadenesara kwa pongaikire marenga nagenye nokugava mpangera va tongamene efano lyongorodo. Ano nkenye ogu ngano ga dilire kutwa nongoro yige kumuzugumina mesuga lyomundiro. Vakareli vatatu woVahebeli kwa tanterere Nebukadenesara kuvyukilira asi: “Karunga ogu atu ruganene, nsene a hara kutuparura, age kuvhura a tu yoworore mo mesuga lyomundiro gokutwera nomokuwoko koge, ove hompa. Nye nampili ngano a dire kuyivhura, hompa eyi yi diva asi ose kapi ngatu kanderera karunga goge gefano lyongorodo eli wa rugana.” (Ndan. 3:16-18) MwaNdaniyera 3:19-30 kwa singonona omu Jehova ga parwire Vahebeli owo vatatu. Nampili ngomu nava dira kututura mesuga lyomundiro gokutwera, kuvhura va heteke ulimburukwi wetu ntani twa yi diva asi Jehova nga tu tungika nsene tu likida epuro nokukwata mutjima.

14. Kuliza naNdaniyera egaununo 6, ngapi omu Ndaniyera ga kwete mutjima, ntani noyitundwamo musinke?

¹⁴ Ndaniyera kwa likidire epuro nokukwata mutjima apa nonkore dendi da sininikire hompa Daliusi gwaPeresiya a ture po mpangera ezi asi: “Nkenye ogu ana kudina mpangera ezi va mu zugumine mekero lyovanyime.” Tupu ga zuvhire Ndaniyera asi vana tjanga mpangera, “makura ta hwilire membo lyendi. Konzugo zendi zekeguru makende ga kere ko aga ga tara koyiha yaJerusarema. Omo yimo ga zire, moomu mwanare, ta ka tongeka nongoro pomakende gokuzeguruka a kanderere Karunga rutatu mezuva.” (Ndan. 6:6-10) Ndaniyera kwa mu zuguminine mekero lyovanyime, nye Jehova ga mu parwire.—Ndan. 6:16-23.

15. (a) Ngapi omu Akura naPilisikira va likidire epuro nokukwata mutjima? (b) Yisinke da tamba nonkango daJesus domwaJohanesa 13:34, ntani ngapi omu Vakriste wovanzi ava likida eharo lyangoso?

¹⁵ Bibeli kwa tanta asi Akura naPilisikira kwa tulire eparu lyawo mosiponga ‘va popere mwenyo gwaPaurusa.’ (Yirug. 18:2; Rom. 16:3, 4) Awo kwa sikisire mo nonkango daJesus edi asi: “Sipango sosipe nina kumupa asi, omu lihara-hare moomu na mu hara ame, yimo nomu lihara-hara none.” (Joh. 13:34) Veta zaMosesa kwa hepere ko komuntu a hare mukwawo moomu ga lihara mwene. (Lev. 19:18) Nye morwasinke sipango saJesus  sina karere sosipe? Morwa aso kuhepa ko kwetu tu hare vakwetetu dogoro pontambo zokuvafira, ngwendi Jesus. Vakriste wovanzi kwa likida eharo pokutura eparu lyawo mosiponga pokunyokera po kuhorora vapuli vakwawo va va hepeke ndi di va dipage nonkore dawo.—Resa 1 Johanesa 3:16.

16, 17. Ngapi omu va hetekere epuro lyoVakriste womosiruwo saKristusa, ntani ngapi va hetekere epuro lyoVakriste vamwe womosiruwo setu?

¹⁶ Ngwendi Jesus, Vakriste womosiruwo sendi nawo kwa karerere Jehova gelike. (Mat. 4:8-10) Awo kwa nyokere kutongamena hompa gwaRoma. (Tara efano.) Daniel P. Mannix kwa tjenge mobuke zendi Those About to Die asi sizambero sokuswakerera kwa si tulire mosira omu ngava dipagere Vakriste. Age kwa tente asi nsene Mukriste na tura yikwayidumba posizambero makura tava mu mangurura. Kwa va fatwilire asi awo kapi vana kutongamena hompa, nye kuna kukwatesa ko asi hompa gwaRoma karunga. Nampili ngoso, Vakriste wovasesu tupu va yi rugene yipo va paruke.

¹⁷ Vakriste vamwe womosiruwo setu ava va hepekere monokamba domahepeko daNazi kwa va pere nompito dokuvamangurura va dire kuvadipaga pokusaina mbapira zokulikida asi kapi hena ngava karera Jehova. Nye wovasesu tupu va sainine. Posiruwo soyita moRwanda, Nombangi doVatutsi nedi doVahutu kwa tulire eparu lyado mosiponga mokupopera vapuli vakwaawo. Momaukaro gangoso, vantu vaKarunga va hepa epuro nokukwata mutjima.

18, 19. Yihonena musinke yomoBibeli yokukara nepuro nokukwata mutjima nayi tu vatera tu sikise mo sirugana setu sokuzuvhisa?

¹⁸ Ose twa kara nositumbukira sokulihameka mosirugana sosinene esi ga pa Karunga vakareli vendi sokudivisa mbudi zoUhompa nokutura po varongwa. (Mat. 24:14; 28:19, 20) Ee, rupandu musi tuna kara naro kosihonena sosiwa saJesus! Age kwa zire “mwa za yitata a udise Mbudi zoUntungi waKarunga.” (Ruk. 8:1) Ngwendi Jesus, nose twa hepa epuro nokukwata mutjima yipo tu zuvhise mbudi zoUhompa. Nevatero lyaKarunga, nose kuvhura tu kwate mutjima ngwendi Nowa, ogu ‘nga udisa uhungami mouzuni wovadinikarunga’ ou wa kere pepi nezonauko.—2 Pet. 2:4, 5.

¹⁹ Ekanderero kutuvatera tu sikise mo sirugana sokuzuvhisa. Apa varongwa vamwe vaKristusa ava va hepekere va kandererere asi ‘va udise nonkango daKarunga nomupampi,’ makanderero gawo va ga limbwilire. (Resa Yirugana 4:29-31.) Nsene poyiruwo yimwe ove kukara nowoma wokuzuvhisa tunda embo zende embo, Jehova nga limburura makanderero goge gokukara nepuro nokukwata mutjima.—Resa Episarome 66:19, 20. *

20. Evatero musinke twa kara nalyo ngovakareli vaJehova?

²⁰ Ayo kapisi ureru kutwikira kurugana mpango zaKarunga mouzuni ou woudona. Nampili ngoso, kapisi nyoselike twa kara. Karunga nose ga kara. Ano Munwendi Mupangeli gombungakriste. Ntani hena twa kara novapuli vakwetetu wokupitakana 7 000 000 mouzuni mudima. Yipo nye tu twikireni kulikida epuro nokuudisa mbudi zongwa ngomu tuna kudiworoka etjangwa lyetu lyomvhura 2013: “Kora, o kwate mutjima. . . . Jehova Karunga goge pweli poge.”—Jos. 1:9.