NOMVHURA dongandi da ka pita, valikwali Roald naElsebeth wonomvhura dokoyiha 40 kwa tungire moBergen sitata somoNoroweyi. Awo kwa lihamekere moyirugana yomombungakriste zawo noulimburukwi kumwe namunawo gomukadona Isabeli nogu gomumati Fabian. Roald kwa kere mukuronambunga, ano Elsebeth muzuvhisi gokukarerera, posiruwo oso Isabel naFabian awo vazuvhisi tupu.

Nampili ngoso, mwaSitarara 2009, epata lyawo kwa tokwere kutamununa sirugana sawo pokukazuvhisira komukunda gwapeke. Roald naElsebeth naFabian gonomvhura 18 kwa zire koNordkyn, mukunda gwaFinnmark. Oko, kwa ka zuvhisilire momukunda gwaKjøllefjord kumwe novanavazinyawo ava va wizire va ya zuvhisire momukunda ogo. Roald kwa tanta asi: “Sivike oso, ame kwa lizuvhire ruhafo morwa kwa wapaikire elikwamo lyange yipo ni lihameke mo mokuzuvhisa sivike nasinye.” Mosivike sooso, kosili sininke simwe sa mu ninkisire a gazadare ko unene. Yisinke ya horokere?

Roald kwa tanta asi: “Hararasi tupu, Mario, muzuvhisi gokukarerera gomoFinnmark, kwa tu pulire nsene kuvhura tu dirukire kodoropa zedina  Lakselv mokukavatera mbungakriste ezi za kere novazuvhisi 23.” Epuro eli kwa tetukisire Roald morwa kapi ga li ndindilire. Age kwa fatwilire asi: “Name naElsebeth kwa gazarere asi konyima zapa ngava kura vanona va tunde mo membo ntani ngatu dirukira komukunda oku vana hepa vazuvhisi.” Momazuva gomasesu aga ga zuvhisilire momukunda ogo, Roald ga yi dimbwilire asi vantu va kere neharo lyokulironga kuhamena Jehova. Awo va hepere evatero posiruwo sooso, kapisi konyima zosiruwo. Age kwa tanta asi: “Epuro eli kwa kundamene ezwi lyange lyokomutjima ntani poyiruwo yimwe kapi ngani rara.” Makura Mario yipo ga twere Roald nepata lyendi kodoropa zaLakselv, ezi za kara ure wonokilometa 240 koMbindakano zaKjøllefjord. Mario kwa here vagenda va ka mone mbungakriste ozo zonunu.

Apa va ka sikire, Andreas, gumwe govakuronambunga kwa likidire vagenda mukunda noSinyanga soUhompa. Mbungakriste kwa va tambwire nawa nokutantera Roald naElsebeth asi awo ngava yi hafera nsene epata lyawo ngali dirukira komukunda gwawo va ya va vatere mosirugana sokuzuvhisa. Noruhafo, Andreas kwa tente asi age ga wapaikilire nare Roald naFabian yirugana. Yisinke va hepere kurugana ko?

Fabian apa ga yi zuvhire, kwa tente asi: “Kapi nina hara kudirukira komukunda ogo.” Kapi ga here kusiga vakaume vendi wovanene womombungakriste zawo makura a ka tunge mokadoropagona. Ntani kapi ga mene edeuro lyendi lyoyikwamarutjeno. Nye Isabel gonomvhura 21 apa va mu pulire, age kwa tente asi: “Oyo yiyo ani gazara kurugana nkenye apa!” Makura yipo ga tente hena asi: “Apa ani gazadara ko, ame kulipura asi: ‘Eli kuna kara egano lyewa ndi? Ngani rongora vakaume vange ndi? Ni kare tupu mombungakriste zetu omu nayi genda nge po yininke monaruwa ndi?’” Ngapi Elsebeth ga lizuvhire kezigido eli? Age kwa tanta asi: “Ame kwa lizuvhire asi Jehova kwa pere epata lyetu sirugana, nye na gazarere hena kuhamena nzugo zetu ezi twa wapukwilire noyininke nayinye ya kere mo eyi twa gwene monomvhura 25 da ka pita.”

Konyima zosivike oso, Roald nepata lyendi kwa tengwire koBergen, nye ngava diworoka nkenye apa vanavazinyawo womodoropa zaLakselv, ezi za kara ure wonokilometa 2 100. Elsebeth kwa tanta asi: “Yikando yoyinzi ngani kanderere kwaJehova, ntani na twikilire kuzogera novakaume ava twa ka ligwene nawo pokulitumina mafano noyilimonena.” Roald kwa tente asi: “Na hepere siruwo mokutambura ediruko olyo. Ntani hena na hepere kugazadara ko nsene kuvhura ngatu ka gwane yokulireresa. Ngapi omu ngatu ka rera epata? Ame kwa kanderere unene kwaJehova nokuzogera nepata lyange novanavazinyetu.” Fabian kwa tanta asi: “Ngomu na gazadarere ko unene, yimo hena na dimbwilire asi kapi ya kere hepero ni nyoke. Apa na kanderere unene kwaJehova, eharo lyokudiruka yipo lya nkondoparere.” Yisinke ga rugene ko Isabel? Mokuliwapaikira ediruko eli, yipo ga tamekere kurugana uzuvhisi wokukarerera modoropa zawo. Konyima zomakwedi ntazimwe gokurugana uzuvhisi owo, nokuruganesa siruwo sosinzi kelirongo lyoBibeli lyanyamwendi yipo ga ya lizuvhire asi ana liwapaikire kudiruka.

Ngomu eharo lyokudirukira oku kuna hepa vazuvhisi lya nkondoparere, epata lyawo yipo lya rugene ko yuma mokusikisa mo sitambo sawo. Roald kwa kere noyirugana eyi ngava mu futu yimaliwa yoyinzi eyi nga hafere, nye kwa hundilire va mu pe epwizumuko ure womvhura. Nye muhona gwendi kwa mu ninkire a rugane yivike yivali, ano yivike ntazimwe ta pwizumuka. Roald kwa tanta asi: “Mfeto zange kwa zi sesupikire, nye ya tu gwanenene po.”

Elsebeth kwa tanta asi: “Mugara gwange kwa pulire nge ni hetekere ko kupapara nzugo moLakselv ntani tu hehedese nzugo zetu zomoBergen. Ayo kwa gusire siruwo nelituromo nye ya tu tompokere. Konyima zosiruwo vana vetu tava ya gwana yirugana yokaruwogona ntani nokutuvatera tu fute yihepwa, nondya nougendero.”

Isabel kwa tanta asi: “Mokumona asi doropa ezi twa dirukilire nunu, udigu wange wounene kwa kere wokugwana yirugana ni livaterese ko ngomuzuvhisi gokukarerera. Poyiruwo yimwe, na lizuvhire ngwendi kapi nayi tompoka nge.” Isabeli ga rugene yirugana yokulisiga-siga momvhura zokuhova ano eyi ya  mu vaterere a sikise mo yihepwa yendi. Ngapi kuhamena Fabian? “Mokumana sure zange ngomupangeli yikwamarutjeno, simpe na hepere kurugana ngomurongwa. Eyi kwa yi ruganenene modoropa zaLakselv. Na ya pitire makonakono nokugwana yirugana yopokaruwogona ngomupangeli goyikwamarutjeno.”

Marelius namukadendi Kesia, nawo kwa here kuza oku va hepere vazuvhisi. Marelius gonomvhura 29 kwa tanta asi: “Yiuyungwa yoposigongi somazuva gatatu nomapuragero gouzuvhisi wokukarerera kwa kundamene nge ni gazadare ko kuhamena kutamununa sirugana sange.” Kesia gonomvhura 26, egano lyokudiruka kwa mu digoperere kulitambura. Age kwa tanta asi: “Ame kapi na here kukara ure novantu ava na hara.” Ntani hena, Marelius kwa rugene siruwo nasinye mokufuta makongo gonzugo zawo. Age kwa tanta asi: “Nevatero lyaJehova, ya tu tompoka kutura po marunduruko yipo tu diruke.” Pomuhowo, awo ngava ruganesa siruwo sosinzi melirongo lyawo lyoBibeli. Konyima tava ya randesa nzugo zawo nokuhageka yirugana, ano mwaSiwogedi 2011 yipo va dirukilire kositata saAlta moNoroweyi. Mokulivatera vene ngovazuvhisi wokukarerera, Marelius kurugana yirugana yokuvarura yimaliwa ano Kesia kurugana mositora.

Knut naLisbeth, valikwali wonomvhura dokoyiha 30 kwa va kundamene yihorokwa yomoYearbook yowo va kere komukunda oku va hepere vazuvhisi woUhompa. Lisbeth kwa tanta asi: “Yihorokwa eyi kwa tu ninkisire tu gazadare ko kuza kosirongo sapeke nye na kere nomasinganyeko morwa kwa gazarere asi kapi tani yi vhuru.” Nye va rugene ko yuma mokusikisa mo sitambo sawo. Knut kwa tanta asi: “Ose kwa randesere nzugo zetu, nokupungura yimaliwa nokudirukira membo lyonane. Mokutuvatera tu liwapaikire kuza kosirongo sapeke, pomuhowo ose twa hepere kudirukira mombungakriste zoRuingilisa moBergen, omu twa ka kere nozina vaLisbeth.” Konyima zosiruwo, Knut naLisbeth kwa lizuvhire asi vana liwapaikire kudirukira koUganda. Nkenye mvhura awo kutengura koNoroweyi nokukakara ko makwedi gavali va ka rugane. Monkedi zangoso awo kupongaika yimaliwa va livaterese ko mvhura nazinye mosirugana sokuzuvhisa moUganda.

Ngapi ya va gendere vazuvhisi ava wokuligava? Roald kwa tanta asi: “Ose kuruganesa siruwo sosinzi ngepata mokuzuvhisira momukunda ogu kupitakana omu ngatu yi rugana moBergen. Epata lyetu ngesi lina likwatakana kumwe. Pokumona vana vetu omu vana kutura po ezokomeho ayo kuhafesa unene.” Age kwa gwederera ko asi: “Ngesi tuna kara nomutaro gomuwa koyininke yopanyama. Kapi tuna kuyitara hena asi mulyo ngomu ngatu yi tara nare.”

Elsebeth kwa dimbwilire hepero zokulironga eraka  lyapeke. Morwasinke? Mukunda gombungakriste zaLakselv kwa hamena mo mukunda gwaKarasjok omu va kara Vasami, vantu ava va tunda korwaMuzogo gwaNoroweyi naSiwede naFinland naRusia. Mokumurerupira kuzuvhisira vantu owo, Elsebeth kwa lirongere Rusami. Ngesi age kuna kuzogera novantu owo meraka lyawo. Age kuna kuyihafera kuzuvhisira mukunda ogo ndi? Age kwa tanta asi: “Ame kulironga Bibeli novantu ntazimwe. Ame nina hafa unene kuzuvhisira momukunda ogu!”

Fabian, ogu ngesi ana kara muzuvhisi gokukarerera nomukwafimbunga kwa tanta asi age naIsabel kwa vaterere vadinkantu vatatu mombungakriste zawo zompe ava va hepere ekorangedo va lihameke mo unene moyirugana yomombungakriste. Moutatu wawo kuna kulitura mo unene mosirugana sokuzuvhisa. Vavali va gwana ekuho ntani va rugene uzuvhisi wokuvatera mwaNsinano 2012. Mudinkantu gumwe ogu ga tengwire monyima kwa pandwire Fabian naIsabel kweyi va mu vaterere a nkondopeke hena elikwatakano lyendi naJehova. Fabian kwa tanta asi: “Ayo kwa kundamene nge unene kweyi ga uyungire. Ee, ruhafo musi rokuvatera gumwe!” Isabel kwa tanta asi: “Mosirugana esi, ame kwa ‘heteka ni tare asi HOMPA ngapi omu ga wapa!’” (Epis. 34:8) Kwa gwederera ko asi: “Kugusa ko oyo, kuzuvhisira momukunda ogu kureta ruhafo!”

Marelius naKesia ngesi va rerupika eparu lyawo nye va gwanena mo matungiko. Mbungakriste zomoAlta omu va dirukira, ngesi zina kara novazuvhisi 41. Marelius kwa tanta asi: “Ayo kukorangeda nge monkedi omu lya runduruka eparu lyetu. Ose kupandura Jehova mokumukarera ngovazuvhisi wokukarerera momukunda ogu. Ayo kuhafesa sili!” Kesia kwa gwederera ko asi: “Ame na lironga kuhuguvara unene mwaJehova, ano age kutupakera mbili. Ame na yi dimburura hena asi kutunga ure nekoro lyange kwa vatera nge ni mone mulyo gokukara kumwe nawo apa atu ka va dingura. Kapi na livera rumwe ketokoro eli twa tura po.”

Ngapi kuhamena Knut naLisbeth ava vana kara moUganda? Knut kwa tanta asi: “Ayo kwa gusire siruwo mokuyika nkarapamwe nompo zompe. Mema norutjeno nokukora-kora mezimo yigo maudigu atu ligwanekere nago nkenye apa, nye nampili ngoso ose twa kara novarongwa wovanzi woBibeli!” Lisbeth kwa tanta asi: “Kutunda oku twa tunga kugenda po nominute 30 oku kwa kara nomukunda edi va dira kuzuvhisira rumwe mbudi zongwa. Apa atu zi ko, ose kukagwana vantu kuna kuresa Bibeli ntani awo kutupura tu lironge nawo. Kuronga vantu vangoso wokulinunupika mbudi zongwa kureta sili ruhafo rorunene!”

Omu tupu ayi hafesa Mupitisili gwetu, Jesus Kristusa, pokumona omu sirugana sokuzuvhisa esi ga tamekere vana kusirugana mouzuni mudima! Vantu navenye vaKarunga kuvahafesa unene pokuligava vene va sikise mo mpangera zaJesus ‘zokuninka nomuhoko nadinye di kare varongwa vendi.’—Mat. 28:19, 20.