1. Yisinke ya ninkisire Paurusa a hafere Vakriste womoKolinte?

MOMVHURA 55, mupositoli Paurusa kwa kere mositata zaTorowa, nye kwa twikilire kudiworoka kuhamena Vakolinte. Ketamekero lyomvhura ozo, ayo ya mu guvisire mokudiva asi nomutangu adi kara-kara mo mokatji kovapuli vakwawo. Morwa eharo, yipo ga va tuminine mbilive mokuvavyukisa. (1 Kol. 1:11; 4:15) Ntani hena kwa va tuminine murugani mukwawo Titusa nokumutantera a ya mu divise omu vana karere. Paurusa kwa ndindilire Titusa moTorowa, a ya zuvhe omu vana kurugana Vakolinte mosirugana souhompa. Nye Paurusa kwa guvire unene, morwa Titusa kapi ga tengwire kwendi. Yisinke ga rugene ko Paurusa? Age kwa zire koMakedoniya nosikepa, makura tava ka ligwana naTitusa ano eyi kwa mu hafesere. Titusa kwa tente asi vanavazina womoKolinte va tambwire mbilive zaPaurusa nehafo ntani asi va here kumumona. Apa Paurusa ga zuvhire mbudi zongwa zokuvahamena, ‘ehafo lyendi yipo nye lya vhukire unene.’—2 Kol. 2:12, 13; 7:5-9.

2. (a) Yisinke ga tjangerere Paurusa Vakolinte kuhamena epuro noruhafo? (b) Mapuro musinke natu ka konakona?

² Konyima, Paurusa kwa ya tjangerere Vakolinte mbilive zauvali. Age kwa va tanterere asi: “Ose kapi tuna hara kumupangera eyi nomu pura, yeeyi one mwa kora mepuro. Ose kurugana kumwe neni morwauwa wanyamweni.” (2 Kol. 1:24) Yisinke ga tembe Paurusa? Ngapi nonkango odo nadi kundama vakuronambunga naina?

3. (a) Yisinke ga tembe Paurusa pokutjanga asi: “One mwa kora mepuro”? (b) Ngapi vakuronambunga vana kukwama sihonena saPaurusa?

³ Paurusa kwa tumbwire maruha gavali gomulyo goukareli wetu, epuro noruhafo. Kuhamena epuro, age kwa tjenge asi: “Ose kapi tuna hara kumupangera eyi nomu pura, yeeyi one mwa kora mepuro.” Nononkango odo, Paurusa ga yi dimbwilire asi vanavazina womoKolinte kwa peme mepuro, kapisi morwa yige ndi vantu vapeke, nye morwa epuro lyavene mwaKarunga. Paurusa kapi ga here kupangera epuro lyovanavazina. Age kwa va huguvarere asi awo Vakriste wovalimburukwi ava va here kurugana youhunga. (2 Kol. 2:3) Naina, vakuronambunga kukwama sihonena saPaurusa sokuhuguvara epuro lyovanavazinyawo neharo lyawo lyokukarera Karunga. (2 Tes. 3:4) Mevango lyokutura po noveta doudigu mombungakriste, vakuronambunga kuhuguvara monompango domoBibeli nomomavyukiso gombunga zaJehova. Vakuronambunga naina kapi ava pangere epuro lyovanavazinyawo.—1 Pet. 5:2, 3.

4. (a) Yisinke ga tembe Paurusa apa ga tjenge asi: “Ose kuruganena kumwe neni morwauwa wanyamweni”? (b) Ngapi omu ava honene vakuronambunga naina nkareso zaPaurusa?

⁴ Paurusa kwa tente hena asi: “Ose kurugana kumwe neni morwauwa wanyamweni.” Nonkango odo, kwa di tambesere kwamwene nokovakaume vendi. Ngapi omu twa yi diva? Morwa mombilive zoozo zoVakolinte, Paurusa kwa tumbwire vakaume vendi vavali apa ga tjenge asi: ‘Jesus, ogu ngatu mu udisire, name naSilivanusa naTimoteusa.’ (2 Kol. 1:19) Ntani hena apa Paurusa nga ruganesa ntanto “varugani vakwetu” monombilive dendi, age kwa tembe vakaume vendi wovanene ngwendi Aporo naAkura naPilisikira naTimoteusa naTitusa ntani navamwe hena. (Rom. 16:3, 21; 1 Kol. 3:6-9; 2 Kol. 8:23) Pokutanta asi: “Ose kuruganena kumwe neni morwauwa wanyamweni,” Paurusa kwa huguvaresere Vakolinte asi age novakwawo kwa here kurugana nkenye eyi va vhulire morwauwa wovantu navenye womombungakriste. Vakuronambunga naina nawo kwa kara neharo lyokulifana. Awo kwa hara kurugana nkenye eyi mokuvatera vanavazinyawo va ‘tongamene HOMPA nehafo.’—Epis. 100:2; Fil. 1:25.

5. Epuro musinke va pulire vanavazinyetu vamwe, ntani yisinke natu ka konakona?

⁵ Vanavazinyetu vamwe wovagara nava wovakadi womupampi ava va tunga koyirongo yokulisiga-siga kwa va pulire asi: “Nkareso musinke zomukuronambunga ezi za gwederera koruhafo roge?” Ngomu natu ka konakona malimbururo govanavazinyetu, gazadareni yininke eyi va uyunga ndi va rugana vakuronambunga eyi ya mu hafesere. Ntani hena, tu gazadareni omu nkenye gumwe gwetu na gwederera koruhafo romombungakriste zetu. *

6, 7. (a) Monkedi musinke vakuronambunga nava temwinina Jesus naPaurusa novakareli vamwe vaKarunga? (b) Ngapi omu ava lizuvhu vanavazinyetu apa atu va tumbura komadina gawo?

⁶ Vanavazinyetu wovanzi kwa tanta asi ruhafo rwawo kunkondopara unene apa vakuronambunga ava likida elituromo mwawo. Nkedi zimwe omu nava yi rugana vakuronambunga eyi kuna kara pokuhonena Ndafita naElihu naJesus mwene. (Resa 2 Samwere 9:6; Joba 33:1; Rukasa 19:5.) Vakareli owo vaJehova kwa likidire elituromo movantu poruganesa madina gawo. Paurusa nage ga dimbwilire mulyo gokudiworoka madina govapuli vakwawo nokugaruganesa.  Age kwa hagesere mbilive zendi zimwe pokukundisira po vanavazina 25, kukwatera mo Peresisi ogu ga uyungire Paurusa asi: “Kundisireni po Peresisi, munwamali gomukadi gokuhara.”—Rom. 16:3-15.

⁷ Vakuronambunga vamwe kuvadigopera kudiworoka madina. Nye apa vakuronambunga ava hetekere ko kuyirugana, vapuli vakwaawo kulizuvha asi kuna kuvapakera mbili. (Ex. 33:17) Vapuli vakwaawo kulizuvha ruhafo apa vakuronambunga ava diworoka nokutumbura madina gawo pElirongo lyoRuhungu ndi momapongo gamwe hena.—Hetakanesa Johanesa 10:3.

8. Monkedi musinke zimwe zomulyo ga kweme Paurusa sihonena saJehova naJesus?

⁸ Paurusa kwa likidire hena elituromo movakwawo pokuvapandadeka, azo nkedi zimwe hena zokunkondopeka ruhafo rovapuli vakwetetu. Apa Paurusa ga tjangerere Vakolinte, age kwa va tanterere asi ga va huguvara pokuuyunga asi: “Kulifumadeka kwange mwareni kunene.” (2 Kol. 7:4) Nonkango odo depandadeko kwa hafesere nomutjima dovapuli womoKolinte. Paurusa ga pandadekere hena nombungakriste dimwe koyirugana yado yoyiwa. (Rom. 1:8; Fil. 1:3-5; 1 Tes. 1:8) Konyima zokutumbura Peresisi mombilive zendi kombungakrite zomoRoma, Paurusa kwa gwederere ko asi: “Ogu a rugana unene mwaHompa.” (Rom. 16:12) Ee, omu tupu da mu hafesere nonkango odo munazinyetukadi gomulimburukwi! Mokupandadeka wopeke, Paurusa kwa kweme sihonena saJehova naJesus.— Resa Marukusa 1:9-11; Johanesa 1:47; Ehor. 2:2, 13, 19.

9. Morwasinke kugava nokugwana epandadeko ayi gwederere koruhafo romombungakriste?

⁹ Naina vakuronambunga va dimburura mulyo gokupandadeka vanavazinyawo nononkango donongwa. (Yis. 3:27; 15:23) Nsene mukuronambunga a rugana oyo, ngwendi kuna kutantera vanavazina asi: ‘Ame kwa mu diva ntani na kara nosinka kweni.’ Ntani vapuli vakwetetu kwa hara kuzuvha nonkango donongwa dovakuronambunga. Munazinyetukadi gonomvhura 50 kwa uyungilire po vakwawo asi: “Koyirugana kapi ani gwana epandadeko. Ako kwa kara ko nkareso zomarumbasano. Apa mukuronambunga a pandadeke nge kweyi nina rugana mombungakriste, ayo kuhafesa nokunkondopeka nge! Ayo kuninkisa nge ni lizuvhe asi Guhyetu gemeguru kwa hara nge.” Guhya gomudike ogu a rere vanona vavali nage yimo ngoso ga lizuvhire, apa mukuronambunga ga mu pandadekere kutundilira komutjima. Ngapi omu ya mu kundamene? Age kwa tanta asi: “Nonkango domukuronambunga kwa nkondopekere nge unene!” Ayo kulikida nawa-nawa asi apa mukuronambunga a pandadeke vanavazinyetu, age kuvavatera va twikire kukarera Karunga noruhafo ‘va hana kutwama.’—Jes 40:31.

10, 11. (a) Ngapi vakuronambunga nava kwama sihonena saNehemiya? (b) Yisinke nayi vatera mukuronambunga a gave uhwi wopampepo pedinguro lyokugava ekorangedo?

¹⁰ Nkedi musinke zomulyo omu vakuronambunga nava likida elituromo movanavazinyawo nokugwederera koruhafo romombungakriste? Pokulitulira po siruwo sokuvatera owo vana hepa ekorangedo. (Resa Yirugana 20:28.) Apa ava yi rugana ngoso, awo kuhonena vakareli vaKarunga womosiruwo sanare. Pasihonena, Bibeli kutanta asi apa Nehemiya ga dimbwilire asi Vajuda vakwawo vana dompo nomutjima, age kwa rugene ko yuma mokuvakorangeda. (Neh. 4:14) Vakuronambunga vanaina nawo kurugana yokulifana. Apa vanavazinyawo ava  dompo nomutjima, awo kurugana paapa va hulira va va korangede. Vakuronambunga kuhetekera ko kukadingura vanavazinyawo momambo gawo nokukavapa ‘uhwi wopampepo,’ kutanta asi kukazogera nawo yininke eyi nayi nkondopeka epuro lyawo. (Rom. 1:11) Yisinke nayi vatera vakuronambunga va yi rugane oyo?

¹¹ Pokurugana edinguro lyokukagava ekorangedo, mukuronambunga ga hepa kugazadara komeho zokuza komuntu ogu ana kukadingura. Maudigu musinke ana kuligwanekera nago? Magano musinke naga ka mu vatera? Etjangwa ndi sihonena salye somoBibeli sina lizi noukaro wendi? Kugazadara ko komapuro ogo, ngayi vatera mukuronambunga a gave ekorangedo lyewa lyokuhafesa. Medinguro, mukuronambunga ga hepa kupulisira munazina a uyunge udigu wendi ano age a purakene nawa. (Jak. 1:19) Munazinyetukadi gumwe kwa tanta asi: “Ayo kuhafesa apa mukuronambunga a purakene nomutjima gwendi nagunye.”—Ruk. 8:18.

12. Wolye va hepa ekorangedo mombungakriste, ntani morwasinke?

¹² Wolye ngava gwanena mo uwa medinguro lyovakuronambunga? Paurusa kwa korangedere vapuli vakwawo wovakuronambunga va ‘takamese navenye womombungakriste.’ Navenye womombungakriste va hepa ekorangedo, kukwatera mo vazuvhisi novazuvhisi wokukarerera ava va kara noulimburukwi nomvhura dononzi. Morwasinke va hepera ekorangedo lyovakuronambunga? Morwa poyiruwo yimwe yininke youzuni ou woudona kuvadompesa mutjima nampili ngomu va kara nepuro lyokupama. Vanavazinyetu owo nawo va hepa evatero, ngomu natu ka yi konakona mosihorokwa sahompa Ndafita.

13. (a) Yisinke ga gazarere Isebi-Benobu moukaro ou ga kere Ndafita? (b) Ngapi omu Abisayi ga poperere Ndafita?

¹³ Konyima tupu zapa mudinkantu Ndafita va mu gwavekere a kare hompa, age  kwa rwire naGolyata, gumwe gomoruvharo ronondungurume. Ndafita kwa kwete mutjima nokudipaga Golyata. (1 Sam. 17:4, 48-51; 1 Hist. 20:5, 8) Konyima zonomvhura dononzi, apa va kere noyita noVafilisiti, Ndafita kwa rwire hena nondungurume zimwe. Edina lyazo Isebi-Benobu. (2 Sam. 21:16) Posiruwo esi ndungurume nkare zi dipage Ndafita. Morwasinke? Etjangwa kwa tanta asi: ‘Ndafita kwa rorokere.’ Apa ndungurume Isebi-Benobu ga dimbwilire asi Ndafita ana roroka, age “kwa gazarere asi na dipaga Ndafita.” Nye apa ndungurume za ninkire asi zi twe Ndafita, “Abisayi zaSeruya ta ya popere Ndafita, makura ta dipaga ozo ndungurume.” (2 Sam. 21:15-17) Ndafita nkare a fe! Omu tupu ya hafesere Ndafita pokudiva asi Abisayi kwa mu nomenene nokumupopera apa eparu lyendi lya kere mosiponga! Yisinke natu lirongera ko kosihorokwa esi?

14. (a) Ngapi omu natu vhura kufunda po maudigu gomanene? (b) Ngapi omu vakuronambunga nava vatera wopeke va kare noruhafo? Gava sihonena.

¹⁴ Ngovantu vaJehova mouzuni mudima, ose kuna kurugana sirugana setu sokuzuvhisa nampili ngomu Satana novakwatesiko vendi vana kuyitudigopekesera. Vamwe vetu kwa ligwanekera nomaudigu gomanene, nye nehuguvaro lyenene mwaJehova, va ga funda po. Nye poyiruwo yimwe ose kulizuvha asi kapi tuna kara nononkondo dokugwanena po mokurwanesa po uzuni waSatana. Moyiruwo yangoso, ayo ureru kutudompesa mutjima maudigu aga atu lididimikire nkenye apa. Nye mukuronambunga kuvhura a dimburure omu tuna kulizuvha makura ta tu pe evatero eli twa hepa posiruwo sokuwapera. Muzuvhisi gokukarerera gomukadi gonomvhura dokupitakana 60 kwa tanta asi: “Poyiruwo yimwe kapi ngani lizuvhu nawa ntani yirugana yokuzuvhisa ngayi rorora nge. Mukuronambunga ga dimbwilire udigu wange makura ta hedere nge. Age kwa korangedere nge nomatjangwa gomoBibeli. Ame kwa tulire pasirugana mapukururo aga ga pere nge ntani na gwanenene mo uwa.” Age kwa gwederere ko asi: “Omu tupu ga hafesere nge mukuronambunga ogo pokudimburura udigu wange nokuvatera nge!” Ayo kuhafesa pokudiva asi vakuronambunga kutupakera mbili ntani va liwapaikira mokutuvatera ngwendi Abisayi ogu ga ‘poperere Ndafita.’

15, 16. (a) Morwasinke Paurusa va mu harerere vapuli vakwawo? (b) Morwasinke natu harera vakuronambunga?

¹⁵ Vakuronambunga kurugana unene. Poyiruwo yimwe kapi ava rara morwa kukara nosinka sovapuli vakwaawo ano pamwe kupinduka masiku va va kanderere po ndi kuvavatera. (2 Kol. 11:27, 28) Nampili ngoso, vakuronambunga kusikisa mo sirugana sawo noruhafo ngwendi Paurusa. Age kwa tjangerere Vakolinte asi: “Ame ngani ya gava nayinye yange nehafo, nanyamwange si ngani ligava morwanomwenyo deni.” (2 Kol. 12:15) Morwa eharo lyokuhara vanavazina, Paurusa kwa ligeve mwene mokuvankondopeka. (Resa 2 Vakolinte 2:4; Fil. 2:17; 1 Tes. 2) Eyi yiyo vapuli vakwawo va mu harerere Paurusa!—Yirug. 20:31-38.

¹⁶ Ngovakareli vaKarunga naina twa hepa kuhara vakuronambunga nokupandura Jehova momakanderero getu kweyi ga va tu pa. Awo kulikida elituromo mwetu pokugwederera ko koruhafo rwetu. Madinguro gawo gokugava ekorangedo kutungawopeka pampepo. Ntani tuna hafa unene pokudiva asi awo va liwapaikira kutuvatera moyiruwo yomaudigu mouzuni ou. Vakuronambunga owo, yosili ‘kurugana kumwe nose morwauwa wanyamwetu.’