1-3. (a) Morwasinke natu uyungira asi Josuwa ga tulire po etokoro lyewa? (b) Yisinke twa hepa kudiworoka nsene tatu tura po matokoro?

ETOKORO kuna kara sininke somulyo. Muntu ga kara nononkondo dokutura po matokoro meparu. Pasihonena, muntu kuna kugenda monzira, hararasi nzira ozo za ya ligaunuka pavali. Zipi po na genda? Nsene ana diva oku ana tamba, nzira zimwe nazi mu twara oku ana kuza ano nkwawo kuvhura zi mu tware ure.

² MoBibeli kwa kara mo yihonena yoyinzi yovantu ava va tulire po matokoro. Pasihonena, Kaini ga hepere kutura po etokoro lyokupangera ehandu lyendi ndi hawe. (Gen. 4:6, 7) Ano Josuwa ga hepere kutura po etokoro lyokuruganena Karunga gosili ndi vakarunga woyimpempa. (Jos. 24:15) Sitambo saJosuwa kwa kere sokuhedera pepi naJehova, yipo nye ga horowere nzira ezi za mu twere kositambo oso. Nye Kaini kapi ga kere nositambo oso, yipo nye ga horowere nzira ezi za mu gusire ko kwaJehova.

³ Poyiruwo yimwe, ose kutudigopera kutura po matokoro. Nsene yi tu horokera oyo, twa hepa kudiworoka sitambo setu sokuhafesa Jehova mwanayinye eyi atu rugana ntani tu nyokere po nkenye eyi nayi tu gusa ko kwendi. (Resa Vahebeli 3:12.) Mosirongwa esi nesi sokukwama ko, natu ka lironga nonkedi ntambali omu natu dira kupulisira nkenye eyi yi tu guse ko kwaJehova.

4. Morwasinke ya karera mulyo kurugana?

⁴ Vakriste kwa kara nositumbukira sokulipakera vene mbili nomapata gawo. Bibeli kwa kulikida asi muntu ogu a dili kupakera mbili vembo lyendi udona  wendi wa pita wogu ga dira kupura. (2 Tes. 3:10; 1 Tim. 5:8) Yirugana mulyo unene meparu, nye nsene kapi tuna kutakamesa, yirugana noyitambo yetu kuvhura yi tu guse ko kwaJehova. Monkedi musinke?

5. Yisinke twa hepa kutura megano nsene tatu papara yirugana?

⁵ Tu tante nye asi ove kuna kupapara yirugana. Nsene asi momukunda gweni udigu kugwana yirugana, kuvhura yi ku tumangede o tambure tupu nkenye sirugana no gwana. Nye ngapi nsene sirugana oso kulirwanesa nonoveta domoBibeli? Ngapi nsene novili edi o rugana ndi kevango oku o ruganene kukukondera o dire kulihameka moyirugana yaJehova ndi o kare ure nepata lyoge? Kuvhura o tambure tupu sirugana oso morwa to gazara asi hansa kurugana neyi no hingira tupu? Diworoka asi, nsene o horowora nzira zepuko ngayi ku gusa ko kwaJehova. (Heb. 2:1) Yi kare asi kuna kupapara yirugana ndi kuna kugazadara ko kosirugana soge, ngapi no vhura kutura po matokoro gomawa?

6, 7. (a) Sitambo musinke nampo muntu na paparera yirugana? (b) Nye sitambo musinke nasi ku hedesera pepi naJehova, ntani morwasinke?

⁶ Ngwendi moomu tuna yi tumbura, muntu wa hepa kutura megano sitambo soge. Lipura asi: ‘Sirugana esi kupi nina hara si twaredesere nge?’ Nsene ove kuna hara sirugana yipo o lirere nyamoge nepata lyoge mokuruganena Jehova, age nga tungika elituromo lyoge. (Mat. 6:33) Jehova kapi tayi mu tukukisa nsene o zumbanesa sirugana soge ndi kapi ono kara noyimaliwa. (Jes. 59:1) Morwa age “ga diva omu a yoworora vatjilikarunga momaheteko gawo.”—2 Pet. 2:9.

⁷ Nye ngapi nsene sitambo soge kuna kara tupu sokungawopa? Kuvhura ngayi ku tompoke. Nye, diworoka asi ngo ligwanekera noyitundwamo yoyidona. (Resa 1  Timoteusa 6:9, 10.) Nsene o kondjera unene ungawo, ngayi ku gusa ko kwaJehova.

8, 9. Yisinke va hepa kugazadara ko vakurona kuhamena omu ava tara yirugana yawo? Faturura.

⁸ Nsene asi o mukurona, gazadara ko omu sihonena soge nasi kundama vana woge. Yisinke ava tara vana woge eyi ya kara mulyo koge, yirugana yoge ndi elikwatakano lyoge naJehova? Nsene va dimburura asi ove kwa hara unene mfumwa noungawo, kuvhura ngava kwame sihonena soge sosidona. Ntani kuvhura ngava dire kukufumadeka. Mudinkantu gumwe goMukriste kwa tente asi: “Otate kwa litura mo unene moyirugana yawo. Pomuhowo ame kwa gazarere asi awo ngava rugana unene morwa kwa here epata lyetu li gwane eyi lya hepa. Awo kwa here kutupakera mbili. Nye mwa za nomvhura, ame kwa yi mona mwapeke. Otate kurugana sili unene, nokurandanga tupu yininke. Morwa oyo, epata lyetu kwa divikwire asi twa kara noyimaliwa yoyinzi nye kapi atu korangeda vakwetu va kondjere yitambo yopampepo. Ame kwa harera otate va tu pakere mbili pampepo kupitakana tupu kukara noyimaliwa.”

⁹ Vakurona, mwa ha ligusa ko kwaJehova pokukondjera tupu unene yirugana yeni. Kupitira mosihonena seni, likideni vana veni asi sininke somulyo po meparu kuna kara elikwatakano lyetu naJehova kapisi ungawo.—Mat. 5:3.

10. Yisinke ga hepa kugazadara mudinkantu nsene ta horowora meho zendi?

¹⁰ Nsene ove o mudinkantu ono kugazadara meho zoge, ngapi no tura po  etokoro lyewa? Ngwendi moomu tuna yi zogere nare, wa hepa kudiva sitambo soge. Lipura asi: Edeuro ndi yirugana eyi nina hara ngayi pa nge mpito ni lihameke moyirugana yaJehova ndi ngayi gusa nge ko kwendi? (2 Tim. 4:10) Sitambo soge kuna kara sokuhonena vantu ava ava hafa tupu nsene vana kara noyimaliwa yoyinzi ndi? Ndi ove ngo kara nehuguvaro ngwendi lyaNdafita ogu ga tjenge asi: “Ntaantani nina kurupa, na kere ni mumati, nye simpe kapi na mona rumwe muhungami asi va mu zumbe, ndi asi vana vendi va hehere nondya”? (Epis. 37:25) Diworoka asi, nzira zimwe nga zi kugusa ko kwaJehova ano nkwawo ngazi ku twara keparu lyewa. (Resa 1 Timoteusa 6:6; Marakiya 3:10.) Nzira musinke ngo horowora? *

11. Yisinke za uyunga ko Bibeli kuhamena yilihafeso, nye yisinke twa hepa kutakamesa?

¹¹ Bibeli kapi za silika yilihafeso ndi zi tante asi yilihafeso kwato mulyo. Paurusa kwa tjangerere Timoteusa asi: “Maliyombereso goparutu mulyo gwago musesu.” (1 Tim. 4:8) Bibeli kwa tanta hena asi pwa kara ‘siruwo sokuhafa,’ ntani “nosiruwo sokudana,” azo kutukorangeda tu pwizumuke ko. (Muud. 3:4; 4:6) Nye nsene kapi ono kutakamesa, yilihafeso kuvhura yi ku guse ko kwaJehova. Monkedi musinke? Udigu kuna kara rupe royilihafeso eyi twa hara ntani siruwo esi atu ruganesa moyilihafeso.

12. Yisinke wa hepa kulipura kuhamena yilihafeso eyi wa hara?

¹² Tu tareni kuhamena rupe royilihafeso. Pwa kara yilihafeso yoyiwa yokuvhura kukupwizumukisa. Nye sinzi soyilihafeso yanaina kwa hamena mo yininke eyi ga nyenga Karunga ngwendi nyanya, umpure noruhonda. Yipo nye, wa hepa kukonakona yilihafeso eyi wa hara. Ngapi omu ayi ku kundama? Ayo kukukorangeda o kare nonyanya nomarumbasano ndi nomalitondororo? (Yis. 3:31) Ndi ayo kumana po yimaliwa yoge? Ndi ayo kupundukisa vakweni? (Rom. 14:21) Vantu musinke o kara nawo moyilihafeso yoge? (Yis. 13: 20) Ayo kukuretera madowo gomadona ndi?—Jak. 1:14, 15.

13, 14. Yisinke wa hepa kulipura kuhamena siruwo esi o ruganesa koyilihafeso?

¹³ Tu tareni hena kuhamena siruwo esi atu ruganesa koyilihafeso. Lipura asi: ‘Ame kuruganesa siruwo sange nasinye moyilihafeso nye kapi ani kara nosiruwo soyininke yopampepo ndi?’ Nsene o ruganesa siruwo soge nasinye koyilihafeso, kapi ngo hafera nawa siruwo soge. Nye owo va kara nehetakano kuhafera nawa siruwo sawo. Morwasinke? Morwa awo pomuhowo tanko kurugana yininke “yoyiwa po” ndi yomulyo po, makura apa nava ka lihafesa kapi tava ka lizuvha unzoni.—Resa Vafilipi 1:10, 11.

¹⁴ Kuvhura yi moneke uwaawa mokuruganesa siruwo sosinzi moyilihafesa, nye nkareso ozo kuvhura kutugusa ko kwaJehova. Munazinyetukadi gonomvhura 20 gedina Kim ga yi limonenene oyo. Age kwa tanta asi: “Ame ngani zi kwa nkenye nopati ngadi horoka. Nkenye sikondovike ngaku kara yilihafeso. Ngesi, nina yi dimburura asi pwa kara yininke yomulyo na hepa kurugana. Pasihonena, ngomuzuvhisi gokukarerera, ame kupinduka 6 kongurangura ni ze moyirugana yokuzuvhisa, kapi tani vhuru kukara kopati dogoro masasiku. Na yi diva asi yilihafeso kapisi yidona, nye kuvhura yi ku donganese unene. Wa hepa tupu kukara nehetakano.”

15. Ngapi vakurona nava vatera vana vawo va gwanene mo uwa moyilihafeso?

¹⁵ Vakurona va kara nositumbukira sokulipakera vene mbili novana vawo panyama nopampepo nopamalizuvho. Eyi kwa kwatera mo kukara noyilihafeso. Nsene o mukurona, wa ha gazara asi epuko kukara noyilihafeso. Nye hena kapisi o pulisire yininke yoyidona. (1 Kol. 5:6) Nsene mu gazara komeho zosiruwo, one ngomu horowora yilihafeso eyi ngayi mu pwizumukisa nepata lyeni. * Monkedi zangoso none novana veni ngomu horowora nzira ezi ngazi mu hedesera pepi naJehova.

16, 17. Ukaro musinke au koresa sinzi sovakurona, ntani ngapi omu tuna yi diva asi Jehova ga diva kukora kwawo?

¹⁶ Elikwatakano lya kara pokatji komukurona namunwendi nonkondo unene yiyo Jehova ga rugenesere elikwatakano lyangoso mokufanekesa eharo eli ga kara nalyo kovantu vendi. (Jes. 49:15) Yimo ya kara ngorooro kuguva nsene gumwe gemepata a hageka kukarera Jehova. Munazinyetukadi ogu munwendi va gusire mo mombunga kwa tente asi: “Ame kwa guvire unene. Tani lipura asi: ‘Morwasinke munwange ana hagekere kukarera Jehova? Ame kwa lizuvhire unzoni nokulipa nyamwage usima.’”

¹⁷ Jehova ga diva kukora koge. Nage kwa ‘guvire unene’ apa Adamu naEva navamwe va mu rwanesere. (Gen. 6:5, 6) Nsene kapi ya ku horokera rumwe udigu kukwata egano kukora kwa hamena mo. Nye hena epuko kupulisira nkareso zogu va gusa mo mombunga zi ku ninkise o liguse ko kwaJehova. Ngapi no vhura kulididimikira ruguwo nsene gumwe gemepata a hageka kukarera Jehova?

18. Morwasinke vakurona nava dilira kulipa usima nsene munwawo a hageka kukarera Jehova?

¹⁸ Wa ha lipa usima kweyi yina horoka.  Nkenye muntu ga hepa “kusimba mudigo gwamwene.” (Gar. 6:5) Jehova age kupangura muntu kounzoni wamwene. (Hes. 18:20) Ntani hena wa ha pa vapeke usima. Fumadeka episuro eli ga tura po Jehova. Rwisa Muzonaguli nye wa ha rwanesa vakuronambunga ava ava popere mbungakriste.—1 Pet. 5:8, 9.

19, 20. (a) Yisinke va hepa kurugana vakurona va lididimikire ruguwo morwa munwawo va mu gusa mo mombunga? (b) Ehuguvaro musinke nava vhura kukara nalyo vakurona?

¹⁹ Nye nsene o handukira Jehova, ove ngo ligusa ko kwendi. Ogu va gusa mo mombungakriste ga hepa kumona asi ove wa tokomena kutura Jehova muhowo meparu kupitakana elikwatakano lyemepata. Yipo nye wa hepa kulididimikira nokutwikira kupameka elikwatakano lyoge naJehova. Wa ha ligusa ko kovapuli vakweni wovalimburukwi. (Yis. 18:1) Tantera Jehova maudigu goge. (Epis. 62:7, 8) Wa ha papara nompito o uyungise ogu va kugusa mo mombunga, yi kare asi kulitumina nombudi moselefoni ndi koe-mail. (1 Kol. 5:11) Litura mo unene moyirugana yopampepo. (1 Kol. 15:58) Munazinyetukadi ogu tuna tumbura kwa tente asi: “Na yi diva asi na hepa kulitura mo unene moyirugana yaJehova nokupameka elikwatakano lyange nendi yipo asi apa munwange nga tengura kwaJehova ngani ya vhure kumuvatera.”

²⁰ Bibeli kwa tanta asi eharo “kuhuguvara nayinye.” (1 Kol. 13:4, 7) Kapi ya kara epuko kukara nehuguvaro asi ogu va gusa mo mombunga nga tengura hena. Nkenye mvhura, wovanzi kulitezurura nokutengura hena kombunga zaJehova. Age kutambura vantu wokulitezurura. Ntani hena age ga liwapaikira “kudongonona po nonzo.”—Epis. 86:5.

21, 22. Yisinke ono tokomene kombinga zoumanguruki woge?

²¹ Jehova kwa pa vantu umanguruki wokutura po matokoro. (Resa Deuteronomium 30:19, 20.) Nye yinzi ya hamena mo moumanguruki owo. Nkenye Mukriste ga hepa kulipura asi: ‘Monzira musinke nina kugenda? Ame kwa pulisira yirugana noyilihafeso ndi elikwatakano lyepata lyange yi guse nge ko kwaJehova?’

²² Jehova age kwa hara vantu vendi. Ose ngatu ligusa ko kwaJehova nsene ngatu horowora nzira zepuko. (Rom. 8:38, 39) Ngano kapisi yi tu horokere. Tura po etokomeno lyokudira kupulisira nkenye eyi yi ku guse ko kwaJehova. Sirongwa sokukwama ko ngasi ka zogera nonkedi ne omu natu likida etokomeno lyetu.