1, 2. Yita musinke nayi ka horoka ntaantani, ntani yisinke ngava dira rugana vakareli vaKarunga moyita oyo?

MOMAZUVA 30 Sikukutu 1938, mamiliyona govantu moAmerika kwa purakenene kelikwamo lyokoradio. Melikwamo olyo, vadani wosihorokwa oso kwa divisire asi koyili yisitwa yina kutunda kopuranete zongandi yi ya homokere evhu nokulizonagura po. Vantu wovanzi kapi va yi dimbwilire asi eli kwa kere tupu esimwititi lyokoradio. Awo kwa gazarere asi yita yina tameke. Vamwe kwa tundire momambo gawo oku tava takuma. Vamwe kwa vende nokutura mauta gawo yikutji nokukudumika nomutwe dawo nonohanduke dokuwora asi va lipopere kompepo zouhungu.

² Yita yoyinene ntaantani yi wize. Nye sinzi sovantu kapi vana yi liwapaikire. Yita oyo kuyitumbura asi Harumagedoni, kutanta asi yita yaKarunga yokuyazonagura po uzuni wovadinikarunga. Eli kapisi esimwititi tupu. Ose twa yi diva asi yita eyi ngayi horoka morwa Karunga kwa yi tu tantera moNonkango dendi, Bibeli. (Ehor. 16:14-16) Ose kapi ngatu rwa moyita eyi. Nye Jehova nga ruganesa nonkondo dendi a tu zowore monkedi zokutetukisa.

3. Uporofete musinke natu ka lironga, ntani morwasinke wa karera nomulyo kwetu naina?

³ Uporofete va tjanga mwaSakaliya egaununo 14 kututantera yoyinzi kuhamena yita yaHarumagedoni. Nampili ngomu va u tjenge konyara nomvhura 2 500 da ka pita, uporofete ou kuna kara nomulyo kwetu naina. (Rom. 15:4) Awo kwa uyunga kuhamena yininke eyi ya horokera vantu vaKarunga kutunda tupu apa Jesus ga tamekere kupangera meguru 1914. Kututantera hena kuhamena  yininke yokuhafesa eyi ngayi ka horoka komeho, ntani kututantera kuhamena “muramba gomunene” ‘nomema gomawa.’ (Sak. 14:4, 8) Mosirongwa esi natu ka lironga asi muramba musinke ogu ntani nomu vakareli vaJehova nava gwana mo epopero. Ntani natu ka lironga hena asi yisinke mema gomawa nomu natu gwanena mo uwa. Ngoyitundwamo, kapi tupu ngatu diva asi twa hepa kuganwa nye hena ngatu kara neharo lyokuganwa. Ngesi tu konakoneni uporofete ou.—2 Pet. 1:19, 20.

4. (a) Siruwoke lya tamekere ezuva lyaHOMPA? (b) Monomvhura dononzi, yisinke va zuvhisa vagwavekwa, ntani ngapi va yi tere vanapolitika novampitisili?

⁴ Uporofete va tjanga mwaSakaliya egaununo 14 kwa tameka pokutanta asi: “Ezuva eli nga hingira HOMPA a pangure, pepi lina kara.” (Resa Sakaliya 14:1, 2.) Ezuva musinke eli? Alyo kwa lifana ‘nezuva lyaHompa,’ eli lya tamekere 1914 apa Jesus ga tamekere kupangera ngaHompa goUhompa waKarunga meguru. (Ehor. 1:10; 11:15) Monomvhura dononzi, vagwavekwa ngava zuvhisa asi uhura ‘wosiruwo sovapagani’ ngau wiza 1914 ntani asi kutundilira posiruwo oso, mouzuni ngamu kara maudigu gomanzi kupitakana pwanare. (Ruk. 21:24) “Vapagani” va purakenene kerondo lina ndi? Hawe. Mevango lyoyo, vanapolitika novampitisili womaukarelikarunga kwa zorere nokuhepeka Vakriste owo. Pokurugana oyo, vampitisili kwa swawire Karunga Munankondo morwa vagwavekwa ava va fanekesa ‘Jerusarema zemeguru,’ kwa karera po Uhompa waKarunga.—Heb. 12:22, 28.

5, 6. (a) Yisinke da rugene nonkore kovantu vaKarunga? (b) Wolye ‘harufa nkwawo’ ezi za kere mositata?

⁵ Sakaliya kwa pumbire eyi ngava rugana vapagani pokutanta asi: ‘Sitata saJerusarema ngava si kwata.’ “Sitata” kwa fanekesa Uhompa waKarunga woUmesiyasa. Uhompa ou vana karere po ‘vanauntungi,’ yihupwa yovagwavekwa apa pevhu. (Fil. 3:20) Sitata kwa si ‘kwete’ poYita yoPomuhowo yoUzuni apa vanavazinyetu ava ngava pitisire mbunga zaJehova va va tulire modorongo moAtlanta, moGeorgia, mosirongo saAmerika. Nonkore odo kwa tekwire nonyanya vagwavekwa nokusilika yimbapiratjangwa yawo nokuhetekera ko kuvahagekesa kuzuvhisa. Ayo kwa kere ngwendi nonkore kwa zungwilire “mambo” gomositata.

⁶ Nampili ngomu nonkore da kere nononkondo dokuhepeka vantu vaKarunga nokuvarundira, awo kapi va vhulire kuzonagura po ukareli wousili. Ngomu va yi tumbura mwaSakaliya, ‘harufa nkwawo’ zovagwavekwa wovalimburukwi kwa kere “moomo mositata.”

7. Sihonena musinke va tu tulira po vagwavekwa?

⁷ Nonkore da hagekere kuhepeka vantu vaKarunga apa ya hege Yita yoPomuhowo yoUzuni ndi? Hawe. Mahepeko aga ga pumbire Sakaliya kwa twikilire. (Ehor. 12:17) Pasihonena, vanavazinyetu kwa va hepekere unene moYita yaUvali yoUzuni. Yihonena yovagwavekwa wovalimburukwi kutukorangeda tu lididimikire maheteko. Maheteko ogo kwa kwatera mo  makwamakwamo gokutundilira kwava ava tu zoro morwa epuro lyetu, va kare asi vemembo ndi wokoyirugana ndi wokosure. (1 Pet. 1:6, 7) Yi kare asi kupi twa tunga, tuna tokomene ‘kuliza mutjima gumwe’ kapisi gu tu ‘tororokwe tu tjire nonkore detu.’ (Fil. 1:27, 28) Nye ngapi natu kara mepopero mouzuni ou wa tu nyenga?—Joh. 15:17-19.

8. (a) Yisinke adi fanekesa nondundu poyiruwo yimwe moBibeli? (b) Yisinke azi fanekesa “Ndundu zoMauzwe”?

⁸ Mouporofete ou tuna lirongo mo asi “sitata” ndi “Jerusarema zemegeru” kufanekesa Uhompa waKarunga. Yisinke azi fanekesa “Ndundu zoMauzwe” ezi za kara pepi naJerusarema? Ngapi omu ngava zi “gaununa” zi kare nondundu mbali? Morwasinke Jehova a di tumbwire asi ‘nondundu’ dange? (Resa Sakaliya 14:3-5.) MoBibeli, nondundu poyiruwo yimwe kufanekesa mauhompa ndi mapangero. Ntani hena Bibeli kwa tanta asi matungiko nepopero kutundilira kondundu zaKarunga. (Jes. 25:6, 7) Yipo nye, ndundu zomauzwe kwa fanekesa upangeli waJehova koyisitwa yendi nayinye.

9. Yisinke ali tanta egaununo ‘lyondundu zomauzwe’?

⁹ Uporofete kutanta asi ndundu zomauzwe kwa zi gaununa. Yisinke ayi tanta? Ayo kutanta asi Jehova kwa tulisa po uhompa wouvali nositambo sokulikarera. Uhompa ou kwa hamena kwaKarunga ano Jesus Kristusa yige hompa gwawo. Morwa mauhompa nagenye kwa hamena kwaJehova, yipo nye a tumbwire nondundu mbali asi “nondundu” dange.—Sak. 14:4.

10. Yisinke agu fanekesa “muramba gomunene” ogu gwa gaununa nondundu mbali?

¹⁰ Apa ndundu zopasifanekeso va zi gaununa, harufa zimwe zondundu kwa henyena koMuzogo ano ezi nkwawo korwaMbindakano, ano nompadi daJehova kwa kara ponondundu edi nadinye. Egaununo eli lyonondundu kwa tulisa po “muramba gomunene” konompadi daJehova. Muramba musinke ogu? Ago kwa fanekesa epopero lyaKarunga. Ngamoomu tupu vantu ava gwana epopero momuramba gonondundu mbali, yimo hena vakareli vaJehova ava gwana epopero moupangeli wendi nou waMunwendi. Jehova kapi nga pulisira ukareli wousili va u zonagure po. Siruwoke va zi gaununa ndundu zomauzwe? Eyi kwa horokere 1914 apa ga tamekere kupangera Jesus meguru. Uporofete kwa uyunga hena asi vantu vaJehova ngava tjwayukira ‘komuramba gomunene.’ Siruwoke ya tameka kuhoroka oyo?

11, 12. (a) Siruwoke va tamekere vantu vaKarunga kutjwayukira komuramba? (b) Yisinke yina kulikida asi Jehova kupopera vantu vendi?

¹¹ Jesus kwa rondwere vasikuli vendi asi: “One nkenye muhoko ngagu mu nyenga morwedina lyange.” (Mat. 24:9) Nyengo ozo kwa ligwederera unene kutundilira 1914, apa mazuva gopouhura ga varekere. PoYita yoPomuhowo yoUzuni, nonkore kwa hepeka Vakriste wovagwavekwa nye kapi va vhura kuhagekesa ukareli wousili. Momvhura 1919, vantu vaKarunga kwa mangurukire ko koukarelikarunga  woyimpempa, koBabironi zonene. (Ehor. 11:11, 12) * Etjwayukiro komuramba gondundu zaJehova yipo lya tamekere.

¹² Kutundilira 1919 Jehova kwa twikira kupopera vakareli vendi mouzuni mudima. Nomvhura dononzi, mapangero kwa hetekera ko kusilika sirugana sokuzuvhisa soNombangi daJehova noyimbapiratjangwa yawo. Eyi kuna kuhoroka simpe moyirongo yimwe. Nye Jehova kapi ga pulisira mapangero ga zonagure po ukareli wousili. Yi kare asi yisinke naga rugana mapangero, Jehova nga twikira kuruganesa nonkondo dendi mokupopera vantu vendi.—Deut. 11:2.

13. Ngapi natu kara momuramba gwaJehova gwepopero, ntani morwasinke yina karere nomulyo unene ngesi?

¹³ Nsene tu twikira kulimburukwa Jehova ngatu kara momuramba gwepopero lyendi. Jehova naMunwendi kapi ngava pulisira nkenye ogu ndi nkenye eyi yi tu ‘gagunyune mo momawoko gawo.’ (Joh. 10:28, 29) Jehova kutupa evatero eli tuna hepa tu kare valimburukwi koupangeli wendi nou waMunwendi. Ose ngatu hepa evatero lyendi unene po poudigu wounene ou una kara pepi. Ngesi yina kara nomulyo unene asi tu kare momuramba gwaJehova gwepopero.

14, 15. Apa Karunga nga rwisa nonkore dendi, yisinke ngayi horokera ava va kara ponze ‘zomuramba gomunene’ gwepopero?

¹⁴ Ngomu uhura wouzuni una kuhedera pepi, Satana kuna kuhomokera vantu vaKarunga. Ntaantani tupu a homokere vantu vaKarunga rokuhulilira. Mezuva olyo, Jehova nga rwa nokuzonagura po nonkore dovantu vendi nadinye. Alyo ngali kara ‘ezuva lyokurwa’ eli ga pumbire Sakaliya. Yita eyi ngayi likida asi Jehova Mukwayita gononkondo unene.—Sak. 14:3.

¹⁵ Apa Karunga nga rwisa nonkore dendi, yisinke ngayi horokera ava va kara ponze ‘zomuramba gomunene’ gwepopero? Awo ngava kara ‘momundema,’ eyi kutanta asi kapi ngava gwana ehafero lyaKarunga. “Nonkambe nononsino nonongameru noyindongili,” eyi ayi fanekesa yirwiso eyi ava ruganesa moyita ngayi kara ya hana sikwafo. Jehova nga ruganesa hena ‘ehamba lyedona.’ Meho nomaraka gawo “ngaga wora.” Kapi tuna diva nsene asi alyo ehamba lyene-lyene. Nye ose twa yi diva asi awo kapi ngava vhura kutukoresa ndi va rwanese Karunga. (Sak. 14:6, 7, 12, 15) ‘Vahompa navenye vepevhu novakwayita vawo’ ngava hamena kwaSatana. Kapi ngava vhura kuhenduka ezonauko olyo. (Ehor. 19:19-21) “Mezuva olyo yimbu eyi nga dipaga HOMPA, ngayi lihana kutunda kouhura ou wouzuni dogoro koukwawo.”—Jer. 25:32, 33.

16. Mapuro musinke natu lipura nyamwetu, ntani yisinke ngatu hepa kurugana poudigu wounene?

¹⁶ Yita kureta ruhepo kovantu navenye. Nondya kuvhura kusesupa. Kuvhura kuzumbanesa yiweka. Eparu kuvhura kudigopa. Kuvhura tu zumbanese umanguruki ou tuna kara nawo ngesi. Nsene tu ligwanekera nomaudigu gangoso, yisinke natu rugana? Ngatu kara nowoma ndi? Ngatu dompa mutjima nokuzumbanesa ehuguvaro ndi? Ngatu hageka kukarera Jehova ndi? Poudigu wounene, twa  hepa kukara momuramba gwepopero pokulimburukwa Jehova nokuhuguvara asi nga tu popera.—Resa Habakuku 3:17, 18.

17, 18. (a) Yisinke “mema gomawa”? (b)  Yisinke ali fanekesa ‘Efuta lyoKufa nefuta lyoPokatji’? (c) Yisinke tuna tokomene kurugana?

¹⁷ Konyima zoHarumagedoni “mema gomawa” ndi gomwenyo ngaga pupa ga tunde moUhompa waKristusa. “Mema” ogo kwa fanekesa mawapaiko aga ga tulisa po Karunga yipo vantu ngava ka paruke narunye. Mouporofete waSakaliya, ‘Efuta lyoKufa’ kwa fanekesa navenye vana kara montoko, ano ‘efuta lyoPokatji’ kwa fanekesa “emukurumbunga” eli ngali paruka Harumagedoni. (Resa Sakaliya 14:8, 9; Ehor. 7:9-15) Nombunga nadinye ngadi nwa “mema gomawa” ‘momukuro gomema gomwenyo,’ ngoyitundwamo navenye ngava sikilira mo nokuparuka narunye.—Ehor. 22:1, 2.

¹⁸ Apa Jehova nga zonagura po uzuni ou woudona, nga tu popera nokututwara mouzuni wokuhungama woupe. Nampili ngomu vantu navenye va tu nyenga, ose tuna tokomene kulimburukwa koUhompa waKarunga nokukara momuramba gwaJehova gwepopero.