“CREATION DRAMA” kuna kara sidanauka esi va singwenene sinzi sovantu asi “sokudira kudivara.” Aso kwa horokere posiruwo souhunga ntani ava va si tere kapi va si divara. Yosili, “Creation Drama” kwa geve umbangi wounene wokuyererepeka Jehova komeho tupu Hitler a tameke kuhepeka unene vantu vaJehova moEuropa. Yisinke “Creation Drama”?

Mo-1914 mberewa zonene zovantu vaJehova moBrooklyn, New York moAmerika kwa pwagesere “Photo-Drama of Creation.” Alyo kwa kere elikido lyonovili ntantatu lyomafano aga va kwateka nomazwi. Elikido olyo kwa li tere mamiliyona govantu mouzuni mudima. Ruha rorusupi rwelikido olyo oru ava tumbura asi “Eureka Drama” kwa ru pwagesere 1914. Nye koyiha 1920 yiruganeso yelikido olyo kwa zonaukire. Nye vantu wovanzi kwa here kutarera hena elikido olyo. Pasihonena, vatungi womoLudwigsburg moNdovesiranda kwa pulire asi: “Siruwoke ngava likida hena ‘Photo-Drama’?” Yisinke va hepere kurugana?

Mokurugana hena malikido ogo, koyiha yomvhura 1920 vakarelipo vepata lyoBeteli moMagdeburg moNdovesiranda kwa rende yiruganeso nomafano kongesefa zokufanaika zomoParis nomoLeipzig nomoDresden. Mafano ogo kwa ga tulire kumwe nagamwe ‘gomoPhoto-Drama.’

Munazinyetu Erich Frost ogu ga kara noudivi wonomusika, kwa wapaikire nomusika nokuditura kumwe nomafano ogo. Sidanauka kwa si gusire mobuke Creation. Eyi yiyo ewapukururo ‘lyoPhoto-Drama’ va ya li tumbwire asi “Creation Drama.”

Sidanauka sosipe ngasi gusa novili ntantatu ngwendi ‘soPhoto-Drama’ ntani kwa si likidire momaruha nkenye masiku. Aso kwa likidire nombudi domomazuva gesito nokugava ehistoli lyoBibeli ntani kwa likidire asi maukarelikarunga kwa pukisa vantu. Sidanauka “Creation Drama” kwa si likidire moAustria nomoNdovesiranda nomoLuxemburg nomoSwisiranda ntani kovantu wokuuyunga Rundovesi.

Erich Frost kwa fatwilire asi: “Pelikido olyo lyomafano nomazwi, ame kwa korangedere vakaumwe vange, unene po ava ngatu rugana nawo kumwe, va ruganese siruwo sepwizumuko va ze tunda mukweyo zende mukweyo nokuhanesa kovapurakeni nobuke noyimbapiratjangwa yetu. Monkedi zangesi ose kwa hanesere yimbapiratjangwa yoyinzi kupitakana eyi ngatu hanesa tunda embo zende embo.” Johannes Rauthe ogu ga wapaikire  malikido moPoranda nomoCzech Republic, kwa tanta asi vantu wovanzi kwa geve noaderesi dawo yipo va ka va dingure. Noaderesi odo kwa geve mpito zokurugana matengwiropo.

Koyiha 1930, konosala oku ngava likidire “Creation Drama” ngaku zura vantu wovanzi ntani navenye womonodoropa odo ngava uyunga kuhamena Nombangi daJehova. Koyiha 1933 konyara emiliyona limwe lyovantu kwa kere pomalikido aga za tulisire po mberewa zomutayi moNdovesiranda. Käthe Krauss kwa tente asi: “Ose ngatu gendi nokilometa murongo mokukatarera tupu malikido, ngatu gendi monondundu.” Else Billharz kwa uyungire asi: “‘Creation Drama’ kwa ninkisire nge ni tameke kuhara usili.”

Alfred Almendinger kwa tente asi apa ozina va ka tarere sidanauka awo “kwa va hafesere unene yiyo va rende Bibeli nokupapara nkango ‘mundiro gokuhuhura kononzo.’” Morwa nkango ezi kapi va zi gwene moBibeli, yipo va hagekere kuza kongereka nokuyagwana ekuho ngagumwe goNombangi. Erich Frost kwa tente asi: “Vantu wovanzi kwa gwene usili kupitira mokutarera elikido ‘Creation Drama.’”—3 Joh. 1-3.

Ngomu vantu wovanzi ngava tarere “Creation Drama” yimo hena mbunga politika zaNazi nazo za gwene ekwatesoko lyenene moEuropa nokuretesa po maudigu gomanene. Ketamekero 1933 yirugana yoNombangi daJehova moNdovesiranda kwa yi silikire. Kutundilira posiruwo sina dogoro kouhura woyita yauvali youzuni 1945, vakareli vaJehova moEuropa kwa va hepekere unene. Erich Frost kwa kere modorongo nomvhura ntantatu. Apa va mu pwagesere mo konyima yipo ga ka rugene koBeteli zomodoropa zaWiesbaden moNdovesiranda. Ee, omu tupu ya wepe asi sihorokwa “Creation Drama” sokudira kudivara kwa horokere posiruwo souhunga mokukorangeda Vakriste wovanzi ava va ya ligwanekerere nomahepeko moYita yaUvali yoUzuni!—Upungwiro woyininke yanare moNdovesiranda.