1. Morwasinke musingindira na konakonena ndira kuliza nelikwamo komeho a tameke kusinga?

MUSINGINDIRA nkenye apa a liwapaikire kusinga ndira, age kuzikonakona nawa komeho a tameke kusinga. Age kuruganesa elikwamo lyeyi na tara a divilise nawa asi nayinye yina pu kukonakona. Nsene a dira kukonakona ndira, kuvhura a dire kudimburura udigu ou nampo nau retesa po siponga. Nampili vasingi ava va singa nondira nomvhura dononzi va hepa kukonakona nayinye kuliza nelikwamo.

2. NgoVakriste, yisinke twa hepa kukonakona?

² Ngwendi elikwamo eli a ruganesa musingindira, pwa kara elikwamo lyoyininke eli no vhura kukonakona o divilise asi epuro lyoge lina pama nampili moyiruwo yomaudigu. Yi kare asi ntaantani tupu katu gwene ekuho ndi kwa kara mousili nomvhura dononzi, twa hepa kukonakona epuro lyetu. Nsene tu gazara tupu asi epuro lyetu lya pama, posiruwo somaheteko kuvhura tu zumbanese elikwatakano lyetu naJehova. Bibeli kuturondora asi: “Ogu ana kugazara asi age kuna sikama nawa-nawa, a takamese ga ha liganda.”—1 Kol. 10:12.

3. Yisinke Vakriste womoGarata va hepere kurugana?

³ Sizoweseso saJesus kwa vatera Vakriste va dive Karunga monkedi zokulikarera. Vantu ngesi kuvhura kukara vana vaKarunga. Mokukara nelikwatakano olyo, Vakriste womoGarata va hepere kukonakona epuro lyawo. (Gar. 4:9) Pwa kere vamwe mombungakriste ava ngava tanta asi Vakriste kuvahungameka tupu pokupura moVeta zaMosesa. Nye Karunga kapi hena nga ruganesa Veta  ozo, ntani vapagani kapi va kere konhi zoVeta! Vajuda novapagani ava va kere mombungakriste ozo va hepere kukura pampepo. Awo va hepere kukwata egano asi Karunga kapi ga hepere ko kovantu va kwame Veta zaMosesa.

4, 5. Epukururo musinke ga geve Paurusa koVagarata, ntani morwasinke mbilive zendi zina karere nomulyo kwetu?

⁴ Mbilive ezi ga tjangerere mupositoli Paurusa Vagarata kudiworokesa Vakriste navenye va kwaterere kousili ou va lironga moBibeli. Twa ha tengura konkareso zetu zanare. Mbilive ozo kuvhura kutuvatera natuvenye tu kwaterere koulimburukwi wetu.

⁵ Natuvenye twa hepa kudiworoka apa twa tokwere kukarera Jehova. Gazadara ko komapuro aga gavali: To diworoka nontambo edi da ku vaterere o liwapaikire ekuho ndi? To diworoka omu wa ya divire Karunga nomu wa lizuvhire apa ga ku divire ndi?

6. Nontambo musinke natu ka lironga?

⁶ Pwa kara nontambo ntane edi da tu vaterere tu tambure usili. Tara kakende  “Nontambo edi da tu twadesere kekuho nokutwikira kukura pampepo.” Kuvhura tu gazadare nontambo odo ngelikwamo lyoyininke eyi twa hepa kukonakona mokupameka epuro yipo tu dire kutengura konkareso zetu zanare. Ngwendi moomu tupu musingindira a konakona pelikwamo lyendi komeho zokusinga ndira, nose twa hepa kulikonakona nkenye apa.

7. Sihonena musinke twa hepa kukwama, ntani morwasinke?

⁷ Ngamoomu tupu musingindira a konakona pelikwamo lyendi nkenye apa komeho a tameke kusinga, nose twa hepa kutwikira kulikonakona nsene kuna kukura pampepo. Paurusa kwa tjangerere Timoteusa asi: “O kwame sihonena sononkango donongwa edi wa zuvha kwange, ove o kwaterere kepuro nekeharo eli twa kara nalyo momalikwatakano naJesus Kristusa.” (2 Tim. 1:13) ‘Nonkango donongwa’ kwa kwatera mo marongo nagenye gomoNonkango daKarunga. (1 Tim. 6:3) Moomu tupu efaneko lyongandi ali tu pe egano omu ngasi moneka sininke, yimo hena ‘nonkango donongwa’ adi tu vatere tu kwate egano eyi ga hepa ko Jehova kwetu. Tu tarurureni nontambo edi da tu twaredesere kekuho nokulikonakona tu dive nsene kuna kudikwama.

8, 9. (a) Morwasinke natu kulikira ediwo nepuro lyetu? (b) Morwasinke ekuro lyoVakriste lya lifanena nekuro lyositji?

⁸ Ntambo zokuhova, twa hepa kukara nediwo, eli nali twaredesa kepuro. Nye twa hepa kutwikira kukulika ediwo nepuro lyetu. (2 Tes. 1:3) Konyima zekuho, twa hepa kutwikira kunkondopeka elikwatakano lyetu naKarunga.

⁹ Eyi ya lifana nomu asi kuru sitji. Ayo kutetukisa mokumona omu asi repa sitji, unene po nsene nondandani daso dina simbama mevhu. Pasihonena, yitji yimwe yosedeli yaLibanoni kuvhura kusika ponometa 37 moure, ano unene waso kusika ponometa 12. (Rus. 5:15) Pomuhowo sitji kukura usimbu-simbu nye ngomu nondandani daso dina kusimbama mevhu yimo hena edi lyaso nali nenepa nokurepa. Kapi atu vhuru kumona omu asi kuru sitji. Ayo ya lifana nekuro lyopampepo  lyoVakriste. Pomuhowo ose kutura po marunduruko usimbu-simbu apa atu lirongo Bibeli makura tatu gwana ekuho. Womombungakriste kumona omu tuna kutura po marunduruko. Kuvhura tu tameke kurugana uzuvhisi wokukarerera ndi tu gwane yitumbukira mombungakriste. Mwaza siruwo wopeke kuvhura va dire kudimburura omu tuna kukura pampepo. Nye natuvenye twa hepa kukulika ediwo nepuro lyetu dogoro tu ka sike “moukurona wene-wene, ou au tundu kwaKristusa.” (Efe. 4:13) Yipo nye, nsene ose kuna kukura pampepo, ayo kuna fana ngwendi simenogona esi ngasi ka kara emutji lyemunene.

10. Morwasinke Vakriste nava twikilira kukura pampepo nampili nare va kara mousili?

¹⁰ Ekuro lyopampepo kapi ali haga. Ediwo nepuro lyetu kwa fana ngwendi nondandani edi adi sikama ndjikiti. Nondandani odo da hepa kukora. (Yis. 12:3) Sinzi sovanavazinyetu kutwikira kukura monkedi zangoso. Pasihonena, munazinyetugara gumwe ogu ga kara mukuronambunga kupitakana nomvhura 30 kwa tanta asi age simpe kuna kukura pampepo. Ntani kwa tanta asi age ngesi kuna kukwata nawa egano Bibeli kupita pwanare. Age kuna kutwikira kulironga nonkedi donompe omu Bibeli azi vatere vantu va ture po matokoro, ntani nokuhafera unene sirugana sokuzuvhisa.

11. Ngapi omu natu twikira kunkondopeka ukaume wetu naJehova?

¹¹ Nsene tuna hara kukura pampepo, twa hepa kutwikira kuhedera pepi naJehova ngaKaume naGuhyetu. Age kuna hara tu lizuvhe asi ga tu hara, ngwendi moomu a lizuvhu munona apa a kara novakurona ndi ngwendi moomu atu lizuvhu apa atu kara nakaume gwetu gomuwa. Ukaume naJehova kapi ava u tulisa po ezuva limwe, ngomu sina kupita siruwo ose kuyamudiva nokuyadimburura asi age ga tu hara. Yipo nye, ya wapa asi o litulire po siruwo nkenye ezuva sokuresa Bibeli noyifo nonobuke noyimbapiratjangwa yoyipe eyi a tu pe Jehova. Eyi ngayi ku vatera o dive nawa Jehova nokunkondopeka ukaume woge nendi.

12. Yisinke twa hepa kurugana yipo a tu dive Jehova?

 ¹² Makanderero novakaume wovawa kuvhura kutuvatera tu nkondopeke ukaume wetu naKarunga. (Resa Marakiya 3:16.) Jehova “kupurakena nkenye apa makanderero.” (1 Pet. 3:12) Jehova kupurakena apa atu kanderere kwendi, yipo nye twa hepera kutwikira ‘kukanderera nkenye apa.’ (Rom. 12:12) Kapi tatu vhuru kukara kaume kaKarunga pwa hana evatero lyendi. Nsene tu hageka kukanderera kwendi, kapi ngatu nkondopara, makura uzuni ou woudona ngau tu dompesa mutjima. Nye age ga kara neharo lyokutuvatera nsene tu mu hundira. Ove kukanderera kwaJehova ngwendi moomu o uyunga nakaume gokuhuguvara ndi? Wa dimburura hepero zokuwapukurura makanderero goge ndi?—Jer. 16:19.

13. Morwasinke kukara ukaume novapuli vakwetu ya karera nomulyo kekuro lyopampepo?

¹³ Twa hepa kukara pepi nombungakriste yipo tu kare novakaume vaJehova. Age kwa va hara morwa awo ‘kutengura’ ndi kupapara epopero kwendi. (Nah. 1:7) Morwa uzuni una donapa unene, twa hepa kukara nkenye apa novapuli vakwetu. Awo ngava tu korangeda tu ‘lihara-hare nokurugana yirugana yoyiwa.’ (Heb. 10:24, 25) Mokusikisa mo epukururo lyaPaurusa ntudi tu kare nkenye apa novapuli vakwetu. Ntani nokukara nkenye apa komapongo nokulihameka mo mokugava malimbururo.

14. Morwasinke twa hepera kulitezurura nokusiga nkareso zetu zanare?

¹⁴ Komeho tu ya kare Vakriste twa hepere kulitezurura nokusiga nkareso zetu zanare. Elitezururo kapi ali haga. Ngovantu wokudira kusikilira mo, ose kuzona nkenye apa morwa nzo kwa fana ngwendi ezoka eli lya liwapaikira kuhuma nkenye apa. (Rom. 3:9, 10; 6:12-14) Tu kareni tuna vangarara, kapisi tu ncenune maupirankondo getu. Jehova kutufira nkenda nampili ngomu atu kondjo nomaupirankondo getu. (Fil. 2:12; 2 Pet. 3:9) Ruganesa siruwo nononkondo doge mosirugana saJehova ntani nyokera po kukondjera yininke yopanyama. Munazinyetukadi gumwe ogu ga kulira mousili kwa kere noutjirwe asi kapi ta vhuru kuhafesa Jehova. Age kwa lizuvhire asi kapi ta vhuru kuhedera Jehova pepi morwa mapuko gendi. Age kwa tanta asi: “Kapisi morwa kapi na here Jehova nye morwa kapi na mu divire nawa.” Makura yipo ga kanderere kwaKarunga a mu vatere nokutameka kutura po marunduruko. Age kwa tanta hena asi: “Na ya dimbwilire asi Jehova kuna kupitisira nge nokuvatera nge monkedi zeharo ni kohonone po maudigu gange, nokulikida nge eyi na hepa kurugana.”

15. Yisinke ga diva Jesus noGuhwe?

¹⁵ Muengeli gwaKarunga kwa tanterere Peturusa novapositoli vakwawo va ka ‘tantere mbunga nayinye yokuhamena’ mbudi zongwa. (Yirug. 5:19-21) Twa hepa kukonakona elikwamo lyetu lyokuzuvhisa lyankenye sivike yipo tu nkondopeke epuro lyetu. Jesus naJehova va diva epuro eli twa kara nalyo ntani kuhafera eyi atu rugana moyirugana yokuzuvhisa. (Ehor. 2:19) Sirugana sokuzuvhisa sa hepa kukara somulyo meparu lyetu.

16. Morwasinke ya karera nomulyo kugazadara ko keligawo lyoge kwaJehova?

¹⁶ Gazadara ko keligawo lyoge nkenye apa. Elikwatakano lyetu naJehova kuna kara sininke somulyo po unene  esi twa kara naso. Jehova ga yi diva asi natuvenye kwa hamena kombunga zendi. (Resa Jesaya 44:5.) Konakona elikwatakano lyoge naJehova nokuhundira evatero lyendi. Diworoka ezuva lyoge eli wa gwene ekuho. Ekuho lyoge kwa likidire wopeke asi ove wa ligava kwaJehova, ano eli kwa kere etokoro lyomulyo po meparu lyoge.

17. Morwasinke twa hepera elididimiko mokukara pepi naJehova?

¹⁷ Paurusa kwa tanterere Vagarata asi va ha roroka. (Gar. 6:9) Nose twa hepa elididimiko, morwa ngatu ligwanekera nomaudigu. Nye Jehova nga tu vatera. Tu twikireni kuhundira Karunga a tu pe mpepo zendi zokupongoka. Age nga tu vatera tu kare noruhafo nombili nampili momaudigu. (Mat. 7:7-11) Gazadara ko kweyi: Nsene asi Jehova kupakera sinka yidira, ngapi nye ove wa mu hara ntani wa ligava kwendi? (Mat. 10:29-31) Nampili o ligwanekere nomaudigu gomanene, wa ha dwapa ndi o tengure monyima. Ee, matungiko musi twa kara nago morwa Jehova ga tu diva!

18. Navenye ava va diva Karunga, yisinke va hepa kurugana ngesi?

¹⁸ Yi kare asi ntaantani tupu ko gwene ekuho ndi nare, yisinke wa hepa kurugana ngesi? Twikira kudiva nawa Jehova ntani twikira kukura pampepo. Wa ha gazara asi wa diva nawa Karunga ntani kapi ono hepa kuwapukurura elikwatakano lyoge nendi. Nkenye apa tarurura yininke eyi tuna zogere mosirongwa esi yipo ngo vhure kuhedera pepi naGuhyetu geharo naKaume naKarunga gwetu, Jehova.—Resa 2 Vakolinte 13:5, 6.