Yihorokwa eyi yomoBritaniya nayi ka ku vatera o dimburure eyi no dilira kuzumbanesa ehuguvaro. No ka dimburura hena eyi no rugana yipo o vatere owo va dira simpe kutambura usili —Muud. 11:1.

Kukovekeda kuna kara sininke somulyo. Wa hepa kukovekeda kukarera Jehova gelike. (Deut. 10:20) Oyo yiyo ga rugene Georgina. Apa ga tamekere kulironga Bibeli noNombangi daJehova 1970, mugara gwendi Kyriacos kwa handukire. Kyriacos kwa hetekerere ko kuhagekesa po elirongo lyamukadendi nokudira kupulisira Nombangi daJehova membo nokuzuguma yimbapiratjangwa yawo.

Apa Georgina ga varekere kuza komapongo, mugara gwendi kwa handukire unene. Ezuva limwe mugara gwendi kwa zire koSinyanga soUhompa nokukatameka kutanguna. Apa vanavazinyetu va yi dimbwilire asi age kuuyunga nawa Rugereka kupitakana Ruingilisa, munazinyetukadi gumwe yipo ga toonene ngodi munazinyetugara goMugereka gokombungakriste zapeke a ya va vatere. Kyriacos kwa purakenene nawa kwamunazinyetu ogo ano konyima zomakwedi gongandi yipo va tamekere kulironga nage Bibeli. Nye nampili ngoso Kyriacos ga ya hagekere.

Georgina kwa twikilire kuligwanekera nomakwamakwamo ure wonomvhura ntatu. Kyriacos kwa tente asi nga mu zumba nsene nga gwana ekuho. Mezuva lyendi lyokugwana ekuho, Georgina kwa kanderere nononkondo kwaJehova asi mugara gwendi ga ha mu zumba. Apa Nombangi da ya sikire di ya mu piture va ze kosigongi, Kyriacos kwa va tanterere asi: “Piteni tupu komeho. Natu mu kwama netuwa lyetu.” Kyriacos kwa kere poruha rongurangura rosigongi nokutarera mukadendi omu ana kugwana ekuho.

Konyima Kyriacos ga ya hagekere kurwanesa mukadendi, nokutura po marunduruko kanunu-kanunu. Konyima zonomvhura 40, Georgina yipo ga ya mwene mugara gwendi kuna kugwana ekuho! Yisinke ya vaterere Kyriacos? Age kwa tanta asi: “Ame nina hafa asi Georgina kapi ga pulisilire nkenye eyi yi mu hagekese kukarera Jehova.” Georgina kwa tanta asi: “Nampili ngomu nga rwanesa nge mugara gwange, ame kapi na hagekere kukarera Karunga gwange. Ame kwa twikilire kukanderera kwaJehova, ntani kapi na zumbanesere ehuguvaro.”

Nkedi zimwe mokuvatera mulikwali goge kuna kara kutunga po yikara yoSikriste. Mupositoli Peturusa kwa korangedere vakadi woVakriste asi: “Omu limburukwe kovagara veni, asi vamwe mo ava va dira kupura nonkango daKarunga, ngayi va tezwilise po yikara yovakadi vawo, awo va hana kuuyunga.” (1 Pet. 3:1) Christine kwa parukire kuliza nevyukiso eli, nampili ngomu ya mu gusire nomvhura dononzi komeho mugara gwendi a ya tambure usili. Monomvhura 20 edi ga kere Mbangi, mugara gwendi, John, kapi ga pulire mwaKarunga. John kapi ga here kulihameka moukarelikarunga, nye ga ya dimbwilire marunduruko mwamukadendi. John kwa tanta asi: “Ame na yi dimbwilire asi ukareli wamukadange kwa mu reterere ruhafo. Age kwa tungire po nkareso zokuhuguvara, ano eyi kwa vaterere nge moyiruwo youdigu.”

Christine kapi ga sininikire mugara gwendi a tambure ukarelikarunga wendi. John kwa tanta asi: “Christine ga yi dimbwilire kutundilira ketamekero asi ga ha sininika nge kuuyunga name kuhamena ukareli wendi, ano age ga lididimikilire mokusiga nge ni lironge usili posiruwo sanyamwange.” Apa Christine nga mono yirongwa yomoyifo Ruhungu ndi Awake! eyi ga divire asi kuvhura yi koke elituromo lyaJohn, ngwendi yokuhamena unsitwe, age nga yi likida yendi nokutanta asi: “Nina si huguvara asi no yi hafera kuresa sirongwa esi.”

Mwaza siruwo, John ga ya hagekere yirugana nokurugana tupu yirugana yomosikunino. Morwa kwa kere nosiruwo sokugwanena po sokugazadara ko unene komapuro gokuhamena eparu, age ga tamekere kuteda kepuro eli: ‘Vantu kwa wiza po melisinto ndi kwa va ungira nositambo?’ Ezuva limwe, munazinyetugara ogu ga zogerere naJohn kwa pulire asi: “Ngapi kuhamena elirongo lyoBibeli?” John kwa tanta asi: “Morwa na tamekere kupura asi Karunga pweli, yipo na tambwire elirongo.”

Ee, omu tupu ya kara nomulyo asi Christine kapi ga zumbanesere ehuguvaro! Konyima zonomvhura 20, John yipo ga tambwire usili nokugwana ekuho. Ngesi awo kuna kukarera kumwe Jehova nomupampi. John kwa tanta asi: “Yininke yivali ya kokere nge. Ayo kuna kara nkenda neharo lyoNombangi. Nsene wa kwara gumwe goNombangi daJehova, ove ngoso wa kara nomulikwali gokuhuguvara ogu a likida eharo lyosili.” Christine kwa tulire pasirugana  nonkango domwa-1 Peturusa 3:1, ntani ya mu tompoka.

Ngapi kuhamena varongwa woBibeli ava ava zumbanesa eharo lyokulironga morwa konda zongandi? Hompa Saromo kwa tjenge asi: “O kune ngurangura nongurova hena. Nye kapi wa diva asi nayinye ngayi kura nawa ndi yimwe po yiyo ngayi kura hasa, kupitakana yikwawo.” (Muud. 11:6) Poyiruwo yimwe kuvhura kugusa nomvhura ntani usili una kukura momutjima gomuntu. Nye mouhura muntu nga ya dimburura mulyo gokuhedera pepi naKarunga. (Jak. 4:8) Ezuva limwe kuvhura ngayi ku tetukise.

Tarurura Alice, gokoIndia ogu ga dirukira koIngiranda. Momvhura 1974 yipo ga tamekere kulironga Bibeli. Age nga uyunga Ruhindu nye ga here kuwapukurura Ruingilisa rwendi. Elirongo kwa twikilire nomvhura dongandi, ntani Alice poyiruwo yimwe nga zi komapongo gombungakriste zoRuingilisa. Ga yi divire asi eyi ga lirongere kwa kere usili nye kapi ga dimbwilire mulyo gwawo. Age kwa here unene yimaliwa nokuza konopati. Konyima Alice ta ya hageke kulironga.

Konyima zonomvhura 30, Stella ogu nga lirongo naAlice, kwa gwene mbilive kwendi. Azo kwa zi tjenge ngesi: “Nina si huguvara asi no ka yi hafera mokudiva asi murongwa goge goBibeli ogu ngo lirongo nage momvhura 1974 ka gwene ngesi ekuho posigongi somazuva gatatu. Ove kwa ruganena nge sininke somulyo meparu. Ove kwa kunine mbuto zousili mwange nampili ngomu na dilire kuligava kwaKarunga posiruwo sina nye na pungwire mbuto ozo momutjima gwange.”

Yisinke ya horokere? Alice kwa faturura asi age kwa dompere mutjima apa ga fire mugara gwendi 1997. Yipo ga kandererere kwaKarunga. Monominute tupu murongo, Nombangi mbali dokuuyunga Rupunjabi kwa wizire pembo nokumusigira sitratate Ehuguvaro kovafe ava twa hara? Alice kwa lizuvhire asi ekanderero lyendi vana li limburura yipo ga tokwere kupapara Nombangi daJehova. Nye kupi oku ga vhulire kuvagwana? Yipo ga paparere buke zonotelefona zombungakriste zoPunjabi ezi ga mu pere Stella. Alice kwa ka dingwire Sinyanga soUhompa ntani va mu tambwire nawa vanavazinyetu wokuuyunga Rupunjabi. Alice kwa tanta asi: “Na lizuvhire eharo eli va likidire nge ntani ya vaterere nge ni guse po ruguwo rwange.”

Age kwa tamekere kuza komapongo nokulironga Bibeli ntani ga lirongere kuuyunga nokuresa nawa Rupunjabi. Momvhura 2003 yipo ga gwene ekuho. Ano mbilive zendi kwaStella kwa hulisire asi: “Mpandu zonene mokukuna usili mwange nomvhura 29 da ka pita ntani nokutulisa po sihonena sosiwa esi nina kukwama.”

“Mpandu zonene mokukuna usili mwange nomvhura 29 da ka pita ntani nokutulisa po sihonena sosiwa esi nina kukwama.”—Alice

Yisinke no lirongera ko koyihorokwa eyi? Ayo kuvhura kugusa siruwo sosire kupita omu o yi ndindire, nye nsene muntu ga hara kudiva Jehova Karunga nokuhungika ntani ga linunupika, age nga mu vatera yipo usili u kure momutjima gwendi. Diworoka nonkango domosifanekeso saJesus edi asi: “Mbuto kuna kumena tazi kuru, a dive ko nye omu ayi gendi, mpaga. Eyi ayi ninkisa mbuto zi yime, evhu lyene: pomuhowo ruhatji, ntani mutwe, ntani nye momutwe nondanda dene-dene.” (Mar. 4:27, 28) Ekuro olyo kukura kanunu-kanunu nokukura pwalyene. Yosili, vazuvhisi woUhompa navenye kapi va diva omu ali gendi ekuro. Yiyo va hepera kukuna nomupampi. Makura ngava zangure momunene.

Wa ha divara mulyo gwekanderero. Georgina naChristine kwa kovekedere kukanderera kwaJehova. Nsene o ‘kanderera narunye,’ ntani o dire kuzumbanesa ehuguvaro, “ezuva limwe” ngo gwanena mo “nsonso” moyirugana yoge youpampi.—Rom. 12:12; Muud. 11:1.