1-3. Mauwa musinke aga tundu mokuresa Bibeli nokutura pasirugana marongo gazo?

MUNAZINYETUKADI gomukurupe kwa tanta asi: “Ame kupandura Jehova nkenye ngurangura kweyi a vatere nge ni kwate egano Bibeli.” Nampili ngomu ga resa Bibeli yikando yokupitakana 40, age simpe kuna kutwikira kuziresa. Munazinyetukadi gomudinkantu kwa tjanga asi kuresa Bibeli kwa mu vatera a dive nawa Jehova. Ngoyitundwamo, age kwa hedera pepi naGuhwe gemeguru. Age kwa tanta asi: “Ame ngesi nina kara noruhafo rorunene kupitakana pwanare!”

² Mupositoli Peturusa kwa korangedere navenye va “kare nkenye apa nonzara zomasini-sini gopampepo.” (1 Pet. 2:2) Apa atu lirongo Bibeli nokutura pasirugana marongo gazo, ose kukara nezwi lyewa lyokomutjima nositambo meparu. Ayo kutuvatera tu kare nelikwatakano lyewa nava va hara Karunga nokumukarera. Odo kuna kara nokonda donongwa ‘dokupanda unene Veta zaKarunga.’ (Rom. 7:22) Ngapi omu nali tu vatera elirongo lyoBibeli?

³ Moomu ono kulironga kuhamena Jehova naMunwendi, yimo hena eharo lyoge kwawo noku kwava wopeke ngali nkondopara. Ntani hena Bibeli ngazi ku ronga omu Karunga nga ka parura vantu wovahungami apa nga ka zonagura po vadinikarunga. Wa kara nombudi zongwa ezi no tantera wopeke moyirugana yoge yokuzuvhisa. Jehova nga ku tungika ngomu ono kuronga wopeke yininke eyi wa lironga moNonkango dendi.

4. Yisinke ayi tanta ‘kuteda’ ko kweyi ono kuresa moBibeli?

⁴ Jehova kapi ana harere vakareli vendi va rese  Nonkango dendi pangenderera. Age kwa tanterere Josuwa asi: ‘Nonkango edi dobuke ezi zoVeta, walye adi tundu mo mokana koge, nye o di tede mutenya nomasiku.’ (Jos. 1:8; Epis. 1:2) Eyi kutanta nye asi twa hepa kuresa Bibeli nazinye kuziguruka nokuwowota ndi? Hawe. Ayo kutanta asi wa hepa kuresa kuliwora nokugazadara ko kweyi ono kuresa. Nsene o teda ko kweyi ono kuresa moBibeli, ngayi ku vatera o demenene komaruha gomulyo aga ngaga ku korangeda. Nsene ono gwana nonkango ndi sihorokwa sekorangedo, resa kuliwora ndi kuwowota nonkango odo. Makura eyi ono kuresa ngayi kundama mutjima goge. Morwasinke ya karera nomulyo eyi? Morwa apa no kwata egano mapukururo gaKarunga, ove ngo hara kuparuka kuliza nago.

5-7. Gava sihonena omu kuresa Nonkango daKarunga nokuteda ko nayi ku vatera (a) o limburukwe konoveta dendi; (b) o uyunge nombili nava wopeke; (c) o huguvare mwaJehova poyiruwo yomaudigu.

⁵ Apa atu resa nobuke domoBibeli edi atu gazara asi udigu kudikwata egano, ya wapa kudiresa kuliwora yipo tu vhure kugazadara ko kuhamena eyi tuna kuresa. Pasihonena, gazara munazinyetugara gomudinkantu ogu ana kuresa buke zaHoseya. Megaununo 4, konyima zokuresa velise 11 dogoro 13 ta hageke a tede ko. (Resa Hoseya 4:11-13.) Morwasinke? Morwa kuna kuligwanekera neheteko kosure lyokurugana yininke yokunyata. Nye ngomu ana kuteda ko kuhamena novelise odo, age ta liuyungisa mwene asi: ‘Jehova kumona yininke yoyidona eyi ava rugana vantu nampili apa ava kara velike. Kapi nina hara kumuhandukisa.’ Munazinyetugara ta tokora asi nga limburukwa noveta daJehova dokukuhuka.

⁶ Mosihonena sauvali, gazara munazinyetukadi ana kuresa mobuke zaJowera makura ta ya siki megaununo 2 velise 13. (Resa Jowera 2:13.) Velise ezi ta zi mu ninkisa a dimburure asi ga hepa kutemwinina Jehova, ogu ‘a zaverere ntani ga zura nkenda.’ Makura ta tokora kutura po marunduruko morwa poyiruwo yimwe age kuuyungisa mugara gwendi nava wopeke monkedi zokuvakoresa nokuvahandukisa.

⁷ Sautatu, gazara guhya ogu ga zumbanesa yirugana yendi nokukara nosinka sepata lyendi. Ngomu ana kuresa mwaNahumu 1:7, ta resa asi Jehova ‘kufira sinka’ ava ava mu huguvara ‘nokuvapopera pomaruveze gomaudigu.’ Eyi tayi vatere munazinyetu a dimburure asi Jehova ga mu hara kumwe nepata lyendi, ntani ga hepa kuhageka kukara nosinka. Makura ta resa velise 15 nokuteda ko. (Resa Nahumu 1:15.) Munazinyetu ta dimburura asi kuvhura a yi likide asi ga huguvara mwaJehova pokuzuvhisa mbudi zongwa nampili moyiruwo yomaudigu. Ngomu ana kupapara yirugana yoyipe, age na ruganesa siruwo sosinzi moyirugana yokuzuvhisa.

8. Faturura pausupi yimwe eyi wa lironga mereso lyoge lyoBibeli.

⁸ Yihonena yoyiwa tuna zogere kwa tunda monobuke doBibeli edi pamwe ava gazara vamwe asi udigu kudikwata egano. Apa o gwana mo novelise dokukorangeda, ngo hara kuresa buke nazinye. Ado kuvhura kutuhengagwida nokutupa unongo. Nobuke nadinye domoBibeli kuvhura kutuvatera monkedi zokulifana. Nonkango daKarunga kwa fana ngwendi mina ezi za kara noyikawe. Ngomu ono kuresa Bibeli nazinye, twikira kupapara “yikawe” ndi mavyukiso nomakorangedo aga ga kara mo!

9. Yisinke natu rugana yipo tu kwate nawa egano Bibeli?

⁹ Nampili ngomu ya kara nomulyo mokuresa Bibeli nkenye ezuva, wa hepa kudivilisa asi ono kwata egano eyi ono kuresa. Yipo nye, ruganesa nawa yimbapiratjangwa yombunga zaJehova pokulironga kuhamena vantu nomavango noyihorokwa. Nsene kapi ono diva omu no tura pasirugana eyi ono kuresa moBibeli, pura vakuronambunga ndi vanavazinyetu ava va kura pampepo va ku vatere. Mukriste gumwe gomosiruwo sanare kwa hepere evatero lyokukwata nawa egano usili. Edina lyendi Aporo.

10, 11. (a) Ngapi omu Aporo ga gwene evatero mokukara muzuvhisi gomuwa gombudi zongwa? (b) Yisinke natu lirongera ko kosihonena saAporo? (Tara kakende “Ekwatogano lyoge lyousili woBibeli kuna kukura ndi?”

¹⁰ Aporo kwa kere Mukriste goMujuda ogu ga ‘divire matjangwa’ ntani ‘mpepo zendi kwa hwamukire.’ Buke zoYirugana kwa mu simwitira asi: ‘Age kwa hwamukire mokusanseka Jesus, oku ta rongo nawa-nawa yokumuhamena, nye ekuho lyaJohanesa yilyo lyelike ga divire ko.’ Nye Aporo kapi ga yi dimbwilire asi Jesus kwa rongere varongwa vendi yininke yoyipe kuhamena ekuho. Apa va mu zuvhire asi moEfeso ana kara, valikwali woVakriste Pilisikira naAkura tava mu gusa ‘va mu fatwilire nawa-nawa nzira zaKarunga.’ (Yirug. 18:24-26) Ngapi omu eyi ya vaterere Aporo?

¹¹ Konyima zokuzuvhisira moEfeso, Aporo kwa zire koAkaya. “Ga ka sika, ta ka kara ekwafo lyenene lyava va pura, morwankenda zaKarunga. Age kwa dininine po Vajuda nononkango dononkondo moyitarameho yawo, pokuvalikidisisa komatjangwa asi Jesus yige  Kristusa.” (Yirug. 18:27, 28) Apa ga kwete egano ntanto zekuho lyoVakriste, age ga kere “ekwafo lyenene” kwava wovape va kure pampepo. Yisinke natu lirongera ko kweyi? Ose kuvhura kukwama sihonena saAporo sokukondja yipo tu kwate egano eyi tuna kuresa moBibeli. Nye hena twa hepa kulinunupika nokukara neharo lyokutambura nkenye mavyukiso aga atu gwana yipo tu kare varongi wovawa.

12, 13. Ngapi natu ruganesa matjangwa tu vatere varongwa woBibeli va ture po marunduruko?

¹² Ngwendi Pilisikira naAkura naAporo, kuvhura tu vatere wopeke. Apa o vatere muntu a ture po marunduruko meparu lyendi, ngapi omu o lizuvhu? Ndi nsene asi ove mukuronambunga, ngapi omu o lizuvhu apa gumwe a ku pandura kepukururo lyomoBibeli eli wa mu pere apa ga kere nomaudigu? Yosili, ayo kutuhafesa apa atu ruganesa Bibeli tu vatere wopeke va ture po marunduruko meparu lyawo. * Ngapi no yi rugana oyo?

¹³ Momazuva gaEliya, Vaisraeli wovanzi kwa heme kuvali. Mapukururo gaEliya kovantu vena, kuvhura ga vatere murongwa goBibeli ogu ana kudira kutura po marunduruko. (Resa 1 Vahompa 18:21.) Pasihonena, nsene murongwa kuna kara nowoma eyi nava mu gazarera vakaume ndi vekoro lyendi, kuvhura o mu vatere a tokore kukarera Jehova pokuruganesa nonkango domwaJesaya 51:12, 13.—Resa.

14. Yisinke nayi ku vatera o diworoke eyi ya kara moBibeli mokuvatera wopeke?

¹⁴ MoBibeli kwa kara mo magano gomanzi gokuvhura kutukorangeda nokutuvyukisa ndi kutunkondopeka. Nye kuvhura o lipure asi: ‘Ngapi omu nani diva asi matjangwa musinke nina hepa aga nani ruganesa?’ Resa Bibeli nkenye ezuva ntani teda ko kweyi ono kuresa. Monkedi zangoso, ove ngo diva Bibeli ntani Jehova nga ruganesa mpepo zendi zi ku vatere o diworoke eyi ya kara mo.—Mar. 13:11; resa Johanesa 14:26.

15. Yisinke ngayi ku vatera o kwate nawa egano Bibeli?

¹⁵ Ngwendi hompa Saromo, hundira unongo kwaJehova yipo o sikise mo sirugana sokuzuvhisa nesi somombungakriste. (2 Hist. 1:7-10) Ngwendi vaporofete, ‘papara ntani konakona’ nawa Nonkango daKarunga, ano eyi ngayi ku vatera o dive usili kuhamena Jehova nompango zendi. (1 Pet. 1:10-12) Mupositoli Paurusa kwa korangedere Timoteusa a “lirere nononkango depuro nerongo lyewa.” (1 Tim. 4:6) Nsene o twikira kulironga Bibeli, ngo zi kwata nawa egano ntani ngo diva kuziruganesa mokuvatera wopeke. Ntani hena epuro lyoge ngali pama.

16. (a) Ngapi omu Vabereya va gwanene mo uwa ‘mokukonakona nkenye ezuva matjangwa’? (b) Morwasinke ya karera nomulyo kuresa Bibeli nkenye ezuva?

¹⁶ Vajuda ava va tungire moBereya ngava “konakona nkenye ezuva matjangwa.” Apa Paurusa ga zuvhisilire mbudi zongwa koVajuda owo, awo kwa hetakanesere nonkango dendi nediwo lyawo lyomoMatjangwa. Wovanzi kwa yi dimbwilire asi age kuna kuronga usili makura “tava kara vapuli.” (Yirug. 17:10-12) Eyi kulikida asi kuresa nkenye apa Bibeli  kutunga po epuro lyokupama mwaJehova. Epuro lyangoso “yilyo ehuguvaro lya pama lyoyininke eyi twa ndindira,” alyo mulyo nsene tuna hara kukaparuka mouzuni woupe waKarunga.—Heb. 11:1.

17, 18. (a) Ngapi omu epuro lyokupama neharo nayi popera mutjima goMukriste gopasifanekeso? (b) Ngapi omu ehuguvaro nali tu popera?

¹⁷ Paurusa kwa tjenge asi: “Ose ava twa hamena komutenya, atu nyokeni unkorwe. Epuro neharo tu yi rukiseni silikandwiso setu, ano ehuguvaro lyeparu tu li rukiseni ekoli lyetu.” (1 Tes. 5:8) Mukwayita nga dwara silikandwiso ponturo a popere mutjima gwendi kononkore. Mutjima gwetu gopasifanekeso nago gwa hepa epopero. Apa Mukriste a tungu po epuro lyokupama momatumbwidiro gaKarunga nokukara neharo lyenene kwendi noku kwava wopeke, age kupopera mutjima gwendi gopasifanekeso. Age nga rugana paapa ga hulira mokukara meharo lyaKarunga.

¹⁸ Paurusa kwa tumbwire hena ekoli asi “ehuguvaro lyeparu.” Vakwayita womosiruwo sanare ngava ruganesa ekoli va popere nomutwe dawo. Nsene tu tunga po ehuguvaro lyokupama mwaJehova, alyo ngali popera magazaro getu. Ehuguvaro lyetu lyokupama ngali tu vatera tu nyokere po varwanesi usili ‘nononzogera dawo donondona doyikavauka.’ (2 Tim. 2:16-19) Ehuguvaro lyetu ngali tu nkondopeka hena tu nyokere po nkareso zondona.

19, 20. Morwasinke natu fumadekera Nonkango daKarunga, ntani ngapi omu natu yi likida asi twa di hara? (Tara kakende “Jehova kuna kupa nge eyi na hepa.”)

¹⁹ Ngomu tuna kuhedera pepi nouhura wouzuni, twa hepa kuhuguvara unene moNonkango daJehova. Mapukururo aga atu gwana mo kutuvatera tu nyokere po nomukaro donondona ntani tu rwanese madowo getu gononzo. Ago kutuhengagwida nokutukorangeda tu lididimikire nkenye eheteko ana kuturetera Satana nouzuni wendi. Mavyukiso gomoNonkango daJehova kutuvatera tu kare monzira zeparu.

²⁰ Diworoka asi mpango zaKarunga kuna kara asi ‘vantu navenye va ka paruke.’ Vakareli vaJehova kuna kara nawo mokatji ‘kovantu navenye’ owo. Ntani nava atu vatere kupitira mosirugana setu sokuzuvhisa nesi sokuronga. Nye navenye ava vana hara kukaparuka va hepa ‘kukasika kediwo lyousili.’ (1 Tim. 2:4) Twa hepa kuresa Bibeli nokutura pasirugana mavyukiso gazo nsene tuna hara kukaparuka. Nsene tu resa Bibeli nkenye ezuva tayi likida asi twa hara Nonkango daJehova.—Joh. 17:17.