1, 2. Uporofete musinke wokuhamena mazuva gopouhura ou va lipulire varongwa, ntani morwasinke?

JESUS kwa tanterere varongwa vendi asi ntembeli ngava zi zonagura po. Nonkango odo kwa pere sinka Peturusa naJakopo naJohanesa naAndiliyasa. (Mar. 13:1-4) Makura apa va kere velike naJesus yipo va mu pulire asi: “Tu tantera asi, ezuvake ngayi horoka yene eyi? Sidiviso sewizo lyoge nesi souhura wouzuni sipi so?” (Mat. 24:1-3) Melimbururo, Jesus kapi tupu ga va tanterere yininke eyi ngayi horoka komeho va ka zonagure po Jerusarema nye hena noyininke eyi ngayi horoka momazuva gopouhura wouzuni waSatana. Jesus kwa pumbire yininke yokutjilisa, ngwendi yita nerumbu nevhuko lyoudona. Nye Jesus ga pumbire hena sininke simwe sosiwa. Age kwa tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mat. 24:7-14.

² Varongwa vaJesus kwa hefe mokuzuvhisa mbudi zongwa zoUhompa kumwe nendi. (Ruk. 8:1; 9:1, 2) Awo nampo kwa diworokere eyi ga va tanterere asi: “Muzangu munzi, nye varugani vasesu. Kanderereni nye Hompa gomuzangu, a tume varugani momuzangu gwendi.” (Ruk. 10:2) Nye nampo va lipulire asi: ‘Ngapi omu natu “divisa mwa za uzuni mudima” ntani tu gave ‘umbangi konomuhoko nadinye’? Kupi oku ngava tunda varugani? Varongwa va yi divire asi nonkango edi domwaMateusa 24:14 ngadi sika mo.

3. Ngapi omu etjangwa lyaRukasa 21:34 lina kusikilira mo naina, ntani yisinke twa hepa kulipura?

³ Uporofete waJesus kuna kusikilira mo mosiruwo  setu. Mamiliyona govantu kuna kuzuvhisa mbudi zongwa zoUhompa evhu nalinye. (Jes. 60:22) Nye Jesus ga yi likidire asi kwavamwe ngayi kara udigu kwawo kutura muhowo sirugana sokuzuvhisa meparu lyawo. Awo ngava litura mo unene moyininke yapeke ‘nokulizumbilira’ mwayo. (Resa Rukasa 21:34.) Nonkango odo daJesus kuna kara nomulyo kwetu naina, morwa vantu vamwe vaKarunga kapi vana kutura muhowo yininke yomulyo po. Ose kuyimona eyi apa ava tura po matokoro kuhamena yirugana ndi elirongo lyokuzeruka ndi yininke yopanyama, ano vantu kuruganesa siruwo sosinzi momaudano ndi moyilihafeso. Vamwe kapi vana kulitura mo unene mosirugana saKarunga ngwendi moomu ngava yi rugana nare morwa yinka yankenye ezuva. Lipura asi: ‘Ame ngapi? Kuna kutura muhowo mpango zaKarunga meparu lyange ndi?’

4. (a) Yisinke Paurusa ga kandererere kuhamena Vakriste womoFilipi, ntani morwasinke? (b) Yisinke natu ka zogera mosirongwa esi nesi sokukwama ko, ntani ngapi nayi tu vatera yirongwa eyi?

⁴ Vakriste womosiruwo sina va hepere kurugana unene mokutura sirugana saKarunga muhowo meparu lyawo. Eyi yiyo mupositoli Paurusa ga kandererere asi womoFilipi va ‘horowore yoyiwa’ ndi yomulyo po. (Resa Vafilipi 1:9-11.) Ngwendi mupositoli Paurusa, sinzi soVakriste ‘va kara nomupampi mokuuyunga nonkango daKarunga va hana woma.’ (Fil. 1:12-14) Mokulifana, sinzi setu naina twa kara nomupampi mokuzuvhisa Nonkango daKarunga. Nye simpe ayo kutukorangeda pokuzogera mosirongwa esi omu Jehova ana kuruganesa mbunga zendi zi sikise mo nonkango domwaMateusa 24:14. Eyi ngayi tu vatera unene tu kare nomupampi mosirugana sokuzuvhisa. Yisinke zina kurugana mbunga zaJehova, ntani ngapi nayi tu tumangeda eyi kumwe nomapata getu? Mosirongwa sokukwama ko, ngatu ka zogera eyi ngayi tu vatera tu lididimikire mosirugana saKarunga nokukwama epitisiro lyombunga zendi.

5, 6. (a) Morwasinke Jehova a tanterere vakareli vendi kweyi yina kuhoroka meguru? (b) Yisinke ga mwene Hesekiyeli memoneko?

⁵ Pwa kara yininke yoyinzi eyi ga dira kutura Jehova moBibeli. Pasihonena, age kapi ga tu pa mauzera kuhamena omu au rugana uruvi wovantu ndi omu wa kara uzuni. Nampili ngoso, Jehova ga tu pa mauzera aga twa hepa yipo tu vhure kukwata egano mpango zendi nokumulimburukwa. (2 Tim. 3:16, 17) Ayo kuhafesa pokudiva asi Jehova ga tu tantera kuhamena ruha rwemeguru rombunga zendi. Ayo kutukorangeda pokuresa mauzera ogo mobuke zaJesaya nezi zaHesekiyeli nezi zaNdaniyera nezi zEhororo. (Jes. 6:1-4; Hes. 1:4-14, 22-24; Ndan. 7:9-14; Ehor. 4:1-11) Morwasinke Jehova ga tu pulisilira tu dive kuhamena yininke yimwe eyi ayi horoka meguru?

⁶ Jehova kuna tu harere tu diworoke nkenye apa asi ose ruha rombunga zendi mouzuni mudima. Ruha rwemeguru rombunga zaJehova kurugana unene mokusikisa mo mpango zendi. Pasihonena, Hesekiyeli kwa mwene emoneko lyetemba lyenene eli ali fanekesa ruha rwemeguru rombunga zaJehova. Etemba olyo kwa gendererere kugenda li vyuke koruha rongandi. (Hes. 1:15-21) Ntani hena ga mwene Musingi getemba. Hesekiyeli kwa tanta asi:  “Rupe rokufana ngwendi ngoporo zokuvembera zina kara mokatji komundiro. . . Kwa kere uzera wokuvaima ou wa likidire ekaropo lyaHOMPA.” (Hes. 1:25-28) Omu tupu ga tetukire Hesekiyeli mokumona emoneko olyo! Age ga mwene asi Jehova yige ana kugendesa mbunga zendi pokuruganesa mpepo zendi zokupongoka. Omu ali gendi etemba lyememoneko kulikida omu aru rugana ruha rwemeguru rombunga zaJehova.

7. Ngapi omu emoneko eli ga mwene Ndaniyera nali tu pa ehuguvaro?

⁷ Ndaniyera nage kwa mwene emoneko eli nali tu pa ehuguvaro. Age kwa mwene Jehova, “ogu ga kererera po,” ana hingire posipundi sendi souhompa somakoso gomundiro. (Ndan. 7:9) Jehova kwa here Ndaniyera a mone omu azi gendi mbunga zendi mokusikisa mo sitambo sendi. Ndaniyera kwa mwene hena “yuma yokufana ngwendi muntu,” Jesus ogu va pere nonkondo dokugendesa ruha rwepevhu rombunga zaJehova. Upangeli waJesus wokupangera vantu kapisi wonomvhura tupu dononsesu. Nye, “epangero lyendi ngali karerera, ano untungi wendi kapi ngau haga po.” (Ndan. 7:13, 14) Emoneko eli kututumangeda tu huguvare mwaJehova nokudimburura eyi ana kusikisa mo ngesi. Morwa Jesus kwa gwana nonkondo kwaJehova, emoneko eli kututumangeda hena tu huguvare mwaJesus ngoMupitisili gwetu.

8. Ngapi omu mamoneko ga kundamene Hesekiyeli naJesaya, ntani ngapi omu naga tu kundama?

⁸ Ngapi omu mamoneko gokuhamena  ruha rwemeguru rombunga zaJehova naga tu kundama? Ngwendi Hesekiyeli, ose kututetukisa unene eyi ana kurugana Jehova. (Hes. 1:28) Kuteda ko kombunga zaJehova kuvhura kututumangeda tu rugane ko yuma, ngwendi Jesaya. Apa ga gwene mpito zokutantera ko vantu kuhamena eyi ana kurugana Jehova, kapi ga likata-katere kuyisikisa mo. (Resa Jesaya 6:5, 8.) Nevatero lyaJehova, Jesaya ga yi divire asi kwato yokumuhagekesa mokurugana sirugana sendi ngomuporofete. Ngwendi Jesaya, ose kututumangeda tu kwatese ko mbunga zaJehova pokurugana unene mosirugana sendi. Ayo kukorangeda pokudiva asi ose ruha rombunga ezi azi rugana nkenye apa mpango zaJehova!

9, 10. Morwasinke pwa karera ruha rwepevhu rombunga zaJehova?

⁹ Kupitira mwaMunwendi, Jehova kwa tulisa po ruha rwepevhu rombunga zendi oru aru ruganene kumwe noru rwemeguru. Eyi yiyo ya hepa po mokusikisa mo sirugana esi va pumba mwaMateusa 24:14. Morwasinke? Tu zogereni nokonda ntatu.

¹⁰ Zokuhova, Jesus kwa tanterere varongwa vendi va zuvhise “dogoro nokooku wa ka twa uzuni.” (Yirug. 1:8) Zauvali, ava ava rugana sirugana sokuzuvhisa va hepa mavyukiso nomakorangedo gomoBibeli. (Joh. 21:15-17) Zautatu, awo va hepa mapongo oku nava vhura kupongera mokukakarera Jehova nokulironga omu nava zuvhisa. (Heb. 10:24, 25) Nayinye eyi mokuyisikisa mo, varongwa vaJesus va hepa ewapaiko lyewa.

11. Ngapi omu natu kwatesa ko mbunga zaJehova?

¹¹ Ngapi omu natu kwatesa ko mbunga zaJehova? Nkedi zimwe zomulyo kuna kara pokuhuguvara vanavazinyetu wovagara ava ava pitisire mosirugana sokuzuvhisa, morwa Jehova naJesus kwa va huguvara. Vanavazinyetu owo ngano kuvhura va ruganese siruwo nononkondo dawo va hetekere ko kukohonona po maudigu gomouzuni ou, nye kapi vana kuyirugana oyo. Ngesi tu zogereni kweyi runa kurugana ruha rwepevhu rombunga zaJehova.

12, 13. Ngapi omu vakuronambunga ava sikisa mo sirugana sawo, ntani morwasinke ayi tu korangedere eyi?

¹² Mouzuni mudima, vakuronambunga ava va kura pampepo kwa va pa situmbukira sokugendesa nokupitisira sirugana sokuzuvhisa moyirongo eyi va kara. Ngapi ava yi rugana oyo? Vagara owo, apa ava tura po matokoro, awo kupapara mavyukiso moBibeli pokuzipulisira zi kare ‘uzera wokuvapitisira nouzera womonzira zawo,’ ntani nokuhundira evyukiso lyaJehova kupitira mekanderero.—Epis. 119:105; Mat. 7:7, 8.

¹³ Ngwendi vakuronambunga womosiruwo sina, naina vakuronambunga ava ava gendesa sirugana sokuzuvhisa kulitura mo unene ‘mokuudisa nonkango daKarunga.’ (Yirug. 6:4) Ayo kuvahafesa pokumona ezokomeho lyosirugana sokuzuvhisa lyomosirongo sawo nomouzuni naunye. (Yirug. 21:19, 20) Awo kapi ava tura po noveta nonongendeseso dononzi, nye kukwama evyukiso lyomoBibeli neli lyompepo  zokupongoka mokutura po mawapaiko yipo sirugana sokuzuvhisa si ze komeho. (Resa Yirugana 15:28.) Mokurugana ngoso, vanavazinyetu owo kutura po sihonena sosiwa kwanavenye womonombungakriste dawo.—Efe. 4:11, 12.

14, 15. (a) Yisinke vana kurugana mokutuvatera tu zuvhise mbudi zongwa mouzuni mudima? (b) Ngapi omu atu lizuvhu kuhamena kukwatesa ko sirugana sokuzuvhisa?

¹⁴ Vanavazinyetu wovanzi kuna kurugana nkenye ezuva va wapaike yimbapiratjangwa nomapongo noyigongi. Pasihonena, mayovi govalizambeli kurugana unene va toroke yimbapiratjangwa momaraka gokupitakana 600. Ngoyitundwamo, vantu wovanzi kuna kulironga “yirugana yoyinene yaKarunga” momaraka gavene. (Yirug. 2:7-11) Vanavazinyetu wovadinkantu kurugana komahina gomanene aga aga nduruka nokurameka kumwe yimbapiratjangwa. Makura yimbapiratjangwa oyo kuyituma konombungakriste nampili komavango gokoure.

¹⁵ Nampili monomukunda detu, wovanzi kuna kurugana sirugana esi sina kutuvatera tu demenene mokuzuvhisa mbudi zongwa. Pasihonena, mayovi govalizambeli kuvatera mokutunga Yinyanga yoyipe yoUhompa neyi yoYigongi. Vamwe kuvatera ava ayi kundama yimpangwa nouhaku wopangenderera. Vamwe kurongikida yigongi ano vamwe kuronga nosikora doBibeli. Sitambo musinke soyirugana nayinye eyi? Ayo kuyiruganena va tu vatere tu zuvhise mbudi zongwa, nokutura po ezokomeho nokuvatera vantu wovanzi va ya kare vakareli vaJehova. Ruha rwepevhu rombunga zaJehova kutura muhowo yininke yomulyo po!

16. Mapaparo musinke no rugana poukareli wepata ndi pelirongo lyanyamoge?

¹⁶ Ose poyiruwo yimwe kulitulira po siruwo sokugazadara ko kuhamena eyi azi rugana mbunga zaJehova ndi? Ove kuvhura kurugana mapaparo moukareli weni wepata ndi pelirongo lyanyamoge kuhamena mbunga zaJehova nokuteda ko kweyi ono lirongo. Pasihonena, ayo nayi ku tetukisa mokukalironga mamoneko aga ga mwene Jesaya naHesekiyeli naNdaniyera ntani naJohanesa. Buke Jehovah’s Witnesses—Proclaimers of God’s Kingdom ntani noyimbapiratjangwa ndi nodividi nayo kugava mauzera gomanzi kuhamena mbunga zaKarunga.

17, 18. (a) Ngapi omu sina ku vatere sirongwa esi? (b) Mapuro musinke no lipura?

¹⁷ Ayo ya wapa kwetu tu tede ko omu Jehova ana kuruganesa mbunga zendi mokukwatesa ko sirugana sokuzuvhisa. Ngwendi mbunga ezi, ngano tu ture muhowo yininke yomulyo po meparu lyetu. Mokurugana ngoso, ngatu lizuvha ngwendi Paurusa ogu ga tjenge asi: ‘Karunga kwa tu pa sirugana esi monkenda zendi, yiyo nye natu dilira kudompa nomutjima.’ (2 Kol. 4:1) Age hena kwa korangedere vapuli vakwawo asi: “Walye atu rorokeni kurugana uwa, yeeyi nsene tu dira kudwapa, ngano ngatu ka sika ko komuzangu.”—Gar. 6:9.

¹⁸ Ove nepata lyoge mwa hepa kutura po marunduruko gongandi yipo mu ture muhowo yininke yomulyo po meparu ndi? Kuvhura o rerupike eparu lyoge yipo o rugane unene mosirugana sokuzuvhisa ndi? Mosirongwa sokukwama ko, ngatu ka zogera yininke yitano eyi nayi tu vatera tu kwame sihonena sombunga zaJehova nokukara nomupampi mosirugana sendi.