AYO kuhafesa pokumona asi vadinkantu wovanzi woNombangi kuna kurerupika eparu lyawo yipo va tamunune sirugana sawo sokuzuvhisa. (Mat. 6:22) Marunduruko musinke ava tura po? Yilimbikiso musinke ava ligwanekere nayo? Mokuyidiva oyo, tanko tu ka zogere vamwe ava vana kuzuvhisira ngesi moMeksiko.

Dustin naJassa ava va tungire moAmerika kwa likwere mwaMurongagona 2007. Konyima tupu zononkwara dawo, awo kwa rende sikepagona nokutunga mo mvhura zimwe. Sikepa sawo kwa kere pepi nomukunda gwaAstoria ogu gwa kara nonondundugona edi adi zura yiterengenze modoropa zaOregon moAmerika, pepi tupu nefuta lyaPacific. Dustin kwa tanta asi: “Nkenye tupu oku no tara, emoneko lyazo kutetukisa!” Valikwali kwa lizuvhire asi kwa rerupikire eparu lyawo, nokuhuguvara mwaJehova. Awo kwa tanta asi: ‘Ose kwa tungire mosikepa sonometa ntantatu, nokurugana yirugana yokaruwogona nokuza kombungakriste zeraka lyapeke, ano poyiruwo noyiruwo ngatu rugana uzuvhisi wokuvatera.’ Konyima, va ya yi dimbwilire asi awo kuna kulikumbagera tupu vene. Dustin kwa tanta asi: “Mevango lyokukwatesa ko mbungakriste, siruwo nasinye ose ngatu wapaike tupu sikepa setu. Twa ya yi dimbwilire asi  nsene tuna hara kutura Jehova muhowo meparu lyetu, twa hepere kutura po marunduruko.”

Jassa kwa gwederera ko asi: “Komeho tu ka likware, ame kwa tungire moMeksiko, kwa kere mombungakriste zoRuingilisa. Ame kwa haferere moMeksiko, ntani na kere neharo lyokutengura.” Mokunkondopeka eharo lyawo lyokukazuvhisira kosirongo sokoure, Dustin naJassa poukareli wepata kwa tamekere kuresa yihorokwa yemeparu yovanavazinyawo ava va dirukilire koyirongo oku kwa fililire etezo. (Joh. 4:35) Dustin kwa tanta asi: “Nose twa here kukara noruhafo rwangoso.” Apa va zuvhire kovakaume vawo womoMeksiko asi mbunga zompe zina hepa evatero, Dustin naJassa yipo va gazadarere ko unene. Awo kwa hagekere yirugana yawo nokurandesa sikepagona sawo, makura tava dirukire koMeksiko.

Dustin naJassa kwa kara modoropa zaTecomán, pepi tupu nefuta lyaPacific nye ure wonokilometa 4 300 korwaMbindakano zaAstoria. Dustin kwa tanta asi: “Mevango lyokuzuvha mpepo zontenda nokumona nondundu, ose kuzuvha upyu ntani nokumona tupu yitji yoyitorone.” Pomuhowo, awo kapi va gwene yirugana. Morwa kwato yimaliwa, awo ngava li tupu roso nomakunde ruvali mezuva. Jassa kwa tanta asi: “Tupu twa kere asi kwato yokulya, varongwa vetu woBibeli yipo va tamekere kutupa ko yimango nomabanana nomaputji ano nondjato detu ngadi zura yitorone!” Mwaza siruwo, valikwali kwa ya gwene yirugana koInterneta. Yimaliwa eyi ava gwana mosirugana oso yiyo ava lireresa.

Ngapi omu ana kulizuvha Dustin naJassa kuhamena mparukiso zawo zompe? Awo kwa tanta asi: “Ediruko eli kuna kara sininke sosiwa esi twa dira kumona rumwe. Elikwatakano lyetu naJehova nanyamwetu kwa nkondopara kupitakana omu twa yi ndindilire. Nkenye ezuva ose kurugana kumwe yininke yoyinzi ngwendi kuza moyirugana yokuzuvhisa nokuzogera omu natu vatera varongwa vetu woBibeli nokuliwapaikira yokomapongo. Ntani hena, ngesi tuna manguruka koyinka eyi twa kere nayo.” Awo kwa gwederera ko asi: “Ose ngesi tuna diva eyi twa dilire kukwata egano pwanare, usili ou wa kara mEpisarome 34:8 asi: ‘Hetekeni mu tare asi HOMPA ngapi omu ga wapa!’”

Vanavazinyetu wokupitakana 2 900, va kare asi wokukwara ndi wovadike, kwa diruka nokuzuvhisira monomukunda daMeksiko omu vana hepa vazuvhisi woUhompa. Morwasinke Nombangi nadinye odo adi ruganene sirugana soudigu ngoso? Sinzi sawo apa va va pulire epuro lyangoso, awo kwa geve nokonda ntatu dononene. Nokonda musinke odo?

 Kulikida eharo kwaJehova nokovapuli vakwawo. Leticia kwa mu kuhwire nonomvhura 18. Age kwa tanta asi: “Apa na ligeve kwaJehova, na yi kwete egano asi na hepa kumukarera nomutjima nomwenyo gwange nagunye. Mokulikida eharo lyange lyokuhara Jehova nomutjima nagunye, ame kwa here kuruganesa siruwo nononkondo dange mosirugana sendi.” (Mar. 12:30) Hermilo, ogu ngesi ga kwara Leticia, age kwa kere nonomvhura 20 apa ga dirukire a ka zuvhisire oku va hepere vazuvhisi woUhompa. Age kwa tanta asi: “Ame na yi dimbwilire asi kuvatera vantu va dive usili, azo nkedi zongwa zokulikida eharo lyange kovakwetu.” (Mar. 12:31) Yipo ga sigire sitata saMonterrey oku nga rugana mombanga nokuhafera eparu lyewa, makura ta dirukire kodoropagona.

Kulimonena ruhafo rwene-rwene rokukarerera. Konyima tupu zekuho lyendi, Leticia kwa lipakererere namunazinyetukadi gomuzuvhisi gokukarerera va ka zuvhisilire kodoropa za likarera zelike kwedi kumwe. Leticia kwa tanta asi: “Ame kwa ka tetukire. Ayo kwa reterere nge ruhafo mokumona omu vantu vana kutambura mbudi zoUhompa ezi ngatu va zuvhisire. Kehagero lyokwedi oko, ame kwa litanterere nyamwange asi: ‘Eyi yiyo nina hara kurugana meparu lyange!’” Mokulifana, Essly, munazinyetukadi gomudike ogu ana kara ngesi koyiha yonomvhura 20, ruhafo oru ga mwene yiro rwa mu ninkisire a hare kuzuvhisira oku vana hepa vazuvhisi. Apa ga kere mosure, age kwa ligwene noNombangi doupampi dokulisiga-siga edi ngadi zuvhisire oku va hepere vazuvhisi. Age kwa tanta asi: “Mokumona ruhafo rovanavazinyetu owo, kwa tumangedere nge name ni hare kuparuka ngwendi yiwo.” Ngwendi Essly, vanavazinyetukadi wovanzi va yi limonena oyo. MoMeksiko, vanavazinyetukadi wovadike wokupitakana 680 kuzuvhisira oku kuna hepa vazuvhisi. Ee, sihonena musi kouwa esi va hepa kukwama vadinkantu novakurona!

Kuparuka eparu lyewa lyoruhafo. Apa ga mene sure, Essly kwa mu pere yimaliwa yokukatwikira nelirongo lyokounivesiti. Vakwawo womapupi gendi kwa mu korangedere a yi tambure nokukondjera eparu lyewa, ngwendi kugwana diploma noyirugana netuwa. Nye age kapi ga kweme mapukururo gawo. Essly kwa tanta asi: “Ame na yi nongwenene asi vakaume vange woVakriste wovanzi ava va kondjerere yininke yangoso va hageka kudemenena koyitambo yawo yopampepo. Ntani na yi mwene asi awo kwa ya nyegenyene komaudigu aga ngava ligwanekere nago ngomu va lihamekere mo unene moyitambo yomouzuni ou. Ame kwa litulira po sitambo sokukarera Jehova moudinkantu wange.”

Essly kwa zire kosure zedeuro lyopokaruwogona eli lya mu vaterere a gwane yirugana yipo a lirere mwene  mouzuvhisi wokukarerera, makura yipo ga dirukilire komukunda oku kuna hepa vazuvhisi woUhompa. Ntani hena ga lirongere maraka aga ava uyunga Vaotomi noVatlapaneko. Monomvhura ntatu edi nga zuvhisire monomukunda dokoure, age kwa tanta asi: “Kuzuvhisira oku kuna hepa vazuvhisi kwa retera nge ruhafo ntani kwa vatera nge meparu. Nye unene po kwa nkondopeka elikwatakano lyange naJehova.” Phillip naRacquel, valikwali wokoyiha yonomvhura 30 wokoAmerika, nawo va yi kwatesa ko oyo. Awo kwa tanta asi: “Uzuni kuna kurunduruka makura vantu wovanzi kulizuvha asi eparu lyawo kuna kurunduruka. Nye kuzuvhisira oku natu gwana vantu wovanzi vana kupurakena mbudi zongwa kuturetera ruhafo!”

Kukazuvhisira oku vana hepa vazuvhisi woUhompa kwa hamena mo maudigu. Udigu umwe kuna kara omu no gwana yimaliwa yokulivateresa. Mokukutompoka oyo, wa hepa kurundurura ukaro woge kuliza noku ono kukazuvhisira. Verónica muzuvhisi gokukarerera, kwa faturura asi: “Momukunda gumwe omu ngani zuvhisire, ame kuwapaika nondya nokukadirandesa. Ano momukunda gumwe hena, ame ngani randesa yikoverero nokukurura nohuki. Ngesi ame kurugana yirugana yokuzeresa nokuronga vareti wovape omu nava uyunga kumwe novana vawo.”

Kutambura mpo zapeke kuvhura kukara udigu, unene po nsene ove kwa tunga mokatji kovantu worudi rwapeke. Eyi yiyo ya horokerere Phillip naRacquel apa ngava zuvhisire momukunda omu ava uyunga Runahuatili. Phillip kwa tanta asi: “Nompo kwa lisigire unene.” Yisinke ya va vaterere va ture po marunduruko? “Ose kwa demenene koyininke yoyiwa eyi ngatu mono kovantu woVanahuatili, ngwendi elikwatakano lyawo nomapata gawo, neharo eli ava likida monkedi omu ava ruganene kumwe, ntani nougavi wawo.” Racquel kwa gwederera ko asi: “Ose twa lironga yoyinzi nokuruganena kumwe novanavazinyetu worudi oro.”

Nsene ono hara kukazuvhisira konomukunda dokoure oku kuna hepa vazuvhisi, yisinke no vhura kurugana ngesi mokuliwapaikira? Vanavazinyetu ava va limonena sirugana sangesi kwa tanta asi: Komeho o diruke, rerupika eparu lyoge ntani liyikisa kukara neyi wa kara nayo. (Fil. 4:11, 12) Yisinke hena wa hepa kurugana? Leticia kwa tanta asi: “Ame na nyokerere po yirugana eyi nkare yi ninkisire nge ni kare tupu pevango limwe. Morwa ame kwa here kudiruka nkenye apa ntani nkenye oku kuna hepa evatero.” Hermilo kwa tanta asi: “Ame na lironga kutereka nokukuhwa nokukangura.” Verónica kwa tanta asi: “Apa na kere membo lyetu, ame ngani vatere kuzeresa nokulironga kutereka nondya. Ntani na lirongere kupungura yuma.”

Levi naAmelia wokoAmerika ava vana kara mononkwara nomvhura ntantatu kwa uyunga omu makanderero ga va vatera va liwapaikire kukazuvhisira moMeksiko. Levi kwa tanta asi: “Ose kwa varwire yimaliwa eyi twa hepere mokukazuvhisira mvhura zimwe oku kuna hepa vazuvhisi, makura yipo twa hundilire Jehova mekanderero a tu vatere tu gwane yimaliwa oyo.” Momakwedi gongandi, awo va vhulire kupungura yimaliwa eyi va tumbwire mekanderero, makura yipo va dirukire va hana kuliranga-ranga. Levi kwa tanta asi: “Jehova kwa limburwire ehundiro lyetu, ano ngesi twa hepa kurugana ruha rwetu.” Amelia kwa gwederera ko asi: “Ose kwa gazarere asi ngatu kara mo tupu mvhura zimwe, nye ngesi ose kuna kara mo nomvhura ntambali, ntani kapi tuna kugazara kutengura! Kukara omu kuna kutuninkisa tu limonene evatero lyaJehova. Nkenye ezuva, ose kumona uwa wendi.”

Adam naJennifer, valikwali wokoAmerika ava vana kukazuvhisira moMeksiko momukunda omu ava uyunga Ruingilisa, makanderero kwa va vatera unene. Awo kwa korangeda asi: “Wa ha ndindira asi tanko nayinye yi ku gwanene po. Tura po etokoro lyokukazuvhisira koure makura yi tura momakanderero ntani rugana ko yuma kuliza nomakanderero goge. Rerupika eparu lyoge nokutjangera komberewa zomutayi zomosirongo esi ono hara kukazuvhisira, ano konyima zokuvarura yimaliwa eyi ono hepa makura diruka!” * Nsene o yi rugana, matungiko ngaga ku powomokera.