nJESUS kwa tente asi nemanya si limwe lyeeli lyontembeli zaJehova ngali kara kontunda zekwawo, ano uporofete ou kwa ya sikilire mo apa vakwayita woVaroma mepitisiro lyaTitus va ya zonagure po Jerusarema momvhura 70. (Mat. 24:2) Konyima, hompa Julian kwa here kutungurura ntembeli.

Julian ngava mu zigida asi hompa gwaRoma gomupagani gokuhulilira. Julian, simpumba saConstantine goMunene kwa lirongere erongo lyoUkriste. Nye konyima zokumutumba ngahompa momvhura 361, age kwa nyokerere po erongo olyo ntani nonkareso zoUkriste zomomazuva gendi morwa kuhara erongo lyosipagani. Buke zehistoli kwa mu tumbwire asi “Murwanesi usili.”

Julian kwa nyengere Ukriste. Konda zimwe nampo kwa kere asi apa ga kere nonomvhura 6, age kwa mwene vanangereka vamwe ava va ya dipagere oguhwe novagara vemekoro lyawo. Kuliza nomunahistoli gongereka, Julian kwa korangedere Vajuda va tungurure ntembeli zawo, negano lyokulikida asi Jesus muporofete goyimpempa. *

Julian kwa tokomenene kutungurura ntembeli. Vanahistoli kulipatanesa nsene asi sili ga tamekere nosirugana sokutungura ntembeli, ano nsene asi yimo, kapi va diva eyi ya mu ninkisire a hageke. Julian kwa mu dipagere komeho a kare mouhompa nomvhura mbali, makura sirugana sendi yipo sa hege.