OSE kwa tu hampurukira kofarama zokorwaMuzogo gwaOstrobothnia moFinland, ano vanona murongo twa kere. PoYita yaUvali yoUzuni ose simpe vanona. Nampili ngomu yita ya karerere ure nembo lyetu, ose twa yi divire asi vantu kwa hepere unene. Esiku limwe, sitata saOulu nesi saKalajoki kwa si bomene, ano eguru kwa gehere komundiro. Vakurona vetu kwa tu tanterere asi nsene natu mona nondira doyita meguru twa hepa kuvanda. Apa mukurwetu gomugara, Tauno, ga tu tanterere kuhamena paradisa, omu ngamu ka dira ruhepo, ayo kwa tu kundamene unene.

Tauno apa ga lirongere usili woBibeli noValirongi woBibeli age nomvhura dendi 14. Apa ya varekere Yita yaUvali yoUzuni, age kwa nyokere kukara mukwayita morwa eyi ga lirongere moBibeli, makura tava mu tura modorongo. Modorongo kwa ka mu hepekere momudona. Eyi kwa nkondopekere etokomeno lyendi lyokukarera Jehova, ano apa va mu mangwilire mo yipo ga lihamekere unene mosirugana sokuzuvhisa. Sihonena sosiwa samukurwetu kwa tu korangedere tu ze komapongo goNombangi aga ngava ruganene pepi nomukunda gwetu. Ngatu rugana unene nokupungura yimaliwa yokuzisa koyigongi. Ngatu honzo yikoverero yovamusinda zetu nokutapeka nonyanga nokutoragura enyango. Morwa kwa kere noyirugana yoyinzi yokurugana kofarama, ngatu lipe marufo gokuza koyigongi.

Usili ou twa lirongere kuhamena Jehova nositambo sendi kwa nkondopekere eharo lyetu, makura yipo twa tokwere kuligava kwendi. Mo-1947, natuvenye yipo twa gwene ekuho. (Annikki kwa mu kuhwire nonomvhura 15 ano Aili nonomvhura 17.) Mukurwetu gomukadi Saimi nage kwa gwene ekuho momvhura zoozo. Ngatu lirongo hena Bibeli namukurwetu gomukadi Linnea. Nage nepata lyendi nawo tava ya kara Nombangi daJehova. Konyima zekuho lyetu, yipo twa tokwere kurugana uzuvhisi wokuvatera poyiruwo noyiruwo.

Momvhura 1955, yipo twa dirukilire kositata sokoMuzogo ava tumbura asi Kemi. Nampili ngomu natuvenye ngatu rugana, twa here kukara vazuvhisi wokukarerera nye twa kere nowoma asi kapi tatu vhuru kukalirera. Yipo twa gazarere asi pomuhowo twa hepa kupungura yimaliwa. Nye munazinyetukadi gomuzuvhisi gokukarerera ogu tuna tumbura ketamekero lyosirongwa esi ga tu vaterere tu kwate egano asi nose kuvhura kurugana uzuvhisi wokukarerera. Mevango lyokulihuguvara nyamwetu nepata lyetu, yipo twa huguvarere mwaJehova asi nga tu pa nayinye eyi twa hepa.

Posiruwo oso, ose twa pungura ko yimaliwa yokugwaneka makwedi gavali. MwaKudumonkuru 1957, yipo twa tulire mo mahundiro gokurugana uzuvhisi wokukarerera makwedi gavali modoropa Pello, moLapland mosirongo somaterengenze. Nye  konyima zomakwedi gavali, twa kere simpe noyimaliwa eyi twa pungwire yipo twa gwederere ko hena makwedi gavali. Konyima hena zomakwedi ogo, simpe twa kere noyimaliwa, makura yipo twa huguvarere mwaJehova asi sili nga tu pakera mbili. Konyima zonomvhura 50 domosirugana souzuvhisi wosiruwo nasinye simpe ha twa karera noyimaliwa eyi twa pungwire! Pokudiworoka nayinye, ose kulizuvha ngwendi Jehova kwa tu kwete komawoko nokututantera asi: “Wa ha tjira, ame tani ku kwafa.”—Jes. 41:13.

Mo-1958, mutareli gwetu gonombunga kwa tu pulire nsene kuvhura tu dirukire korwaMuzogo kositata saSodankylä momukunda gwaLapland. Posiruwo sina, momukunda ogo kwa kere mo Mbangi zimwe tupu, munazinyetukadi. Age kwa lirongere usili monkedi zokulikarera. Munwendi gomumati kwa zire nedinguro lyeyi yokosure konkurusitata Helsinki moFinland. Apa va gendere mositata novanasure vakwawo, munazinyetukadi gomukurupe yipo ga pere munona ogo gomumati sifo soRuhungu nokumutantera asi a ka si gave kozina. Apa ozina va ya si resere, va ya yi dimbwilire asi awo usili womoBibeli.

Momukunda ogo kwa kere mo fabilika zokuteta yitji. Ose kwa tungire konzugo zekeguru lyofabilika ozo ntani yimo ngatu ruganene mapongo getu. Pomuhowo nyoselike ngatu pongo namunazinyetukadi ogo ntani namunwendi gomukadona. Ngatu lirongo kumwe yemepongo lyankenye sivike. Konyima, mugara ogu ga lirongere Bibeli noNombangi daJehova ta gwana yirugana mofabilika ozo. Nage nepata lyendi yipo va tamekere kuyaponga kumwe nose, ano konyima nage namukadendi tava ya gwana ekuho. Makura munazinyetugara ogo yipo ga tamekere kupitisira mapongo. Vagara vamwe womofabilika ozo nawo kwa varekere kuwiza komapongo nokutambura usili. Karuwogona tupu kambunga ketu ta ka ya kara mbungakriste.

Oku ngatu zuvhisire kwa kere ure unene. Posiruwo sokwenye, ngatu gendi ndi kusinga nombasikora, ano pamwe ngatu dugu mawato tu ze oku ngatu ka zuvhisira. Nombasikora ngadi tu vatere unene. Ngatu di ruganesa hena pokuza koyigongi nokukadingura vakondi vetu, ava va tungire ure wonokilometa mafere. Posiruwo sokufu, ngatu rondo besa ngurangura zonene tu ze oku ngatu ka  zuvhisira nokukarugana tunda embo zende embo. Ngatu zuvhisa tunda mukunda zende mukunda. Yiterengenze ngayi zura mositaura ntani kapi ngava kombo mo nkenye apa. Nsene asi gumwe ana gendi mo nare monzira ngayi tu rerupire kugenda, ano apa ngayi gu hena yiterengenze ngayi dongonona hena nonzira. Pomangenyena, materengenze ngaga hemuka makura ngayi tu digopere kugenda.

Utenda wounene ou ngatu zuvhu ngau tu ninkisa tu dware yikoverero yokufu. Ngatu dwara yiturumufe yoyire yonongodi yivali ndi yitatu ntani nomakaturo gomare. Nampili ngoso, makatura getu ngaga zura materengeze. Nkenye apa ngatu ka sika pevero lyonzugo ngatu ga hutura nokutjukumuna mo materengenze. Ntani hena konomukunkuru donombaikisa detu dononde ngaku woro apa ngatu gendi momaterenze makura ngaku kanka. Mukadi gumwe ogu twa zuvhisilire kwa tente asi: “One kwa kara nepuro lyokupama, yiyo muna kugendera moutenda wangesi.” Ose kwa gendere ure wonokilometa 11 mokukasika kembo lyomukadi ogo.

Ose rorunzi ngatu rara monomukunda omu ngatu zuvhisire. Ngurova ngatu pura vantu nsene kuvhura tu gwane ko mararo momambo gawo. Nampili ngomu mambo gawo ga kere goruhepo nye vantu vamo vanambili ntani ngava tu tambura neharo nokutupa nondya nomararo. Yikando yoyinzi ngava tu pe yipapa yoyikorama tu rare po, ano momambo gamwe ngatu rara monzugo zovagenda. Pasihonena, mukadi gumwe ogu ga kere nembo lyenene kwa tu twere monzugo zovagenda omu mwa kere mbete zongwa nomakehe gomazera. Poyiruwo yoyinzi ngatu zogere Bibeli nava vemembo dogoro pokatji komasiku. Momukunda gumwe, ose kwa ka rere navenya embo monzugo zimwe. Valikwali owo kwa twikilire kutupura mapuro yipo twa zogerere nawo kuhamena Bibeli dogoro monongura.

Lapland mukunda gomuwa. Nye vantu ava va lirongere kuhamena Jehova kwa ya kere vantu wovawa unene kwetu. Vamwe ava twa zuvhisilire kwa kere vagara ava ngava rugana mofabilika zokuteta yitji. Poyiruwo yimwe, mouvali wetu ngatu zi kononzugo dovarugani wovagara owo. Vagara owo ngava hafere kupurakena mbudi zomoBibeli nokuresa yimbapiratjangwa yetu.

Ose kwa limonena yihorokwa yoyinzi yokuhafesa. Ezuva limwe, vili zopositasi sonombesa kwa zi pitisire komeho nonominute ntano yipo za tu zumbire mbesa. Makura yipo twa tokwere kuza nombesa zokomukunda gwapeke. Kapi twa rugana mo rumwe momukunda ogo, nye membo lyokuhova kwa gwene mukadona ogu ga uyungire asi: ‘Muna ya siki ngomu tupu kani yi ndindire.’ Ose ngatu lirongo Bibeli namukurwendi gomukadi. Mumbyendi gomukadi kwa pulire mukurwendi a ture po ewapaiko yipo tu ka lironge nendi mezuva  lyoolyo. Nye mbudi ozo kapi twa zi gwene. Yipo twa tamekere kulironga nage kumwe nekoro lyendi eli lya kara pepi. Konyima yipo twa va pakerere tu va ronge kumwe, ano awo kwa kere murongo navavali. Kutunda opo, wovanzi mepata olyo kwa ya kara Nombangi daJehova.

Mo-1965, yipo va tu pulire tu dirukire kombungakriste za kara koMbindakano kositata saKuusamo. Posiruwo oso, mombungakriste kwa kere mo tupu vazuvhisi wovasesu. Pomuhowo, kwa kere udigu kuzuvhisira momukunda ogo. Vantu vamo kwa litura mo unene monongereka ntani kapi va here sirugana setu. Nye vantu wovanzi womomukunda ogo kwa fumadekere Bibeli. Yipo twa hetekerere ko kudiva vantu, ano konyima zonomvhura mbali kwa ya tu rerupilire kulironga novantu Bibeli.

Ose simpe kuna kuza moyirugana yokuzuvhisa nkenye ezuva, nampili ngomu tuna kudira kuvhura kurugana siruwo sosire. Ano ngesi ureru kuzuvhisira momukunda gomunene morwa Aili ga lironga kusinga etuwa. Munwamukurwetu kwa korangedere Aili a lironge kusinga ano momvhura 1987 yipo ga gwene mbapira zousingi age opo nomvhura dendi 56. Ngesi ose kuna kara monzugo ezi za kara poSinyanga setu sosipe soUhompa.

Tuna hafa asi wovanzi ava va kara koMuzogo gwaFinland va tambura usili. Apa twa tamekere kuzuvhisira mo, kwa kere mo tupu vazuvhisi wovasesu. Ngesi kuna kara nombungakriste dononzi edi ana kudingura mutareli gonombunga. Rorunzi apa atu kara poyigongi, vamwe kutuwizira nokuyatutantera asi nyose twa lirongere nepata lyawo apa va kere vanona. Yosili, Karunga ga tungika sirugana setu.—1 Kol. 3:6.

Mo-2008, yipo twa gwanesere nomvhura 50 mosirugana souzuvhisi wosiruwo nasinye. Tatu pandura Jehova kweyi ga tu vatera tu likorangede mokutwikira kumukarera. Ose kwa rerupika eparu lyetu, nye kwato eyi twa hepere. (Epis. 23:1) Ngesi tuna ya dimburura asi kapi pwa kere hepero zokukara nowoma wokutameka uzuvhisi wokukarerera. Monomvhura nadinye odo, Jehova kwa tu nkondopeka ngomu ga tumbwidira mwaJesaya 41:10 asi: “Ngani ku nkondopeka tani ku kwafa; ngani ku popera tani ku parura.”