1. Morwasinke natu huguvarera unene moNonkango daKarunga?

KOMEHO murongwa goBibeli a tameke kuza moyirugana yokuzuvhisa, ga hepa kuyilikida asi ga tambura Bibeli asi Nonkango daKarunga. * Natuvenye twa hepa kuyilikida moyirugana nomombuuyungiso zetu asi twa huguvara Bibeli. Apa atu huguvara unene moBibeli nokulironga kuziruganesa mokuzuvhisa, ose kuvatera wopeke va dive Jehova ntani va gwane nzira zokomwenyo gwanarunye.

2. Morwasinke natu karera ‘mousili ou twa lironga’?

² Mupositoli Paurusa kwa nkondopekere mulyo goNonkango daKarunga apa ga tjangerere Timoteusa asi: “Kara mousili ou wa lironga, yiyo wa u pura nawa-nawa.” ‘Usili’ ou kwa tumangedere Timoteusa a ture epuro mombudi zongwa. Usili owo kuna kutunkondopeka nose naina, ntani kutuvatera tu twikire kukara ‘noukonentu tu ka paruke.’ (2 Tim. 3:14, 15) Eyi ga uyungire Paurusa movelise zokukwama kulikida asi Bibeli kwa tunda kwaKarunga, nye yisinke natu vhura kulirongera ko kononkango domwa-2 Timoteusa 3:16, NW *? (Resa.) Ngesi tatu ka zogera velise ezi momunene. Pokurugana ngoso, ngayi nkondopeka ehuguvaro lyetu asi marongo nagenye gaJehova ga hungama.—Epis. 119:128.

3-5. (a) Yisinke ya horokere konyima zokugava Peturusa siuyungwa kombunga zonene poPentekoste, ntani morwasinke? (b) Morwasinke sinzi sava womoTesaronika va tambwilire usili? (c) Yisinke nayi tetukisa vantu naina kuhamena ezuvhiso lyetu?

³ Jesus kwa tanterere muhoko gwaIsraeli asi: “Ame  yipo nye nina kumutumina vaporofete novakonentu novalirongi womatjangwa.” (Mat. 23:34) Jesus kwa uyungire kuhamena varongwa vendi, ava ga rongere va ruganese Matjangwa moyirugana yokuzuvhisa. PoPentekoste momvhura 33, mupositoli Peturusa kwa geve siuyungwa kombunga zonene zomoJerusarema ntani kwa temwininine Matjangwa goRuhebeli. Apa vantu va zuvhire omu Peturusa ga fatwilire novelise odo, wovanzi “tadi va tu konomutjima.” Makura tava litezurura kononzo dawo. Mezuva olyo, vantu wokusika ngwendi pomayovi gatatu kwa ya kere Vakriste.—Yirug. 2:37-41.

⁴ Nose kuvhura tu lirongere ko komupositoli Paurusa, ogu ga zuvhisire mbudi zongwa ponze zaJerusarema. Pasihonena, mositata saTesaronika moMakedoniya, age kwa uyungisire Vajuda ava ngava karere mosinagoge. Paurusa ‘ta uyunga nawo yomomatjangwa Masabata gatatu, ta va fatwilire oku ta va likida asi, Kristusa yige sili kunyanda, ntani ana kuvhumbuka koufe.’ Yitundwamo, ‘vamwe po tadi va zi konomutjima, kumwe nombunga zonene zoVagereka.’—Yirug. 17:1-4.

⁵ Monkedi omu vakareli vaKarunga vana kuruganesa Bibeli kutetukisa vantu wovanzi. Munazinyetukadi gumwe gomoSwisiranda kwa resere etjangwa moyirugana yokuzuvhisa, ano ogu ga zuvhisilire kwa mu pulire ngereka ezi ga hamena. Munazinyetukadi kwa limbwilire asi age nomuzuvhisi mukwawo, awo Nombangi daJehova. Mugara kwa tente asi ana yi dimburura morwa Nombangi daJehova delike dokuwiza pembo lyendi nokuresa moBibeli.

6, 7. (a) Ngapi nava ruganesa nawa Bibeli ava ava rongo mombungakriste? (b) Morwasinke ya karera nomulyo mokuruganesa nawa Bibeli posiruwo selirongo?

⁶ Ngapi omu natu ruganesa Bibeli monkedi zongwa pokuronga wopeke? Nsene vana ku pe siuyungwa ndi ruha rwapeke komapongo, ruganesa Bibeli kuvyukilira. Mevango lyokutantera vapurakeni eyi lya uyunga ko etjangwa ndi kuliresa posipepa, penuna Bibeli nokuresa mo kuvyukilira ntani va korangeda va rugane yokulifana. Faturura eyi adi tanta novelise ntani nomu nadi vhura kuvavatera va kare nelikwatakano lyenene naJehova. Mevango lyokuruganesa yifanekeso eyi nava dira kukwata egano ndi yilimonena eyi nayi ninkisa vantu va zore, ruganesa siruwo mokufaturura Nonkango daKarunga.

⁷ Yisinke twa hepa kudiworoka nsene tatu rongo varongwa vetu woBibeli? Ngomu tuna kulironga nomuntu, twa ha siga matjangwa aga va tura mobuke. Ninka murongwa a rese matjangwa aga va tura mo. Ngomu tuna kugamufatwilira, kapisi tu uyunge unene nye twa hepa kupulisira murongwa a uyunge omu ana kugakwata egano. Mevango lyokumutantera eyi ga hepa kupura ndi kurugana, kuvhura tu mu pure mapuro gomawa aga naga mu vatera a kwate egano eyi azi rongo Bibeli. *

8. Yisinke ga rwisire Paurusa?

⁸ Ose narunye kutara ‘episuro’ ngositumbukira sovakuronambunga. Yosili, vapitisili kwa kara nositumbukira sokupisura ndi ‘sokutugumukira ava vana kuzona.’ (1 Tim. 5:20; Tit. 1:13) Nye nose twa hepa kulipisura nyamwetu. Paurusa kwa kere Mukriste gomuwa ogu ga kere nezwi lyewa lyokomutjima. (2 Tim. 1:3) Nampili ngoso, age kwa tjenge asi: “Ame kumona hena veta zapeke ezi azi rugana morutu rwange. Veta ozo kurwisa Veta zomomutjima gwange. Azo yizo za tura nge moupika wononzo.” Pokukonakona nonkango odo, natu ka kwata nawa egano eyi ga rugene  Paurusa mokupangera nkareso zendi zononzo.—Resa Varoma 7:21-25.

9, 10. (a) Upirankondo musinke ga rwanesere po Paurusa? (b) Ngapi omu ga kondjere Paurusa mokurwanesa po nonzo?

⁹ Maupirankondo musinke ga rwanesere po Paurusa? Nampili ngomu ga dilire kugavyukilira kugatumbura, age kwa tjangerere Timoteusa asi age nga “swaura” Vakriste. (1 Tim. 1:13) Komeho a ya kare Mukriste, Paurusa nga hepeke unene Vakriste. Kombinga zomalizuvho gendi kuhamena vasikuli vaKristusa, age kwa litongwenene asi: “Ame ngani va hepeke unene.” (Yirug. 26:11) Paurusa ga lirongere kupangera ehandu lyendi, nye poyiruwo yimwe ga hepere kukondja a pangere malizuvho nombuuyungiso zendi. (Yirug. 15:36-39) Yisinke ya mu vaterere yipo yi mu tompoke?

¹⁰ Apa Paurusa ga tjangerere Vakriste womoKolinte, age kwa singwenene omu ga lipiswire mwene. (Resa 1 Vakolinte 9:26, 27.) Age kwa kondjere unene mokurwanesa po upirankondo wendi. Age kwa paparere mapukururo moMatjangwa nokulikwambera kwaJehova a mu vatere aga ture pasirugana ntani nokurugana unene a ture po marunduruko. * Ose kuvhura tu gwanene mo uwa mosihonena sendi morwa nose kurwanesa maupirankondo getu.

11. Ngapi natu vhura ‘kulikonakona’ nyamwetu tu divilise nsene asi kuna kutwikira kugenda monzira zousili?

¹¹ Kapisi tu hageke kurwanesa po maupirankondo getu. Nye, twa hepa ‘kulikonakona’ nyamwetu yipo tu divilise nsene asi kuna kutwikira kugenda monzira zousili. (2 Kol. 13:5) Apa atu resa matjangwa gangoso ngwendi Vakorosi 3:5-10, kuvhura tu lipure asi: ‘Ame kuna kurugana unene mokudipaga madowo gange gononzo ndi? Pokuruganesa Interneta, ame kudimisa usimbu nsene ruha rokunyata runa moneka po ndi ame kupapara maruha gokunyata?’ Kutura nyamwetu pasirugana mapukururo gomoNonkango daKarunga ngayi tu vatera ‘tu vangarare ntani tu kare vandjewa-ndjewa.’—1 Tes. 5:6-8.

12, 13. (a) Yisinke sitambo setu ‘sokuvyukisa’ yininke, ntani ngapi natu vhura kukwama sihonena saJesus? (b) Mbuuyungiso musinke azi dili ‘kuvyukisa’ yininke novakwetetu?

¹² Nkango zoRugereka va toroka “kuvyukisa” kutanta asi “kuretesa po uwa, kuwapeka, kutengwidira po uwa.” Poyiruwo yimwe twa hepa kurugana ko yuma ‘mokuvyukisa’ yininke novakwetetu ava vana dili kutukwata egano ndi nkareso zetu. Pasihonena, vampitisili womaukarelikarunga goVajuda kwa sivanene asi Jesus kulya kumwe “novafutisi mutero novananzo.” Jesus kwa va limbwilire asi: “Ava va kanguka kapi va hepa muhakuli, vaveli ntani yiwo va mu hepa. Nye zendeni, mu ka lironge eyi yina kutanta yokuninka asi, ‘Ame ufenkenda na hara, kapisi nzambo.’” (Mat. 9:11-13) Neharo, age kwa fatwilire nonkango daKarunga kwanavenye. Valinunupiki va ya divire Jehova asi “Karunga goMufenkenda, age Karunga gombili noMulididimiki. Uwa wendi unzi, age Mulimburukwi.” (Ex. 34:6) Morwa MunwaKarunga kwa vyukisire yininke, wovanzi va tulire epuro mombudi zongwa.

¹³ Sihonena saJesus kuturonga omu natu vatera wopeke. Kapisi tu uyunge nonyanya mokutura mapukururo gomwa-2 Timoteusa 3:16 pasirugana. “Matjangwa” kapi aga tu pulisire tu korese vakwetu. Ngwendi moomu aru ‘wurura rufuro,’ nonkango donondona kuretesa po kukora noyitundwamo yoyidona.—Yis. 12:18.

14-16. (a) Ngapi omu vakuronambunga nava ‘vyukisa’ yininke monkedi zokuvatera wopeke va kohonone po maudigu gawo? (b) Morwasinke ‘kuvyukisa’ yininke monkedi zoPatjangwa ya karera nomulyo mokurera nawa vanona?

 ¹⁴ Ngapi omu natu ruganesa elididimikiro nonkenda ‘mokuvyukisa’ yininke? Tu tante asi valikwali tava pura mukuronambunga evatero yipo va kohonone po madiro kulizuvha. Yisinke ga hepa kurugana mukuronambunga? Ga hana kuhamena koruha rongandi, mukuronambunga kuvhura a zogere novalikwali nompango domoBibeli, nampo pokuruganesa edi da kara megaununo 3 lyobuke Nsapi zokutwaredera koruhafo rwemepata. Ngomu mukuronambunga ana kupitisira nzogera, valikwali kuvhura va dimburure asi va hepa kutura po marunduruko. Konyima zosiruwo, mukuronambunga kuvhura nga hare kuvapura omu yina kugenda po yininke mepata nokugava hena evatero nsene hepero.

 ¹⁵ Ngapi omu vakurona nava ‘vyukisa’ yininke monkedi omu nayi nkondopeka vana vawo va kure pampepo? Tu tante asi ono hara kuvatera munonge gomukadona a nyokere po ukaume woudona. Pomuhowo, wa hepa kugwana mauzera. Makura nsene pana kara konda, kuvhura o zogere nage, nampo pokuruganesa magano gomobuke Questions Young People Ask—Answers That Work, Ruha 2. Mwaza siruwo, kuvhura o litulire po siruwo sokukara nendi. Kuvhura o mu nomene ngomu ana kulihameka moyirugana yokuzuvhisa ndi moyilihafeso kumwe nepata. Nsene o likida elididimikiro neharo, munonge nga dimburura elituromo lyoge. Ngayi mu tumangeda mokutura pasirugana mapukururo goge nokunyokera po matokoro gomadona.

¹⁶ Kukara nelididimikiro nonkenda, kuvhura kukorangeda ava vana kara nosinka kuhamena ukanguki wawo, nava vana dompo nomutjima morwa  kuzumbanesa yirugana yawo ndi ava yina kudigopera kutambura marongo gamwe gomoBibeli. Kuruganesa Nonkango daKarunga ‘mokuvyukisa’ yininke kuretera vantu vaJehova mauwa gomanzi.

17. Morwasinke twa hepera kutambura erungururo noruhafo?

¹⁷ “Siruwo nasinye serungururo sokukora, kapisi sehafo. Nye konyima ava vana kupita mo, tali va retere ukaro wombili nouhungami.” (Heb. 12:11) Sinzi soVakriste wovakondi va yi kwatesa ko asi erungururo eli va gwene kovakurona vawo wovapuli kwa va vaterere. Ntani kutambura erungururo lyaJehova ngomu vana kulitupa vakuronambunga, kutuvatera tu kare monzira zokomwenyo.—Yis. 4:13.

18, 19. (a) Morwasinke epukururo lyomoYisewe 18:13 lya karera nomulyo ‘mokurungurura mouhungami’? (b) Apa vakuronambunga ava likida nkenda neharo komunzoni, yitundwamo musinke ayi kara?

¹⁸ Kugava erungururo lyewa mulyo. Jehova kwa tanterere Vakriste va rungurure ‘mouhungami.’ (2 Tim. 3:16) Twa hepa kuruganesa nompango doBibeli ngevyukiso lyetu. Mpango zimwe zomulyo kuzigwana moYisewe 18:13 asi: “O hove tanko kuzuvha ko, ntani ono kulimburura. Nsene o dira kuyirugana, ugova woge neswau lyaamoge.” Yipo nye, nsene vakuronambunga kuna hara kuuyunga nomuntu ogu vana kurundira asi ana tura nzo zonene, va hepa kuyikonakona nawa yipo va gwane mauzera nagenye. (Deut. 13:14) Ntani nye nava vhura kumurungurura ‘mouhungami.’

¹⁹ Ntani hena, Nonkango daKarunga kuronga vakuronambunga va gave mapukururo monkedi ‘zombili.’ (Resa 2 Timoteusa 2:24-26.) Yosili, muntu kuvhura a retere Jehova eswau ntani nokukoresa vantu va hana nzo. Mukuronambunga ogu a handuka apa a pukurura muntu gwangoso, kapi ngayi vatera muntu ogo. Nye nsene vakuronambunga va honena “ufenkenda waKarunga,” kuvhura ngayi tumangede munanzo ogo a litezurure.—Rom. 2:4.

20. Nompango musinke vakurona va hepa kutura pasirugana nsene tava rungurura vana vawo?

²⁰ Mokurera vana vawo ‘nokuvapukurura kuliza neyi ga hara’ Jehova, vakurona va hepa kutura pasirugana nompango doBibeli. (Efe. 6:4) Guhya ga hepa kunyokera po kutengeka munwendi ga hana kugwana mauzera nagenye. Mepata lyoMukriste kapisi mu kare nyanya. Jehova ‘mufenkenda nomunambili,’ ano ava va kara nositumbukira sokurungurura vanona va hepa kukondja mokulikida yikara yendi.—Jak. 5:11.

21, 22. Nonkango musinke da kara mEpisarome 119:97-104 edi adi likida malizuvho goge koNonkango daJehova?

²¹ Mugara ogu ga tjira Karunga ga horwere eyi ga harerere veta zaJehova. (Resa Episarome 119:97-104.) Pokuzilironga, age ga gwanene mo unongo nonondunge nediwo. Kukwaterera komavyukiso gazo kwa mu vaterere a nyokere po yikara yoyidona eyi ya koresere wopeke. Kulironga Matjangwa kwa mu hafesere. Age kwa tokomenene kulimburukwa Karunga ogu ga gava mavyukiso yipo wovanzi va gwanene mo mauwa.

²² Ove kufumadeka “Matjangwa nagenye” ndi? Nsene yimo, ove ngoso wa pura asi Karunga nga ka sikisa mo sitambo sendi. Mapukururo gamo kukupopera koyitundwamo yoyidona yononzo. Ano mokugafaturura nawa, kuvhura kuvatera wopeke va gwane nzira zokomwenyo nokuzikwaterera. Ngano tu ruganese nawa “Matjangwa nagenye” ngomu tuna kukarera Karunga gwetu gounongo geharo, Jehova!