1, 2. Ehuguvaro musinke azi tu pe mbunga zaJehova?

AYO kutetukisa mokudiva asi ose ruha rombunga zaJehova zonene mouzuni naunye. Emoneko lya kara mwaHesekiyeli egaununo 1 naNdaniyera egaununo 7 kulikida omu Jehova ana kusikisa mo sitambo sendi kevhu. Jesus kuna kupitisira ruha rwepevhu rombunga zaJehova ru demenene kosirugana sokuzuvhisa mbudi zongwa nesi sokuronga ntani nokukorangeda ava vana kusirugana nokuvatera wopeke va karere Jehova. Eyi kututumangeda tu huguvare mombunga zaJehova.—Mat. 24:45.

² Ove kuna kukwama sihonena sombunga zaJehova pokulitura mo unene mokuzuvhisa ndi? Nampo ove kuna kulizuvha asi kuna kuzumbanesa upampi woge. Eyi yiyo ya horokerere Vakriste womomazuva gaPaurusa. Mupositoli Paurusa kwa va diworokesere sihonena saJesus soupampi. Age kwa va tanterere eyi ngayi va vatera va ‘dire kuroroka gu va tororoke!’ (Heb. 12:3) Mosirongwa sa ka pita, twa zogerere sirugana sokutetukisa esi zina kurugana mbunga zaJehova naina. Ngwendi moomu sihonena saJesus sa korangedere Vakriste vena, sihonena sombunga zaJehova kutuvatera tu lididimikire nokukara noupampi mosirugana sendi.

3. Yisinke twa hepa yipo tu dire kuroroka, ntani yisinke natu ka zogera mosirongwa esi?

³ Nampili ngoso, Paurusa kwa yi likida asi mokudira kuroroka yoyinzi ya hepa po. Age kwa tente asi twa hepa “kurugana uwa.” (Gar. 6:9) Tu zogereni yininke yitano eyi twa hepa kurugana tu kare noupampi nokukwama egendeso lyombunga zaJehova. Makura kuvhura tu tokore nomapata getu nsene asi koyili yimwe eyi twa hepa kuwapukurura.

4. Morwasinke natu tantera asi mapongo kwa kara nomulyo moukareli wousili?

⁴ Kuponga kumwe kwa kara sininke somulyo kovakareli vaJehova. Meguru, Jehova kuponga kumwe novaengeli. (1 Vah. 22:19; Joba 1:6; 2:1; Ndan. 7:10) Mosiruwo soVaisraeli, Karunga kwa va tanterere va ponge yipo ‘nkenye ogu a zuvhe a lirongere ko.’ (Deut. 31:10-12) Mosiruwo saJesus, Vajuda ngava pongo monosinagoge va rese Matjangwa. (Ruk. 4:16; Yirug. 15:21) Kutundilira tupu apa va tulisire po nombungakriste, mapongo kwa kara nomulyo moukareli wetu. Vakriste wousili ‘kulikoraika-koraika mokulihara-hara nomokurugana yirugana yoyiwa.’ Twa hepa kutwikira ‘kulikorangeda, unene pokumona asi ezuva lyaHompa tali hedere pepi.’—Heb. 10:24, 25.

5. Ngapi omu natu vhura kulikorangeda-korangeda komapongo getu?

⁵ Nkedi zimwe zomulyo omu natu vhura kulikorangeda-korangeda komapongo kuna kara pokugava malimbururo. Pasihonena, ose kuvhura kulimburura epuro lyomoparagarafu ndi kukumburura ko ketjangwa ndi kusimwitira pausupi sihorokwa esi asi likida omu nompango doBibeli adi tu vatere. (Epis. 22:22; 40:9) Yi kare asi siruwo sokuhura kupi twa kara mousili, malimbururo nagenye aga atu zuvhu komapongo, ga kare asi govakurona ndi govanona, kutukorangeda unene.

6. Mononkedi musinke aga tu vatere mapongo?

⁶ Mapongo noyigongi kutuvatera mononkedi dononzi. Pasihonena, ayo kutuvatera tu kare nomupampi gokuzuvhisa nampili vantu womomukunda gwetu va tu rwanese ndi va dire kutupurakena. (Yirug. 4:23, 31) Yiuyungwa nomaruha gamwe gokutunda moBibeli kunkondopeka epuro lyetu. (Yirug. 15:32; Rom. 1:11, 12) Erongo nekorangedo eli atu gwana momapongo getu goukareli kutuvatera tu gwane ruhafo rwene-rwene ntani kutupa “epwizumuko momazuva goudigu.” (Epis. 94:12, 13) Komitiye zerongo zoMbungagendesi kurongikida elikwamo lyomapongo govantu vaJehova. Ee, rupandu musi tuna kara naro kerongo eli atu gwana nkenye sivike komapongo!

7, 8. (a) Yisinke sitambo sosinene seyi atu zire komapongo? (b) Ngapi omu mapongo aga tu vatere?

⁷ Kapi atu zire tupu komapongo morwa mauwa aga atu gwana. Nye sitambo sosinene seyi atu zire ko sokukakarera Jehova. (Resa Episarome 95:6.) Ee, situmbukira musi twa kara naso sokuhamberera Karunga gwetu geharo! (Koros. 3:16) Jehova ga fira ukareli wetu, unene po apa atu kara momapongo nokulihameka mo. (Ehor. 4:11) Eyi yiyo ava tu korangedere asi ‘twa ha zumba yigongi yomombungakriste zetu, moomu va yi yika vamwe.’—Heb. 10:25.

⁸ Ose kumona mapongo getu asi uhwi wokutunda kwaJehova ou nau tu vatera tu lididimikire dogoro nga ka zonagure po uzuni ou woudona ndi? Nsene yimo, ose ngatu kondja mokukara momapongo nampili tu kare noyiviyauka yoyinzi. (Fil. 1:10) Twa ha dumwa komapongo getu ntudi kuna kara nokonda zomulyo.

9. Ngapi omu twa yi diva asi sirugana sokuzuvhisa mulyo?

⁹ Kulihameka mo unene mosirugana sokuzuvhisa kutuvatera tu kwame epitisiro lyombunga zaJehova. Jesus yige ga varekere sirugana esi apa ga kere pevhu.  (Mat. 28:19, 20) Kutundilira pena, sirugana sokuzuvhisa nesi sokutulisa po varongwa kuna kara sirugana esi azi demenene unene mbunga zaJehova. Yihorokwa yoyinzi kulikida asi vaengeli kukwatesa ko sirugana esi ntani kutuvatera tu gwane “ava gwa tumbukira mwenyo gwanarunye.” (Yirug. 13:48; Ehor. 14:6, 7) Ruha rwepevhu rombunga zaJehova kuna kuwapaika nokukwatesa ko sirugana esi somulyo. Nove wa tura sirugana esi si kare somulyo po meparu lyoge ndi?

10. (a) Ngapi omu munazinyetugara gumwe ga nkondopekere eharo lyendi kousili? (b) Ngapi omu sirugana sokuzuvhisa sa ku vatera o nkondopeke eharo lyoge kousili?

¹⁰ Kulihameka unene mokuzuvhisa kutuvatera tu nkondopeke eharo lyetu kousili. Koneka eyi ga uyungire Mitchel, muzuvhisi gokukarerera gomukuronambunga. Age kwa tanta asi: “Ame kwa hara kuzogera novantu kuhamena usili. Ame kugazadara ko kosirongwa sosipe somoRuhungu ndi somoAwake! ntani kutetukisa nge unongo wa kara mwankenye sifo. Ayo kutumangeda nge ni ze mokuzuvhisa yipo ni ka mone omu nayi ka kundama vantu nokupindura elituromo lyawo.” Mitchel kwa tanta hena asi sirugana sokuzuvhisa kumuvatera a ture muhowo yininke yomulyo po meparu lyendi nokunyokera po nkenye madonganeso. Nose kuvhura tu lididimikire mazuva aga gopouhura nsene tu litura mo unene  mosirugana saKarunga.—Resa 1 Vakolinte 15:58.

11. Morwasinke natu resera yimbapiratjangwa yetu nokuteda ko kweyi atu resa mo?

¹¹ Nkedi zimwe omu Jehova ana kutunkondopeka kuna kara kupitira moyimbapiratjangwa eyi atu gwana. Nampo to diworoka siruwo simwe apa wa resere mosimbapiratjangwa nokugazara asi: ‘Esi sirongwa nyame sina tamba! Jehova ngwendi nyame ga si tjangera!’ Pwa kara konda zeyi wa lizuvhilire ngoso. Jehova kuturonga nokutuvyukisa kupitira moyimbapiratjangwa. Age kwa tanta asi: “Ame tani ku rongo nzira ezi no genda.” (Epis. 32:8) Ose kulitura mo mokuresa yimbapiratjangwa nayinye eyi atu gwana nokuteda ko kweyi atu resa mo ndi? Kurugana ngoso, ngayi tu vatera tu lididimikire nokukara nomupampi mosirugana saKarunga momazuva aga goudigu gopouhura.—Resa Episarome 1:1-3; 35:28; 119:97.

12. Yisinke nayi tu vatera tu tare yimbapiratjangwa yetu asi mulyo?

¹² Ose ngatu tara yimbapiratjangwa yetu asi mulyo nsene tu gazadara ko kuhamena omu ava yi wapaike yipo tu gwane nondya dopampepo. Ayo kwa hamena mo mapaparo nokutjanga nokuresurura mo nokutura mo yifanekeso netoroko nenduruko ndi kuyitura koInterneta. Komitiye zokutjanga zoMbungagendesi yizo azi rugana sirugana esi. Ano nomberewa domutayi yido adi nduruka yimbapiratjangwa nokuyituma konombungakriste. Morwasinke ava ruganene yirugana nayinye eyi? Yipo vantu vaJehova va gwane nondya dopampepo. (Jes. 65:13) Ngano tu gwanene mo mauwa moyimbapiratjangwa nayinye eyi atu gwana mombunga zaJehova.—Epis. 119:27.

13, 14. Wolye va kara meguru vana kukwatesa ko mbunga zaJehova, ntani ngapi natu zi kwatesa ko nose?

¹³ Memoneko, Johanesa kwa mwene Jesus ana rondo ponkambe zonzera ana kuza a ka funde owo ava rwanesa Jehova. (Ehor. 19:11-15) Age kwa mwene hena meguru vagwavekwa wovalimburukwi ava va vhumbwire ntani novaengeli ava va rondere kononkambe tava kwama Jesus, eyi kulikida asi awo kukwatesa ko Jesus ngoMupitisili gwawo. (Ehor. 2:26, 27) Sihonena esi sosiwa kuturonga asi nose twa hepa kukwatesa ko ava ava pitisire mombunga zaJehova.

¹⁴ Monkedi zokulifana, emukurumbunga kukwatesa ko unene sirugana sovamumbya vaKristusa ava simpe vana kara apa pevhu. (Resa Sakaliya 8:23.) Ngapi natu kwatesa ko mbunga zaJehova? Nkedi zimwe pokulimburukwa ava ava tu pitisire. (Heb. 13:7, 17) Eyi atu uyunga kuhamena vakuronambunga womombungakriste zetu kukorangeda wopeke va va fumadeke nosirugana esi ava rugana ndi? Ose kuronga vana vetu va fumadeke vagara owo wovalimburukwi nokupurakena komapukururo gawo ndi? Ngepata, ose kuzogera omu natu kwatesa ko sirugana sokuzuvhisa pokugava yigava ndi? (Yis. 3:9; 1 Kol. 16:2; 2 Kol. 8:12) Ose kuvatera mokuzeresa nokuwapeka Sinyanga soUhompa ndi? Apa Jehova a mono asi ose kuna kukwatesa ko mbunga zendi mononkedi dangoso, age kutupa mpepo zendi zokupongoka. Kupitira mompepo ozo, ose kugwana evatero yipo tu dire kuroroka momazuva aga gopouhura.—Jes. 40:29-31.

15. Morwasinke natu kondjera kuparuka kuliza nonompango daJehova?

¹⁵ Nsene tuna hara kulididimikira nokukwama epitisiro lyombunga zaJehova, twa hepa kuparuka kuliza neyi “ya za Hompa komutjima.” (Efe. 5:10, 11) Satana nouzuni wendi ou woudona nokudira kusikilira mo kwetu kutudigopekesera kurugana youhunga. Vanavazinyetu vamwe kukondja mokupopera elikwatakano lyawo naJehova nkenye ezuva, ano eyi kuninkisa Jehova a va hafere. Mwa ha roroka! Kuparuka kuliza nonompango daJehova ngaku tu retera ruhafo meparu ntani ukarelikarunga wetu kapi ngau kara womawoko-woko.—1 Kol. 9:24-27.

16, 17. (a) Yisinke twa hepa kurugana nsene tuna tura nzo zonene? (b) Yisinke natu lirongera ko kosihonena saAnne?

¹⁶ Yisinke twa hepa kurugana nsene tuna tura nzo zonene? Twa ha zi horeka. Twa hepa kupapara usimbu evatero. Diworoka asi apa Ndafita ga hetekerere ko kuhoreka nonzo dendi, ‘age kwa rorokere kokuworoma ezuva mudima.’ (Epis. 32:3) Nsene tu horeka nonzo detu, ngatu zumbanesa ruhafo rwetu ntani nelikwatakano lyetu naJehova, nye twa hepa ‘kudisanseka tu di sige, makura Karunga nga tu fira nkenda.’—Yis. 28:13.

¹⁷ Tu tarurureni sihonena saAnne. * Apa Anne ga kere mudinkantu age nga rugana uzuvhisi wokukarerera. Konyima ta ya tameke kurugana yirugana yokunyata. Eyi ya mu kundamene unene. Age kwa tanta asi: “Ezwi lyange lyokomutjima ngali pe nge usima. Nkenye apa ame ngani kara noruguwo nokudompa mutjima.” Yisinke ga rugene ko? Age kwa tanta asi ezuva limwe kepongo kwa zogerere Jakopo 5:14, 15. Anne ga yi dimbwilire asi ga hepere evatero makura yipo ga zire kovakuronambunga. Ayo kapi ya kere ureru, nye age kwa tanta asi: “Ame kwa verere makura Jehova yipo ga pere nge nomutji edi na hepere. Mutji kapisi ureru kugumina, nye kuverura.” Ngesi Anne kuna kara hena nomupampi mosirugana saJehova nezwi lyewa lyokomutjima.

18. Yisinke twa hepa kukondjera unene?

¹⁸ Twa hepa kudiworoka nkenye apa asi azo mfumwa mokukara ruha rombunga zaJehova momazuva aga gopouhura! Kumwe nomapata getu, ngano tu kondje unene mokukara komapongo getu nagenye nokuzuvhisa nomupampi momukunda gwetu nokugwanena mo uwa moyimbapiratjangwa yetu nayinye. Ntani ngano tu paruke monkedi ezi azi hafesa Jehova nokukwatesa ko ava ava pitisire mbunga zendi. Nsene tu yi rugana oyo, ose ngatu kwama epitisiro lyombunga zaJehova ntani kapi ngatu roroka kurugana uwa.