YITA YOPOMUHOWO YOUZUNI 1914 kwa ninkisire vantu wovanzi va dimburure asi Valirongi woBibeli kapi ava lihameke moyita. (Jes. 2:2-4; Joh. 18:36; Efe. 6:12) Yisinke ya horokerere vakareli vaKarunga moBritania?

Veta zoukwayita zomvhura 1916 kwa tulisire po asi vadike wovagara wonomvhura 18 dogoro 40 va ze koukwayita, kugusa ko ava va “pulire moukarelikarunga.” Epangero kwa tulisire po komitiye zokutokora asi yilye nava tura moukwayita nogu nava dira kutura mo.

Konyima zosiruwogona, Valirongi woBibeli 40 kwa va tulire modorongo ano 8 kwa va tumine koyita moFransa. Yirugana eyi yokudira kuhungama kwa tumangedere vanavazinyetu va tjangere nkuruministera Herbert Asquith mbilive zokudira kukwatesa ko eturo modorongo nezi zehundiro lyopaveta ezi va sainine vantu 5 500.

Mbudi kwa zuvhikire asi vanavazinyetu ntantatu ava va tumine koFransa kwa va tokwerere kuvaroya morwa kudira kutambura ukwayita. Nye apa va kere momukweyo asi ngano va va roye, yipo va tjindjire asi va kare modorongo nomvhura murongo. Makura tava va tengwidire koIngiranda va ka kare modorongo zomosirongo sawo.

Ngomu yita ya twikilire, veta kwa zi rundwilire asi vagara wokukwara nawo va ze koukwayita. Momukunda gwaManchester moIngiranda, ndokotora Henry Hudson age hena Mulirongi goBibeli kwa mu pangwire. Momazuva 3 Siwogedi 1916, mpanguro kwa mu tokwerere asi age mutezipo veta nokumufutisa makura tava mu gava koukwayita. Posiruwo sooso, mpanguro zimwe kwa kere moEdinburgh mosirongo saSikotoranda. James Frederick Scott, ogu ga kere nonomvhura 25 ntani muzuvhisi gokukarerera, kapi va mu gwene usima. Epangero kwa hundilire asi va tengwidire po mpanguro ozo, konyima tava ya zi hagekesa po morwa mpanguro zimwe ezi za kere moLondon. Ano mompanguro ezi, munazinyetugara gedina Herbert Kipps, kwa mu pangwire nokumufutisa makura tava mu gava koukwayita.

Koyiha yaSitarara 1916, vanavazinyetu 264 kwa tulire mo mahundiro asi va dire kuvatura mosirugana soukwayita. Vanavazinyetu owo, vatano ehundiro lyawo kwa li tambwire, ano 154 kwa va pere “yirugana youdigu unene,” 23 kwa va pere yirugana yapeke ya hana asi yokurwa, ano 82 kwa va geve koukwayita, vamwe kwa nyokere makura tava va tura modorongo. Vantu wovanzi kapi va kwatesere ko muteku gonyanya ogu ngava tekura vanavazinyetu owo, yipo epangero lya va  gusire mo modorongo zoukwayita nokuvatwara monokamba va ka rugane.

Edgar Clay naPryce Hughes, ogu konyima ga ya kere mutareli goBeteli zomoBritania, kwa mu tumine kosirugana sokutunga ndama moWales. Herbert Senior, gumwe gwava va tengwidire koFransa, kwa mu tumine kodorongo zaWakefield modoropa Yorkshire. Vamwe kwa va tumine kodorongo zaDartmoor, ezi za kere novanavazinyetu wovanzi ava va nyokere sirugana soukwayita.

Frank Platt, Mulirongi goBibeli ogu ga tambwire sirugana sa hana asi soukwayita kwa mu hepekere momudona apa ga nyokere sirugana soukwayita. Atkinson Padgett, ogu ga nyokere kulihameka moukwayita konyima tupu zokulironga usili nage kwa mu hepekere momudona.

Nampili ngomu monomvhura dononzi da ka pita vanavazinyetu va dilire kukwata nawa egano epirombinga lyetu, awo va kondjerere kuhafesa Jehova Karunga. Ava vana tumbura apa komadina kwa tura po sihonena sosiwa sepirombinga, unene po mosiruwo ‘sosidigu.’ (Ehor. 3:10)—Upungwiro woyininke yanare moBritania.