1, 2. Mfumwa musinke adi gwana Nombangi daJehova, ntani ngapi o lizuvhu kuhamena oyo?

WOVANZI kulizuvha mfumwa apa ava va pe mfeto zetomporo lyawo. Pasihonena, vamwe kugwana mfumwa apa ava vatere nomuhoko mbali di tulise po mbili. Nye azo mfumwa zonene kukutuma Karunga ngontumi ndi ngomuudisi mokuvatera vantu va tulise po mbili nendi!

² NgoNombangi daJehova, ose kugwana mfumwa ozo zonene. Karunga naKristusa kugendesa sirugana setu tu vatere vantu va ‘likwatakane naKarunga,’ va kare vakaume vendi. (2 Kol. 5:20) Jehova kuturuganesa yipo tu kokere vantu kwendi. Monkedi zangesi yimo va vatera mamiliyona govantu moyirongo yokupitakana 235 va kare nelikwatakano lyewa naKarunga ntani nehuguvaro lyokukagwana mwenyo gwanarunye. (Tit. 2:11) Nomupampi, ose kuzigida nkenye “ogu ana hara, a wize a ya guse mema gomwenyo mawoko-woko.” (Ehor. 22:17) Ose ‘mupampi mokurugana yoyiwa’ morwa eharo lyokuruganena Jehova nokurugana paapa twa hulira. (Tit. 2:14) Ngesi tatu ka zogera omu upampi wetu wokurugana yoyiwa nau tu vatera tu kokere vantu kwaJehova. Nkedi zokuhova kuna kara kupitira mosirugana setu sokuzuvhisa.

3. Morwasinke upampi waJehova au tu pere ehuguvaro?

³ Jesaya 9:7 kututantera asi MunwaKarunga nga kara Hompa ntani nga ruganena vantu yininke yoyiwa. Nayinye eyi ngayi horokera morwa upampi waJehova “Munankondo nadinye.” Nonkango odo kusingonona Guhyetu gemeguru omu ga kara neharo lyokuzowora vantu. Upampi kuna kara eharo lyenene lyokurugana yininke. Twa hepa kukara nomupampi mosirugana sokuzuvhisa morwa Jehova Karunga kwa kara noupampi. Ngovarugani kumwe naKarunga, ose  kurugana paapa twa hulira mokuudisa mbudi zongwa ndi?—1 Kol. 3:9.

4. Ngapi omu Jesus ga tulisa po sihonena sokukovekeda nomupampi mokuzuvhisa?

⁴ Konakona upampi waJesus. Age kwa tulire po sihonena sosiwa sokukovekeda nomupampi mokuzuvhisa. Nampili momahepeko, age kwa kwatererere koruhafo rwendi dogoro konomfa dendi. (Joh. 18:36, 37) Morwa Jesus ga divire asi ntaantani va ka mu hepeke nokukamudipaga, age kwa rugene unene mokuvatera wopeke va dive Jehova.

5. Ngapi omu Jesus ga fene ngwendi munomeni gomosifanekeso sositji soukuzu?

⁵ Momvhura 32, Jesus kwa geve sifanekeso somugara ogu ga kere nositji soukuzu mosikunino sendi ou wa dilire kuyima nomvhura ntatu. Nampili ngomu va mu tanterere asi a u komangere po, nye munomeni gosikunino kwa hundilire va mu pe ko hena siruwo yipo a ture ko ruhoho. (Resa Rukasa 13:6-9.) Apa Jesus ga yi uyungire eyi, vantu wovasesu tupu yiwo va kere varongwa. Nye sifanekeso esi kwa likida asi Jesus kwa here kurugana unene mosiruwo sosisupi esi sa hupire ko komeho va ka mu dipage yipo ga zuvhisire nomupampi moJudeya nomoPereya konyara makwedi ntazimwe. Mazuva gongandi komeho zonomfa dendi, Jesus kwa lililire vantu womositata sendi ava ‘va limbanderere.’—Mat. 13:15; Ruk. 19:41.

6. Morwasinke natu litulira mo unene mosirugana setu sokuzuvhisa?

⁶ Twa hepa kulitura mo unene mokuzuvhisa morwa uhura wouzuni pepi. (Resa Ndaniyera 2:41-45.) Ee, mfumwa musi kouwa da kara nado Nombangi daJehova! Nyoselike tupu apa pevhu atu tantere ko wopeke omu Karunga nga ka kohonona po maudigu govantu. Mutjangi gosaitunga kwa tente asi epuro lyedigu kulimburura kuna kara asi: “Morwasinke yininke yoyidona ayi horokerere vantu wovawa?” Nye Bibeli kututantera eyi ayi horokerere, ntani aso situmbukira setu ose Vakriste mokutantera ko wopeke. Twa hepa ‘kuhwama nompepo,’ ngomu tuna kurugana sirugana saKarunga. (Rom. 12:11) Jehova Karunga nga tungika sirugana setu, ntani kuvhura tu vatere vapeke va mu dive nokumuhara.

7, 8. Ngapi omu nkareso zelizambero azi yererepeke Jehova?

⁷ Mosirugana sendi sokuzuvhisa, mupositoli Paurusa kwa lididimikilire maudigu ngwendi ‘kudira kurara’ ntani ‘kukara nonzara.’ (2 Kol. 6:5) Vanavazinyetu nawo kutura po malizambero gokulifana. Vazuvhisi wokukarerera kutara sirugana sokuzuvhisa asi ngosirugana somulyo unene, ntani awo kurugana yipo va livatere vene. Diworokeni hena vatumwa vetu ava ava ‘lizambere’ va ka zuvhisire koyirongo yapeke. (Fil. 2:17) Vakuronambunga vetu womupampi pamwe kapi ava li ndi va rare morwa kupakera mbili nonzwi daJehova. Twa kara hena novakurupe nava wokuvera-vera ava ava kondjo kuwiza komapongo nokulihameka mosirugana sokuzuvhisa. Ayo kukorangeda pokumona vakareli owo vaKarunga kuna kulizambera mosirugana sokuzuvhisa. Elituromo lyangoso kukundama omu wopeke ava tara sirugana setu sokuzuvhisa.

⁸ Mombilive zokosaitunga moIngiranda, muresi gomuhapuli kwa tente asi: “Vantu kuna kuzumbanesa epuro lyawo moukarelikarunga. Kapi nina diva eyi vana kurugana vampitisili wonongereka. Awo kapi ava zi va ka zuvhisire vantu ngwendi moomu ga yi rugene Kristusa. Ukarelikarunga ou au pakere mbili vantu kuna kara tupu woNombangi daJehova, edi adi zi kovantu di ka va zuvhisire usili.’ Mouzuni ou wa pira eharo, nkareso zetu  zelizambero kuyererepeka Jehova Karunga.—Rom. 12:1.

9. Yisinke nayi tu tumangeda tu kare nomupampi mokuzuvhisa?

⁹ Yisinke natu rugana nsene tu mona asi kuna kuzumbanesa mupampi gwetu mosirugana sokuzuvhisa? Ayo ya wapa kuteda ko kweyi ana kusikisa mo Jehova kupitira mosirugana sokuzuvhisa. (Resa Varoma 10:13-15.) Eparuro kwa korera mokukuga edina Jehova, nye vantu kapi tava yi rugana oyo pwavene ntudi tu va zuvhisire. Pokuyidimburura eyi, ngayi tu tumangeda tu kare nomupampi mokurugana yoyiwa nokulitura mo unene kuzuvhisa mbudi zongwa zoUhompa.

10. Ngapi omu nkareso zetu zongwa azi kokere vantu kwaJehova?

¹⁰ Upampi wetu mosirugana sokuzuvhisa kapi wa gwanena po mokukokera vantu kwaKarunga. Nkedi zauvali omu yirugana yetu youpampi nayi kokera vantu kwaKarunga kupitira monkareso zetu zongwa. Paurusa kwa nkondopekere mulyo gonkareso zetu apa ga tjenge asi: “Ose kapi tuna kutura sipundukiso monzira zomuntu, neisi ngasi swauka sirugana setu.” (2 Kol. 6:3) Mbuuyungiso nonkareso zetu zongwa kuvhura kukokera vantu koukareli waJehova. (Tit. 2:10) Ose rorunzi kuzuvha yitundwamo yoyiwa apa vantu wovawa ava nomene nkareso zetu zoSikriste.

11. Morwasinke natu gazadarera ko konkareso zetu nomu azi kundama wopeke?

¹¹ Moomu nkareso zetu zongwa azi kundama vantu momuwa yimo hena nonkareso zondona azi va kundama momudona. Yipo nye, yi kare asi koyirugana ndi kembo ndi kosure, tuna hara kunyokera po nkenye eyi nayi swaukisa sirugana ndi nkareso zetu. Nsene tu zonena wina, yitundwamo ngayi kara yoyidona  unene. (Heb. 10:26, 27) Eyi yangesi kututumangeda tu gazadare ko konkareso zetu nomu azi kundama wopeke. Ngomu nkareso zouzuni ou zina kudonapa unene, vantu wovawa kuna ‘kumona malisigo, pokatji kogu a kerere Karunga nogu a dili kumukerera.’ (Mara. 3:18) Nkareso zongwa zoVakriste kwa kara nomulyo mokukwatakanesa vantu naKarunga.

12-14. Ngapi omu elididimikiro lyetu komahepeko ali kundama mutaro gwava wopeke kousili? Gava sihonena.

¹² Mombilive zendi zauvali koVakolinte, Paurusa kwa tumbwire asi age kwa kere monompatakani nomomaudigu nomoyipumpu nomonomango. (Resa 2 Vakolinte 6:4, 5.) Apa atu ligwanekere nomahepeko, elididimikiro lyetu kuvhura kuvatera wopeke va tambure usili. Pasihonena: Nomvhura da ka pita, moAngola kwa hetekerere ko kuhagekesa po Nombangi daJehova. Valikwali woNombangi vavali novarongwa woBibeli 30 kwa va sopwere dogoro kuna kuzoza honde. Vakadi novanona navenye nawo kwa va sopwere nonyanya. Sitambo kwa kere sokutjilisa vantu asi va dire kupurakena koNombangi daJehova, yipo va sininikire vantu womomukunda va ya tarere. Nye konyima zesoporo olyo, wovanzi womomukunda kwa wizilire Nombangi nokuhundira elirongo lyoBibeli! Ngoyitundwamo, sirugana sokuzuvhisa kwa twikira ntani sivaro kwa ligwederera unene.

¹³ Sihonena esi kulikida omu kukwaterera kwetu konompango doBibeli aku vatere wopeke. Mbunga zonene ezi za ya likwatakanene naKarunga morwa uradi ou ga kere nawo Peturusa novapositoli vakwawo. (Yirug. 5:17-29) Mosiruwo setu, vanasure ndi varugani vakwetu ndi vanekoro kuvhura va tambure usili apa ava mono kukwaterera kwetu kweyi youhunga.

¹⁴ Nkenye apa, vanavazinyetu vamwe kuligwanekera nomahepeko. Pasihonena, moArmenia vanavazinyetu wokusika konyara 40 kuna kara modorongo morwa upirambinga wawo, ntani kuna kumoneka asi simpe vanzi nava tura modorongo momakwedi aga gana kuwiza. MoEritrea vakareli vaJehova 55 kwa va tura modorongo, vamwe kwa kara mo nomvhura dokupitakana 60. MoSouth Korea, Nombangi dokusika konyara 700 kwa va tura modorongo morwa epuro lyawo. Ukaro ou kwa twikira ure wonomvhura 60. Tu kanderereni asi ngano ulimburukwi wovanavazinyetu ava vana kuhepeka moyirongo yokulisiga-siga u retere eyererepeko Karunga nokuvatera ava va hara uhungami va kwaterere koukareli wousili.—Epis. 76:8-10.

15. Simwitira omu nkareso zetu zokuhungika azi kokere vantu kousili.

¹⁵ Kuhungika kwetu nako kukokera vantu kousili. (Resa 2 Vakolinte 6:4, 7.) Pasihonena, koneka sihorokwa esi: Munazinyetukadi kwa futire yimaliwa yombesa ano ava ga kere nawo mombesa tava mu ninki asi kapisi hepero a fute morwa kapi ana kuza ure. Munazinyetu ogo kwa fatwilire asi ayo ya kere hepero kufuta nampili ngomu ga dilire kuza ure. Konyima zoyo gumwe gowo ta humburuka mo mombesa. Musingimbesa makura ta setuka a tare munazinyetukadi nokumupura asi: “Ove gumwe goNombangi daJehova ndi?” Munazinyetukadi ta limburura asi: “Nhi. Yisinke yina ku ninkisa o pure?” Musingi ta tanta asi: “Ame kuna mu zuvhu kuna kuuyunga kuhamena kufuta kombesa, na yi diva asi Nombangi daJehova yiwo velike ava futu ntani awo kuhungika mwanayinye.” Konyima zomakwedi gongandi, mugara ogo kwa wizilire munazinyetukadi kepongo nokutanta asi: “Ono dimburura nge ndi? Nyame musingi gozina mbesa ogu ga uyungire nove kuhamena kufuta kombesa. Konyima zokunomena nkareso  zoge yipo na tokwere kulironga Bibeli noNombangi daJehova.” Nkareso zetu zokuhungika kuninkisa vantu va huguvare mbudi zongwa ezi atu zuvhisa.

16. Morwasinke yikara ngwendi ezaverero nombili neharo ayi gumine nomutjima dovantu? Gava sihonena.

¹⁶ Nose kuvatera vantu va wize kwaJehova pokulikida yikara ngwendi ezaverero nombili neharo. Vamwe ava ava tu nomene kuvhura ngava hare kulironga kuhamena Jehova nositambo sendi nombunga zendi. Nkareso noyikara yoVakriste kwa lisiga novantu ava ava limonekesa tupu asi kukarera Karunga nye yirugana yawo kwa lilimba nonompango dendi. Vampitisili vamwe wonongereka kwa kungawopa morwa kukumbagera vantu va fute yimaliwa yoyinzi, ano yimaliwa oyo kuyiruganesa mokuranda mambo nomatuwa gondiro nayimwe ngoso. Awo kapi ava kwama mpango zaKristusa zokugava “mawoko-woko.” (Mat. 10:8) Nye awo kwa kara ngwendi vapristeli wovadona woVaisraeli vanare, awo “kufaturura Veta morwamfuto” ano sinzi seyi ava rongo kapi ya liza nomatjangwa. (Mika 3:11) Nkareso zouyilipaki zangoso kapi azi kwatakanesa vantu naKarunga.

17, 18. (a) Ngapi omu ayi retere eyererepeko Jehova apa atu likida yikara yendi? (b) Yisinke ayi ku tumangeda o kovekede mokurugana yoyiwa?

¹⁷ Ntani hena marongo goVakriste wousili nokuruganena vantu yirugana yoyiwa kuguma nomutjima. Pasihonena, pokurugana yirugana ya tunda embo zende embo muzuvhisi gokukarerera kwa zire pembo lyomukurukadi gomufisayendi. Mufisayendi ogo kwa tente asi apa muzuvhisi ga ngongwere kevero age kwa kere kosirondero a ture ramba zompe. Makura munazinyetu yipo ga uyungire asi: “Ayo siponga mu rugane nyonelike yininke oyo.” Munazinyetugara ogo yipo ga vaterere mufisayendi pokutura ramba makura ta ka za. Apa muna gomugara gomufisayendi ga ya divire eyi ya horokere, age kwa mu tetukisire makura ta papara munazinyetugara nokumupandura kweyi ga ruganenene ozina. Konyima nage yipo ga tamekere kulironga Bibeli.

¹⁸ Morwasinke ono tokomenene kukovekeda kurugana yoyiwa? Nampo morwa wa yi dimburura asi nsene tu likida mupampi moyirugana yokuzuvhisa nokurugana yininke kuliza nompango zaKarunga, ngatu yererepeka Jehova nokuvatera wopeke ngava ka paruke. (Resa 1 Vakolinte 10:31-33.) Apa atu kara nomupampi gokurugana yoyiwa mosirugana sokuzuvhisa mbudi zongwa nokukara nonkareso zongwa, eyi kulikida asi twa hara Karunga ntani vakwetu. (Mat. 22:37-39) Nsene tu kara nomupampi gokurugana yoyiwa, ngatu kara noruhafo. Ntani ngatu ndindira nononkondo apa vantu navenye ngava ka likida upampi koukareli wousili mokuyererepeka Musiti gwetu, Jehova.