1. Morwasinke ava mu tumbwire Jehova asi Muudisi gokuhova gomunene?

MUUDISI kuna kara muntu ogu a tantere vantu mbudi zongwa. Jehova Karunga yige Muudisi gokuhova gomunene. Konyima tupu zapa va zonene vakurona vetu wokuhova, Jehova kwa divisire mbudi zongwa asi ezoka, Satana Muzonaguli ngava ka mu zonagura po. (Gen. 3:15) Monomvhura mayovi da kapita, Jehova kwa gendesere vagara wovalimburukwi va tjange mauzera kuhamena omu nga ka zeresa edina lyendi keswau nomu ngava ka gusa po ezonauko eli ga retesa po Satana nomu vantu ngava ka gwana hena mpito ezi ga zumbanesere Adamu naEva.

2. (a) Monkedi musinke vaengeli va kara vaudisi? (b) Sihonena musinke ga tu tulira po Jesus kovaudisi?

² Vaengeli nawo vauudisi. Nawo kuzuvhisa mbudi zongwa, ntani kuvatera hena vantu va udise mbudi zongwa. (Ruk. 1:19; 2:10; Yirug. 8:26, 27, 35; Ehor. 14:6) Ngapi kuhamena Mikayera muengeli gomunene? Apa ga kere pevhu, Jesus kwa tu tulira po sihonena sokuudisa nkenye apa. Jesus meparu lyendi nalinye nga udisa mbudi zongwa.—Ruk. 4:16-21.

3. (a) Mbudi zongwa musinke atu udisa? (b) Mapuro musinke natu ka konakona?

³ Jesus kwa pangerere varongwa vendi va kare vaudisi. (Mat. 28:19, 20; Yirug. 1:8) Mupositoli Paurusa kwa korangedere mukwawo Timoteusa asi: “To rugana sirugana somuudisi goMbudi zoNgwa, to sikisa mo sirugana soge.” (2 Tim. 4:5) Mbudi zongwa musinke ozo natu udisa ngovasikuli vaJesus? Azo kuna kara usili ou asi Guhyetu gemeguru, Jehova, kwa tu hara. (Joh. 3:16; 1 Pet. 5:7) Uhompa waJehova kuna kara silikido seharo lyendi kovantu. Yipo nye atu haferere kutantera ko wopeke asi  navenye ava ava limburukwa kepangero lyoUhompa noku kwaKarunga nokurugana youhunga kuvhura va kare nelikwatakano nendi ngovakaume vendi. (Epis. 15:1, 2) Aso kuna kara sitambo saJehova mokukagusa po ruhepo narunye. Age hena nga ka gusa po kukora oku rwa retesa po ruhepo oro. Ezi kuna kara mbudi zongwa! (Jes. 65:17) Mokumona asi ose vaudisi, tu konakoneni malimbururo komapuro aga gavali gomulyo: Morwasinke ya karera nomulyo asi vantu va zuvhe mbudi zongwa naina? Ntani ngapi omu natu vhura kusikisa mo sirugana setu ngovaudisi?

4. Yimpempa musinke ava uyunga vantu kuhamena Karunga?

⁴ Gazara asi ove va ku tantera asi oguho kwa ku zumba kumwe nepata lyeni nalinye. Ava va va divire tava ku tantere asi awo kwa kere wonyanya ntani kapi va ku here. Vamwe tava ku tantere asi kapisi hepero o va papare morwa va fa. Wovanzi kwa va tantera yokulifana kuhamena Karunga. Awo kwa va ronga asi Karunga kwato ogu ga mu diva ndi asi age nyanya. Pasihonena, vampitisili vamwe womaukarelikarunga kutanta asi Karunga nga futisa vantu wovadona momundiro gwanarunye. Ano vamwe kutanta asi Karunga yige a retesa po yimpagwa. Nampili ngomu yimpagwa oyo ayi dipaga vantu wovawa nava wovadona, awo kutanta asi Karunga yige a va futisa.

5, 6. Ngapi omu erongo lyelisinto nomarongo goyimpempa ga kundama vantu?

⁵ Vamwe kutanta asi kwato Karunga. Kuhamena eyi, konakona erongo lyelisinto. Vakwatesiko erongo olyo kutanta asi eparu kwa wiza po tupu pwalyene. Awo kutanta asi kapi pwa kara Musiti. Vamwe kuuyunga hena asi vantu kwa tundilira koyikorama, yipo nye ayi dili kutetukisa apa vantu ava likida yikara yonyanya. Awo kutanta asi apa vantu ava hepeke vakwawo nonyanya, awo kukwama noveta dopansitwe. Yiyo nye ayi dili kutetukisa asi wovanzi kwa pura asi uhahungami ngorooro ngau twikira. Nampili ngoso, owo va pura melisinto kapi va kara nehuguvaro lyokomeho.

⁶ Yosili, erongo lyelisinto nomarongo goyimpempa kwa gwederera koruhepo oru vana kuligwanekera naro vantu momazuva aga gopouhura. (Rom. 1:28-31; 2 Tim. 3:1-5) Marongo ogo kapisi mbudi zongwa. Mupositoli Paurusa kwa tjenge asi ago kwa ninkisa vantu ‘nondunge dawo di govakane, nokulinapa noukaro ou a gava Karunga.’ (Efes. 4:17-19) Ntani hena, marongo ogo kwa ninkisa vantu va dire kutambura mbudi zongwa zokutunda kwaKarunga.—Resa Vaefeso 2:11-13.

7, 8. Nkedi musinke zimwe tupu omu vantu nava kwata egano mbudi zongwa?

⁷ Mokuninka asi vantu va likwatakane naKarunga, pomuhowo va hepa kuyipura asi Jehova yipo ga kara ntani asi pwa kara nokonda donongwa deyi nava hedera pepi nendi. Kuvhura tu va vatere va gwane ediwo olyo pokuvakorangeda va konakone unsitwe. Nsene va konakona unsitwe, awo ngava lironga unongo nononkondo daKarunga. (Rom. 1:19, 20) Mokuvatera vantu va kwate egano eyi ga rugana Musiti gwetu goMunene, kuvhura tu ruganese yifo yivali Was Life Created? ntani The Origin of Life—Five Questions Worth Asking. Nampili ngoso, ava ava lirongo tupu unsitwe kapi ngava gwana malimbururo komapuro gamwe ngwendi gaga: Morwasinke Karunga ga pulisira ruhepo? Yisinke sitambo saKarunga kevhu? Karunga kupakera nge sinka ndi?

⁸ Nkedi zimwe tupu omu vantu nava  kwata egano mbudi zongwa kuhamena Karunga nositambo sendi kuna kara pokulironga Bibeli. Ose twa kara nomfumwa zokuvatera vantu va gwane malimbururo komapuro gawo! Mokuguma nomutjima dovapurakeni vetu, twa hepa kuvatera vantu va pure nawa-nawa eyi tuna kuvaronga. (2 Tim. 3:14) Eyi kuvhura yi tu tompoke pokukwama sihonena saJesus. Morwasinke ya mu tompokerere? Konda zimwe kuna kara asi morwa age kwa ruganesere nawa mapuro. Ngapi omu natu mu honena?

9. Mokuvatera vantu pampepo, yisinke twa hepa kurugana?

⁹ Morwasinke natu honenena Jesus pokuruganesa mapuro mosirugana sokuudisa? Koneka sihorokwa esi: Ndokotora goge ta ku tantere mbudi zongwa asi kuvhura o veruke nsene nava ku kurugana etauro lyenene. Kuvhura o yi pure. Nye ngapi nsene a ku tantera yininke oyo komeho a ku pure eyi ono kuvera? Kuvhura o dire kuyipura. Nampili ndokotora ga kara noudivi, ga hepa kukupura mapuro nokupurakena kweyi ono kuvera komeho a ku vatere. Mokulifana, mokuninka asi tu vatere vantu va tambure mbudi zongwa zoUhompa, twa hepa kudiva kupura mapuro gokuwapera. Konyima zokudiva ukaro wawo wopampepo ntani nye natu vhura kuvavatera.

10, 11. Yisinke ngatu sikisa mo nsene tu honena nkedi zaJesus zokuronga?

¹⁰ Jesus ga yi divire asi kuhorowora nawa mapuro kapi tupu aku vatere murongi a dive murongwa nye hena kuninkisa murongwa a lihameke mo monzogera. Pasihonena, apa Jesus ga here kuronga varongwa vendi sirongwa selinunupiko, pomuhowo age kwa pulire epuro mokuvaninkisa va gazadare ko. (Mar. 9:33) Mokuronga Peturusa sirongwa somulyo, Jesus kwa mu pulire epuro, nokumupa malimbururo gavali yipo a horowore po lyouhunga. (Mat. 17:24-26) Sikando simwe, apa Jesus ga here kudiva eyi ya kere monomutjima dovarongwa vendi, age kwa va pulire mapuro yipo va pwagese magano gawo. (Resa Mateusa 16:13-17.) Jesus kapi tupu ga tantere vantu eyi nava rugana. Monkedi omu nga pura mapuro, kwa tumangedere vantu va tambure mbudi zongwa ntani va ture po marunduruko meparu lyawo.

¹¹ Apa atu honene Jesus pokuruganesa mapuro gokuwapera, ose kugwana nkedi zongwa omu natu vatera vantu, kukongwa vantu ava ava nyoka kupurakena kombudi zongwa ntani kuronga vantu va gwanene mo uwa. Ngesi tatu ka zogera yihonena yitatu omu natu ruganesa mapuro gokuwapera.

12-14. Ngapi omu no vatera munoge a kare nouradi wokutantera ko vakwawo mbudi zongwa? Gava sihonena.

¹² Sihonena 1: Yisinke no vhura kurugana nsene munoge gomudinkantu kwa kara nowoma wokuzogera novakwawo wokosure kuhamena ukaro wovafe nomundiro gwanarunye? Ngapi omu no mu vatera a kare nouradi wokutantera ko vakwawo mbudi zongwa? Mevango lyokumuhandukira ndi lyokumutantera eyi na ka uyunga, kuvhura o mu pure mapuro aga naga mu vatera a pwagese magano gendi ngwendi moomu ga yi  rugene Jesus. Ngapi omu no yi rugana oyo?

¹³ Resa namunoge noparagarafu dimwe megaununo 6 mobuke Marongo goBibeli. Makura kuvhura o mu pure asi magano musinke gemegaununo gana mu ninkisa a pure asi vafe kapi ava hepa momundiro gwanarunye. Mu korangeda a pwagese magano gendi nemanguruko. (Rom. 12:2) Fatwilira munoge asi nokonda dendi kuvhura di lisige nedi doge.

¹⁴ Tantera munoge asi pokuuyunga nomunasure mukwawo, kuvhura a kwame sihonena esi ono mu likida. Pasihonena, kuvhura a gave sifanekeso makura konyima ta pura munasure mukwawo epuro yipo a dive magano gendi. Pasihonena, kuvhura a ruganese nombudi domoparagarafu 17 demegaununo 6 mobuke Marongo goBibeli, makura ta pura mukwawo asi: “Kweli guhya ogu na futisa munwendi pokutura kuwoko kwamunwendi momundiro ndi?” Konyima zokupurakena kelimbururo kuvhura a pure hena asi: “Nsene vantu nokuvhura si kufutisa vana vawo monkedi zangoso, kuvhura Karunga ogu ga sita vantu a va hepeke momundiro gwanarunye ndi? Mokuvatera munoge a kare nemanguruko lyokuuyunga nava wopeke kuhamena epuliro lyendi, kuvhura kuliyomberesa nage. Nsene o deura munoge a ruganese mapuro gokuwapera, ove ngo mu vatera a sikise mo sirugana sendi ngomuudisi.

15. Ngapi natu ruganesa mapuro mokuvatera ava va dira kupura mwaKarunga?

¹⁵ Sihonena 2: Moyirugana yetu yokuzuvhisa, ose kugwanekera novantu ava va dira kupura asi Karunga pweli. Pasihonena, muntu kuvhura a tu tantere asi age kapi ga pura mwaKarunga. Kuvhura tu mu pure monkedi zefumadeko nsene asi ntaantani ndi nare ga kara negano  olyo neyi ya mu ninkisa a dire kupura mwaKarunga. Konyima zokupurakena komalimbururo gendi nokumupandadeka kegano lyendi, kuvhura tu pure nsene ana hara kukaresa sifo sa gava umbangi asi yinamwenyo kwa wiza po kupitira mesito. Nsene muntu ogo ga kara neharo, kuvhura tu mu pe sifo Was Life Created? ndi The Origin of Life—Five Questions Worth Asking. Kupura mapuro monkedi zongwa, kuvhura kuguma mutjima gomuntu a tambure mbudi zongwa.

16. Morwasinke naga dilira kutugwanena po malimbururo gomurongwa gokuresa mobuke ndi mosifo?

¹⁶ Sihonena 3: Pokurugana elirongo lyoBibeli, yisinke nayi vhura kuhoroka nsene tu pulisira murongwa a rese malimbururo mobuke ndi mosifo? Kuvhura a dire kutura po ezokomeho. Morwasinke? Morwa murongwa ogu a resa malimbururo ga hana kuteda ko kukara ngwendi sitji sonondandani edi da dira kukora. Kuvhura yi mu digopere mokukwaterera kousili nsene vantu va mu rwanesa. (Mat. 13:20, 21) Mokukandana po yitundwamo yangoso, twa hepa kupura murongwa gwetu omu ana kulizuvha kweyi ana kulironga. Mu pura nsene kuna kukwatesa ko eyi ana kulironga neyi ana kulizuvhira ngoso. Makura mu vatera a tede ko koMatjangwa yipo epuro lyendi li tundilire moBibeli. (Heb. 5:14) Nsene tu ruganesa mapuro gokuwapera, owo atu rongo ngava pama mepuro ntani ngava vhura kunyokera po makondjeso govapukisi ndi govarwanesi. (Koros. 2:6-8) Yisinke hena yimwe natu rugana tu kare vaudisi wovawa?

17, 18. Pokupwaga noMukriste mukweni mosirugana sokuzuvhisa, ngapi omu nomu ruganena kumwe?

¹⁷ Jesus kwa tumine varongwa vendi vavali-vavali mosirugana sokuzuvhisa. (Mar. 6:7; Ruk. 10:1) Konyima, mupositoli Paurusa kwa tumbwire ‘varugani vakwawo’ ava ngava ‘rugana unene kumwe nendi mokuhanesa mbudi zongwa.’ (Fil. 4:3) Momvhura 1953, vazuvhisi woUhompa kwa tamekere nelikwamo lyokudeura vakwawo mosirugana sokuzuvhisa.

¹⁸ Pokupwaga noMukriste mukweni mosirugana sokuzuvhisa, ngapi omu nomu ruganena kumwe? (Resa 1 Vakolinte 3:6-9.) Tara matjangwa aga ana kuruganesa mukweni moBibeli zoge. Purakena nawa nsene mukweni ndi ogo muna kuzuvhisira kuna kuuyunga. Kwama nawa nzogera yipo o mu vatere nsene nava mu pura epuro lyedigu. (Muud. 4:12) Erondoro: Wa ha kwata mukweni meraka nsene age kuna kufaturura yuma yimwe. Kuvhura o mu donganese ndi o piyaganeke ogu muna kuzuvhisira. Poyiruwo yimwe kuvhura yi kare hepero kulihameka mo monzogera. Nye nsene kuna kukumburura ko, ya wapa kusupipika eyi ono kuuyunga. Makura, pa mukweni mpito a twikire.

19. Yisinke twa hepa kudiworoka, ntani morwasinke?

¹⁹ Ngapi omu nomu livatera namukweni mokuzuvhisa tunda embo zende embo? Kuvhura mu ruganese siruwo oso muna kugenda mu ze kembo limwe mokuzogera nonkedi omu nomu wapukurura ezuvhiso lyeni. Mwa hepa kutakamesa asi makumbururo geni gokuhamena vantu womukunda ga ha kara gomadona. Ntani hena mwa ha zogera yikara yoyidona yovaudisi vakweni. (Yis. 18:24) Ayo ya wapa tu diworoke asi kapi twa sikilira mo. Jehova kwa tu likida nkenda zonene pokutupa ugawo ou wokuzuvhisa mbudi zongwa. (Resa 2 Vakolinte 4:1, 7.) Ngano natuvenye tu likide rupandu kougawo owo pokurugana unene tu sikise mo sirugana setu ngovaudisi.