1, 2. (a) Morwasinke natu haferera vakaume wokuhungika ntani wokudongwenena po? (b) Mapuro musinke natu ka zogera?

NGAPI omu no singonona kaume gousili? Munazinyetukadi gedina Ashley kwa tanta asi: “Kwange, kaume gousili kuna kara muntu ogu a vatere nge nkenye apa momaudigu nokudongwenena nge po nsene nina lipuka.” Natuvenye kuhafera vakaume vangoso. Awo kutuvatera tu lizuvhe egameno neharo.—Yis. 17:17.

² Jehova yige Kaume gomunene po gokuhungika nokudongwenena po. Muepisarome kwa tanta asi: “HOMPA, ove o muwa, hena kudongonona po nonzo, eharo lyoge enene kwava ava ku kanderere.” (Epis. 86:5) Yisinke ayi tanta kuhungika nokudongwenena po? Ngapi Jehova a likida yikara oyo yoyiwa? Ntani ngapi natu temwinina sihonena sendi? Malimbururo naga ka tu vatera tu nkondopeke eharo lyetu kwaKaume ketu gomuwa po, Jehova. Ntani naga ka tu vatera tu nkondopeke ukaume wetu nava wopeke.—1 Joh. 4:7, 8.

3. Yisinke ayi tanta kukara muntu gokuhungika?

³ Muntu gokuhungika kulimburukwa komuntu ogu ga hara ntani kumuhuguvara. Age kulikida eharo lyendi pokutwikira kumuvatera nokumukwatesa ko. Age kuyirugana oyo nampili moukaro woudigu. Bibeli kwa singonona asi Jehova ‘Muhungiki’ gomunene po. Kwato gumwe gokuhungika kupitakana Jehova.—Ehor. 16:5.

4, 5. (a) Ngapi omu Jehova a likida sikara sokuhungika? (b) Ngapi natu gwana ekorangedo pokugazadara ko sikara saJehova sokuhungika?

⁴ Ngapi omu Jehova a likida sikara sokuhungika? Jehova nkenye apa kuvatera vakareli vendi wovalimburukwi.  Gumwe govakareli owo, kuna kara Hompa Ndafita, ogu ga kwatesere ko kuhungika kwaJehova pokutanta asi: “Muhungiki to mu ruganene pauhunga.” (2 Sam. 22:26, NW.) Apa ga kere Ndafita momaudigu, Jehova ga rugene ko yuma mokumuvyukisa nokumupopera nokumuzowora. (2 Sam. 22:1) Ndafita ga yi limonenene meparu lyendi asi Jehova kapi tupu a likida sikara sokuhungika nye hena kusitura pasirugana. Morwasinke Jehova ga hungikire kwaNdafita? Morwa Ndafita mwene kwa kere ‘muhungiki.’ Jehova kwa hara vakareli vendi wokuhungika ntani kuvafuta pauhungami.—Yis. 2:6-8.

⁵ Kuvhura tu gwane ekorangedo pokugazadara ko kokuhungika kwaJehova. Munazinyetugara gomulimburukwi gedina Reed kwa tanta asi: “Ayo kuvatera nge apa ani resa kuhamena omu Jehova ga ruganenene kumwe naNdafita poyiruwo yomaudigu. Nampili ngomu Ndafita nga hendauka nonkore dendi pokurara momakombombo gokulisiga-siga, nye Jehova ga mu pakerere mbili. Eyi kukorangeda nge unene! Ayo kudiworokesa nge asi yi kare asi ukaro musinke ndi ngapi nau digopa ukaro owo, Jehova nga pakera nge mbili nsene ni twikira kumulimburukwa.” Yosili, nove yimo ono kulizuvha ngoso.—Rom. 8:38, 39.

6. Mononkedi musinke dimwe Jehova a likida asi age kuhungika, ntani mauwa musinke ava gwanene mo vakareli vendi?

⁶ Mononkedi musinke dimwe Jehova a likida asi age kuhungika? Nkedi zimwe kuna kara asi age kwa kwaterera konompango dendi. (Jes. 46:4) Age nkenye apa kutura po matokoro kuliza nonompango dendi, ano nompango dendi kapi adi runduruka. (Mara. 3:6) Nkedi zimwe hena kuna kara asi Jehova kusikisa mo nonkango dendi edi a tumbwidire. (Jes. 55:11) Morwa Jehova kuhungika, vakareli vendi navenye wovalimburukwi kugwanena mo mauwa. Monkedi musinke? Apa atu kondjo mokulimburukwa konompango daJehova, ose kuvhura tu kare nehuguvaro asi nga twikira kusikisa mo etumbwidiro lyendi lyokututungika.—Jes. 48:17, 18.

7. Nkedi musinke zimwe omu natu honena kuhungika kwaJehova?

 ⁷ Ngapi omu natu honena kuhungika kwaJehova? Nkedi zimwe kuna kara pokuvatera ava vana kuligwanekera noukaro woudigu. (Yis. 3:27) Pasihonena, wa diva ko mupuli mukweni ogu ana dompo mutjima, nampo morwa udigu woukanguki nomarwaneso gekoro nomaupirankondo gamwene ndi? Ove kukorangeda muntu ogo “nononkango dehengagwido” ndi? (Sak. 1:13) * Pokurugana ngoso, ove ngo kara kaume gousili, ‘gokuhuguvara unene, kupitakana vamumbya vendi.’—Yis. 18:24.

8. Ngapi natu honena kuhungika kwaJehova mononkwara?

⁸ Pwa kara nonkedi dimwe omu natu hungika kwava twa hara. Pasihonena, nsene twa kwara, twa yi diva asi twa hepa kukara noulimburukwi kovalikwali vetu. (Yis. 5:15-18) Yipo nye, twa hepa kunyokera po nkareso ezi nazi tu twaredesa koruhonda. (Mat. 5:28) Ntani hena, ose kuhungika kovapuli vakwetetu nsene tu dira kuvagamba ndi kuvarundira ndi kupurakena komauyungo gangoso.—Yis. 12:18.

9, 10. (a) Unene po kwalye tuna hara kuhungika? (b) Morwasinke kulimburukwa konompango daJehova ayi dili kukara nkenye apa ureru?

⁹ Unene po, tuna hara kara vahungiki kwaJehova. Ngapi natu yi rugana oyo? Pokuhara eyi ga hara Jehova nokunyenga eyi ga nyenga, ntani nokuparuka monkedi ezi azi mu hafesa. (Resa Episarome 97:10.)  Moomu tuna kulironga kugazara ngwendi moomu a gazara Jehova, yimo hena ngayi tu rerupira kumulimburukwa.—Epis. 119:104.

¹⁰ Yosili, ayo kapisi ureru kulimburukwa konompango daJehova. Nye kuvhura tu kondje mokukara noulimburukwi. Pasihonena, munazinyetukadi kuvhura a hare kukwara, nye simpe kapi ana gwana mulikwali gokuwapera mokatji kovakareli vaJehova. (1 Kol. 7:39) Vantu wokoyirugana yendi kuvhura va hetekere ko kumupaparera ogu nava livandekera nage. Nampo munazinyetukadi posiruwo oso kuna kukondja nomalizuvho gomukuma. Nye ta tokomene kukwaterera koulimburukwi wendi kwaJehova. Sihonena samunazinyetu ogo kuna kara sihonena sosiwa sokuhungika. Jehova nga futa navenye ava ava kwaterere koulimburukwi wawo nampili momaudigu.—Heb. 11:6.

11. Yisinke aku tanta kudongwenena po?

¹¹ Simwe soyikara yaJehova yoyiwa kuna kara kudongwenena po. Yisinke aku tanta kudongwenena po? Kudongwenena po kwa hamena mo kugusira po ogu ana tu handukisa nsene ana litezurura sili. Kapi aku tanta asi kuncenuna mapuko ndi kudira kupakera mbili eyi yina horoka. Nye kudira kutengwida kuwoko. Matjangwa kuturonga asi Jehova ga liwapaikira ‘kudongwenena po’ ava ava likida elitezururo lyousili.—Epis. 86:5.

12. (a) Ngapi omu Jehova a likida edongwenenopo? (b) Yisinke aku tanta ‘kudongonoka po’ nonzo?

¹² Ngapi omu Jehova a likida edongwenenopo? Apa Jehova a dongwenene po, age kuyirugana “momunene,” age kudongwenena po nuunu ntani narunye. (Jes. 55:7, NW) Ngapi omu twa yi diva asi Jehova kudongwenena po nuunu? Konakona ehuguvaro lyomoYirugana 3:19. (Resa.) Mupositoli Peturusa kwa korangedere vapurakeni vendi va ‘litezurure, va tengure kwaKarunga.’ Apa munanzo a litezurura nawa-nawa, age kulivera unene koyininke yepuko eyi ga rugana. Age kutokomena  kudira kuyirugana hena. (2 Kol. 7:10, 11) Ntani hena, elitezururo lyousili kutumangeda munanzo a “tengure kwaKarunga,” pokuzumba nkareso zendi zondona nokukodjera ezi azi hafesa Karunga. Ngano vapurakeni vaPeturusa kwa likidire elitezururo lyousili, ngano yitundwamo musinke ya kere? Peturusa kwa tanta asi ‘nonzo dawo ngadi dongonoka po.’ Apa Jehova a dongwenene po, age ngwendi kuna kugusa sikehe makura ta kokota po pa zere. Age kudongwenena po nuunu.—Heb. 10:22; 1 Joh. 1:7.

13. Yisinke adi tu rongo nonkango edi “kapi ngani diworoka hena mausima gawo” kuhamena Jehova?

¹³ Ngapi omu twa yi diva asi Jehova kudongwenena po narunye? Konakona uporofete waJeremiya kuhamena egwanekero lyepe, eli va tulisa po kumwe noVakriste wovagwavekwa, eli ngali retesa po edongwenenopo lyene-lyene kowo ava tura epuro lyawo mosizoweseso. (Resa Jeremiya 31:34.) Jehova kwa tanta asi: “Ame ngani dongonona po nonzo dawo, kapi ngani diworoka hena mausima gawo.” Jehova kwa tu tumbwidira asi apa a tu dongwenene po, kutanta asi komeho kapi hena nga ka tu tengeka morwa nonzo detu danare. Age kapi a diworoka nonzo detu yipo asi a tu pangure hena. Nye, age kudongonona po nonzo odo nokudidivara narunye.—Rom. 4:7, 8.

14. Ngapi natu gwana ehengagwido pokuteda ko kedongwenenopo lyaJehova? Gava sihonena.

¹⁴ Kuvhura tu gwane ehengagwido pokuteda kedongwenenopo lyaJehova. Konakona sihonena esi. Munazinyetukadi gedina Elaine kwa mu gusire mombunga nomvhura dononzi. Ano konyima yipo va mu tengwidilire mo. Nampili ngoso, Elaine kwa tanta asi kapi ga yi pulire asi Jehova ga mu dongwenena po. Age kwa lizuvhire asi Jehova kwa hara unene vakwawo kumupitakana age. Nye Elaine ga gwene ehengagwido pokuresa nokuteda ko omu Bibeli za singonona edongwenenopo lyaJehova. Elaine kwa tanta asi: “Ame na ya lizuvhire eharo nonkenda zaJehova monkedi omu na dira kulizuvha rumwe.” Unene po kwa mu tumangedere egano eli asi: “Nsene Jehova ana tu dongwenene po nonzo detu, twa ha lizuvha hena usima wononzo odo meparu lyetu nalinye.” * Elaine kwa tanta asi: “Na yi dimbwilire asi ame kapi na yi pulire asi Jehova ga dongwenena nge po nuunu, ano ame kwa gazarere asi ngani simba mudigo ogu meparu lyange nalinye. Nina yi diva asi ngayi gusa siruwo sosire, nye nina tameke kulizuvha asi kuvhura ni hedere pepi naJehova, ntani asi mudigo gwange kuna kugugusa nge.” Yosili, Jehova age Karunga geharo ntani kudongwenena po!—Epis. 103:9.

15. Ngapi natu honena edongwenenopo lyaJehova?

¹⁵ Ose kuvhura kuhonena edongwenenopo lyaJehova pokulidongwenena-dongwenena po. (Resa Rukasa 17:3, 4.) Diworoka asi apa Jehova a tu dongwenene po, age kudivara nonzo detu monkedi omu nga dira hena kudidiworoka yipo a tu pangure. Apa atu dongwenene po vakwetu, twa hepa nose kuyidivara nokudira kuyidiworoka hena komeho.

16. (a) Kudongwenena po kutanta asi kuncenuna mapuko ndi kupulisira vakwetu va tu ninkilire mo ndi? Faturura. (b) Mokutudongwenena po Karunga, yisinke twa hepa kurugana?

 ¹⁶ Kudongwenena po kapi aku tanta asi kuncenuna mapuko ndi kupulisira vakwetu va tu ninkilire mo. Ako kutanta asi kapisi tu tengwide kuwoko. Mokuninka asi Karunga a tu dongwenene po, twa hepa nose kudongwenena po vakwetetu. (Mat. 6:14, 15) Jehova kudiworoka asi “ose mbundu zevhu,” ntani ga yi diva asi kapi  twa sikilira mo. (Epis. 103:14) Yipo nye, nose tu diworokeni asi vakwetu kapi va sikilira moomu twa dira kusikilira mo nose ntani twa hepa kuvadongwenena po kutundilira komutjima.—Efe. 4:32.

17. Yisinke nayi tu vatera nsene mupuli mukwetu ana tu zuvhisa kukora komutjima?

 ¹⁷ Kapisi ureru nkenye apa kudongwenena po wopeke. Nampili Vakriste vamwe wovagwavekwa womosiruwo saPaurusa kapi ya va rerupilire mokukohonona po madiro kulizuvha. (Fil. 4:2) Nsene mupuli mukwetu ana tu zuvhisa kukora komutjima, yisinke nayi tu vatera tu mu dongwenene po? Gazara sihonena saJoba. Age kwa lizuvhire kukora apa vakaume vendi woyimpempa Elifasa naBilidade naSofara va mu pere usima. (Joba 10:1; 19:2) Moruhura, Jehova kwa piswire vakaume owo woyimpempa. Karunga kwa va tanterere va ze kwaJoba yipo va ka gave nzambo zononzo dawo. (Joba 42:7-9) Nye Jehova ga hepere Joba a rugane sininke simwe. Sininke musinke oso? Jehova kwa hundilire Joba asi a kandererere po vakaume vendi woyimpempa. Joba ga rugene ngamoomu ga mu tanterere Jehova, makura Jehova ga tungikire Joba morwa nkareso zendi zokudongwenena po. (Resa Joba 42:10, 12, 16, 17.) Yisinke natu lirongera ko? Kukanderera po gumwe ogu ana tu handukisa kuvhura yi tu vatere mokudira kutengwida kuwoko.

18, 19. Ngapi natu twikira kunkondopeka rupandu rwetu koyikara yoyiwa yaJehova?

¹⁸ Ayo kutuhafesa kweyi tuna lirongo yoyinzi kuhamena yikara yaJehova. Ose twa lironga asi age ureru kumuhedera, kwato mpongo, ugavi, ugomoki, kuhungika ntani kudongwenena po. Nampili ngoso, simpe yinzi yokulironga kuhamena Jehova. Ose tuna hafa mokukalironga yikara yoyinzi yaJehova narunye nanarunye. (Muud. 3:11) Ose kukwatesa ko mupositoli Paurusa, ogu ga tjenge asi: “Ee, ugawo waKarunga kounzi! Ukonentu wendi nediwo lyendi unzigona!” Kuvhura tu uyunge yokulifana koyikara ntazimwe yaKarunga eyi twa zogera moyirongwa eyi.—Rom. 11:33.

¹⁹ Ngano natuvenye tu twikire kunkondopeka rupandu rwetu koyikara yoyiwa yaJehova! Kuvhura tu yi rugane oyo, pokulironga yikara yendi nokuyilikida nokuyihonena meparu lyetu. (Efe. 5:1, 2) Ngomu tuna kuyirugana oyo, ose ngatu kwatesa ko unene muepisarome ogu ga dimbire asi: “Yoyiwa po kwange ame, yokukara pepi naKarunga!”—Epis. 73:28.