1. (a) Yikara musinke yaJehova ayi wiza momagano goge? (b) Ngapi omu no gwanena mo uwa pokulironga yikara yaKarunga?

APA o gazara kuhamena Jehova, yikara musinke ayi wiza momagano goge? Sinzi setu kugazara eharo nouhungami nounongo ntani nonkondo. Nye, twa yi diva asi Jehova ga kara noyikara yoyinzi yoyiwa. Monomvhura dina ka pita, moyimbapiratjangwa yetu kwa zogera mo yikara yaJehova yokulisiga-siga yokupitakana 40. Nsene o lironga yikara oyo melirongo lyanyamoge ndi lyepata, ngo gwana mauzera gomanzi kuhamena Jehova. Ove ngo nkondopeka rupandu roge koyikara yendi. Moomu rupandu roge kwaJehova runa kunkondopara yimo hena eharo lyoge lyokumuhedera nokumuhonena ngali nkondopara.—Jos. 23:8; Epis. 73:28.

2. (a) Fanekesa omu natu nkondopeka rupandu rwetu koyikara yaJehova. (b) Yisinke natu ka zogera mosirongwa esi neyi yivali nayi ka kwama ko?

² Yisinke ayi tanta kulikida “rupandu” kosininke? Nkango rupandu kutanta asi kudimburura mulyo gosininke. Rupandu rwangoso kunkondopara kanunu-kanunu. Mokuyifanekesa: Ose kuvhura kupameka rupandu rwetu konondya donompe pokufumbwira edumba lyado, nokuhara kudimakera makura tatu di tereke nyamwetu. Mokulifana, ngatu nkondopeka rupandu rwetu koyikara yaKarunga pokuyidiva nawa-nawa nokuyilikida nokuyihonena meparu lyetu. (Efe. 5:1, 2) Sirongwa esi noyirongwa yivali eyi nayi ka kwama ko tayi ka zogera yikara yaKarunga yimwe. Mwankenye sikara, natu ka zogera mapuro aga: Yisinke asi tanta? Ngapi omu Jehova a si likida? Ngapi omu natu honena Jehova mokulikida sikara sangoso?

3, 4. (a) Ngapi no singonona muntu ogu ga kara asi ureru kumuhedera? (b) Ngapi Jehova a likida sikara soureru kumuhedera?

³ Pomuhowo tatu ka zogera sikara esi ureru kumuhedera. Ngapi no singonona muntu ogu ga kara asi ureru kumuhedera? Kuvhura o tante asi: ‘Muntu ogu ga kara nonkenda, ga liwapaikira nkenye apa ntani ureru kuuyunga nage.’ Muntu ogu ga kara asi ureru kumuhedera kuvhura o mu nongwenene mombuuyungiso nemeligumaguro lyorutu ntani nemenya-menyo lyendi.

⁴ Ngapi Jehova a likida sikara soureru kumuhedera? Nampili moomu ga kara asi yige Musiti gwanayinye mouzuni mudima, Jehova ga liwapaikira kutupurakena nokulimburura makanderero getu. (Resa Episarome 145:18; Jesaya 30:18, 19.) Ose kuvhura kuuyunga nendi nkenye siruwo ndi pwankenye evega. Kuvhura tu hedere Jehova nemanguruko, pokudiva asi kapi nga tu nyoka. (Epis. 65:2; Jak. 1:5) Nonkango daKarunga kwa faturura Jehova morupe rosintu, mokulikida asi ana hara tu mu hedere. Pasihonena, Ndafita kwa tjenge asi: “Meho gaHOMPA kwa tara” kwetu. (Epis. 34:15) Muporofete Jesaya kwa fanekesa Jehova komusita, pokutanta asi: “Nga pongaika nonzwigona mokuwoko kwendi a di simbire ponturo zendi.” (Jes. 40:11) Gazadara tupu omu Jehova ana tu harere tu mu hedere pepi ngwendi nzwigona vana simbire ponturo zomusita! Ose twa kara naGuhyetu goureru kumuhedera. Ngapi omu natu honena sikara esi saJehova?

5. Morwasinke ya karera nomulyo kovakuronambunga va kare ureru kuvahedera?

⁵ Nombangi domupampi edi da tunga moyirongo yokulisiga-siga kwa di pulire asi: “Sikara musinke wa hara unene momukuronambunga?” Sinzi sawo kwa limbwilire asi: “Soureru kumuhedera.” Yosili, nkenye Mukriste ga hepa kutunga po sikara esi, nye unene po kwa kara nomulyo  kovakuronambunga va kare ureru kuvahedera. (Jes. 32:1, 2) Mokukumburura ko kweyi ga lizuvhilire ngoso asi sikara esi mulyo, munazinyetukadi kwa tanta asi: “Nsene tupu mukuronambunga ureru kumuhedera, ngatu gwanena mo uwa moyikara yendi yimwe eyi ga kara nayo.” Nonkango odo usili. Nye yisinke ayi ninkisa muntu a kare ureru kumuhedera?

6. Yisinke ya hepa po mokukara ureru kukuhedera?

⁶ Mokukara ureru kukuhedera wa hepa kulikida elituromo lyousili kwava wopeke. Nsene mukuronambunga kupakera sinka wopeke ntani ga kara neharo lyokulizambera, vapuli vakwawo kukwatera mo vanona ngava yi dimburura. (Mar. 10:13-16) Carlos gonomvhura 12 kwa tanta asi: “Apa ani mono omu vakuronambunga womosinyanga vana kumwenya-mwenya nokulikida nkenda, ayo kuhafesa nge.” Yosili, ayo kapi ya gwanena po komukuronambunga mokutanta asi ureru kumuhedera, nye ga hepa kusitura pasirugana. (1 Joh. 3:18) Ngapi na vhura kuyirugana?

7. Morwasinke kudwara kakarata koposigongi aka ninkisire vantu va hare kuzogera nose, ntani sirongwa musinke natu lirongera ko?

⁷ Pasihonena, munazinyetugara pokutunda kosigongi a ze kembo kwa genderere mondira ano kwa dwere kakarata koposigongi. Apa murugani gomondira ga mwene kakarata oko kononkango ‘Uhompa waKarunga a wize!’ age kwa tanterere munazinyetugara asi: “Nhi, u wize, nye twa hepa kuyizogera momunene.” Konyima, va zogerere ntani murugani ga tambwire yifo yetu. Sinzi setu twa ligwanekera noyihorokwa yangoso. Morwasinke kakarata koposigongi aka ninkisire vantu va hare kuzogera nose? Ako ngwendi kutantera vantu asi: “Kara nemanguruko lyokuhedera nge. Pura nge oku nina kuza.” Kakarata koposigongi kuna kara sidiviso sokulikida vantu va dive asi tuna hara kuvatantera ko eyi twa pura. Mokulifana, vakuronambunga woVakriste va hepa kugava sidiviso sokutantera vapuli vakwawo asi: “Kareni nemanguruko lyokuhedera nge.” Yidiviso yimwe musinke oyo?

8. Ngapi omu vakuronambunga nava likida elituromo lyousili kwava wopeke, ntani ngapi ayi kundama mbungakriste?

⁸ Nompo kwa lisiga tunda sirongo zende sirongo, nye narunye apa atu menya-menya komeho zovanavazinyetu nokuvamorora mokuwoko nokuvakunda, ose ngoso kuna kulikida elituromo mwawo. Yilye ga hepa kulikida pomuhowo elituromo? Koneka sihonena saJesus. Mateusa kwa divisa asi pepongo kumwe novarongwa vendi, ‘Jesus ta va hedere, ta uyunga nawo.’ (Mat. 28:18) Mokulifana, naina vakuronambunga va hepa kulikida pomuhowo elituromo lyokuhedera vapuli vakwawo nokuuyunga nawo. Ngapi omu nayi kundama mbungakriste? Munazinyetukadi gomuzuvhisi gokukarerera gonomvhura 88 kwa tanta asi: “Emenyamenyo nekorangedo eli ani gwana kovakuronambunga apa ani hwilire moSinyanga soUhompa kuninkisa nge ni uyunge nawo.” Munazinyetukadi gumwe gomulimburukwi kwa gwederera ko asi: “Kuvhura yi moneke ngwendi sininke sosinunu, nye apa mukuronambunga a tambura nge kepongo kumwe nemenyamenyo, kukundama nge momunene.”

9, 10. (a) Sihonena musinke sosiwa ga tura po Jehova? (b) Ngapi vakuronambunga nava honena Jehova?

 ⁹ Kapi tava vhuru kutuhedera nsene kapi tuna kulitulira po siruwo sokuuyunga nawo. Jehova kuna kara sihonena sosiwa moyuma eyi. Bibeli kutanta asi ‘age kapi ga kara ure nose.’ (Yirug. 17:27) Nkedi zimwe omu vakuronambunga nava honena Jehova kuna  kara pokuuyunga novapuli vakwaawo va kare asi vanona ndi vakondi komeho nokonyima zepongo. Munazinyetugara gomuzuvhisi gokukarerera kwa tanta asi: “Apa mukuronambunga a pura nge mupindu gwange nokupurakena kweyi nina kumulimburura, ame kulizuvha ruhafo.” Munazinyetukadi ogu ga karera Jehova konyara nomvhura 50 kwa tanta asi: “Vakuronambunga ava ava litulire po siruwo va uyunge name konyima zepongo kuninkisa nge ni lizuvhe asi name mulyo.”

¹⁰ Yimo, vakuronambunga va hepa kupakera hena mbili yitumbukira yawo yimwe. Nampili ngoso, komapongo va hepa kulitura po siruwo sokuuyunga novapuli vakwaawo.

11, 12. (a) Yisinke ya hamena mo kudira mpongo? (b) Ngapi Jehova ga kara sihonena kwetu sokudira mpongo?

¹¹ Kudira mpongo kuna kara simwe soyikara yoyiwa yaJehova. Yisinke aku tanta kudira mpongo? Kutanta asi kumanguruka ko kelitondororo ndi kutekura vantu pankedi zehetakano. Kudira mpongo kwa hamena mo maruha gavali: mutaro ntani nonkareso zetu kwava wopeke. Morwasinke maruha ogo ga karera nomulyo? Morwa muntu gokudira mpongo ga kara nomutaro ogu agu mu tumangeda a tekure vantu pankedi zehetakano. MoMatjangwa goRugereka goSikriste, nkango “kapi ga paka mpongo” kutanta asi kapisi “kutara kosipara” ndi kuhara po muntu gumwe kupitakana vakwawo. (Yirug. 10:34) Muntu ogu ga dira kukara nompongo kutekura vantu monkedi zehetakano kapi a tara kemoneko ndi komparukiso zomuntu nye koyikara yendi.

¹² Jehova yige sihonena sosiwa po sokudira mpongo. Nonkango dendi kutanta asi age “kapi ga paka mpongo” ntani asi age “kapi a tara sipara somuntu.” (Resa Yirugana 10:34, 35; Deuteronomium 10:17.) Ukaro ou wa horokere momazuva gaMosesa kwa yi likidire eyi.

13, 14. (a) Udigu musinke va ligwanekerere nawo vana wovakadi vaSerofehadi? (b) Ngapi omu Jehova ga yi likidire asi kwato mpongo?

 ¹³ Komeho tupu Vaisraeli va hwilire moSirongo sEtumbwidiro, vakadi vatano wovadike kwa kere noudigu. Udigu musinke owo? Awo va yi divire asi ngwendi mazimo goVaisraeli vakwawo, nawo ezimo lyawo lya hepere kugwana sirongo soupingwa esi sa tumbukilire guhyawo. (Num. 26:52-55) Nye guhyawo, Serofehadi gemezimo lyaManase kwa fire. Kuliza nompo, ngano vana wovagara vaSerofehadi yiwo va vhulire kugwana sirongo soupingwa, nye age kwa kere tupu novana wovakadi. (Num. 26:33) Kudira kukara novana wovagara wokupinga sirongo, eyi kutanta asi va hepere kugava sirongo kovanekoro nokusiga vana vendi wovakadi va hana upingwa ndi?

¹⁴ Vakadi owo kwa hederere Mosesa nokumupura asi: “Nampili moomu ga dilire  kusiga ko kana kokagara, yiyo nye na lizumbanena edina lyawo mezimo lyawo ndi?” Awo kwa hundilire asi: “Tu pa ugawo wemekoro lyaguhyetu.” Mosesa ga limbwilire nye asi, ‘kapi pwa kara veta zangoso ndi’? Hawe, nye age kwa ‘twere nonkango dawo kwaHOMPA.’ (Num. 27:2-5) Ngapi ga limbwilire Jehova? Jehova kwa tanterere Mosesa asi: “Eyi vana pura vana wovakadi vaSerofehadi youhunga. Va pa ugawo wemekoro lyaguhyawo. Ninka upingwa waguhyawo u kare wawo.” Ntani hena, Jehova ga gwederere ko pokutantera Mosesa asi: “Nsene mugara ta fu ga hana kusiga ko konauzuni kana kokagara, munwendi gomukadi yige na pinga ugawo wendi.” (Num. 27:6-8; Jos. 17:1-6) Kutundilira opo, Vaisraeli navenye wovakadi ava va ligwanekerere noukaro wangoso kwa gwene upingwa.

15. (a) Ngapi omu Jehova a tekura vakareli vendi nampili vakadi? (b) Yihorokwa musinke yimwe yomoBibeli ya likida asi Jehova kwato mpongo?

¹⁵ Ee, etokoro musi lyewa lyokudira mpongo! Jehova kwa tekwire nefumadeko vakadi owo vatano, ngwendi moomu ga tekwire Vaisraeli navenye. (Epis. 68:5) Esi kuna kara simwe soyihorokwa yoyinzi moBibeli eyi ayi likida usili ou asi Jehova kutekura vakareli vendi navenye ga hana mpongo.—1 Sam. 16:1-13; Yirug. 10:30-35, 44-48.

16. Ngapi natu dira kukara nompongo ngwendi Jehova?

¹⁶ Ngapi natu honena Jehova mokudira kukara nompongo? Diworoka asi kudira kukara nompo kwa hamena mo yininke yivali. Nsene kapi twa kara nompongo ngatu tekura vakwetu pwa hana mpongo. Yimo, nampo natuvenye kuligazara asi kapi twa paka mpongo. Poyiruwo yimwe udigu kudiva omu atu lizuvhu kuhamena wopeke. Yisinke twa hepa kurugana mokudiva nsene asi kapi twa paka mpongo? Apa Jesus ga here kudiva eyi ngava uyunga vantu kumuhamena, age kwa pulire vakaume vendi wokuhuguvara asi: “Ngapi omu ava gazara vantu MunwaMuntu, asi yigelye?” (Mat. 16:13, 14) Nose kuvhura tu mu honene. Kuvhura o pure kaume koge gumwe ogu wa huguvara a ku tantere nsene asi kapi wa paka mpongo. Nsene na ku tantera asi wa kara noyikara yimwe yelitondororo, yisinke wa hepa kurugana? Kanderera kwaJehova kuhamena malizuvho goge nokumulikwambera a ku vatere o wapukurure nkareso zoge yipo o honene sikara sendi sokudira mpongo.—Mat. 7:7; Koros. 3:10, 11.

17. Mononkedi musinke natu tekura wopeke twa hana mpongo?

 ¹⁷ Mombungakriste, ose kulikida eharo lyetu lyokuhonena Jehova mokudira mpongo pokutekura vanavazinyetu navenye monkedi zonkenda zefumadeko. Pasihonena, pokutambura vagenda tuna hara kuzigida vapuli vakwetu navenye, kukwatera mo worudi rwapeke ntani nonohepwe nononsigwe novafisavaya vawo. (Resa Vagarata 2:10; Jakopo 1:27.) Moyirugana yokuzuvhisa yoUhompa, ose kuzuvhisira mbudi zongwa vantu navenye twa hana mpongo, kukwatera mo vanayirongo. Ayo kutuhafesa mokukara noyimbapiratjangwa yoBibeli momaraka konyara 600. Ee, umbangi musi wokupama wokulikida asi ose kwato mpongo!

18. Ngapi no yi likida asi wa kara norupandu kosikara saJehova soureru kumuhedera nesi sokudira mpongo?

¹⁸ Yosili, ngomu tuna kulitulira po siruwo sokuteda ko omu Jehova ga kara ureru kumuhedera nokudira mpongo, rupandu rwetu kwendi ngaru nkondopara. Ngomu rupandu rwetu runa kunkondopara yimo hena ngayi tu tumangeda tu honene yikara yaJehova nokuyilikida meruganeno lyetu kumwe novapuli vakwetetu ntani nowo atu zuvhisire.