Nampili ngomu buke zEhororo za dira kugava siruwo esi nawa-nawa va mu zugumine mo Satana, nye za tumbura yihorokwa yokulisiga-siga eyi nayi tu vatera tu ngungunyikire siruwo esi va mu zumine mo meguru. Sihorokwa sokuhova kuna kara etulisopo lyoUhompa woUmesiyasa. Konyima zoyo, ‘meguru kwa kere mo yita,’ eyi ya twaredesere Satana va mu funde nokumuzuguma mo.

Matjangwa kwa likida 1914 ngomvhura ezi sa ‘hege siruwo sovapagani’ ntani va tulisire po Uhompa. * (Ruk. 21:24) Kutundilira opo, siruwoke ya sikamene yita meguru eyi ya twaredesere Satana va mu zugume mo?

Ehororo 12:4 kutanta asi: ‘Satana kwa sikeme komeho zomukadi ana kuhara kuhampuruka, asi nkumwe a mine munona, nsene nava mu hampuruka.” Eyi kulikida asi Satana kwa here kuzonagura po Uhompa, posiruwo esi tupu va u tulisire po. Nampili ngomu Jehova ga lihamekere mo a kondere Satana kegano lyendi lyedona, Satana kwa tokomenene kuzonagura po etulisopo lyoUhompa woupe. Yipo nye, “Mikayera novaengeli vendi” va zugumine mo “emukongoro novaengeli valyo” meguru yipo va popere Uhompa. Eyi kulikida asi efundo nezugumo lyaSatana meguru kwa horokere konyima tupu zapa va tulisire po Uhompa momvhura 1914.

Sininke simwe twa hepa kutarurura kuna kara evhumbuko lyoVakriste wovagwavekwa, eli lya tamekere konyima tupu zapa va tulisire po Uhompa ngomu zaga likida maumbangi gomoMatjangwa. * (Ehor. 20:6) Mokumona asi kwato mumbyaKristusa gomugwavekwa va tumbura asi ga lipakerere naJesus mokurwisa emukongoro novaengeli valyo, yita yemeguru nezugumo mo lyaSatana novaengeli vendi wovadona kulikida asi kwa hovere kuhoroka ntani kuna kukwama evhumbuko lyovamumbya vaKristusa.

Bibeli kapi za horora nawa-nawa siruwo esi va zugumine mo Satana novaengeli vendi meguru. Nye, eyi ya zera asi sihorokwa esi kwa horokore tupu konyima zokutumba Jesus Kristusa a kare Hompa meguru momvhura 1914.

Mupositoli Peturusa kwa singwenene nompepo odo asi ‘dava va dilire kulimburukwa, apa ga va zavererere Karunga ava va ndindilire momazuva gaNowa.’ (1 Pet. 3:20) Peturusa kwa tembe kovaengeli ava va lipakerere naSatana mourwanesi. Juda kwa tumbura vaengeli ava va “lizoneserere urenga wawo, va zumbe uhungiro wawo,” pokutanta asi Karunga “kwa va manga nomalyenge ganarunye, yiyo ga va tura mosirongo sokonhi, va ndindire Ezuva lyenene lyoMpanguro.”—Juda 6.

Monkedi musinke omu nompepo da dilire kulimburukwa momazuva gaNowa? Komeho zoRuhanzo, nompepo ndi vaengeli owo kwa gusire marutu govantu, sininke esi sa lilimba nositambo saKarunga. (Gen. 6:2, 4) Ntani hena, vaengeli owo kwa ya ligwanekerere panyama novakadi, yininke eyi ya dira kuvafira. Karunga kapi ga sitire vaengeli asi va ligwanekerere panyama novakadi. (Gen. 5:2) Vaengeli owo wokudira kulimburukwa nga ka va zonagura po Karunga posiruwo esi ga horowora. Ano ngesi, ngwendi moomu va yi tjanga mobuke zaJuda, awo kwa va “tura mosirongo sokonhi,” modorongo zopampepo.

Siruwoke ntani ngapi Jesus ga udisilire ‘nompepo odo domodorongo’? Peturusa kwa tjanga asi eyi kwa horokere konyima zapa Jesus va mu “pindwire koufe pampepo.” (1 Pet. 3:18, 19) Koneka asi Peturusa kwa tanta asi Jesus kwa “udisire.” Peturusa mokuruganesa siruwo sanare kuna kulikida asi kuudisa oko kwa horokere komeho Peturusa a tjange mbilive zendi zokuhova. Kumoneka asi konyima zevhumbuko lyendi, Jesus kwa divisire konompepo donondona kuhamena mpanguro zado ezi zina kudindindira. Kapi lya kere eudiso lyokugava ehuguvaro. Alyo kwa kere eudiso lyompanguro. (Jona 1:1, 2) Mokumona asi Jesus ga likidire epuro noulimburukwi dogoro konomfa nekevhumbuko lyendi, eyi kulikida asi Muzonaguli kapi ga kere nononkondo kwendi. Yipo Jesus ga karerere nononkondo dokudivisa mpanguro ozo.—Joh. 14:30; 16:8-11.

Komeho, Jesus nga ka manga Satana novaengeli owo nokuvazugumina mosirongo sokonhi. (Ruk. 8:30, 31; Ehor. 20:1-3) Dogoro posiruwo oso, nompepo odo dokudira kulimburukwa kuna kara modorongo zopampepo makura konyima tava ka di zonagura po narunye.—Ehor. 20:7-10.