1-3. Singonona omu Jesus ga kutikire mayovi govantu momukunda gwaBetesaida. (Tara efano.)

HETEKA kumona sihorokwa esi momagano goge. (Resa Mateusa 14:14-21.) Komeho tupu zoPentekoste momvhura 32, mayovi gatano govagara, nsene o dira kuvarura ko vakadi novanona, kwa kweme Jesus novarongwa vendi kevega lyomaporeza momukunda gwaBetesaida, ogu gwa kere korwaMuzogo gwEfuta lyaGalireya.

² Apa ga mwene mbunga, Jesus ta zi fire nkenda makura ta verura vaveli vawo nokuvaronga yininke yoyinzi kuhamena Uhompa waKarunga. Apa lya gombokere, varongwa tava tumangeda Jesus a sige vantu va ze komambo va ka rande nondya. Nye Jesus ta tantere varongwa vendi asi: “Nyone nomu va pa sakulya va lye.” Nonkango dendi kwa piyaganekere varongwa, morwa nondya nononunu, ado kwa kere tupu nonomboroto ntano nonomfi mbali.

³ Morwa kuvafira nkenda, Jesus kwa rugene sitetu, sitetu esi selike va tjanga moMavangeli nagenye gane. (Mar. 6:35-44; Ruk. 9:10-17; Joh. 6:1-13) Jesus kwa tanterere varongwa vendi va ninke vantu va hingire powayi motumbunga tomafere-mafere nonomurongo ntano-ntano. Konyima zokupandura Guhwe, ta tetagura nomboroto nonomfi. Mevango lyokudipa mwene vantu, Jesus ta di pe “varongwa vendi va di gavere kovantu.” Vantu navenye kwa lire tava kuta! Gazara tupu: Jesus kwa kutikire mayovi kupitira movarongwa vendi wovasesu. *

4. (a) Nondya musinke Jesus ga kere nado nosinka sosinene, ntani morwasinke? (b) Yisinke natu ka zogera mosirongwa esi nesi sokukwama ko?

⁴ Jesus kwa kere nosinka sosinene kuhamena kugava nondya dopampepo kovasikuli vendi. Age ga yi divire asi kulya nondya dopampepo, mausili gomoNonkango  daKarunga, kutwaredesa komwenyo gwanarunye. (Joh. 6:26, 27; 17:3) Nampili ngomu ga fililire mbunga nkenda nokuvapa mboroto nonomfi nye Jesus kwa ruganesere novili dononzi mokuronga vasikuli vendi. (Mar. 6:34) Ntani age ga divire asi siruwo sendi pevhu sisupi ntani asi nga tengura meguru. (Mat. 16:21; Joh. 14:12) Ngapi omu Jesus ga twikira kupa vasikuli vendi nondya dopampepo age meguru? Age ga ruganesa nkedi zokulifana, kutika wovanzi kupitira mwava wovasesu. Wolye owo wovasesu? Tu konakoneni omu Jesus ga ruganesere wovasesu mokukutika vasikuli vendi wovanzi wovagwavekwa mosiruwo sovapositoli. Makura, mosirongwa sokukwama ko ngatu ka zogera epuro eli lyomulyo asi: Ngapi natu dimburura wovasesu omu ana kutukutikira naina Kristusa?

5, 6. (a) Etokoro musinke lyomulyo ga tulire po Jesus yipo a divilise asi vasikuli vendi va va pakere mbili pampepo konyima zonomfa dendi? (b) Ngapi omu Jesus ga wapaikilire vapositoli vendi kosirugana somulyo esi va ya rugene konyima zonomfa dendi?

⁵ Nturagumbo gonondunge kutura po mawapaiko yipo epata lyendi ngava li pakere mbili apa nga fa. Mokulifana, Jesus Mutwe gombungakriste kwa tura po mawapaiko a divilise asi vasikuli vendi va va pakere mbili pampepo konyima zonomfa dendi. (Efe. 1:22) Pasihonena, konyara nomvhura mbali komeho a ka fe, Jesus kwa tulire po etokoro lyomulyo. Age kwa horowere wokuhova mowo wovasesu omu nga kutikire wovanzi. Tu zogereni eyi ya horokere.

⁶ Konyima zokukanderera masiku nagenye, Jesus kwa pongaikire varongwa vendi nokuhorowora mo vapositoli 12. (Ruk. 6:12-16) Monomvhura mbali odo, age kwa tulisire po ukaume wounene nowo 12, pokuvaronga kupitira mononkango nomosihonena. Age ga divire asi awo va hepere kulironga yoyinzi; ntani nga twikire kuvatumbura asi “varongwa.” (Mat. 11:1; 20:17) Age ga va pere mapukururo gomulyo nokuvadeura mosirugana sokuzuvhisa. (Mat. 10:1-42; 20:20-23; Ruk. 8:1; 9:52-55) Yosili, age kwa va wapaikilire kosirugana somulyo esi va ya rugene konyima zonomfa dendi napa ga ya tengwire meguru.

7. Ngapi omu Jesus ga geve mauzera kuhamena sinka sosinene esi va ya kere naso vapositoli?

⁷ Sirugana musinke sa ndindilire vapositoli? Ngomu Pentekoste momvhura 33 za hederere pepi, ayo ya lilikidire nawa-nawa asi vapositoli ngava kara nosirugana sokupitisira. Nye sinka musinke sosinene va ya kere naso? Konyima zevhumbuko lyendi, Jesus ga va pere mauzera kupitira monzogera zendi nomupositoli Peturusa. (Resa Johanesa 21:1, 2, 15-17.) Moyitarameho yovapositoli vakwawo, Jesus kwa tanterere Peturusa asi: “Lisa nonzwi dange.” Jesus apa kwa yi likidire asi movapositoli vendi wovasesu tupu yiwo ngava gava nondya dopampepo kwava wovanzi. Eyi kwa likidire omu Jesus a lizuvhu kuhamena “nonzwi” dendi. *

8. Ngapi omu vapuli wovape poPentekoste va yi likidire asi va dimbwilire nkedi ezi ga ruganesere Kristusa?

⁸ Kutamekera poPentekoste momvhura 33, Kristusa kwa ruganesere vapositoli vendi mokukutika varongwa vendi wovagwavekwa wokuhupa ko. (Resa Yirugana 2:41, 42.) Nkedi ozo va zi dimbwilire Vakriste wovagwavekwa  woVajuda novapagani. Va hana kulikata-kata, awo makura “tava ligava mo merongo lyovapositoli.” Vapuli wovape kwa kere nonzara zonondya dopampepo ntani va divire oku nava di gwana. Nehuguvaro lyokupama, awo kwa ndindilire vapositoli va va fatwilire nonkango noyirugana yaJesus ntani nokuvavatera va kwate egano nontanto domatjangwa aga ga uyunga kumuhamena. *—Yirug. 2:22-36.

9. Ngapi omu vapositoli va twikilire kudemenena kositumbukira sawo sokulisa nonzwi daJesus?

⁹ Vapositoli va twikilire kudemenena kositumbukira sawo sokulisa nonzwi daJesus. Pasihonena, koneka omu va kohwenene po udigu ou wa horokere mombungakriste zompe. Udigu owo kwa hamenene konondya. Vafisavayavawo woVagereka kapi va va tere eho nye kwa pakerere tupu mbili woVahebeli. Ngapi omu vapositoli va kohwenene po udigu ou? “Owo murongo navavali” kwa horowore vagara vatano-navavali wonkedi zongwa va va ture “moyirugana” yokutoporora nondya. Vapositoli ava va lihamekere mo mokugavera nondya mbunga zina ga kutikire Jesus pasitetu, va yi mwene asi yomulyo po kwawo yokudemenena kokugava nondya dopampepo. Eyi yiyo va litulilire mo unene ‘mokuudisa nonkango daKarunga.’—Yirug. 6:1-6.

10. Ngapi omu Kristusa ga ruganesere vapositoli novakurona womoJerusarema?

¹⁰ Koyiha yomvhura 49, vakuronambunga vamwe kwa ya lipakerere novapositoli ava va kere simpe vazuni. (Resa Yirugana 15:1, 2.) ‘Vapositoli novakurona womoJerusarema’ kwa kere mbungagendesi. Mutwe gombungakriste, Kristusa kwa ruganesere mbungagona zovagara wokuwapera va kohonone po nompata dokuhamena komarongo nokupitisira nokugendesa sirugana sokuzuvhisa mbudi zongwa zoUhompa nokuronga.—Yirug. 15:6-29; 21:17-19; Koros. 1:18.

11, 12. (a) Yisinke yina kulikida asi Jehova ga tungikire nkedi ezi nga ruganesere Munwendi mokukutika nombungakriste domosiruwo sina? (b) Ngapi nkedi ozo ga ruganesere Kristusa va zi dimbwilire?

¹¹ Jehova ga tungikire ewapaiko omu Munwendi ga kutikilire nombungakriste domosiruwo sina ndi? Nhi! Ngapi omu tuna yi diva? Buke zoYirugana kudivisa asi: “Va gendagura ngoso moyitata,  tava gava nompangera edi va penge vapositoli novakurona moJerusarema, tava va tantere asi ava di sikise mo. Nombungakriste kwa di korekere mepuro, tadi kuru nkenye ezuva.” (Yirug. 16:4, 5) Koneka asi nombungakriste odo kwa kulire morwa kuruganena kumwe nombungagendesi zomoJerusarema. Owo kuna kara umbangi wetungiko lyaJehova konkedi ezi nga ruganesa Munwendi mokukutika nombungakriste. Tu diworokeni asi ekuro lyopampepo kutompoka tupu metungiko lyaJehova.—Yis. 10:22; 1 Kol. 3:6, 7.

¹² Tuna mono asi Jesus kwa ruganesere nkedi zimwe apa ga kutikire vasikuli vendi: Age kwa kutikire wovanzi kupitira mwava wovasesu. Nkedi ezi ga ruganesere zokukutika pampepo kwa zi dimbwilire. Vapositoli, vahameni wombungagendesi zokuhova, va vhulire kugava umbangi asi eyi va rugene yokutunda kwaJehova. Yirugana 5:12 kwa tanta asi: “Vapositoli kwa ruganene yidiviso noyitetu yoyinzi mokatji kovantu.” * Makura kapi pwa kere konda kowo va ya kere Vakriste va lipure asi: ‘Wolye nawa-nawa ava ana kuruganesa Kristusa mokukutika nonzwi dendi?’ Nye kehagero lyosiruwo sovapositoli, ukaro kwa rundurukire.

13, 14. (a) Erondoro musinke ga geve Jesus kuhamena ehomono, ntani siruwoke da sikire mo nonkango dendi? (b) Kupi ga tundilire mahomono? (Tara mauzera gamwe.)

¹³ Jesus kwa pumbire asi mbungakriste ngava zi homona. Diworoka asi mouporofete wendi wosifanekeso soyilya nomau, Jesus kwa rondwere asi mombuto zompe zoyilya zemepya (Vakriste wovagwavekwa) ngava kuna mo mau (Vakriste woyimpempa). Age kwa tente asi va yi sige yi kulire simwe dogoro nokokuteza-teza, eyi ngayi horoka ‘pouhura wouzuni.’ (Mat. 13:24-30, 36-43) Kapi pwa pitire siruwo sosire nonkango daJesus yipo da sikire mo. *

¹⁴ Mosiruwo sovapositoli, varwanesi usili kwa tamekere kupukisa, nye vapositoli vaJesus wovalimburukwi ava va kere ngwendi “yilimbika,” kwa nyokerere po epukiso olyo nomarongo goyimpempa. (2 Tes. 2:3, 6, 7) Apa va fire vapositoli, varwanesi usili kwa tamekere kupukisa nokuligwederera monomvhura dononzi. Ntani mosiruwo sina, mau kwa ya kere gomanzi ano yilya kwa kere yoyisesu. Kapi pwa kere mbunga ezi ngazi kovekeda kugava nondya dopampepo. Ano eyi ya ya rundurukire. Siruwoke?

15, 16. Yitundwamo musinke lya retere ekonakono lyoMatjangwa lyoValirongi woBibeli, ntani epuro musinke natu lipura?

¹⁵ Ngomu siruwo somuzangu sa kere pepi, pwa kere vamwe ava va litulire mo mousili woBibeli. Diworoka asi koyiha yomvhura 1870, kambungagona kovapapali usili kwa lipakererere kumwe nokutulisa po elirongo lyoBibeli mokuligusa ko komau, Vakriste woyimpempa. Valirongi woBibeli wokulinunupika ngava kanderere nokukonakona Matjangwa.—Mat. 11:25.

¹⁶ Ekonakono lyoMatjangwa lyoValirongi woBibeli kwa retere yitundwamo yoyiwa. Vagara novakadi owo wovalimburukwi kwa tulire poruzera marongo goyimpempa nokudivisa usili nokupwagesa yimbapiratjangwa yoBibeli nokuyihanesa nakunye. Sirugana sawo kwa kundamene nomutjima dovantu wovanzi ava va kere nonzara nenota kousili. Kuvhura tu lipure asi: MowoValirongi  woBibeli yimo Kristusa nga kutikire nonzwi dendi monomvhura edi da twaredesere komvhura 1914 ndi? Hawe. Awo kwa kere mosiruwo sekuro, ntani ngendeseso zokugava nondya dopampepo kwa kere simpe mewapaiko. Siruwo sokuhangura Vakriste woyimpempa ndi mau koVakriste wousili ndi yilya kapi sa sikire mo simpe.

17. Yihorokwa musinke yomulyo ya tamekere kuhoroka 1914?

¹⁷ Ngomu twa lirongere mosirongwa sa ka pita, siruwo somuzangu kwa tamekere 1914. Momvhura ozo, yihorokwa yoyinzi yomulyo kwa tamekere kuhoroka. Jesus kwa mu tumbire ngaHompa, ntani mazuva gopouhura yipo ga tamekere. (Ehor. 11:15) Kutundilira 1914 dogoro ketamekero 1919, Jesus noGuhwe kwa ya konakonene ntembeli zopampepo nokuyazizeresa. * (Mara. 3:1-4) Momvhura 1919, siruwo sokupongaika yilya yipo sa tamekere. Aso kwa kere siruwo kwaKristusa mokutumba ava nava gava nondya dopampepo ndi? Yimo!

18. Yisinke ga pumbire Jesus mouporofete wendi wokuhamena mazuva gopouhura, ntani epuro musinke lyomulyo ya retesere po?

¹⁸ Mouporofete wendi wokuhamena mazuva gopouhura, Jesus kwa pumbire asi nga tumba ava ngava gava nondya dopampepo “posiruwo sado.” (Mat. 24:45-47) Nkedi musinke nga ruganesa? Nkedi ezi nga ruganesa mosiruwo sovapositoli yizo hena ana kuruganesa mokukutika wovanzi kupitira mwava wovasesu. Nye epuro lyomulyo kwa kere asi: Wolye owo wovasesu? Epuro olyo nagamwe hena kuhamena uporofete waJesus ngava ka ga zogera mosirongwa sokukwama ko.