1. Ngwendi vapositoli, yisinke tuna hara kudiva?

SIRUGANA saJesus sokuzuvhisa kwa kere pepi nokuhaga, ano varongwa vendi kwa here kudiva eyi yina kuvandindira komeho. Mazuva gongandi ko tupu komeho a ka fe, vapositoli vendi vane kwa mu pulire asi: “Ezuvake ngayi horoka yene eyi? Sidiviso sewizo lyoge nesi souhura wouzuni sipi so?” (Mat. 24:3; Mar. 13:3) Jesus kwa limbwilire kupitira mouporofete ou wa kara mwaMateusa megaununo 24 ntani 25. Mouporofete owo, Jesus kwa pumbire yihorokwa yoyinzi yomulyo. Nonkango dendi kuna kara nomulyo kwetu morwa nose tuna hara kudiva eyi yina kutundindira komeho.

2. (a) Monomvhura nadinye edi, yisinke twa here kukwata nawa egano? (b) Mapuro musinke gatatu natu ka konakona?

² Monomvhura nadinye edi, vakareli vaJehova kwa konakona momunene uporofete waJesus kuhamena mazuva gopouhura. Awo kwa here kukwata nawa egano kuhamena siruwo sesikiliromo lyononkango daJesus. Mokulikida omu ekwatogano lyetu va li wapukurura, tu konakoneni mapuro gatatu aga asi: Ezuvake ngau tameka “udigu wounene”? Ezuvake Jesus nga hangura “nonzwi koyikombo”? Ezuvake Jesus nga “wiza” ndi nga tengura?—Mat. 24:21; 25:31-33.

3. Pwanare, ngapi omu twa kwete egano siruwo soudigu wounene?

³ Pwanare, ose kwa gazarere asi udigu wounene kwa tamekere 1914 poYita yoPomuhowo yoUzuni ntani asi Jehova kwa ‘supipikire’ yita yi hage 1918 yipo yihupwa yovagwavekwa va gwane mpito zokuzuvhisa mbudi zongwa konomuhoko nadinye. (Mat. 24:21, 22) Apa ngasi pwa sirugana sokuzuvhisa, epangero lyaSatana ngava li zonagura po. Yipo nye, ose kwa gazarere asi udigu wounene kwa kara momaruha gatatu: Ngano ngau tameka (1914-1918), ngano ngava u supipika (kutundilira  1918 yi tware komeho), ntani ngano ngau haga poHarumagedoni.

4. Yisinke ya twaredesa kekwatogano lyouporofete waJesus kuhamena mazuva gopouhura?

⁴ Mokukonakona momunene uporofete waJesus, ose twa yi nongonona asi uporofete waJesus kuhamena mazuva gopouhura kwa kara nomasikiliromo gavali. (Mat. 24:4-22) Pwa kere esikiliromo lyokuhova moJudeya momazuva govapositoli, ntani ngapa kara esikiliromo mouzuni mudima momazuva getu. Ekwatogano eli kutwaredesa komafatururo gongandi. *

5. (a) Yisinke ya tamekere 1914? (b) ‘Udigu’ owo kwa lifana nosiruwo musinke somomazuva govapositoli?

⁵ Twa nongonona hena asi ruha rokuhova roudigu wounene kapi rwa tamekere 1914. Morwasinke? Morwa uporofete woBibeli kwa horora asi udigu wounene ngau tameka nehomokero lyomaukarelikarunga goyimpempa, nye kapisi noyita yonomuhoko. Yipo nye, yihorokwa eyi ya tamekere 1914 kwa kere ‘ngwendi ntundiliro zezegamo ndi zoudigu,’ nye kapisi etameko lyoudigu wounene. (Mat. 24:8) ‘Udigu’ owo kwa lifana nou wa horokere moJerusarema nomoJudeya kutundilira momvhura 33 dogoro momvhura 66.

6. Sidiviso musinke ngasi likida etameko lyoudigu wounene?

⁶ Sidiviso musinke ngasi likida etameko lyoudigu wounene? Jesus kwa pumbire asi: “Ngomu mona ezonauko lyedona mevango lyokupongoka, eli ga uyungire muporofete Ndaniyera, gokuyiresa a yi kwate egano. Makura ava va kara moJudeya, ngava tjilire konondundu.” (Mat. 24:15, 16) Esikiliromo lyokuhova, kwa horokere momvhura 66, apa vakwayita woVaroma (“ezonauko lyedona”) va homwene Jerusarema nontembeli zazo (ezi ngava tara Vajuda asi ‘evango lyokupongoka’). Esikiliromo lyenene ngali horoka apa mbunga zElipakerero lyoNomuhoko (“ezonauko lyedona” lyomomazuva getu) ngazi homokera nongereka doyimpempa (edi adi moneka asi kwa pongoka kwava ava litumbura asi  Vakriste) ntani noBabironi Zonene. Ehomokero lyokulifana kwa li singonona mEhororo 17:16-18. Sihorokwa esi ngasi kara etameko lyoudigu wounene.

7. (a) Ngapi omu va ‘yowerere’ nomwenyo dovantu momazuva govapositoli? (b) Yisinke natu vhura kundindira ngayi horoka komeho?

⁷ Jesus kwa pumbire asi: ‘Mazuva ogo Karunga nga ga supipika.’ Mesikiliromo lyokuhova, eyi kwa horokere momvhura 66, apa vakwayita woVaroma va ‘supipikire’ ehomono lyawo. Makura Vakriste wovagwavekwa womoJerusarema nomoJudeya yipo va tjwayukire va ‘yoworore’ nomwenyo dawo. (Resa Mateusa 24:22; Mara. 3:17) Yisinke natu vhura kundindira eyi ngayi horoka posiruwo soudigu wounene? Jehova nga ‘supipika’ ehomono lyombunga zElipakerero lyoNomuhoko komaukarelikarunga goyimpempa, pokudira kupulisira ukareli wousili va u zonagure po kumwe nou woyimpempa. Eyi kutupa ehuguvaro asi vantu vaKarunga ngava yoworoka.

8. (a) Yihorokwa musinke ngayi horoka apa ruha rokuhova roudigu wounene ngaru pita? (b) Siruwoke vagwavekwa ava ngava kara pevhu konyima zetameko lyoudigu wounene ngava va twara meguru? (Tara mauzera gamwe.)

 ⁸ Yisinke ngayi horoka apa ruha rokuhova roudigu wounene ngaru pita? Nonkango daJesus kwa likida asi ngapa kara siruwo esi ngasi twaredesa dogoro ketameko lyaHarumagedoni. Yihorokwa musinke ngayi horoka mosiruwo oso? Elimbururo kuligwana mwaHesekiyeli 38:14-16 ntani mwaMateusa 24:29-31. (Resa.) * Konyima zoyo, ose ngatu mona Harumagedoni, ehagero lyoudigu wounene, ou wa lifana nezonauko lyaJerusarema lyomomvhura 70. (Mara. 4:1) Harumagedoni ngazi kara sihorokwa ‘esi sa dira kukara po kutunda ketameko lyouzuni.’ (Mat. 24:21) Apa ngazi pita, Epangero lyoNomuvho Eyovi lyaKristusa ngali tameka.

9. Ngapi omu uporofete waJesus wokuhamena udigu wounene au kundama vantu vaJehova?

⁹ Uporofete ou wokuhamena udigu wounene kutunkondopeka. Morwasinke?  Morwa kutupa ehuguvaro asi yi kare asi maudigu musinke natu ligwanekera nago, vantu vaJehova ngombunga ngava pita mo moudigu wounene. (Ehor. 7:9, 14) Ose ngatu hafa morwa poHarumagedoni, Jehova nga hungameka upangeli wendi nokupongora edina lyendi.—Epis. 83:18; Hes. 38:23.

10. Pwanare, ngapi omu twa kwete egano siruwo sokuhangura nonzwi koyikombo?

¹⁰ Ngesi tu konakoneni uporofete umwe hena waJesus, wosifanekeso sokuhangura nonzwi koyikombo. (Mat. 25:31-46) Pwanare, ose kwa gazarere asi kuhangura vantu ngononzwi ndi ngoyikombo ngano kwa tamekere mosiruwo somazuva gopouhura kutundilira 1914 yi tware komeho. Ntani kwa gazarere asi owo va nyokere mbudi zoUhompa ntani ava va fire komeho udigu wounene u tameke awo ngwendi yikombo, kwato ehuguvaro lyevhumbuko.

11. Morwasinke ehanguro lyovantu ngononzwi ndi ngoyikombo lya dilire kutameka 1914?

¹¹ Koyiha 1990, vatjangi woRuhungu kwa konakonene hena Mateusa 25:31, ezi azi tanta asi: “Apa nga wiza MunwaMuntu mouyerere wendi kumwe novaengeli vendi, ntani nga hingira posipundi souyerere wendi.” Awo kwa ya nongwenene asi Jesus kwa ya kere Hompa goUhompa waKarunga 1914, nye kapi ga ‘hingilire posipundi souyerere wendi’ ngoMupanguli ‘gonomuhoko nadinye dovantu.’ (Mat. 25:32; hetakanesa Ndaniyera 7:13.) Nye, sifanekeso sononzwi noyikombo kwa singonona Jesus ngoMupanguli. (Resa Mateusa 25:31-34, 41, 46.) Mokumona asi Jesus kapi ga kere Mupanguli gonomuhoko dovantu 1914, ehanguro lyendi lyovantu ngononzwi ndi ngoyikombo kapi lya tamekere momvhura ozo. * Ezuvake Jesus nga tameka kuhangura?

12. (a) Siruwoke Jesus nga rugana ko yuma ngoMupanguli gonomuhoko nadinye? (b) Yihorokwa musinke va singonona mwaMateusa 24:30, 31 ntani mwaMateusa 25:31-33, 46?

 ¹² Uporofete waJesus kuhamena mazuva gopouhura kuhorora asi sikando sokuhova nga rugana ko yuma Jesus ngoMupanguli gonomuhoko nadinye kuna kara konyima tupu zapa ngava zonagura po maukarelikarunga goyimpempa. Ngomu vana yi tumbura  moparagarafu 8, yihorokwa yimwe eyi ngayi horoka mosiruwo oso kwa yi tumbura mwaMateusa 24:30, 31. Apa no konakona novelise odo, no ka dimburura asi Jesus opo kwa pumbire yihorokwa yokulifana neyi ga tumbura mosifanekeso sononzwi noyikombo. Pasihonena, MunwaMuntu nga wiza mouyerere wendi kumwe novaengeli vendi; nomuhoko nadinye dovantu ngava di pongaika; ava ngava hangura ngononzwi ‘ngava kankura nomutwe dawo’ morwa kundindira ‘mwenyo gwanarunye.’ * Ano ava ngava hangura ngoyikombo “ngava kara mononkali,” pokunongonona asi kuna kuvandindira ‘ruhepo rwanarunye.’—Mat. 25:31-33, 46.

13. (a) Ezuvake Jesus nga hangura vantu va kare nonzwi ndi yikombo? (b) Ngapi ekwatogano olyo ali kundama omu atu tara sirugana setu sokuzuvhisa?

¹³ Ngesi ngapi kuhamena ekwatogano lyetu? Jesus apa nga wiza posiruwo soudigu wounene nga hangura vantu wonomuhoko nadinye ngwendi nonzwi koyikombo. Makura poHarumagedoni, ehagero lyoudigu wounene, ava va kara ngwendi yikombo ngava za “moruhepo rwanarunye.” Ngapi ekwatogano olyo ali kundama mutaro gwetu kuhamena sirugana setu sokuzuvhisa? Alyo nali tu vatera tu mone mulyo gosirugana setu sokuzuvhisa. Dogoro udigu wounene ngau ka tameke, vantu simpe vana kara nosiruwo sokurundurura magazaro gawo nokutameka kugenda monzira “ezi azi twara komwenyo.”  (Mat. 7:13, 14) Yosili, vantu ngesi kuvhura va likide nkareso zononzwi ndi zoyikombo. Nye, twa hepa kudiworoka asi mpanguro zokuhulilira kwava va fana ngwendi nonzwi ndi yikombo ngazi ka horoka poudigu wounene. Yipo nye tuna karere nokonda zongwa zokutwikira kugava mpito kovantu wovanzi va purakene nokutambura mbudi zoUhompa.

14, 15. Novelise musinke ne da tamba kewizo lyaJesus lyokomeho goMupanguli?

 ¹⁴ Ngoso kukonakona momunene uporofete waJesus kulikida asi ekwatogano lyetu lyokuhamena siruwo soyihorokwa yimwe yomulyo twa hepa kuliwapukurura ndi? Uporofete wene nau ka gava elimbururo. Tu zeni tu ka tare.

¹⁵ Mouporofete wendi ou va tjanga mwaMateusa 24:29–25:46, Jesus kwa demenene unene po kweyi ngayi horoka pomazuma gopouhura ntani poudigu wounene. Apa Jesus kwa tumbwire kuhamena ewizo lyendi yikando ntantatu. * Kuhamena udigu wounene, age kwa tente asi: ‘MunwaMuntu ngava mu mona, age ta wiza pomaremo geguru.’ ‘Yeeyi kapi mwa diva asi Hompa gweni ezuvake nga wiza.’ ‘MunwaMuntu nga wiza movili zohararasi.’ Ano mosifanekeso sendi sokuhamena nonzwi noyikombo, Jesus kwa tente asi: ‘Apa nga wiza MunwaMuntu mouyerere wendi.’ (Mat. 24:30, 42, 44; 25:31) Novelise ne odo kwa tamba kewizo lyaKristusa lyokomeho ngoMupanguli. Mouporofete waJesus, kupi natu vhura kugwana hena nonkango odo?

16. Momatjangwa musinke hena va tumbura ewizo lyaJesus?

¹⁶ Kuhamena mukareli gokulimburukwa gonondunge, Jesus kwa tente asi: “Mukareli gwangesi erago, nsenesi a ya mu gwana hekurwendi, age ta ruganesa ngesi.” Mosifanekeso sovakadona murongo, Jesus kwa tente asi: ‘Ha va za mokukaranda, mukwali ta wiza.’ Mosifanekeso soyimaliwa, Jesus kwa tente asi: ‘Eyi pwa pita siruwo sosire, vakareli owo hekurwawo makura ta wiza.’ Mosifanekeso sokulifana, muhona kwa tente asi: ‘Pomutengu gwange ni ya gwane emona lyange kumwe nonsonso.’ (Mat. 24:46; 25:10, 19, 27) Kosiruwo musinke novelise odo ne da tamba kuhamena ewizo lyaJesus?

17. Pwanare, ngapi omu twa kwete egano nonkango edi “nsenesi a ya mu gwana” va tumbura Mateusa 24:46?

 ¹⁷ Pwanare, ose kwa tumbwire moyimbapiratjangwa yetu asi novelise odo kwa tembe kewizo lyaJesus momvhura 1918. Pasihonena, tarurura nonkango daJesus kuhamena “mukareli gokulimburukwa gonondunge.” (Resa Mateusa 24:45-47.) Ose kwa kwete egano nonkango edi “nsenesi a ya mu gwana” va tumbura movelise 46 asi kwa likwatakana nosiruwo apa Jesus ga wizire mokuyakonakona mukaro gopampepo govagwavekwa 1918 nokuyatumba mukareli a kare mukungi gemona lyendi mudima eyi ya horokere 1919. (Mara. 3:1) Nampili ngoso, kukonakona momunene uporofete waJesus kulikida asi pwa hepa ewapukururo mekwatogano lyetu kuhamena uporofete owo. Morwasinke?

18. Yisinke natu vhura kutanta pokukonakona momunene uporofete waJesus kuhamena ewizo lyendi?

¹⁸ MwaMateusa egaununo 24 velise 30 nezi 42 ntani 44, nkango “nga wiza” kwa tamba poudigu wounene apa Jesus nga wiza a ya pangure. (Mat. 24:30, 42, 44) Ntani hena, ngomu tuna yi zogere  moparagarafu 12, ‘ewizo’ lyaJesus va tumbura mwaMateusa 25:31 kwa tamba kosiruwo sokulifana. Ayo ya wapa kutanta asi ewizo lyaJesus lyokuyatumba mukareli gokulimburukwa a kare mukungi gemona lyendi mudima va tumbura mwaMateusa 24:46, 47, nalyo kwa tamba hena kewizo lyendi lyokomeho, poudigu wounene. * Yosili, pokukonakona momunene uporofete waJesus kwa likida asi novelise odo nadinye edi da tumbura ewizo lyendi kwa tamba poudigu wounene apa nga ya pangura.

19. Mawapukururo musinke tuna zogere kuhamena ekwatogano lyetu, ntani mapuro musinke ngatu ka konakona mosirongwa sokukwama ko?

¹⁹ Yisinke tuna lirongo? Ketamekero lyosirongwa esi, tuna konakona mapuro gatatu. Pomuhowo tuna konakona asi udigu wounene kapi wa tamekere 1914 nye ngau tameka apa mbunga zElipakerero lyoNomuhoko ngazi homokera Babironi Zonene. Ntani hena tuna zogere asi ehanguro lyaJesus lyononzwi noyikombo kapi lya tamekere 1914 nye ngali horoka poudigu wounene. Ntani tuna konakona hena asi etumbo lyaJesus lyomukareli gokulimburukwa a kare mukungi gemona lyendi mudima kapi lya horokere 1919 nye ngali horoka poudigu wounene. Yipo nye mapuro ogo gatatu kwa tamba kosiruwo simwe tupu sokomeho, poudigu wounene. Ngapi omu mawapukururo aga gana kundama ekwatogano lyetu kuhamena sifanekeso somukareli gokulimburukwa? Ntani ngapi gana kundama ekwatogano lyetu kuhamena yifaneseko yimwe yaJesus eyi yina kusikilira mo momazuva aga gopouhura? Mapuro aga gomulyo ngatu ka ga konakona mosirongwa sokukwama ko.