EYI kwa horokere mo-1949, nomvhura 60 da ka pita, nye esimwititi lyange kwa tamekere nare. Otate Hendrik ngava rugana nonkaku ntani nomosikunino moDonderen, mukundagona gokoMuzogo gwaDrenthe mosirongo saHoranda. Momukunda ogo yimo va hampurukira nge momvhura 1927, ano ame munona gwaune movanona ntambali. Embo lyetu kwa kere monzira zomuheke. Sinzi sovamusinda vetu kwa kere vanandima, ntani ame ngani hafere eparu lyounandima. Mo-1947 apa na kere nonomvhura 19, yipo na divire kuhamena usili kupitira mwagumwe gomusinda gwetu gedina Theunis Been. Tani diworoka asi sikando sokuhova twa ligwene naTheunis kapi na mu here, nye konyima tupu zoYita yaUvali yoUzuni, Theunis yipo ga ya kere Mbangi, ntani ame na yi dimbwilire asi ana kara muntu gomuwa kupita pwanare. Erunduruko lyonkareso zendi lya kundamene nge, yipo na purakenene kwendi apa ga uyungire name kuhamena etumbwidiro lyaKarunga lyoparadisa. Yipo na tambwire usili makura tatu ya kara vakaume wovanene. *

Ame kwa tamekere kuzuvhisa mwaKudumonkuru 1948, ano kwedi kokukwama ko momazuva 20 gaPembagona yipo na gwene ekuho posigongi somazuva gatatu moUtrecht. Mezuva 1 Murongagona 1949 tani tameke kurugana uzuvhisi wokukarerera, makura tava tumu nge koBorculo koUpumezuva waHoranda, oku kwa kere kambungagona. Na hepere kugenda konyara nokilometa 130 mokukasika ko, yipo na tokwere kuza nombasikora zange. Ame kwa gazarere asi tayi gusa nge konyara novili 6, nye morwa  kwa rokere mvhura zonene zononkondo ayo kwa gusire nge novili 12, nampili ngomu nokilometa 90 dokuhulilira na ruganesere mahina gorutenda. Masiku yipo na ka sikire kembo lyoNombangi edi na ka kere nado momukunda ogu na ka zuvhisilire.

Konyima zonomvhura doyita, vantu kwa kere tupu noyiweka yoyisesu. Ame kwa kere tupu nosuta nonoranga mbali, suta kwa kere nene ano noranga nonsupi. Ngomu nina yi tumbura ketamekero, kwedi kokuhova moBorculo kwa digopere sili, nye Jehova ga tungikire nge novarongwa woBibeli wovanzi. Konyima zomakwedi ntane, makura tava tumu nge kositata saAmsterdam.

Ame kwa kulilire momukunda gounandima, ano konyima kwa ya kere moAmsterdam mositata sosinene somoHoranda. Sirugana sokuzuvhisa kwa kere sokuhafesa. Mokwedi kokuhova, ame kwa hanesere yimbapiratjangwa yoyinzi kupitakana eyi na hanesere momakwedi ntane ga ka pita. Na ya tamekere kurugana malirongo goBibeli gokupitakana pontantatu. Konyima zokutura nge ni kare muvateli gombungakriste (ogu vana kutumbura ngesi asi muwapaiki gombunga zovakuronambunga), yipo va pere nge siuyungwa sanavenye sikando sokuhova. Ame kwa kere nowoma, ano apa va tumine nge kombungakriste zapeke komeho ni ka gave sosiuyungwa sange sanavenye, kwa lizuvhire ruhafo. Kapi nayi divire asi mwaza nomvhura, ngani gava yiuyungwa yokupitakana 5 000.

MwaKudumonkuru 1950 kwa tumine nge koHaarlem. Makura tani ya gwana ezigido lyomosirugana soutareli. Mazuva gatatu kapi na vhulire kurara. Yipo na tanterere Robert Winkler, munazinyetugara ogu a rugana komberewa zomutayi asi kapi simpe nina wapere sirugana oso, nye age kwa tente asi: “Zwida tupu noforoma. Ngo lironga.” Konyima tupu zoyo, yipo va dewire nge kwedi nakunye makura tani tameke nosirugana soutareli. Apa na ka dingwire mbungakriste zimwe yipo na ka ligwene naJanny Taatgen, muzuvhisi goruhafo gokukarerera gomudinkantu ogu ga kara neharo lyenene kwaJehova nonkareso zelizambero. Yipo twa likwere 1955. Nye komeho ni ka twikire nesimwititi lyange, Janny na ka faturura omu ga ya kere muzuvhisi gokukarerera nomu twa ruganena kumwe konyima zokulikwara.

Janny: Onane kwa ya kere Mbangi 1945 apa na kere nonomvhura 11. Awo kwa mwene mulyo gokulironga Bibeli kumwe novana vawo vatatu, nye otate ngava rwanesa usili, makura onane ngava tu rongo apa ngava pili po otate pembo.

Epongo lyokuhova eli na zire kwa kere sigongi esi sa karerere moThe Hague 1950. Konyima zosigongi yipo na zire sikando sange sokuhova kepongo lyomoSinyanga soUhompa somomukunda moAssen (Drenthe). Otate kwa handukire unene makura tava tjinda nge membo. Onane kwa tente asi: “Ono diva oku no ka kara.” Na yi divire asi awo kwa tembe kovapuli vakwetetu. Pomuhowo ame kwa kere nepata  lyoNombangi eli lya kere pepi nembo lyetu, nye otate simpe ngava twikire kudigopekesa eparu lyange yipo na dirukilire kombungakriste zomoDeventer (Overijssel), ezi za kere konyara ure wonokilometa 95. Ame kwa kere simpe munona, epangero yipo lya tulire otate moudigu morwa kutjinda nge membo. Ngoyitundwamo, yipo va tanterere nge ni tengure kembo. Nampili ngomu otate va dilire kutambura usili, moruhura awo va pulisilire nge ni ze komapongo nagenye nomoyirugana yokuzuvhisa.

Konyima tupu zapa na tengwire kembo, onane yipo va verere unene ano na hepere kurugana yirugana nayinye yemembo. Kugusa ko oyo, ame na twikilire kutura po ezokomeho pampepo makura 1951 yipo na gwene ekuho nonomvhura 17. Mo-1952, konyima zapa onane va verukire kouvera wawo, yipo na rugene pepwizumuko lyange novazuvhisi wovakadi vatatu wokukarerera ngomuzuvhisi gokuvatera makwedi gavali. Ose kwa tungire membo lyomosikepa ano ngatu ka zuvhisira monodoropa mbali domoDrenthe. Mo-1953 yipo na kere muzuvhisi gokukarerera. Konyima zomvhura zimwe, mutareli gonombunga gomudinkantu kwa ya dingwire mbungakriste zetu. Yige Markus. Yipo twa likwere mwaKudumonkuru 1955, ntani twa lizuvhire asi kuvhura yi tu tompoke kukarera Jehova ngovalikwali.—Muud. 4:9-12.

Markus: Konyima zekwareko lyetu, pomuhowo kwa tu tumine ngovazuvhisi wokukarerera koVeendam (Groningen). Ose kwa tungire mokanzugo kokanunu. Nampili ngoso, Janny kwa zi fuwisire. Nkenye ngurova, ngatu goresa sitafura noyipundi yivali yipo tu ture po mbete tu wape kurara.

Konyima zomakwedi ntazimwe, kwa tu zigidire mosirugana sokudingura mosirongo saBelgium. Mo-1955, vazuvhisi mosirongo oso kwa kere tupu 4 000. Ano ngesi va pitakana 24 000! Momukunda gwaFlanders korwaMuzogo gwaBelgium, vantu kuuyunga eraka limwe noVahoranda. Nye Vabelge mbuuyungiso zawo za lisiga, twa hepere kulididimikira udigu weraka.

Janny: Sirugana sokudingura kwa hepere nkareso zelizambero. Ose ngatu dingura nombungakriste nonombasikora nokurara momambo govanavazinyetu. Morwa kapi twa kere nembo lyanyamwetu, ose ngatu kara dogoro Mandaha, ano moUvali kongurangura yipo ngatu zi tu ka dingure mbungakriste zokukwama ko. Nye ose ngatu tara sirugana setu ngetungiko lyokutunda kwaJehova.

Markus: Pomuhowo, ose kapi twa divire vanavazinyetu womonombungakriste odo, nye awo kwa kere nombili ntani ngava tu tambura momambo gawo. (Heb. 13:2) Mwaza nomvhura, ose ngatu dingura yikando yoyinzi nombungakriste nadinye domoBelgium edi adi uyunga eraka lyoRuhoranda. Eyi kwa tu retera matungiko gomanzi. Ose twa ya divire sinzi sovanavazinyetu wokuuyunga Ruhoranda, awo va ya kere vakaume wovawa kwetu. Ose twa limonena vadinkantu wovanzi kuna kukura panyama nopampepo nokuligava vene kwaJehova pokutura sirugana soUhompa muhowo meparu lyawo. Ayo kuhafesa  sili mokumona sinzi sawo kuna kukarera Jehova noulimburukwi mosirugana sosiruwo nasinye. (3 Joh. 4) ‘Ekwafo eli twa gwene natuvenye’ kwa tu rerupikisa tu twikire mosirugana setu nomutjima nagunye.—Rom. 1:12.

Markus: Kutunda tupu apa twa likwere, alyo kwa kere eharo lyetu lyokuza koSikora zaGiliyata. Nkenye ezuva, ose ngatu lirongo Ruingilisa konyara vili zimwe ngoso. Nampili ngoso, kapi ya kere ureru kulironga Ruingilisa romobuke, yipo twa tokwere kuza koIngiranda kepwizumuko tu ka liyomberese Ruingilisa rwetu mokuzuvhisa. Mo-1963 ose kwa gwene nombilive dokutunda komberewa zonene koBrooklyn. Nombilive odo mbali, kwa kere zimwe zange ano zimwe zaJanny. Mbilive zange kwa kere mo ezigido lyokuza koSikora zaGiliyata makwedi murongo. Sikora ozo kwa demenene tupu mokudeura vanavazinyetugara nokuvapa mavyukiso omu nava pitisira mbunga zaJehova. Movarongwa 100 owo va zigidire, 82 kwa kere vanavazinyetugara.

Janny: Mbilive ezi na gwene, kwa hundilire nge ni gazadare ko nsene asi kuvhura ni kare moBelgium siruwo oso Markus ana kuza koSikora zaGiliyata. Pomuhowo ya guvisire nge, morwa na lizuvhire ngwendi asi elituromo lyange lyokutamununa sirugana sange kapi ana li tungike Jehova. Yipo na lidiworokesere sitambo soSikora zaGiliyata, sokuvatera owo vana kuza ko yipo yi ya va tompoke mokuzuvhisa mbudi zongwa uzuni mudima. Yipo na yi tambwire ni kare. Makura tava tumu nge ngomuzuvhisi gosiruwo nasinye koGhent mositata saBelge kumwe novazuvhisi vavali wosiruwo nasinye Anna naMaria Colpaert.

Markus: Morwa na hepere kuwapukurura Ruingilisa rwange, yipo va zigidire nge ni ze koBrooklyn makwedi gatano komeho sikora zi ka tameke. Kwa ka rugene modepartemente zokutuma yimbapiratjangwa ntani zoyirugana yokuzuvhisa. Kurugana komberewa zonene nokuvatera kutuma yimbapiratjangwa koAsia naEuropa naAmerika Mbindakano kwa vaterere nge ni dive momunene uumwe wosiumbya uzuni mudima. Ame unene po kudiworoka munazinyetugara A. H. Macmillan, ogu ga kere mosirugana soutareli (mutareli gokudingura) mosiruwo samunazinyetu Russell. Age kwa kurupire unene ntani matwi gendi kapi ngaga zuvhu nawa, nye age nga wiza komapongo nagenye. Oyo kwa kundamene nge unene ntani kwa rongere nge asi na hepa kutara mapongo goSikriste asi mulyo.—Heb. 10:24, 25.

Janny: Name naMarkus mosivike ngatu litjangere nombilive. Twa lirongwere unene! Nampili ngoso, Markus kwa haferere edeuro lyendi eli ga gwene koGiliyata, ano ame kwa haferere sirugana sange sokuzuvhisa. Apa ga ka tengwire Markus koAmerika, ame nina kara novarongwa woBibeli 17. Nampili ngomu eligaunuko lyetu lyomakwedi 15 lya digopere, nye na mwene asi Jehova ga tungikire elizambero lyetu. Ezuva eli ga wizire Markus ndira ezi ga genderere kwa zi rangapekesere novili dongandi, ano apa ga ya sikire, ose kwa lidingilire nokulililira. Kutunda opo, kapi twa ligaunuka hena.

Markus: Apa na ka tengwire koGiliyata mwaSindimba 1964, kwa tu tumine tu ka rugane koBeteli. Nampili ngomu twa dilire kuyidiva posiruwo sina, aso kapi sa kere sirugana setu sokukarerera. Konyima zomakwedi gatatu, kwa tu tumine mosirugana sokudingura moFlanders. Apa Aalzen naEls Wiegersma  va va tumine ngovatumwa koBelgium, awo kwa va pere sirugana sokudingura, makura ose yipo twa tengwire koBeteli oku ngani ka rugana moDepartemente zoyirugana yokuzuvhisa. Kutundilira 1968 dogoro 1980, sirugana setu kwa rundurukire yikando yongandi kutunda mosirugana sokoBeteli kuza mosirugana sokudingura. Moruhura, kutundilira 1980 dogoro 2005, ame kwa kere hena mutareli gonomukunda.

Nampili ngomu sirugana setu ngasi runduruka-runduruka, ose kapi twa divarere asi sitambo setu sokuligava kwaJehova, sokumukarera nomutjima nagunye. Ose kwa haferere nkenye sirugana esi twa gwene, nehuguvaro asi nkenye marunduruko gomosirugana setu kwa karerere po mokukwatesa ko sirugana soUhompa.

Janny: Unene po ame kwa haferere kuza naMarkus koBrooklyn 1977 ntani koPatterson 1997 apa ga ka gwene edeuro lyokukara gumwe goKomitiye zomutayi.

Markus: Mo-1982, Janny kwa mu tawire, ano konyima ga verukire. Konyima zonomvhura ntatu, mbungakriste zomoLouvain kwa tu pere nzugo za kara keguru lyoSinyanga sawo soUhompa. Aso kwa kere sikando sokuhova monomvhura 30 mokukara nonzugo zanyamwetu. MoUvali, apa twa rongerere tu tameke nosirugana sokudingura nombungakriste ame kwa gurumikire nokuronda yikando yongandi poyitupa 54 mokugurumwisa nomurongero detu. Mo-2002 yipo va tulire po mawapaiko va tu pe nzugo zepevhu. Apa na gwanesere nomvhura 78, kwa tu tulire tu kare vazuvhisi wosiruwo nasinye modoropa zaLokeren. Ose tuna hafa mokukarera Karunga monkedi ezi ntani simpe kuna kuza nkenye ezuva moyirugana yokuzuvhisa.

Janny: Nomvhura detu edi twa kara natuvenye mosirugana sosiruwo nasinye kupitakana 120! Ose twa limonena usili wetumbwidiro lyaJehova eli asi ‘ame kapi ngani mu zumba ndi ni mu sige’ ntani nsene tu mu karera noulimburukwi, ose ngatu ‘gwana nayinye, nkenye tupu eyi twa hepa.’—Heb. 13:5; Deut. 2:7.

Markus: Apa twa kere vadinkantu yipo twa ligeve kwaJehova. Ose kapi twa lipaparere nyamwetu yininke yoyinene. Ose kwa kara neharo lyokutambura nkenye sirugana esi va tu pere morwa twa yi pura asi eyi ya kara nomulyo yokukarera Karunga kapisi evango.