1, 2. Yisinke ya vaterere Nombangi daJehova 230 di paruke morugendo kehagero lyoYita yaUvali yoUzuni?

ALYO kwa kere ehagero lyoYita yaUvali yoUzuni. Ano vakwayita vaHitler kwa va fundire. Epangero lyaHitler kwa kere negano lyokudipaga vanadorongo mayovi ava va kere monokamba dounkwate. Egano kwa kere lyokusininika vanadorongo womokamba zaSachsenhausen va gende va ze kezenga nokukavatura moyikepa eyi nava ka damesa mefuta.

² Vanadorongo mayovi nomurongo ntatu nantatu womokamba zounkwate zomoSachsenhausen kwa va sininikire va gende nokilometa 250 va ze koLübeck, ezenga lyefuta moNdovesiranda. Movanadorongo omo mwa kere Nombangi daJehova 230 wokoyirongo ntazimwe. Vanadorongo navenye kwa zumbanesere nonkondo morwa uvera nonondya dokudira kugwanena po. Nye vanavazinyetu navenye va parukire morugendo oru. Ngapi omu ya va tompokere? Gumwe gwawo kwa tanta asi: “Ngatu likorangeda-korangeda yipo tu twikire ngorooro kugenda.” Morwa eharo lyokulihara vene navene ‘nononkondo dononene’ daKarunga yiyo ya va vaterere va paruke.—2 Kol. 4:7.

3. Morwasinke natu likorangedera-korangedera?

³ Nampili ngomu naina tuna dili kukara morugendo rwina, nye nose kuna kuligwanekera nomaudigu gomanzi. Konyima zapa Uhompa waKarunga wa tamekere kupangera 1914, Satana kwa mu zugumine mo meguru a wize pevhu. Ano ngesi ana ‘handuka unene morwa ana diva asi siruwo sendi esi sina hupu ko, sisupi.’ (Ehor. 12:7-9, 12) Ngomu Harumagedoni zina kuhedera pepi, Satana kuna kuruganesa maheteko nomakondjeso mokuteza po elikwatakano lyetu naJehova. Ose hena kuna kuligwanekera noyinka yeparu nkenye ezuva. (Joba 14:1; Muud. 2:23) Pamwe  maudigu nagenye ogo kuvhura kutuninkisa tu dire kukara nononkondo dokulididimikira edompo mutjima. Pasihonena, munazinyetugara gumwe, monomvhura dononzi kwa korangeda vantu wovanzi va twikire kulimburukwa Jehova. Nye apa ana ya kurupa, nage namukadendi kwa ya verere makura ta dompo mutjima. Ngwendi munazinyetugara ogo, natuvenye twa hepa ‘nonkondo dononene’ dokutunda kwaJehova nomakorangedo gokovanavazinyetu.

4. Mokukorangeda wopeke, epukururo musinke lyomupositoli Paurusa twa hepa kukwama?

⁴ Mokukorangeda wopeke, twa hepa kukwama epukururo lyomupositoli Paurusa ga geve koVakriste woVahebeli. Age kwa tente asi: “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.” (Heb. 10:24, 25) Ngapi natu kwama epukururo eli lyomulyo?

5. Yisinke ayi tanta ‘kulikoraika-koraika,’ ntani ngapi natu yi rugana?

⁵ ‘Kulikoraika-koraika’ kutanta asi kugazadara ko yihepwa yava wopeke. Kapi ngatu diva yihepwa yovanavazinyetu nsene tu genderera kulikunda novanavazinyetu koSinyanga soUhompa ndi tu zogere nawo yininke ya hana mulyo. Yimo, kapi tuna hara ‘kulitura’ mo unene mokudiva nayinye eyi yina kuhoroka meparu lyawo. (1 Tim. 5:13) Nye mokuninka asi tu korangede vanavazinyetu, twa hepa kudiva nawa ukaro wawo weparu noyikara yawo nelikwatakano lyawo naJehova nounankondo wawo ntani upirankondo wawo. Va hepa kututara asi ose vakaume vawo ntani asi twa va hara. Eyi kwa kwatera mo kulitulira po siruwo sokukara kumwe nawo, kapisi paapa tupu ava kara nomaudigu ndi vana dompo mutjima.—Rom. 12:13.

6. Yisinke nayi vatera mukuronambunga a ‘koreke’ mbungakriste?

⁶ Vakuronambunga kuna kuvakorangeda va kare ‘vasita wosiunda saKarunga esi ga va pa,’ va yi rugane neharo lyewa. (1 Pet. 5:1-3) Mokurugana nawa sirugana esi, vakuronambunga va hepa kudiva nawa vapuli vakwaawo. (Resa Yisewe 27:23.) Nsene vakuronambunga va yi likida asi awo vana liwapaikire kuvatera vapuli vakwawo nokuhafera siruwo sokukara kumwe nawo, womombungakriste ngayi va rerupira kupura evatero. Ntani hena ngayi va rerupira kupwagesa malizuvho noyinka yawo, ano eyi ngayi vatera vakuronambunga va gave evatero eli vana hepa vapuli vakwaawo.

7. Yisinke twa hepa kudiworoka kuhamena ‘nonkango dononkukutu’ dava wokudompa mutjima?

⁷ Paurusa kwa tanterere mbungakriste zomoTesaronika zi ‘kwafe varupiranonkondo.’ (Resa 1 Vatesaronika 5:14.) “Varupiranonkondo” kwa kwatera mo ava vana guwu ndi vana dompo mutjima. Yisewe 24:10 kutanta asi: “Nsene ove o munkundi momahepeko, o munkundi hena moyirugana.” Nsene tuna hara kuvatera ava vana dompo mutjima, twa hepa kudiworoka asi poyiruwo yimwe kuvhura va uyunge ‘nonkango dononkukutu.’ (Joba 6:2, 3) Awo kuvhura va uyunge yininke eyi vana dili kutamba. Rachelle ogu ozina va verere kwa yi limonena eyi. Rachelle kwa tanta asi: “Yikando yoyinzi onane ngava uyungire nge yininke yoyidona. Ano poyiruwo eyi, ame ngani lidiworokesa yikara yonane yoyiwa, eharo nonkenda nougavi. Ame na ya yi dimbwilire asi vantu wokudompa mutjima kuuyunga yininke yoyinzi eyi vana dili kutamba.  Ayo kapi nayi wapa nove o uyunga nonkango donondona.” Yisewe 19:11 kutanta asi: “Nsene o kotoka, to pangere nkareso zoge. Ano gumwe nsene ana ku zono, efumano lyoge lyokumudongwenena po.”

8. Yilye ogu twa hepa ‘kuhara unene,’ ntani morwasinke?

⁸ Ngapi natu ‘koreka’ muntu ogu ana dompo mutjima morwa nonzo danare nampili ngomu ga litezurura? Kuhamena munzoni ogu ga litezurura, Paurusa kwa tjangerere vanavazina womoKolinte asi: “Mu dongwenene po oku tomu mu pe upampi, neisi ru mu diinina po ruhodi rorunene. Tani mu korangeda asi mu mu hare unene.” (2 Kol. 2:7, 8) Munazinyetu kapi nga yi diva asi twa mu hara nokumupakera mbili ntudi tu yi mu likide mononkango nomoyirugana.

9. Yisinke ayi tanta ‘kulihara-hara nokurugana yirugana yoyiwa’?

⁹ Paurusa kwa tjenge asi: “Atu likoraike-koraikeni mokulihara-hara nomokurugana yirugana yoyiwa.” Twa hepa kuvatera vanavazinyetu va likide eharo nokurugana yirugana yoyiwa. Pasihonena, nsene tuna hara mundiro gu twikire ngorooro kutwera, twa hepa kutura po yitare yipo gu hwame. (2 Tim. 1:6) Mokulifana, kuvhura tu vatere vanavazinyetu va likide eharo lyawo kwaKarunga nokovantu. Epandadeko lyewa mulyo mokukoreka wopeke va rugane yirugana yoyiwa.

10, 11. (a) Wolye ali korangeda epandadeko? (b) Gava sihonena omu epandadeko ali vatere muntu a rugane youhunga.

¹⁰ Natuvenye kwa hepa epandadeko, yi kare asi tuna dompo mutjima ndi hawe. Mukuronambunga gumwe kwa tjanga asi: “Otate kapi va pandadeka nge rumwe. Ame kwa kura na hana kulizuvha mulyo. . . . Nampili ngomu ngesi nina kara nonomvhura 50, ame simpe kuyihafera apa vakaume vange ava pandadeke nge kosirugana soukuronambunga. . . . Eyi kwa ronga nge omu ya kara nomulyo kugava makorangedo kwava wopeke, makura ame kukorangeda wopeke.”  Epandadeko kuvhura kuvatera navenye, kukwatera mo vazuvhisi wokukarerera novakurupe nava wokudompa mutjima.—Rom. 12:10.

¹¹ Apa vakuronambunga ‘ava hetekere ko kupukurura muntu ogu ana puka,’ mapukururo gomawa gokuwapera kuvhura kutumagenda munzoni a tameke hena kurugana yirugana yoyiwa. (Gar. 6:1) Eyi yiyo ya horokerere munazinyetukadi gedina Miriam. Age kwa tjenge asi: “Ame kwa pitire moudigu wounene meparu lyange apa vakaume vange va tundire mombungakriste, posiruwo sooso otate nawo kwa verere uvera wokupita honde mouruvi. Ame kwa dompere unene mutjima. Mokusesupika ruguwo rwange, yipo na kere nomumati gomouzuni.” Eyi kwa mu ninkisire a lizuvhe asi Jehova kapi ga mu hara makura ta gazara kusiga usili. Apa mukuronambunga ga mu diworokesere yirugana yendi yoyiwa youlimburukwi nokumutantera asi Jehova ga mu hara, eyi kwa mu korangedere. Ngoyitundwamo, eharo lyendi kwaJehova kwa nkondoparere. Makura yipo ga tokwere kunyoka mumati gwendi nokutwikira kukarera Jehova.

12. Kufisa muntu nomuga ndi kumupangura ndi kumuninka a lizuvhe unzoni, kuna kara nkedi zokukorangeda ndi?

¹² Kufisa muntu nomuga pokumuhetakanesa nava wopeke ndi kumupangura ndi kumuninka a lizuvhe unzoni kokudira kurugana unene kuvhura kumukorangeda nye kapi ayi reta yitundwamo yoyiwa. Nye kupandadeka munazinyetu nokumudiworokesa eharo lyendi kwaJehova kureta yitundwamo yoyiwa yokukarerera.—Resa Vafilipi 2:1-4.

13. Yisinke kwa kwatera mo kukorangeda wopeke? (Tara efano pepenuno 18.)

¹³ Twa hepa ‘kulikorangeda-korangeda, unene pokumona asi ezuva lyaHompa tali hedere pepi.’ Kukorangeda wopeke kwa kwatera mo kuvavatera va twikire komeho noyirugana yawo kwaKarunga. Kulihara-hara nokurugana yirugana yoyiwa kuvhura kuyifanekesa kokutweda mundiro ogu guna hara kudima, ano kukorangeda wopeke kuvhura kukufanekesa kokutura yitare pomundiro yipo gu twikire kutwera. Kukorangeda wopeke kutanta asi kuvankondopeka nokuvahengagwida yipo va twikire kukarera Karunga. Nsene kuna kuvatera owo vana dompo mutjima, twa hepa kuuyunga monkedi zeharo zonkenda. (Yis. 12:18) Twa hepa hena ‘kugenderera kuzuvha, nye mokuuyunga nomokuhanduka tatu liwora.’ (Jak. 1:19) Nsene tu purakena nonkenda, kuvhura tu kwate egano eyi munazinyetu ana dompere mutjima nokuuyunga yininke eyi nayi mu vatera a lididimikire ukaro wendi.

14. Ngapi omu munazinyetu gumwe gokudompa mutjima va mu vaterere?

¹⁴ Koneka omu mukuronambunga gumwe gonkenda ga vaterere munazinyetu  ogu ga tengwire monyima nomvhura dongandi. Ngomu mukuronambunga ga purakenene kwamunazinyetu, age ga yi dimbwilire asi munazinyetu gwina simpe ga kere neharo kwaJehova. Age nga lirongo nkenye sifo soRuhungu ntani kwa litulire mo mokuwiza komapongo nagenye. Nye, yirugana yavamwe womombungakriste kwa mu koresere komutjima nokumupundukisa. Mukuronambunga kwa purakenene nelituromo ga hana kumupangura makura ta tantere munazinyetu ogo asi va mu hara nepata lyendi. Konyima, kanunu-kanunu munazinyetu ta ya dimburura asi age kwa pulisilire yihorokwa yoyidona yanare yi mu kondere mokukarera Karunga ogu ga hara. Mukuronambunga yipo ga pulire munazinyetu gwina mokupwaga kumwe moyirugana yokuzuvhisa. Nevatero lyendi, munazinyetu kwa ya tamekere hena kuzuvhisa nokuyakara mukuronambunga.

15. Yisinke natu lirongera ko kwaJehova kuhamena kukorangeda ava vana dompo nomutjima?

¹⁵ Muntu gokudompa mutjima kuvhura a dire kutura po marunduruko usimbu. Kuvhura tu hepe kutwikira kumuvatera. Paurusa kwa tente asi: ‘kwafeni varupiranonkondo nokulididimikira navenye.’ (1 Tes. 5:14) Mevango lyokuliteka usimbu nokusiga varupiranonkondo, tu twikireni ‘kuvakwafa.’ Nare, Jehova kwa lididimikilire vakareli vendi ava va dompere mutjima posiruwo sina. Pasihonena, Karunga kwa fililire nkenda Eliya, pokugazadara ko malizuvho gendi. Jehova kwa vaterere muporofete yipo a twikire nosirugana sendi. (1 Vah. 19:1-18) Ndafita morwa ga litezwilire, Jehova ga mu gusilire po. (Epis. 51:7, 17) Karunga kwa vaterere hena mutjangi gEpisarome 73, ogu nkare a hageke kumukarera. (Epis. 73:13, 16, 17) Jehova muwa ntani kutufira nkenda, unene po nsene tuna dompo mutjima. (Ex. 34:6) Nkenda zendi ‘mpe ngwendi ngurangura,’ ntani ‘kapi azi haga po.’ (Malira. 3:22, 23) Jehova kuna hara tu kwame sihonena sendi nokutekura wokudompa nomutjima nonkenda.

16, 17. Ngomu uhura wouzuni ou una kuhedera pepi, yisinke twa hepa kutokomena kurugana, ntani morwasinke?

¹⁶ Vanadorongo 33 000 ava va tundire mokamba zounkwate zomoSachsenhausen, vantu mayovi kwa fire. Nye Nombangi daJehova nadinye 230 kwa parukire. Makorangedo nevatero eli va lipere-pere yiyo ya va vaterere va paruke.

¹⁷ Naina, ose kuna kara ‘monzira ezi azi twara komwenyo.’ (Mat. 7:14) Ntaantani tupu vakareli vaJehova ngava ka paruke mouzuni woupe wouhungami. (2 Pet. 3:13) Yipo nye, tu tokomeneni kulivatera-vatera monzira zokutwara komwenyo gwanarunye.