Ame kwa hampuruka nge 1956 nouvera womugongo morwa yisupi yimwe kapi ya likwata. Ano eyi kwa zonagura nonsipa dange nokudigopekesera nge kugenda nokuretera nge mauvera gamwe.

Komeho va hampuruke nge, vatumwa woNombangi daJehova kwa tamekere kulironga Bibeli novakondi vange. Pounona wange, vazuvhisi tupu wovasesu va tungire modoropa zetu zaUsakosi, moNamibia. Makura ngatu konakona yimbapiratjangwa yokomapongo ngepata. Apa na kere nonomvhura ntambali, na kere noudigu wosihuhwiro, makura tava taura nge nokutura nge singumi yipo masitamo ga pitire mo nokupwaga. Apa na kere nonomvhura 14, tani kara nouvera wosihegani. Morwa sure sokuzeruka kwa kere ure ntani na hepere epakerombili lyokulikarera lyokovakurona vange, ame kapi na mene sure.

Nampili ngoso, ame kwa tokwere kunkondopeka elikwatakano lyange naJehova. Yimbapiratjangwa yetu yoyinzi kapi ya kere moRumburu, meraka lyetu. Makura tani lirongo kuresa Ruingilisa yipo ni lironge nobuke detu dononzi. Tani ya kara muzuvhisi goUhompa nokuyagwana ekuho ponomvhura 19. Nomvhura ne edi da kweme ko, ame kwa kere nomaudigu gomanzi gokuhamena uvera wange ntani nopamalizuvho. Ano mokadoropa ketu kokanunu, kutjira vantu ngaku kondere nge mokulihameka mo unene mosirugana sokuzuvhisa.

Apa na kere koyiha yonomvhura 20, yipo twa tundire moNamibia tu dirukire moAfrika Mbindakano, aso kwa kere sikando sokuhova kwange kukakara kumwe nombungakriste. Ee, omu tupu ya hafesere nge! Nye va hepere simpe kukataura nge, sikando esi kwa rugene nge etauro lyomuduku.

Konyima zosiruwo, na zuvhire mutareli gonombungakriste kuna kuuyunga kuhamena uzuvhisi wokukarerera. Nonkango dendi kwa kundamene nge. Na yi divire ame ukanguki wange kapi wa wapa nye na dimbwilire omu Jehova ga simba mudigo gwange moyiruwo yoyinzi yomaudigu. Makura yipo na tokwere kutura mo ehundiro lyokukara muzuvhisi gokukarerera. Nye morwa ukanguki wange, vakuronambunga kapi va kwatesere ko ehundiro lyange.

Nye simpe na litulire mo unene mosirugana sokuzuvhisa. Nevatero lyonane neli lyava wopeke, ya tompokere nge kusikisa mo novili douzuvhisi wokukarerera momakwedi ntazimwe. Eyi kwa likidire etokomeno lyange lyokukara muzuvhisi gokukarerera nampili ngomu na kere nouvera. Makura yipo na tulire mo hena ehundiro, ano sikando esi va li kwatesere ko. Mezuva 1 lyaSitarara 1988, tani kara muzuvhisi gokukarerera.

Ngomuzuvhisi gokukarerera, ame kulimonena nkenye apa evatero lyaJehova. Kuronga wovape usili mevango lyokudemenena tupu koukaro wange kwa gamena nge nokunkondopeka nge ntani nokuvatera nge ni kare nelikwatakano lyenene naJehova. Ame kwa gwanena mo ruhafo rorunene mokuvatera wovanzi va ligave kwaKarunga nokugwana ekuho.

Uvera wange kurunduruka-runduruka. Nye Jehova ‘kusimba mudigo gwange nkenye ezuva.’ (Epis. 68:19) Age kapi tupu a vatere nge ni lididimike nye kuvatera nge ni hafere eparu!