Kapisi hepero moSinyanga soUhompa kukara nosinka sokuhamena oku na hingira ogu va gusa mo mombunga. Sifo esi kukorangeda vakurona woVakriste va vatere vana vawo pampepo ava va gusa mo mombunga ava vana kara simpe membo lyawo. Ngomu va yi likida pepenuno 19 neli 20 moRuhungu 15 Mangundu 1988, vakurona kuvhura kulironga Bibeli nomunona va gusa mo mombunga ogu ana kara simpe membo lyawo. Ayo ngayi vatera munona a gwane ekorangedo lyokurundurura nkareso zendi.

Kuhamena kuhingira moSinyanga soUhompa, munona ogu va gusa mo mombunga kuvhura kuhingira novakurona vendi. Mokumona asi kapi pwa kara veta asi ogu va gusa mo mombunga a hingire koyipundi yokonyima moSinyanga, pwa ha kara esiliko nsene munona ogo a hingira novakurona vendi nkenye oku vana hingire. Ngomu vakurona vana kupakera mbili upampepo wamunwawo, awo ngava divilisa asi age kuna kugwanena mo uwa momapongo. Kupulisira munona a hingire kumwe nawo ngayi mu vatera kupitakana tupu kumusigilira a ka hingire nkenye oku.

Ngapi nsene munona va gusa mo mombunga kapi ga tunga novakurona vendi? Eyi kutanta nye asi kapi ta vhuru kuhingira novakurona vendi ndi? Pwanare, sifo esi kwa zeresere nkareso zongwa ezi ga hepa kutunga po Mukriste kuhamena kudira kulikwatakana nogu gekoro va gusa mo mombunga ogu ga dira kutunga nawo. * Mokupulisira munona va gusa mo mombunga a hingire nekoro lyendi mepongo nalinye ya lisiga nokupapara nompito dokulikwatakana nendi. Nsene vemepata kuna kulikida nkareso zouhunga kuhamena ewapaiko lyegusomo mombunga ntani kuna kuhetekera ko kukwama mapukururo goPatjangwa gokudira kulikwatakana nogu va gusa mo mombunga, kapi pana kara konda zokukara nosinka.—1 Kol. 5:11, 13; 2 Joh. 11.

Yi kare asi muntu ogu va gusa mo mombunga kuna hingire pepi nekoro lyendi ndi nagumwe gwapeke mombungakriste, kapisi hepero kukara nosinka. Kusilika muntu oku na hingira kuvhura kuretesa po maudigu gokulisiga-siga. Nsene navenye poveli, kukwatera mo vemepata ava vana kuhetekera ko kufumadeka nompango doBibeli kuhamena egusomo mombunga, ntani hena nsene asi oku ana hingire ogu va gusa mo mombunga kapi yina kupundukisa vanavazinyetu, kapisi hepero mbungakriste zi kare nosinka oku nava hingira ava va gusa mo mombunga. *