1, 2. Nsene tuna hara Karunga a tu hafere, ngapi ‘omu natu fira kukara’?

SINZI sovantu kwa hara kudiva omu ava va gazarere wopeke. NgoVakriste, omu Jehova a tu tara mulyo unene. Age yige Muntu gomunene po mouzuni, ntani yige “ntundiliro zomwenyo.”—Epis. 36:9.

² Mokunkondopeka ‘omu natu fira kukara’ kosipara saJehova, mupositoli Peturusa kwa tu korangeda tu ‘pongoke oku tatu tjira Karunga.’ (Resa 2 Peturusa 3:11.) Mokugwana ehafero lyaKarunga, twa hepa ‘kupongoka’ kutanta asi kukuhuka pamukaro nopamagazaro nopampepo. Ntani hena, twa hepa ‘kutjira Karunga’ nokumulimburukwa. Mokutuhafera Karunga, kapi tupu mwa kwatera nkareso zetu nye hena nomutjima gwetu. Mokumona asi Jehova “kukonakona mutjima,” age ga yi diva nsene asi ose twa pongoka ntani gelike atu karere.—1 Hist. 29:17.

3. Mapuro musinke twa hepa kulipura kuhamena elikwatakano lyetu naJehova?

³ Satana Muzonaguli kapi ana hara Karunga a tu hafere. Age kukondja mokutuninkisa tu zumbanese elikwatakano lyetu naJehova. Satana nkenye apa kuruganesa yimpempa mokuhetekera ko kutupukisa yipo tu hageke kukarera Karunga. (Joh. 8:44; 2 Kol. 11:13-15) Yipo nye, twa hepa kulipura asi: ‘Ngapi omu Satana a pukisa vantu? Yisinke eyi nani rugana ni popere elikwatakano lyange naJehova?’

4. Pokuteza po elikwatakano lyetu naKarunga, yisinke Satana a pukisa, ntani morwasinke?

⁴ Murongwa Jakopo kwa tjenge asi: “Nkenye ogu kumuzeda edowo lyendi lyedona, eli ali mu koko tali  mu kumbagere. Edowo lyedona ntene lina kuru, tali tulisa muntu nzo, ano nzo nazo ntene zina kuru, tazi retere muntu nomfa.” (Jak. 1:14, 15) Pokuteza po elikwatakano lyetu naKarunga, Satana kuhetekera ko kupukisa mutjima gwetu, oku aku tundilire madowo.

5, 6. (a) Ngapi omu Satana a hetekere ko kutupukisa? (b) Mapukiso musinke gatatu a ruganesa Satana mokutunga madowo gomadona monomutjima detu, ntani ngapi omu a ga ruganesa?

⁵ Ngapi omu Satana a hetekere ko kupukisa mutjima gwetu? Bibeli kutanta asi: “Uzuni mudima kwa kara mepangero lyoMuzonaguli.” (1 Joh. 5:19) Yirwiso yaSatana kuna kwatere mo ‘yininke eyi ya kara mouzuni.’ (Resa 1 Johanesa 2:15, 16.) Nomvhura nadinye edi mayovi, Muzonaguli kwa wapaika uzuni ou monkedi omu na pukisa vantu. Morwa ose kwa kara mouzuni ou, twa hepa kulikunga komapukiso gendi.—Joh. 17:15.

⁶ Satana kuhetekera ko kutunga madowo gomadona monomutjima detu. Age kuruganesa ‘yininke eyi ya kara mouzuni’ eyi ga tumbura mupositoli Johanesa: (1) “edowo lyorutu,” (2) “nedowo lyomeho,” ntani (3) “nomalitumbadekero gemona.” Satana kwa ruganesere mapukiso aga gatatu mokuheteka Jesus momburundu. Morwa Satana kwa ga ruganesa nomvhura dononzi, age ga ya kara noudivi wago, ntani ga diva nkenye epukiso eli na ruganesa kwankenye muntu. Komeho tu ka lironge omu natu lipopera nyamwetu, tu konakoneni omu Muzonaguli ya mu tompokere mokupukisa Eva ntani nomu ya dilire kumutompoka mokupukisa MunwaKarunga.

7. Ngapi Satana ga ruganesere “edowo lyorutu” mokuzeda Eva?

⁷ Vantu navenye va hepa nondya yipo va paruke. Musiti kwa wapaika evhu yipo li gave nondya dokugwanena po. Satana kuvhura a hetekere ko kuruganesa edowo lyonondya a tu pukise tu rugane eyi nayi guvisa Karunga. Tu tareni omu ga li ruganesere kwaEva. (Resa Genesis 3:1-6.) Satana kwa tanterere Eva asi kapi nga fa nsene a lya kosiyimwa ‘sokositji sokugava ediwo lyeyi yoyiwa neyi yoyidona,’ nye nga fana Karunga. (Gen. 2:9) Muzonaguli kwa tente asi Eva kapi ga hepa kulimburukwa Karunga yipo a paruke. Eyi kwa kere yimpempa. Apa Muzonaguli ga tulire egano eli momagano gaEva, age ga kere nomatokoro gavali: Age ngano ga hepere kunyokera po egano olyo, ndi ngano ga twikilire kugazadara ko nokupulisira edowo lyendi kosiyimwa oso li kure. Nampili ngomu ya kere asi yiyimwa yinzi yokuvhura kulya, nye Eva ga twikilire kugazara kuhamena  sitji sopokatji kosikunino, ano moruhura ga ‘gusire ko siyimwa simwe makura ta li.’ Satana kwa tungire edowo mwaEva lyokudowokera sininke esi ga mu silikire Musiti gwendi.

8. Ngapi Satana ga ruganesere “edowo lyorutu” mokuzeda Jesus, ntani morwasinke ya dilire kumutompoka?

⁸ Satana kwa ruganesere epukiso lyokulifana kwaJesus. Apa Jesus ga kere momburundu nokudira kulya mazuva 40, Satana kwa hetekerere ko kuzeda Jesus pokuruganesa edowo lyonondya. Satana kwa tente asi: “Nsene asi o MunwaKarunga, ninka mamanya aga ga lisitunuke nomboroto no!” (Ruk. 4:1-3) Jesus ga kere nomatokoro gavali: Age ngano ga horowere mokudira kuruganesa nonkondo dendi kedowo lyonondya ndi ngano ga horowere mokudiruganesa. Jesus ga yi divire asi kapi ta vhuru kuruganesa nonkondo dendi mokulihafesa tupu mwene. Nampili ngomu ga kere nonzara, elikwatakano lyendi naKarunga kwa kere nomulyo unene kupitakana nondya. Jesus kwa limbwilire asi: “Kwa tjanga va tjanga asi, ‘Muntu kapi a paruka komboroto zelike, nye kuparuka kwankenye nkango ezi azi tundu mokana kaKarunga.’”—Ruk. 4:4.

9. Yisinke ‘edowo lyomeho,’ ntani ngapi Satana ga ruganesere epukiso eli kwaEva?

⁹ Epukiso limwe lyaSatana eli ga tumbura Johanesa kuna kara ‘edowo lyomeho.’ Muntu kuvhura kudowokera sininke pokusitarurura. Satana kwa ruganesere epukiso eli mokuzeda Eva pokutanta asi: “Ngomu gwana nondunge.” Ngomu ga si tarwilire unene yimo hena ga kere nedowo. Makura Eva “ta tara oso sitji omu sa fuura nomu ya wapa yimwa yaso mokutara.”

10. Ngapi Satana ga ruganesere ‘edowo lyomeho’ mokuzeda Jesus, ntani ngapi ga limbwilire Jesus?

¹⁰ Ngapi Satana ga ruganesere ‘edowo lyomeho’ mokuzeda Jesus? Satana ‘ta likida Jesus mauntungi nagenye gouzuni. Makura ta mu tantere asi: “Tani ku pe nonkondo nadinye edi nomauwa nagenye aga.”’ (Ruk. 4:5, 6) Eyi ga mwene Jesus kapisi mauntungi nagenye gepevhu, nye emoneko lyomauwa gago. Satana walye ga gazarere asi Jesus nayi mu pukisa eyi ga mwene. Age kwa tanterere Jesus asi: “Nsene asi o tongamena nge, ngano nayinye eyi tayi kara yoge.” (Ruk. 4:7) Jesus kapi ga here kukara omu Satana ga mu harere a kare. Jesus ga limbwilire usimbu asi: “Kwa tjanga asi, ‘O tongamene Hompa Karunga goge gelike oku to mu kerere, makura!’”—Ruk. 4:8.

11. Ngapi omu Satana ga pukisire Eva?

¹¹ Johanesa kwa tumbura hena ‘malitumbadekero  gemona.’ Apa Adamu naEva va kere velike tupu pevhu, awo ngano kapi va vhulire kukara “nomalitumbadekero gemona” komeho zovantu wopeke. Nye nampili ngoso va likidire sikara selinenepeko. Satana kwa here Eva a pure asi koyili yininke yoyiwa eyi ga mu horokera Karunga. Muzonaguli kwa tanterere Eva asi nsene nga lya ‘kositji esi asi gava ediwo lyeyi yoyiwa neyi yoyidona,’ nga ‘fana Karunga mokudiva yoyiwa neyi yoyidona.’ (Gen. 2:17; 3:5) Satana kwa here Eva a gazare asi kapi ga hepa Jehova meparu lyendi. Elinenepeko yilyo lya mu ninkisire a pure yimpempa yaSatana. Yipo ga lire kositji esi va mu silikire nokugazara asi kapi nga fa. Ee, epuko musi ga rugene!

12. Nkedi musinke zimwe Satana ga hetekere ko kuzeda Jesus, ntani ngapi omu Jesus ga limbwilire?

¹² Mokulisiga naEva, Jesus kwa tura po sihonesa sosiwa selinunupiko. Satana kwa hetekere ko kuzeda Jesus a rugane yininke eyi nayi tetukisa wopeke nokuheteka Karunga. Nye Jesus kwa nyokere kurugana eyi ngano ya likidire sikara selinenepeko. Jesus kwa yi likidire melimbururo lyendi asi: “Kwa tjanga hena asi, ‘Walye o heteke Hompa Karunga goge.’”—Resa Rukasa 4:9-12.

13, 14. Ngapi Satana ana kuhetekera ko kutupukisa naina?

¹³ Naina, Satana kuna kuruganesa mapukiso gokulifana naga ga ruganesere kwaEva naJesus. Age kuruganesa “edowo lyorutu” mokuzeda vantu va hondere ndi va kare makurulya nomakurunwa. Kuruganesa ‘edowo lyomeho’ mokuzeda vantu va tarere mafano goruhonda, unene po koInterneta. Ntani kuruganesa hena edowo ‘lyomalitumbadekero gemona’ a zede vantu va kare nelinenepeko nokuhara nonkondo ndi efumano ntani noungawo.

¹⁴ Satana kuruganesa ‘yininke eyi ya kara mouzuni’ ngwendi moomu mukwati nomfi a ruganesa ndjo. Ndjo kukoka mfi, nye monda zazo kuna kara mo erowo. Mokulifana, Satana kuruganesa yininke eyi nayi moneka ngwendi yiwaawa eyi nayi tu ninkisa tu rugane yokulilimba noveta zaKarunga. Age ana hara tu gazare asi kupakera mbili yihepwa  yetu nokukara neparu lyewa mulyo unene kupitakana kurugana mpango zaKarunga. Mapukiso gangoso nose kuvhura ga tu pukise ndi?

15. Ngapi natu honena Jesus mokunyokera po mazedo gaSatana?

¹⁵ Satana ya mu tompokere kupukisa Eva, nye kapi ya mu tompokere kwaJesus. Nkenye apa ga hetekerere ko kumuzeda, Jesus kwa limbwilire kutundilira moMatjangwa asi: “Yeeyi kwa tjanga asi,” ndi “Kwa tjanga hena asi.” Nsene ose valirongi wovawa woBibeli, ngatu diva nawa Matjangwa nokudiworoka novelise edi nadi tu vatera nsene kuna kutuzeda. (Epis. 1:1, 2) Kudiworoka yihonena yovakareli vaKarunga wovalimburukwi ngayi tu vatera tu va honene. (Rom. 15:4) Kukara netjiroKarunga, nokuhara eyi ga hara nokunyenga eyi ga nyenga, ngaku tu popera.—Epis. 97:10.

16, 17. Ngapi omu ‘nondunge’ detu nadi tu kundama?

¹⁶ Mupositoli Paurusa kutukorangeda tu ruganese ‘nondunge’ detu tu kare vantu ava ava gazara monkedi omu a gazara Karunga, kapisi moomu ava gazara vantu womouzuni. (Heb. 5:14) Paurusa kuna kutudiworokesa asi twa hepa kupangera magazaro getu. Age kwa tente asi: “Ose kuhanagura po yipanga yonondunge nankenye ndunge za litumba, asi zi kondjese ediwo lyaKarunga. Ose kuvhulilira po nkenye egazaro lyosintu, asi li limburukwe kwaKristusa.” (2 Kol. 10:5) Magazaro getu kutukundama unene, yipo nye twa hepera nkenye apa kutwikira ‘kugazara’ eyi ya wapera epando.—Fil. 4:8.

¹⁷ Nsene tuna hara kupongoka, twa hepa kunyokera po magazaro nomadowo gomadona. Twa hepa kuhara Jehova ‘nomutjima gomuwa.’ (1 Tim. 1:5) Nye mutjima kwa vera, ntani kuvhura tu dire kuyidimburura omu ‘yininke eyi ya kara mouzuni’ yina kutukundama. (Jer. 17:9) Yipo nye twa hepera ‘kulikonakona nsene asi mepuro tuna kara nokuliheteka nyamwetu.’ Pokulironga Bibeli, twa hepa kulipura asi: ‘Magazaro nomadowo gange kuhafesa Karunga ndi?—2 Kol. 13:5.

18, 19. Morwasinke natu tokomenena kukara muntu ogu ana tu harere Jehova?

¹⁸ Sininke simwe esi nasi tu vatera tu nyokere po ‘yininke yomouzuni’ kuna kara pokudiworoka nonkango daJohanesa edi: “Uzuni ngau zonauka po kumwe nomadowo gawo nagenye, nye ogu a sikisa mo mpango zaKarunga, nga kara dogoro narunye.” (1 Joh. 2:17) Uzuni waSatana kumoneka gwendi ngau karerera. Nye ezuva limwe ngau haga po. Pokudiworoka asi yininke nayinye yomouzuni ou ntaantani tupu yi ka hage po, ayo kutuvatera tu nyokere po mapukiso gaSatana.

¹⁹ Mupositoli Peturusa kutukorangeda tu kare vantu ava a hafere Karunga ngomu tuna ‘kundindira ewizo lyEzuva lyaKarunga, omu ngali ya zonaukira eguru komundiro, noyitatekatungiso ngayi pye yi hemuke.’ (2 Pet. 3:12) Ntaantani tupu, ezuva olyo li wize, ntani Jehova nga zonagura po uzuni naunye waSatana. Nye posiruwo esi, Satana simpe kuna kutwikira kuruganesa ‘yininke eyi ya kara mouzuni’ a tu zede, ngwendi moomu ga yi rugene kwaEva naJesus. Twa ha kara ngwendi Eva ogu ga here tupu kuhafesa madowo gendi. Kurugana ngoso, kulikida asi Satana karunga gwetu. Twa hepa kukara ngwendi Jesus nokunyokera po mazedo, yi kare asi ngapi omu na yi fuwisa Satana. Natuvenye tu tokomeneni kukara muntu ogu ana tu harere Jehova.