1, 2. Morwasinke natu dilira kupa usima Jehova komaudigu govantu? Gava sihonena.

TU TANTE asi ove kwa kara mononkwara doruhafo nomvhura dononzi. Nye ezuva limwe no wiza membo, to ya gwana yininke yemembo nayinye yina lirunga-runga. Yipundi yina tekauka, marupasa nononkinda yina tavauka. Embo lyoge lyewa lina kara ngwendi erunda. Yilye ogu no vhura kupa usima? No uyunga asi: “Morwasinke mukadange ana ruganene yininke yangesi?” Hawe, nye no pura asi: “Yilye ogu ana yi rugana eyi?” Morwa ono yi diva asi mukadoge gomuwa geharo kapi ta vhuru kuzonagura embo lyeni.

² Naina, evhu vana li zonagura. Evhu nomema nompepo yina nyata. Vantu kuna kuhondera ntani vana kara nonyanya. Nye twa lironga moBibeli asi Jehova kapisi yige a retesa po maudigu ogo. Age kwa sitire evhu li kare embo lyetu lyewa lyoparadisa. (Gen. 2:8, 15) Jehova, age Karunga geharo. (1 Joh. 4:8) Matjangwa kututantera asi Satana Muzonaguli yige “mupangeli gouzuni,” ntani yige a retesa po maudigu gomanzi.—Joh. 14:30; 2 Kol. 4:4.

3. Ngapi omu natu vhura kutameka kukara nomagazaro gepuko komaudigu getu?

³ Nye kapi tatu vhuru kupa usima Satana komaudigu getu nagenye. Morwasinke? Morwa maudigu getu gamwe kuwiza po morwa mapuko ganyamwetu. (Resa Deuteronomium 32:4-6.) Kuvhura tu yi pure asi yimo ya kara ngoso, nye morwa kudira kusikilira mo kwetu, kuvhura tu tameke kukara nomagazaro gepuko, ano eyi siponga. (Yis. 14:12) Mevango lyokulipa nyamwetu usima ndi Satana komaudigu getu, kuvhura tu tameke ‘kupa usima’ Jehova.—Yis. 19:3.

4, 5. Ngapi omu Mukriste na vhura ‘kupa usima’ Jehova?

⁴ Ayo sili ya wapa ‘kupa usima’ Jehova ndi? Kurugana ngoso, kapi ayi reta uwa. (Jes. 41:11) Kapi  tatu vhuru kurwanesa Karunga. Yosili, kuvhura tu dire kuyiuyunga asi tuna handukire Jehova. Nye Yisewe 19:3 kuuyunga kuhamena vantu wovagova asi “kulizonagura po vene moyirugana yavene youpote, makura tava pe HOMPA usima.” Eyi kuvhura kulilikida moyirugana yendi. Pasihonena, kuvhura a dire kulitura mo mosirugana sokuzuvhisa ndi a dire kuwiza komapongo.

⁵ Yisinke nayi tu tumangeda ‘tu pe usima’ Jehova? Ngapi omu natu nyokera po siraha esi? Twa hepa kudiva malimbururo komapuro ogo yipo tu popere elikwatakano lyetu naJehova.

6, 7. Morwasinke Vaisraeli womosiruwo saMosesa va tamekere kusivanena Jehova?

⁶ Yisinke nayi ninkisa mukareli gokulimburukwa gwaJehova a tameke kusivanena Karunga momutjima gwendi? Tu konakoneni yininke yitano noyihonena yomoBibeli yava va pere Karunga usima.—1 Kol. 10:11, 12.

⁷ Mauyungo gomadona gava wopeke kutukundama. (Resa Deuteronomium 1:26-28.) Gazara eyi ga ruganenene Jehova Vaisraeli. Age kwa reterere Vaegipite mahepeko murongo ntani ga dividire Farawo novakwayita vendi mEfuta lyEgeha. Vaisraeli kwa va zowere moupika. (Ex. 12:29-32, 51; 14:29-31; Epis. 136:15) Vantu vaKarunga kwa kere pepi nokuhwilira moSirongo sEtumbwidiro. Makura tava tameke kusivanena Jehova. Yisinke ya va ninkisire va zumbanese epuro? Nondadi murongo kwa geve nombudi donondona, ano eyi kwa dompesere Vaisraeli nokuvatjilisa. (Num. 14:1-4) Yitundwamo, Jehova kapi ga pulisilire navenye vepupi lyawo va hwilire “mosirongo sosiwa.” (Deut. 1:34, 35) Mauyungo gomadona gava wopeke kuvhura kusesupika epuro lyetu nokutuninkisa tu sivane omu Jehova ana kugendesa vantu vendi.

8. Yisinke ya ninkisire vantu vaKarunga womomazuva gaJesaya va tameke kupa usima Jehova?

⁸ Maudigu noyimpagwa kuvhura kutudompesa mutjima. (Resa Jesaya 8:21, 22.) Momazuva gaJesaya, Vajuda kwa hepere unene. Awo kwa va kundurukidire nonkore dawo. Awo kwa kere monzara. Nye unene po awo kwa kere monzara zopampepo. (Amosa 8:11) Mevango lyokumuhundira evatero, awo kwa geve usima kwaJehova nokwahompa gwawo komaudigu gawo. Mokulifana, nsene tu dompa mutjima morwa maudigu ndi yimpagwa, kuvhura tu tameke kupa usima Jehova nokulizuvha asi kapi ana kutuvatera.

9. Morwasinke Vaisraeli womomazuva gaHesekiyeli va gazarere asi eyi a rugana Jehova kapi ya vyuka?

⁹ Ose kapi atu diva mauzera nagenye. Morwa kudira kudiva mauzera nagenye, Vaisraeli womomazuva gaHesekiyeli kwa gazarere asi eyi a rugana Jehova “kapi ya vyuka.” (Hes. 18:29) Awo kwa kere ngwendi asi va kara nononkondo dokupangura Karunga ntani asi nonzira dawo da vyuka kupita dendi nampili ngomu va dilire kukwata egano eyi ya horokererere ngoso. Ngapi omu natu vhura kurugana epuko lyokulifana? MoBibeli kwa kara mo yihorokwa eyi nampo natu dira kukwata egano ndi eyi yininke yongandi yina kuhorokera meparu lyetu, makura kuvhura tu tameke kugazara asi nonzira daJehova “kapi da vyuka.”—Joba 35:2.

10. Ngapi omu muntu na kwama sihonena saAdamu sosidona?

¹⁰ Ose kupa wopeke usima komapuko ganyamwetu. Muntu gokuhova,  Adamu kwa zonene nokupa Karunga usima. (Gen. 3:12) Adamu ga yi divire asi age ga tezere po veta zaKarunga ntani asi Karunga nga mu tengeka kounzoni wendi. Nye ga pere Jehova usima, ngwendi asi ga lipukire mokumupa mukadi. Kutunda pena, wopeke nawo kwa kwama sihonena saAdamu sokupa Karunga usima komapuko gavene. Twa hepa kulipura asi: ‘Ame kudompa mutjima nokuhanduka kuhamena mapuko gange nokutameka kugazara asi nompango daJehova nondigu ndi?’

11. Yisinke natu lirongera ko kwaJona?

¹¹ Ose kuvhura kutameka kuligazara unene nyamwetu. Muporofete Jona kwa handukire apa Jehova ga fililire nkenda Vaninivhe. (Jona 4:1-3) Morwasinke? Age kwa tjilire asi nampo nava gazara asi age muporofete goyimpempa morwa mbudi zokuzonagura sitata ezi ga divisire kapi za sikire mo. Ayo kumoneka asi Jona kwa ligazarere mwene unene kupitakana vantu ava va litezwilire. Kuvhura nose tu lizuvhe ngwendi Jona ndi? Nsene tu ligazara tupu nyamwetu, kuvhura tu divare eyi va hepa vantu. Pasihonena, kuvhura yi kare asi ose kwa zuvhisa nomvhura dononzi kuhamena ezuva lyaJehova nye simpe kapi lya wiza, nsene wopeke va tu zora, kuvhura nye tu handukire Jehova ndi?—2 Pet. 3:3, 4, 9.

12, 13. Yisinke natu rugana nsene kapi tuna kukwatesa ko eyi a rugana Jehova ndi eyi a pulisire yi horoke?

¹² Yisinke natu rugana nsene kapi tuna kukwatesa ko eyi a rugana Jehova ndi eyi a pulisire yi horoke? Diworoka asi ayo epuko kugazara ngoso. Yisewe 19:3 kutudiworokesa asi morwa mapuko ganyamwetu, kuvhura tu pe Jehova usima komaudigu aga tuna retesa po nyamwetu. Tu konakoneni yininke yitano eyi nayi tu vatera tu dire kupa Jehova usima.

¹³ Wa ha ncenuna elikwatakano lyoge naJehova. Nsene tu kara nelikwatakano lyenene naJehova, ose kapi ngatu  mu pa usima. (Resa Yisewe 3:5, 6.) Twa hepa kuhuguvara mwaJehova. Twa ha gazara asi twa diva yoyinzi kumupita age ndi tu ligazare tupu nyamwetu. (Yis. 3:7; Rom. 12:3) Eyi ngayi tu vatera tu dire kumupa usima apa ngayi horoka yininke yoyidona.

14, 15. Yisinke nayi tu vatera ga dire kutukundama mauyungo gomadona gava wopeke?

¹⁴ Wa ha pulisira mauyungo gomadona ga ku kundame. Vaisraeli womomazuva gaMosesa va kere nonokonda dononzi deyi va heperere kuhuguvara mwaJehova asi nga va vatera va hwilire moSirongo sEtumbwidiro. (Epis. 78:43-53) Nye apa nondadi murongo da geve nombudi donondona kuhamena sirongo, Bibeli kutanta asi Vaisraeli ‘kwa divarere nonkondo’ daJehova. (Epis. 78:42) Nsene tu teda ko kwanayinye yoyiwa eyi ga tu ruganena Jehova, elikwatakano lyetu nendi ngali nkondopara. Makura ose kapi ngatu pulisira mauyungo gomadona gava wopeke ga tu guse ko kwaJehova.—Epis. 77:11, 12.

¹⁵ Ntani hena, nsene tu kara nomagazaro gepuko kuhamena vanavazinyetu, ngayi kundama elikwatakano lyetu naJehova. (1 Joh. 4:20) Pasihonena, apa Arona va mu horowere a kare mupristeli gomunene, Vaisraeli kwa sivanene, ano eyi kwa kundamene Jehova. (Num. 17:10) Mokulifana, nsene tu sivanena ava ana kuruganesa Jehova va pitisire sirugana sendi apa pevhu, ose ngoso kuna kupa Jehova usima.—Heb. 13:7, 17.

16, 17. Yisinke twa hepa kudiworoka nsene kuna kuligwanekera nomaudigu?

¹⁶ Diworoka asi Jehova kapisi yige a retesa po maudigu getu. Momazuva gaJesaya, Vaisraeli kwa hagekere kukarera Jehova, nye simpe ga here kuvavatera. (Jes. 1:16-19) Ga kare asi maudigu musinke tuna kuligwanekera nago, ose kugwana ehengagwido pokudiva asi Jehova kutupakera mbili ntani ana hara kutuvatera. (1 Pet. 5:7) Age kwa tu tumbwidira asi nga tu pa nonkondo yipo tu lididimikire.—1 Kol. 10:13.

¹⁷ Joba kwa hepere kouhahungami nampili ngomu ga kere mulimburukwi kwaJehova, nose twa hepa kulidiworokesa nyamwetu asi Jehova kapisi yige a retesa po ruhepo. Bibeli kutanta asi age kwa nyenga uhahungami nokuhara uhungami. (Epis. 33:5) Nose twa hepa kukara ngwendi Elihu kaume kaJoba, ogu ga tente asi: “Karunga Munankondo kapi a rugana yoyidona; age hena kapi a pengesa uhungami komuntu gongandi.” (Joba 34:12) Jehova kutupa “nkenye uhwi wouwa nosigava esi sa sikilira mo,” kapi a retesa po maudigu getu.—Jak. 1:13, 17.

18, 19. Morwasinke natu dilira kukara nomasinganyeko kuhamena Jehova? Faturura.

¹⁸ Wa ha kara nomasinganyeko kuhamena Jehova. Karunga kwa sikilira mo, ntani magazaro gendi ga pitakana getu. (Jes. 55:8, 9) Elinunupiko kuvhura kutuvatera tu yi tambure asi kapi tatu vhuru kukwata egano nkenye eyi. (Rom. 9:20) Ose kapi atu diva nkenye apa mauzera nagenye kuhamena ukaro wongandi. Yosili, wa limonena usili wononkango edi asi: “Ogu a howo kuuyunga mompanguro kumoneka nkenye apa asi monzira ana kara, dogoro nange ana kumupuragera gokumuvyuka ntani.”—Yis. 18:17.

¹⁹ Pasihonena, nampo kaume ketu ta rugana yininke eyi natu dira kukwata egano ndi tu lizuvhe asi kapi ana yi rugana nawa. Kuvhura tu genderere kumupa usima ndi? Hawe. Nye ngatu gazara asi kapi tuna diva mauzera nagenye kweyi yina horoka. Nsene asi twa kara  neharo lyokutekura vakaume vetu wokudira kusikilira mo monkedi zangoso, Guhyetu gemeguru ngatu mu huguvara nye unene. Nonzira dendi nomagazaro gendi, kwa likara ure naga getu.

20, 21. Morwasinke natu tambwira yitundwamo yoyirugana yetu?

²⁰ Tambura yitundwamo yoyirugana yoge. Twa hepa kuyitambura asi maudigu gamwe nyamwetu atu ga retesa po. (Gar. 6:7) Twa ha pa usima Jehova. Morwasinke? Pasihonena, yisinke nayi horoka nsene muntu a singa unene ponzira zokupenga? Kuvhura a kandome. Ngoso musingi kuvhura a pe usima ogu ga pangera etuwa ndi? Hawe! Mokulifana, Jehova kwa tu pa umanguruki wokutura po matokoro. Ntani hena age ga tu pa mavyukiso omu natu tura po matokoro gomawa. Yipo nye, nsene tuna tura mapuko, twa ha pa usima Jehova.

²¹ Nye kapisi maudigu getu nagenye kuwiza po morwa mapuko ndi yirugana yanyamwetu. Yininke yimwe kuhoroka morwa “ehudi kuhorokera nkenye ogu.” (Muud. 9:11) Ntani hena, twa hepa kudiworoka asi Satana Muzonaguli yige muretesipo goudona mouzuni ou. (1 Joh. 5:19; Ehor. 12:9) Satana yige natu pa usima kapisi Jehova.—1 Pet. 5:8.

22, 23. Yisinke twa hepa kudiworoka nsene tuna dompo mutjima morwa maudigu?

²² Nsene kuna kuligwanekera nomaudigu gomanene, diworoka sihonena saJosuwa naKarebu. Nondadi nonkwawo murongo kwa geve mbudi zondona kuhamena Sirongo sEtumbwidiro, nye awo kwa geve mbudi zongwa. (Num. 14:6-9) Awo kwa likidire epuro mwaJehova. Nye nampili ngoso, nawo kwa renda-rendere noVaisraeli vakwawo nomvhura 40 momburundu. Ngoso Josuwa naKarebu va sivanene nokuhanduka ndi? Hawe. Awo kwa huguvarere mwaJehova, ano ga va tungikire. Nampili ngomu sinzi soVaisraeli va fililire momburundu, Jehova ga pulisilire Josuwa naKarebu va ka hwilire moSirongo sEtumbwidiro. (Num. 14:30) Mokulifana, Jehova nga tu tungika nsene tu dira ‘kuroroka kurugana’ mpango zendi.—Gar. 6:9; Heb. 6:10.

²³ Nsene tu dompa mutjima morwa maudigu ndi kudira kusikilira mo kwava wopeke ndi kwanyamwetu, yisinke twa hepa kurugana? Diworoka asi Jehova Karunga gomuwa. Gazara yininke yoyiwa eyi ga tumbwidira kukakupa. Lipura omu eparu lyoge lina kara ngano kapi wa kara nelikwatakano naJehova. Kara pepi nendi, ntani wa ha mu pa usima momutjima goge!